Read Mundani Matìù 16 Bible Online

Matìù 16 - Mundani bible

Matìù 16

¹Bèfalèsiì nè Bèsadùsiì e li nkɨ̀Ꞌɨ̂ abua Yesò, me kɨ enyɔ̀Ꞌte atò shu abua tò nê tà nyɨꞋte awɔb àlȩê nê Mbɔ̧ɔ̧mà ka tà tsàà vi la.

²Yesò bɨ̀ɨ̀lè nê, “Nàa ngɨ̀ è wua nyèmtèsi ègwelebuule è me fəəte, bɨ nê àbȩ aa sàꞋa me bɔ̌.

³È wu a ntɔtetsɔ̌Ꞌ ègwet è me fene, mbɨ̀ŋ me kwèle, bɨ nê mbɨ̀ŋ naa lu. Bɨà nkòa ndȩ̀ ègwelebuule shu ndɨ àbȩ àa wu la, ka bɨ̀ ka wu eko shu ndɨ àbȩ àa la.

⁴Bòt laane wu bòt kàbɔ̀ŋ bɔ̀ɔ ka bɔa Mbɔ̧ɔ̧mà la. Bɨà nkɨà nê è nyɨꞋte awɨ̧ àlȩê ka bɨ̀ ka wu eye. NdàꞋ èwuu ànəa kà ye fɨ̀Ꞌ màa nyɨꞋte awɨ̧ la wu à yu Mbɔ̧ɔ̧mà li ngɨ̀ ane Jɔnà la.” Tà ghɨ̀ ale, sà àwɔb me ghǎ.

⁵Bɔkatè Yesò è ntu̧ èlemè wu bɔ̀ ghǎ aguŋ, bɔ ku̧u̧te na bɔ lèène nɨa bled la.

⁶Yesò shu abua yɔb nê, “Bɨ̀ me ko awɨ̧ mè mbààba awɨ̧ ane yis Bèfalèsiì bɔ̂ Bèsadùsiì.”

⁷Bɔ bùꞋ me làꞋa a kètsìà wɔb shua nê, “Tà làꞋ ànəa yis anè ndɨ̀ wu ba me kɨꞋɨ bà ka nɨa bled la.”

⁸Yesò è ko ànəa bɔ làꞋà la, tà bììte awɔb nê, “Bɨ̀a bòt kà zi èntɨ̧ɨ̧ wɨ̧ ane yaã ntsɔ̧̀, bɨ ghɨ̀ na ka me làꞋa kètsìà wɨ̧ shua nê bɨ bakà bɔ bled à?

⁹Ètsə bɨ̧ e bele kà zìꞋì ndzààtè? Bɨ lèènè tètaãaãte bled tu tetà̧â̧ e ndɨ nɨŋ njɨ̌ bòt bètɔsì batà̧â̧ la à? Bɨ li fete bankì basòꞋa?

¹⁰Kò bɨ lèènè tetaã tu tesà̧à̧mbe e ndɨ nɨŋ njɨ̌ bòt bètɔsì bakwì la mɨ̧̂ à? Bɨ li fete bankì basòꞋa?

¹¹A ghɨ̀ na ka à ka kɔꞋ àtsəa yɨ̧ nê mâ ghɨ̂ e nka wua ndàꞋà ànəa bled à? Bɨ̀ me ko awɨ̧ ane yis Bèfalèsiì bɔ̂ Bèsadùsiì.”

¹²Bɔ bê nko nê tà ghɨ̂ tà kà wua ndàꞋà ànəa bled, tà wua shua wuê nê, bɔ̀ me ko awɔb ane àghɨa Bèfalèsiì nè Bèsadùsiì àa nyɨ̀Ꞌta la.

¹³ÀfɨꞋa Yesò li nga a Sìsalìà Filìpȩ la, tà bììte bɔkatè bi nê “Bòt àa shua nê Waã Wòt wu wà à?”

¹⁴Bɔ bɨ̀ɨ̀lè nê “Bòt ko aà shua nê à wu Jɔ̌n ndzìà èdzî, èbeko e shua nê à wu Èlȩjà, èbeko e mè shua nê à wu Jèlèmìà, ka nè èbe bèa shua nê à wu ndàꞋàtɔŋ nyaꞋ Mbɔ̧ɔ̧mà kǒ la.”

¹⁵Tà bììte a wɔb nê “È me wu awɨ̧, bɨ shu nê è ngu wàà?”

¹⁶Simùn Pità bɨ̀ɨ̀lè nê “À wu Fɔ̧̀ wu Mbɔ̧ɔ̧mà yɔꞋ ntsà la, Waã Mbɔ̧ɔ̧mà yû̧.”

¹⁷Yesò bê nê “Ntsɔ̧̀ wu àwɔ̀ Simùn Ba-Jɔnà. Ngu nê ànəê yaa à ka dzəa abua wɔ̀bȩ̂, a dzəa abua Tǎt am wu a ègwet la.

¹⁸È wu ale, tsiꞋ è shu awê nê à wu Pità, maa ghɨ̌ a chɔsì am a ègwet èwu làa ane ndɨ ka è màà ngu wuê èvə è ka ko enɨ wùà la.

¹⁹Maa ŋa nkȩte kèfɔ̧̀ Mbɔ̧ɔ̧mà abua yê. À tsia ànəê a sitsǎꞋ, ko bɔɔ tsia ayùà a ègwet, ntsɔꞋɔ ànəê a sitsǎꞋ, ko bɔɔ tsɔ̀Ꞌɔ ayùà a ègwet mɨ̧̂.”

²⁰Yesò ghɨ̀ ale, mbɔ̂ səèŋkè ètû̧ bɔkatè bi nê bɔ̀ ka shu wòt nê ye wu Fɔ̧̀ wu Mbɔ̧ɔ̧mà yɔꞋ ntsà la.

²¹E buꞋu àfɨꞋa mbɔŋ e ghà nè mbì, Yesò bùꞋ me shu bɔkatè bi ndɨ yèa ghǎ a Jèlusalèm e tàꞋa ye ngoꞋ a tèkitebu bɔɔjuŋ nè bètǎt bèntsìà mèpɨ̧̀ Mbɔ̧ɔ̧mà ndɔ̀Ꞌ nè bènyɨꞋtà mbɨ̧te Musì la. Nè, bɔɔ̀ li ebùŋè àvi ka naa me wu ane èlibȩ betat [8] yea yu̧u̧me.

²²Pità nɨa tò bɔ səèꞋtè àwɔb, tà bùꞋ me fèèle atò shua nê “ChaꞋ a Tè, Mbɔ̧ɔ̧mà ka mbɨ̧̀ɨ̧̀ne nê èwuu ayaa nè ànəê à ghɨ ane yê.”

²³Ka Yesò ghèble avi shu abua Pità nê, “LɔꞋ a ngèt yaã à Satàn! Àà nkèla alu̧ am. Mènəè maà à mɨ̀ɨ̀tà la ka dzəa abua Mbɔ̧ɔ̧mà, è dzəè nè abua bɔbȩ.”

²⁴ÀfɨꞋa mbɔŋ Yesò shu abua bɔkatè bi nê “Wòt me kɨ eghȩ̀ȩ̀ne ateka taã, tà sà mènəè mi ègème ŋèꞋe mbasa vi nkùŋè am.

²⁵Wòt me baabe àtsəa zi ko taa pfə, ka wòt tà ŋà àtsəa zi ambo yaã la, naa peme.

²⁶Wòt wua ane njɨ̀a èghɨ sitsǎꞋ ègème, mbɔ̂ nyɔ̂ zìambɔŋ tà ko nê ye vi ghàà? Kò àghɨa ko aà və betsiꞋa wòt ŋa nɨŋ nchùꞋ àtsəa zi la à?

²⁷Waã Wòt naa li kɨꞋɨ bɔ̂ bɔntu̧ bi ane ènɨ̧ tǎt vi, etsɔꞋɔ wòt ègème ane àghɨa tà ghɨ̀ la.

²⁸Ane nkûŋ, tsiꞋ è shu awɨ̧ nê bòt ko aa adzìꞋ yaa betsiꞋa èvə è ka nɨ awɔb kà bɔ ye Waã Wòt nkɨ̀Ꞌa nè Kèfɔ̧̀ Mbɔ̧ɔ̧mà la.”