Read Mundani Matìù 17 Bible Online

Matìù 17 - Mundani bible

Matìù 17

¹Èlibȩ è tsè bentùa, Yesò nɨa Pità nè Jimsì bɔ̂ wanyɨ vi Jɔ̌n bɔ kɔꞋ nga a ègwet èbȩ èseè ko ntsèke bɔ̀ɔ ndziꞋne.

²Bɔ me ye, èsi Yesò e kubtè ntsìꞋa nkàꞋtà kàꞋte mbɨ̀Ꞌɨ̀ àtaãnyèm, ndìte tò te mè ntsìꞋa fəèəèta fəəte mbɨ̀Ꞌɨ̀ àtaã èŋu.

³KwàꞋ àfɨꞋa mbɔŋ bɔ me ye Musì bɔ̂ Èlȩjà, e puule a mbì lɔb, me làꞋà bɔ̂ Yesò ba.

⁴Pità shu abua Yesò nê “Lefɨ̀Ꞌ, a bɔ̂ŋ nê ba wu a si ŋàa. À bɨ̧̀ɨ̧̀na, ko maa vəèəè bayò batat adzìꞋ yaa, wemɔ̀Ꞌ abua yê, wemɔ̀Ꞌ abua Musì, nè wekǒ abua Èlȩjà.”

⁵Tà bela ndàꞋà ale, mbàꞋ kèfə kǒ kɨꞋɨ̀ nkàbte awɔb, bɔ me zə àtɔŋ a tse a èbem mbàꞋ yu nê, “Eyaa wu waã èkɔŋ am, èntɨ̧ɨ̧ am e taꞋa wua mbɔ̀ ane tò, bɨ yute èngǎ̧ tò.”

⁶ÀfɨꞋa bɔkatè Yesò e zə àtɔŋ yàa la, bɔ chuŋkè ètsə bɔb a si ntaꞋa bɔa.

⁷Yesò kɨ̀Ꞌɨ̂ mbà̧à̧te awɔb, shu abua yɔb nê “Bɨ̀ lɔꞋ a si, bɨ̀ ka mbɔ̀â!”

⁸Bɔ lɔ̀kè àwɔb ndȩ̀, bɔ̀ ka tsi ndzě wòt, bɔ tsiꞋi ye wua Yesò zìa ndziꞋne.

⁹Bɔ̀ lɔ̀Ꞌɔ a ègwet èbȩ lu bɔ̀ me chu, Yesò səèŋkè ètû̧ bɔb nê, “Ko mbɨ̀Ꞌɨ̀ wòt wɨ̧ shu wòt àghɨa bɨ ye la tè Waã Wòt ghɨ̀ mpfə mè njù̧ù̧me.”

¹⁰Bɔkatè atò e biite atò nê, “Ghǎ ghɨ̂ ka bènyɨꞋtà mbɨ̧te Musì e me shu nê Èlȩjà naa bɨ̌ kɨꞋɨ à?”

¹¹Yesò bɨ̀ɨ̀lè nè, “Wu nkûŋ nê Èlȩjà naa kɨꞋɨ a mbì mbɨ̀Ꞌɨ̀ e ghɨ̌ èghɨ ègème aa wu mbɨ̀Ꞌɨ̀ e ghɨ̂ ngu ewu la.

¹²Ka tsiꞋ è shu awɨ̧ nê, Èlȩjà kɨꞋɨ tê ndɔ̀Ꞌ, ka bòt e ka ko atò, ale bɔ ghɨ̧ɨ̧ne atò mbɨ̀Ꞌɨ̀ bɔ kɔ̀ŋkè la. Waã Wòt nàà ye ngoꞋ a tèkitebu tɔb wuê a èlɨ mbɔŋ mɨ̧̂.”

¹³ÀfɨꞋa mbɔŋ ka bɔkatè tò e ko nê, tà me làꞋà mènəè maà ale, ngua ndàꞋà ànəa Jɔ̌n ndzìà èdzî.

¹⁴Mbɨ̀Ꞌɨ̀ bɔ kua akwèn tè nkɨ̀Ꞌɨ̂ nkwene ane ènɔ̧̂ bòt bu la, wòt kǒ kɨꞋɨ ntèmè tènjûŋ ti a si a mbì tò

¹⁵nê “Tê, ku tèsȩte waã am! Àghɔ̧ mànkwena aà ndɔ̀Ꞌɔ ane tò. Aà ŋǎ a tò ngoꞋ kwàꞋ ànyaꞋne, màꞋà atò a èbem èwet nè mèleb a ngo̧ a ngò̧.

¹⁶Mâ yaã nɨa tò nga abua bɔkatè bê, ka bɔ̀ ka ko mbəa tò.”

¹⁷Yesò bɨ̀ɨ̀lè nê “Bɨ̀a wàà bɨ wu àndǎ̧ kà koa Mbɔ̧ɔ̧mà, mè ngu bòt kàbɔ̀ŋ! Màa tseke ba nɨ̧̀ ba te e ghǎ wu a ka àfɨ̀Ꞌ à? Màa kuule èntɨ̧ɨ̧ am ane yɨ̧ te e ghǎ wu a ka àfɨ̀Ꞌ à? Bɨ̀ nɨ waã mbɔŋ nkɨ̀Ꞌɨ̂ adzìꞋ yaa ŋǎ abua am!”

¹⁸Yesò ŋȩ̂ fo kàbɔ̀ŋ yu, è dzəè, tà bê ntɨ̧̌ kwàꞋ àfɨꞋa mbɔŋ mpem.

¹⁹Bɔkatè Yesò e kɨꞋɨ̀ mbììte atò a ntsèm nê, “Ghǎ a yaãaã ngɨ̀ ka bà ka ko fəè fo kàbɔ̀ŋ yu à?”

²⁰Yesò bɨ̀ɨ̀lè nê, “Wu ndɨ̀ wu bɨ̀ baka zi èntɨ̧ɨ̧ wɨ̧ ane Mbɔ̧ɔ̧mà ntsɔ̧̀ la.” Ane nkûŋ, tsiꞋ è shua wɨ̧ nê, bɨ ghɨ̀ ale, mbɔ ntɨ̀, ka è màa nkoa ngu wuê mbɨ̀Ꞌɨ̀ èsaãaãme maŋkaŋa, [9] ko betsiꞋa bɨ shu abua èbȩ làa nê, “LɔꞋɔ adzìꞋ yaa nga àzia, e ghà. Àghɨa ko à ka meè ngu tsè àwɨ̧.”

²¹[Ka è bakà wu nê, wòt naa me tseke kà jɨ àghɨ mè ntsàꞋta Mbɔ̧ɔ̧mà tà kà ko fəè èwuu yaa nè fo kàbɔ̀ŋ.]

²²ÀfɨꞋa bɔkatè Yesò e bù̧ù̧te a Galìlî la, tà shu abua yɔb nê “Bɔɔ baãaã Waã Wòt ezǐ a tèkitebu bɔbȩ

²³bɔɔ bùŋe atò, ka naa me wu ane èlibȩ betat, taa yu̧u̧me.” Tà làꞋ ale a taꞋa saa awɔb.

²⁴Bɔ kɨꞋɨ tê bɔ̀ nyi a Kàpenàwuêm bòt bu bɔ̀ɔ fèta èkab bɔ̀ɔ maꞋa a èbem lob Mbɔ̧ɔ̧mà la, e kɨꞋɨ̀ mbììte a Pità nê, “Tè nyɨꞋtà wɨ̧ nàà màꞋà èkab wu bɔ̀ɔ maꞋa a èbem lob Mbɔ̧ɔ̧mà la à?”

²⁵Pità bɨ̧̀ɨ̧̀ne nê, “Oò tàà màꞋà”, mbɔ̂ tà kɨꞋɨ tê tà nyi a lob, Yesò bɨ̀ mbììte atò nê, “Simùn, àa mɨ̀ɨ̀tà na ane ànəê ya à? Wà ba ka bɔ bɔ ndɨ bɔ̀ɔ me màꞋà èkab nè èghɨ ko tsa ŋǎ abua bèfɔ̧̀ sitsǎꞋ la à? Wu bòt àlaꞋ a mbɔŋ kò wuê bègɨ̧̀ à?”

²⁶Pità bɨ̀ɨ̀lè nê, “Wu Bègɨ̧̀”, Yesò mè nê, “E wu la, ale bòt àlaꞋ e bakà bɔ àbu adù̧ ànəa mbɔŋ.

²⁷Ka la, baa ka kɨ etsòkè mèntɨ̧ɨ̧ bòt bu bɔɔ fèta èkab wàà la. È wu ale, ghǎ *èdzî, màꞋà fȩ, asəâ mbì è kɔꞋɔ la, à ghaꞋa ètsəê tò, ko aa ye àkwȩkab a kùꞋu awa ba nè la, enɨ ghǎ eŋa abua yɔb.”