Read Mundani Matìù 10 Bible Online

Matìù 10 - Mundani bible

Matìù 10

¹Yesò li ntɔ bɔkatè bi bu ntsɔ̀b babe la àdzìꞋ yeamɔꞋ ŋà àwɔb àtɔŋ ndɨ bɔ̀ɔ nɨ efəâ fote kàbɔ̀ŋ ane bòt e mě bə èghɔ̧ nè èlɔꞋ ègème la.

²Tèlente bɔntu̧ bu ntsɔ̀b babe la wu: Simùn wu èlen tò ko li ngu Pità la, bɔ̂ wanyɨ vi Andùlù, Jimsì waã Zebèdiì bɔ̂ wanyɨ vi Jɔ̌n,

³Filìb bɔ̂ Bàtòlomiò, Tɔmasì bɔ̂ Màtìù nɨa mèkab taksì, Jimsì waã Alfeɔ̀ bɔ̂ Tàdià,

⁴Simùn wu tà lè taꞋa wua nùà mènəè àlaꞋ la, nè Judàs Iskaliòt wu tà li ndɔ̀Ꞌ fɨ̧ɨ̧na a Yesò la.

⁵Yesò li ntsà bɔntu̧ bi bàa ntsɔ̀b babe la àbȩ shu abua yɔb nê, “Bɨ̀ ka ngà àdziꞋa ko a èbem àlaꞋ a bòt kà wu Bèjuê. Bɨ̀ ka ngà ka wuê a èbem àpfəa ko ane èpfəè bòt Sàmalìà.

⁶Ka bɨ ghà wuê abua bòt Izəèlȩê bu bɔ̀ wu mbɨ̀Ꞌɨ̀ njɨ̀te te nyɔ la.

⁷Bɨa me ghȩ̀ȩ̀ne, bɨ me làꞋa èngǎ̧ Mbɔ̧ɔ̧mà shua nê, ‘Kèfɔ̧̀ Mbɔ̧ɔ̧mà kɨꞋɨ tê ntsìꞋi a ngèt yɨ̧.’

⁸Bɨ̀ bə bòt èghɔ̧, njù̧ù̧me bòt bɔ pfəꞋte la, ngɨ̀ bòt èghɔ̧atsɔꞋɔ è pem, mè fəè fote kàbɔ̀ŋ ane bòt. Bɨ li mbɔ̀ ka yu̧, è wu ale, bɨ̀ mè ŋa abua bòt kà bɔ yu̧ mɨ̧̂.

⁹Bɨa me ghǎ, bɨ̀ ka mbèà goêl, kò silbà, ka wuê kapà a èbem ntaꞋ tɨ̧.

¹⁰Bɨa me ghǎ, bɨ̀ ka nɨ̀ ambè, bɨ̀ ka nɨ̀ ka wuê ndǐte màꞋa tebe, kò gùbtsə, kò ambàŋ leꞋ. Nkàà nê wɔ̀fàꞋ è bɔ ndɨ tàa bɔ àghɨa tàa nkɨ̀ŋkà la.

¹¹“Bɨ ghɨ̀ bɨ̀ gha a èpfəè ènɨ̧, kò èbe techɨɨle leꞋ, bɨ kɨ ngule wòt tà kɔ̀ŋkè esèe àwɨ̧ la, ntsèke bɨ tò ba, te àlia bɨa me ghà la a kùꞋ.

¹²Bɨ̀ nyi a lob, bɨ tsaꞋte bòt lob mbɔŋ nê àlàŋkè à wu ne nɨ̧̀.

¹³È wu nê, bɔ sèè àwɨ̧, bɨ tsiꞋ àlàŋkè àyɨ̧ a wu nè nɔ̀b. Ka bɔ̀ bakà sèe awɨ̧, bɨ̀ nɨ àlàŋkè àyɨ̧.

¹⁴Ka wòt bakà sèe awɨ̧, mbakà yute ànəa bɨ shua la, bɨ yòò àbeb lob mbɔŋ, kò àpfəèa mbɔŋ leꞋ ane èka bɨ̧, ndèbè kwen tɨ̧ ndzəè me ghǎ.

¹⁵Ane nkûŋ, e shua wɨ̧ nê, naa li ngu ane àlia saꞋa Mbɔ̧ɔ̧mà, tà kù tèsȩte bòt Sodòm nè Gòmolà tè ntsè ndɨ tàa ku e te bòt èpfəè mbɔŋ la.

¹⁶“Bɨ̀ zə ntsɔ̧̀, e ngua ntsàà àwɨ̧ àbȩ mbɨ̀Ꞌɨ̀ njɨ̀tsə ayɔɔ ngwitenyà̧. È wu ale, bɨ me yìa mbɨ̀Ꞌɨ̀ ètsɔꞋ, mè me yu ane mènəè mɨ̧ mbɨ̀Ꞌɨ̀ bèbaba.

¹⁷Bɨ̀ me ko awɨ̧ ane bɔbȩ na bɔ̀ɔ baãaã awɨ̧ enɨ ghǎ a lobte èsaꞋa, e mě shu̧ awɨ̧ a èbem lobte Mbɔ̧ɔ̧mà tɔb la.

¹⁸Bɔɔ li esəèŋnè àwɨ̧ enɨ ghǎ a mbì bègɔvanɔ̀, nè bèfɔ̧̀ ambo yaã, bɨa shu ànəa bɨ ye mè ko ane yaã la a mbì lɔb bɔ̂ bòt kà wu Bèjuê.

¹⁹ÀfɨꞋa bɔ nɨ awɨ̧ nɨŋ ngà la, bɨ̀ ka me mɨ̀ɨ̀te ndɨ bɨ̀a shu la nyaŋ kò ànəa bɨ̀a shu la leꞋ, nkàà nê èngǎ̧ bɨ̀a làꞋà la aa kɔꞋɔ àtsəa ayɨ̧ àfɨꞋa mbɔŋ.

²⁰È ntsě bɨ̀ambɔŋ nga me làꞋà la, wu Fo Tǎt wɨ̧ Mbɔ̧ɔ̧mà naa tsě ane yɨ̧ e làꞋà la.

²¹“Bòt aa li ŋa bɔnyɨ bɔb ne bɔ buŋa, bètǎt bɔ̧ e mè ngɨ̀ wuê a èlɨ mbɔŋ ane bɔ̧ bɔb, bɔ̧ e mè ngu li elɔ̀ke mbù̧tsə ane bètǎt bɔb e ghɨ̌ bɔ bùŋè àwɔb.

²²Bòt bàgème aa li me pààbè àwɨ̧ ambo yaã, ka wòt tà baãaã èntɨ̧ɨ̧ vi tè ngà ndìà la, wu li e peme.

²³Bɔ me kɨ àtsəa yɨ̧ enɨ a èbem àpfəè àko, bɨ lùùlà ngà a yea tsa. KwàꞋ ane nkûŋ, tsiꞋ è shu awɨ̧ nê betsiꞋa bɨ̀ ka paa àfàꞋ àyɨ̧ a èbem èpfəè bòt Izəèlȩê ègème kà Waã Wòt kɨ̀Ꞌɨ̂.

²⁴“Wakatè bakà tse a nyɨꞋtà vi, wafàꞋ kà meè tsea tǎt àfàꞋ vi.

²⁵Ale, wakatè è tsìꞋa mbɨ̀Ꞌɨ̀ nyɨꞋta vi, tà wùꞋtè àvi. WafàꞋ è tsìꞋa mbɨ̀Ꞌɨ̀ tǎt àfàꞋ vi, tà wùꞋtè àvi mɨ̧̂. Bɔ wu tsì èlen tǎt lob ane Belzebùl, ko bɔɔ tɔ bòt lob tò ane tèlente kàbɔ̀ŋ te tsě.

²⁶“Ale, bɨ̀ ka bɔ̀a wòt, nkàà nê àghɨ ko bɔ kabà kà a wu li edzəâ àbȩ la a ntsě, àyea a lò̧ò̧te kà wu li pùùla ayaã la à ka wuê.

²⁷Ànəa mâ shu awɨ̧ a èbem ndzěm la, bɨ̀ shu a kètsìà nèngû̧, àyea bɨ zə a ntsèm la, bɨ tùꞋ a tèbuꞋte èlu̧.

²⁸Bɨ̀ ka mbɔ̀ɔ bòt bu bɔ̀ɔ bùŋe wòt, ka bɔ̀ ka wu ko ebùŋe àlɨ̀ŋkè tò la; bɨ̀ bɔɔ wuê wòt tàa ko tsàà mbɨ̧̀ ènyit nè àlɨ̀ŋkè a èbem èwet Satàn la.

²⁹Tè bɔɔ̀ kà fɨ̧ɨ̧ne bèdzɔɔlekɔt babe ane kapà wemɔ̀Ꞌ? Ka la, Mbɔ̧ɔ̧mà bakà bɨ̧̀ɨ̧̀ne, wekǒ ane yɔb ka kwen a si.

³⁰Ka wuê nyèm tu àtsəa yɨ̧ la, Mbɔ̧ɔ̧mà ko kèmpà̧ tùà tègème.

³¹È wu ale, bɨ̀ ka mbɔ̀â, ngu nê bɨ tsè àlaã bèdzɔɔlekɔt a mbì Mbɔ̧ɔ̧mà.

³²“Ale, wòt ègème tà tɨ̧ɨ̧ a kètsìà bòt mbɨ̧̀ɨ̧̀ne nê ye wu wòt am la, maa li mbɨ̧̀ɨ̧̀ne nê tà wu wòt am mɨ̧̂ a mbì Tǎt am wu a ègwet la.

³³Ka wòt tà tɨ̧ɨ̧ a kètsìà bòt ntu̧ am la, maa li tu̧ atò mɨ̧̂ a mbì Tǎt am wu a ègwet la.

³⁴“Bɨ̀ ka mɨ̀ɨ̀tè nê, e nkɨꞋɨ e ghɨ̌ àlàŋkè a ngɔ̀ŋ ŋaà. ChaꞋ, è nka kɨꞋa e ghɨ̌ àlàŋkè, e nkɨꞋa ezǐ àyɔ̀ŋ.

³⁵E kɨꞋa ezi àyɔ̀ŋ a kètsìà, ‘Waã bɔ̂ tǎt vi, nè waàvi bɔ̂ nyɨ̌ vi, e mě zǐ àyɔ̀ŋ a kètsìà àvi bɔ̂ nyɨ̌ lob vi.

³⁶Ngule bɔmbù̧ wòt nàà wu bòt lob tò.’

³⁷“Wòt tà kɔ̀ŋkè tǎt vi nè nyɨ̌ vi tè ntsè am la, bakà kuꞋu ewe tàa wu wɔ̧ la. Wòt tà kɔ̀ŋkè wambâ̧ vi kò waàvi vi leꞋ tè ntsè am la ka meè kùꞋu ewe tàa wu wɔ̧ la.

³⁸Wòt bakà bɨ̧̀ɨ̧̀ne eŋeꞋe mbasa vi ekùŋè am, tà kà kuꞋu ewe tàa wu wɔ̧ la.

³⁹Wòt me kɨ ebɔ wuê mèmpème mi ko taa bi mèmpème mbɔŋ, ka wòt tà ŋà àtsəa zi ambo yaã la naa bɔ mèmpème.

⁴⁰“Wòt sèè àwɨ̧, tà ko nê ye sèe am, èwe tà sèè am la, ko nê ye sèè atò wu tà tsàà am la.

⁴¹Wòt tà sèe ndàꞋàtɔŋ Mbɔ̧ɔ̧mà, nkàà nê ŋut wu ndàꞋàtɔŋ Mbɔ̧ɔ̧mà la, naa li bɔ àbȩ̀ bɔɔ ŋa abua ndàꞋàtɔŋ Mbɔ̧ɔ̧mà la. Wòt tà sèe wòt ntsɔ̧̀ ambo àfaꞋa ntsɔ̧̀ ŋut la, naa li bɔ àghɨa Mbɔ̧ɔ̧mà naa ŋǎ abua bòt ntsɔ̧̀ la.

⁴²Wòt tà ŋa ka wuê ndɔŋ mèleb kèfi abua wekǒ ane ebe tèchɨɨle baa, ndɨ̀ wu ŋut wu wakatè am la, kwàꞋ ane nkûŋ, tsiꞋ è shu awɨ̧ nè, betsiꞋa àbȩ̀ atò à ka nyɔ̂.”