Read Mundani Matìù 13 Bible Online

Matìù 13 - Mundani bible

Matìù 13

¹Ane àlia mbɔŋ, Yesò dzə a lob ngà ntsèke a ngèt *èdzî [6].

²TaꞋà ènɔ̧̂ bòt e kɨꞋɨ̀ mbù̧ù̧tè a ngèt tò, kwat tè tà tsiꞋi sà àwɔb aguŋ ngà tseke a èbem ànkànuꞋ.

³Tà shu awɔb mènəè nyaŋ ane mèngà̧teme, nê, “Wòt kǒ li ndɔ̀Ꞌ ngà esà èsaãaãme.

⁴Mbɨ̀Ꞌɨ̀ tàa sà la, è weko e kwentè a èbuꞋ èlu̧, banɨ̧̀ e kɨꞋɨ̀ ngwȩ̀ȩ̀te,

⁵è weko e kwentè a ègwet èwu, kà ye ètsaꞋ nyaŋ. AdzìꞋ bê me wù̧ù̧ne e tuutè ndɨ̀ wu ètsaꞋ wu abot àa ndzàŋà la.

⁶Nyèm chu mbê ntò̧ èsaãaãme wu e tuute la, e yu̧ ndɨ̀ wu tèghaŋ tɔb tè bakà nyi a si ntsɔ̧̀ la.

⁷È weko e kwente a èbèm àdzɔ̧, a kɔꞋ nɨŋ.

⁸Ka è weko nè èsaãaãme e kwente adù̧ ètsaꞋ ntsɔ̧̀, nkɔꞋ nkɔ̀ɔ̀le, è weko tètaã ènkɨ̀, è weko èghem yentùa, è weko èghem yetat.

⁹Yesò me lìà nê, wòt bɔ̌ ètû̧, tà yute èngà̧ waa.”

¹⁰ÀfɨꞋa mbɔŋ, bɔkatè Yesò e kɨꞋɨ mbììte atò nê, “À ghɨ̀ na ka me làꞋa abua bòt bu ane mèngà̧teme à?”

¹¹Yesò bɨ̀ɨ̀lè nê “Bɔ ŋa wɨ̧ èyì a mànkoa ènəê ndô̧ kèfɔ̧̀ Mbɔ̧ɔ̧mà, ka bɔ̀ ka ŋa abua bòt ngɔ̀ŋ yaa,

¹²nkàà nê bɔɔ kwèꞋne àghɨ wòt bɔ la, aa yaãaã te me bəèꞋte, ka wòt kà bɔ àghɨ bɔɔ paa ka wuê adzìꞋ wu tà bɔ la enɨ.

¹³Lə màa ndàꞋà abua yɔb ane mèngà̧teme la wu nê, ‘Bɔ̀ɔ ndɨ̀ŋkà bɔ̀ ka ye, njùtâ bɔ̀ ka zə, bɔ̀ ka meè ngua nkòa mènəè.’

¹⁴Ale, ànəa ndàꞋàtɔŋ Mbɔ̧ɔ̧mà Àsayà li shu la a wu nkûŋ ane yɔb: ‘Bɨa lâ zə ka à ka nyi àtsəa yɨ̧, mè ndâ ndɨ̀ŋkè ka bɨ̀ ka ye.

¹⁵Nkàà nê bòt baa e bakà ghaꞋa mèntɨ̧ɨ̧ mɔb, mbɔ̂ nchùkte ètû̧ bɔb mè nkàte àghɨ ayɔb. Mbɨ̀Ꞌɨ̀ ka bɔ gha ghɨ̌ nɨ̀ àghɨ ayɔb ndze, mè nɨ ètû̧ bɔb ndzə, ndɔ̀Ꞌ nko ane mèntɨ̧ɨ̧ mɔb, ngèble awɔb nkɨ̀Ꞌɨ̂ maa bə awɔb.’

¹⁶È me wu awɨ̧ ko bɨ wu ane ntsɔ̧̀ nkàà nê, àghɨ ayɨ̧ aa ndzea, ètû̧ bɨ̧ e zəa.

¹⁷Ane nkûŋ, tsiꞋ è shu awɨ̧ nê, bèndàꞋàtɔŋ Mbɔ̧ɔ̧mà nyaŋ, nè bòt mènəè ntsɔ̧̀ e li ngua ntsènà è nkɨ eye àghɨa bɨ̀a ndzèa la ka bɔ̀ ka ye, mè nkɨ ezə àghɨa bɨ̀a ndzəèa la, ka bɔ̀ ka zə.

¹⁸“Bɨ̀ zə lə èngà̧teme wu ane wòt wu tà li nga esà èsaãaãme vi la.

¹⁹Wòt nàa ngɨ̀ tà zə èngǎ̧ kèfɔ̧̀ Mbɔ̧ɔ̧mà, è bakà nyi èntɨ̧ɨ̧ tò ntsɔ̧̀, Satàn wòt kàbɔ̀ŋ kɨ̀Ꞌɨ̂ ntsì wùà. Eyaa wu mbɨ̀Ꞌɨ̀ èsaãaãme wu e kwente èbuꞋ èlu̧ la.

²⁰Èsaãaãme wu e kwente a ègwet èwu la e wua nyɨ̀Ꞌta bòt bu bɔ zə èngà̧ wu, mbê mbɨ̧̀ɨ̧̀ne nè mèngùꞋte,

²¹ka bɔ̀ ka zi èntɨ̧ɨ̧ wɔb adù̧, è ka tseke ane àfɨ̀Ꞌ à seè la. ÀfɨꞋa ngoꞋ kɨꞋɨ̀, kò bòt e me kɨ àtsəa yɔb enɨ ambo èngǎ̧ mbɔŋ la leꞋ, bɔ bê ntû̧ wùà.

²²Èsaãaãme wu e kwente a èbèm àdzɔ̧ la, e wu mbɨ̀Ꞌɨ̀ bòt bu bɔ zə èngà̧ waa ka ndɨ̀ wu bɔ̀ɔ ndèbà ènyit yɔb ane èghɨ sitsǎꞋ nè èkɔŋ èghɨ èkab nyaŋ la, èngǎ̧ mbɔŋ è ka tsi mbɔ̌ àdziꞋ a èntɨ̧ɨ̧ wɔb, e tsiꞋi tsè àku.

²³È me wu èsaãaãme wu e kwente a si ntsɔ̧̀ la, e wu mbɨ̀Ꞌɨ̀ bòt bu bɔ zə èngà̧ wu e nyi àtsəa yɔb bɔ me ghɨ̀ àghɨa e shua la tè ntsìꞋi mbɨ̀Ꞌɨ̀ èsaãaãme wu e kɔɔle tètaã ènkɨ̀, è weko èghem yentùa nè weko èghem yetat la.

²⁴“Yesò ghɨ̀ ale, mè nê betsiꞋa bɔ fɨ̀Ꞌne a Kèfɔ̧̀ Mbɔ̧ɔ̧mà ane èngà̧teme wàà. Wòt kǒ lè lɔꞋ sà èsaãaãme ntsɔ̧̀ a mbȩ zi,

²⁵ka àfɨꞋa bɔ̀ɔ ndìa la, wɔ̀mbù̧ tò kɨ̀Ꞌɨ̂ sà èsaãaãme afəèꞋ kàbɔ̀ŋ a kètsìà èsaãaãme tò wu.

²⁶Èsaãaãme wu e tseke tè ntsə mbùꞋ me kweele, èwe kàbɔ̀ŋ wu e kɔꞋɔ azi mɨ̧̂.

²⁷“BɔfàꞋ ŋut wu e kɨꞋɨ̀ mbììte atò nê, ‘Tê, ka èsaãaãme wu à li sa a mbȩ yê la li ngu è we ntsɔ̧̀ à? Ale, afəèꞋ kàbɔ̀ŋ dzəa nè ŋǎ a kètsìà à?’

²⁸“Tà bɨ̀ɨ̀lè nê, ‘wɔ̀mbù̧ ko ka tà ghɨ̀ ale la’. BɔfàꞋ tò bu e mè mbììte atò nê, ‘Tè bà gha ntsɔ̀Ꞌɔ afəèꞋ kàbɔ̀ŋ wu ntsì?’

²⁹“Tà nê, ‘ChaꞋ, bɨ̀ tsiꞋ è wu ale, mbɨ̀Ꞌɨ̀ ka bɨ gha mbèla ntsɔꞋta fà̧ ntsɔ̀Ꞌta nè èwe ntsɔ̧̀ wu.

³⁰TsiꞋ è me fɔte ntsəèa tè àfɨꞋa màfuꞋa à kuꞋa. ÀfɨꞋa mbɔŋ ko maa shu abua bòt bu nga efuꞋu la nê, Bɨa ghǎ bɨ̀ tsɔꞋ, bɨ bɨ̀ fete afəèꞋ kàbɔ̀ŋ wu, nkùùle ane tebuꞋtsə ntò̧, mbɔ̂ fetê èbe ntsɔ̧̀ bu nɔ̀ŋe ngǒ yaã.’ ”

³¹Yesò li mè ntème èngà̧ ko abua yɔb nê, “Kèfɔ̧̀ Mbɔ̧ɔ̧mà wu mbɨ̀Ꞌɨ̀ èsaãaãme èwuu maŋkaŋa kǒ wòt kǒ sǎ a mbȩ zi la.

³²Èsaãaãme mbɔŋ e koo te ntsè èsaãaãme ègème, ka àa ngɨ̀ è tsə, e faŋ ntsè èghɨjɨ ègème bɔ liꞋi a mbȩ la, tè ntsiꞋi mbɨ̀Ꞌɨ̀ àyɨt, tè banɨ̧̀ bu bèa ndèa la e me kɨꞋa nkùùla tèjî tɔb adù̧ mèntaãaã tò.”

³³Yesò mè shu awɔb èngà̧teme ko nê, “Kèfɔ̧̀ Mbɔ̧ɔ̧mà wu mbɨ̀Ꞌɨ̀ yis wu naa ngɨ̀à ka bled è kɔ̀Ꞌa la. Àvi nàa ngɨ̀ tà nɨ̀ adzìꞋ ntɔ̀bte ane bapfəèꞋ fàlawà batat è tsekè tè ngȩȩne a èbem fàlawà wu ègème ngɨ̀ è kɔꞋ.”

³⁴Yesò li ngua nɨa mèngà̧teme ka shua wɔb mènəè maa ègème. Tà le kaꞋa wua mbê ndàꞋà ànəê abua yɔb kà zi ane èngà̧teme.

³⁵Tà li ngɨ̀ anè, mbɨ̀Ꞌɨ̀ e ghɨ̌ àghɨa ndàꞋàtɔŋ Mbɔ̧ɔ̧mà li shu la aa wu nkûŋ nê, “Maa me laꞋa abua yɔb ane mèngà̧teme. Maa shu awɔb èghɨ kà bɔ li te mè ko, ebuꞋu tee àfɨꞋa Mbɔ̧ɔ̧mà li ngɨ̀ ngɔ̀ŋ la.”

³⁶AfɨꞋa mbɔŋ Yesò sà ènɔ̧̂ bòt bu nga a lob, me ghǎ bɔkatè tò e kuŋe atò, shu abua tò nê, “Shu awa lə èngà̧teme wu ane afəèꞋ kàbɔ̀ŋ wu a mbȩ la.”

³⁷Yesò bɨ̀ɨ̀lè nê, “Wòt wu tà sà èsaãaãme ntsɔ̧̀ la, wu mbɨ̀Ꞌɨ̀ Waã Wòt,

³⁸mbȩ yu wu mbɨ̀Ꞌɨ̀ ngɔ̀ŋ yaa, èsaãaãme ntsɔ̧̀ wu wu bòt bu bɔ̀ɔ ndzəa mènəè kèfɔ̧̀ Mbɔ̧ɔ̧mà la. AfəèꞋ kàbɔ̀ŋ wu, wu mbɨ̀Ꞌɨ̀ bòt Satàn wòt kàbɔ̀ŋ.

³⁹Tà wu wòt wu tà sà afəèꞋ kàbɔ̀ŋ wu la, nkàà nè tà wu wɔ̀mbù̧ tǎt mbȩ yu. Àlia màfuꞋa yu wu àlia ngɔ̀ŋ nàa li lìà la, bòt màfuꞋa bu wu bɔntu̧ Mbɔ̧ɔ̧mà.

⁴⁰“Èlɨ bɔ̀ɔ fèta afəèꞋ kàbɔ̀ŋ wu ntò̧à a èbem èwet la, wu èlɨ bɔ̀ɔ li ghɨ̀ ane bòt kàbɔ̀ŋ àfɨꞋa ngɔ̀ŋ nàa li lìà la.

⁴¹Waã Wòt naa li tsà bɔntu̧ bi, bea kɨꞋɨ etsǐ èghɨ ègème àa ngɨ̀a kàbɔ̀ŋ la, nè bòt bàgème bɔ̀ɔ ngɨa kàbɔ̀ŋ la a èbem kèfɔ̧̀ vi.

⁴²E tsǐ emàꞋà wɔb a èbem èwet kekweelè àdziꞋa bòt àa me dɨ̀a nkwèla àsɔŋ yɔb ane ntso la.

⁴³Ka bòt bɔ tɨ̧ɨ̧ ndɨŋndɨ̀ŋ e mbì Mbɔ̧ɔ̧mà la e wu li me kàꞋà mbɨꞋɨ̀ àtaãnyèm àdziꞋa ngɔ̀ŋ fi tǎt wɔb Mbɔ̧ɔ̧mà. Wòt bɔ ètû̧, tà yute èngà̧ waa.

⁴⁴“Kèfɔ̧̀ Mbɔ̧ɔ̧mà wu mbɨ̀Ꞌɨ̀ àghɨa èkab àko bɔ̀ lè lɔ̂Ꞌ ndò̧ a èbemebàꞋ wòt kǒ ghà ntùꞋ mbɔ̂ mè nkàbtê la. Tà ghɨ̀ ale, a taꞋa bɔ̌ tò tè tà ghà fɨ̧̀ɨ̧̀tè èghɨ bi ègème nɨŋ njù̧ èbaꞋa mbɔŋ.

⁴⁵“Kèfɔ̧̀ Mbɔ̧ɔ̧mà mè ngu mbɨ̀Ꞌɨ̀ ànəa wòt èwen kǒ tà lè wua ngà̧aã nkɨà èwuu àtia ntsɔ̧̀ àko a taꞋa wua nyia èkab la.

⁴⁶È tseke tè ngu ane àli ako tà ye e le ntsɔ̧̀ ko e ghe àa mbɔ̀ la, ngà fɨ̧̀ɨ̧̀te èghɨ bi ègème nɨŋ njù̧ èti lu.

⁴⁷“Kèfɔ̧̀ Mbɔ̧ɔ̧mà mè ngu mbɨ̀Ꞌɨ̀ ànəa bòt bɔ maꞋa tasat a èbem *èdzî nɨa mbà̧ tèwuute basə tègème la.

⁴⁸ÀfɨꞋa è lu̧ la bɔ səèŋ nɨŋ nkɔ̀Ꞌɔ aguŋ ntsèke a si ndàà èbe ntsɔ̧̀ ndzi a èbem èghɨ mbɔ̂ ngwàꞋ èbe kàbɔ̀ŋ.

⁴⁹Aa li wu èlɨ waa àlia ngɔ̀ŋ nàa li lìà la. Bɔntu̧ Mbɔ̧ɔ̧mà aa li nkɨ̀Ꞌɨ̂ ndàà bòt kàbɔ̀ŋ ntsì ane bòt Mbɔ̧ɔ̧mà,

⁵⁰màꞋà wɔb a èbem èwet kekweelè àdziꞋa bɔ̀ɔ li me dɨ̀a nkwèla àsɔŋ yɔb ane ntso la.”

⁵¹Yesò ghɨ̀ ale, mbììte bɔkatè bi nê, “Bɨ zə ènəê baa ègème kè naa?” Bɔ bɨ̧ɨ̧nè nê “Oò Tè.”

⁵²Tà mè shu abua yɔb nê è wu ale, nyɨꞋtà mbɨ̧tsə tà tsiꞋi wakatè a kèfɔ̧̀ Mbɔ̧ɔ̧mà la, wu mbɨ̀Ꞌɨ̀ tǎt lob wu tàa ngɨ̀ tà tsɔꞋɔ àtsəa lob zi ntsì èghɨ ntsɔ̧̀ fi bi nè èbe nyaꞋ àfɨꞋa tà kɔ̀ŋkè la.

⁵³Mbɨ̀Ꞌɨ̀ Yesò è paa a màndaꞋa mèngà̧teme màa la, tà lɔ̀Ꞌ abot

⁵⁴ngwènè àlaꞋ azi. Tà ghà ale, me nyɨꞋte awɔb a èbem lob Mbɔ̧ɔ̧mà yɔb. A taꞋa tsě bòt bu njùtâ la, tè bɔ tsiꞋa mbììta nê “Mbê waa li nchɨɨme nɨ̀ èwuu èyì waà, nè èwuu mènəè kà ye fɨ̀Ꞌ màà nèŋàà?

⁵⁵Tè eyaa ntsě waã kapentà wuù? Ka Màlià wu nyɨ̌ tò à? Ka Jimsì bɔ̂ Jòsêb nè Simùn bɔ̂ Judàs wu bɔnyɨ tò à?

⁵⁶Ka bɔnyɨ tò bɔɔ̀zi aà ntsèka ba tò ba à? Tà nɨ̀ èwuu èyì wàa nè mètàŋ maà nèŋàà?”

⁵⁷Ale, bɔ ntû̧ èngǎ̧ tò. Yesò shu abua yɔb nê, “Bɔɔ nkùkta ndàꞋàtɔŋ adzìꞋ àgème, tè tsìꞋi wuê bòt àlaꞋ atò nè bòt àndǎ̧ tò.”

⁵⁸Tà li tà kà ghɨ ènəê kà ye fɨ̀Ꞌ abot nyaŋ ndɨ̀ wu bɔ li bɔ̀ ka zi èntɨ̧ɨ̧ wɔb ane tò la.