Read Mundani Matìù 18 Bible Online

Matìù 18 - Mundani bible

Matìù 18

¹ÀfɨꞋa mbɔŋ bɔkatè Yesò e kɨꞋɨ̀ mbììte atò nê, “Wòt tà tsě bòt bàgème a kèfɔ̧̀ Mbɔ̧ɔ̧mà la wu wàà?”

²Yesò tɔ watèchɨɨle kǒ ntsia a mbì lɔb,

³mbɔ̂ nê, “Ane nkûŋ, tsiꞋ è shua wɨ̧ nê bɨ bakà kùbte ane mènəè mɨ̧ te tsiꞋi mbɨ̀Ꞌɨ̀ bɔtechɨɨle, ko bɨ̀ ka lɔ̀Ꞌɔ̀ àlia e nyi a kèfɔ̧̀ Mbɔ̧ɔ̧mà à.

⁴Ale, wòt tà tsě bòt bàgème a kèfɔ̧̀ Mbɔ̧ɔ̧mà la wu wòt tà nɨa vi a si tè ntsìꞋi mbɨ̀Ꞌɨ̀ watèchɨɨle waa la.

⁵“Wòt sèè watèchɨɨle kǒ mbɨ̀Ꞌɨ̀ waa ane èlen laã, tà ko nê ye wua sèè am.

⁶Ka wòt tà ghɨ̂ watèchɨɨle kǒ ane baa waꞋa ntɨ̀ yu tà bɔ ane yaã la, a bɔ̂ŋ nê bɔ̀ sèlè taꞋà èti àmî atò maꞋa tò tea èbem *èdzî.

⁷“Aa bɨɨ àbâ bòt ngɔ̀ŋ yaa. Èghɨ e taꞋa wu àa ngɨ̀à bòt e tsìà mèntɨ̧ɨ̧ mɔb ane Mbɔ̧ɔ̧mà la. A bɔ ndɨ àa wu ale la, ka ngoꞋ wu ye wòt wu tàa ngɨ̀à bòt e tsìà mèntɨ̧ɨ̧ mɔb a èlɨ mbɔŋ la.

⁸Àbu ayê, kò àka yê leꞋ à ghɨ̀ à tsì èntɨ̧ɨ̧ wê ane Mbɔ̧ɔ̧mà, a lo ngwa. A bɔ̂ŋ nê bɔ àbu yeamɔꞋ kò àka yeamɔꞋ leꞋ, mbɔ̀ mèmpème kàlìà, tè ntsè ndɨ àa bɔ èbu bê nè èka bè ègème bɔɔ màꞋà wê a èbem èwet Satàn wu kà wu li lema la.

⁹Èghɨ lê e ghɨ̀ à tsì èntɨ̧ɨ̧ wê ane Mbɔ̧ɔ̧mà a tsɔꞋ ngwaꞋ. A bɔ̂ŋ nê bɔ èghɨ lemɔꞋ mbɔ̀ mèmpème kàlìà tè ntsè ndɨ àa bɔ àghɨ yebe bɔɔ màꞋà wê a èbem èwet Satàn la.

¹⁰“Bɨ̀ ko mbɨ̀Ꞌɨ̀ bɨ me waa waã kǒ ane bɔtechɨɨle bàa, tsiꞋ è shua wɨ̧ nê, bɔntu̧ Mbɔ̧ɔ̧mà bɔb aa ntsèka nta mènəè mɔb a mbì Tǎt am a ègwet àfɨ̀Ꞌ àgème.

¹¹[Waã Wòt li ngua nkɨ̀Ꞌa mbɨ̀Ꞌɨ̀ etsǐ bòt bɔ nyɔ la a èbem kàbɔ̀ŋ e ghɨ̌ bɔɔ peme.]

¹²“Bɨ̀a mɨ̀ɨ̀tà nàà? Tè wòt bɔa njɨ̀tsə ènkɨ̀, yemɔ̀Ꞌ nyɔ̂ ko tà ka saame tu èghem yebəèꞋa ntsɔ̀b tebəꞋa la a ègwet èghem e ghǎ me kɨ yu yemɔ̀Ꞌ e nyɔ la à?

¹³TsiꞋ è shu awɨ̧ ane nkûŋ nê, tà kɨ ale ndzea ko taa wùꞋtè àvi ane ànəa ye ngaa yemɔ̀Ꞌ è yaã nyɔ̂ la te tsě ane tu èghem yebəèꞋa ntsɔ̀b tebəꞋa te yaã tè ka nyɔ̂ la.

¹⁴Ale, wu wuê a èlɨ mbɔŋ Tǎt am wu a ègwet la nàa ka kɨ nê, waã kǒ ane ebe techɨɨle bàa nyɔ la.

¹⁵“Wanyɨ wè fà̧ ànəê abua yê à tɔ atò bɨ tò e gha a ntsèm, à shu atò ànəa tà fà̧ la, à shu ale, tà bɨ̧̀ɨ̧̀ne nê ye fà̧, à ko nê yê mê mbɔ atò mbɨ̀Ꞌɨ̀ wanyɨ wè.

¹⁶Mbə à shu ale, tà bakà bɨ̧̀ɨ̧̀ne nê ye fà̧, à mè nɨ wòt kǒ wemɔ̀Ꞌ kò babe leꞋ nkwèꞋne ane yê ka bɨ ghà mè ndaꞋa abua tò mbɨ̀Ꞌɨ̀ bòt bàa aa zə emě ko shu ànəa àgème bɔ zə la.

¹⁷Bɨ làꞋ ale tà bakà mè mbɨ̧̀ɨ̧̀ne, bɨ ghà shu ànəa àgème abua chɔsì, tà bakà mè njùte ànəa chɔsì è shu abua tò la, bɨ tsì àwɨ̧ ane tò mbɨ̀Ꞌɨ̀ bɨ̀a ntsìà ane wòt tàa nɨa èkab taksì nè wòt kà ko a Mbɔ̧ɔ̧mà la.

¹⁸“Ane nkûŋ, tsiꞋ è shua wɨ̧ nê bɨ tsia ànəê a sitsǎꞋ ko bɔɔ tsia yùà a ègwet, ntsɔ̀Ꞌɔ ànəê a sitsǎꞋ ko bɔɔ tsɔꞋɔ yùà a ègwet mɨ̧̂.

¹⁹TsiꞋ è mèe shua wɨ̧ nê, bòt babe e wu ane ètsəê wemɔꞋ ane ànəê a sitsǎꞋ ŋàa, mbììte Tǎt am wu a ègwet la ko taa ghɨ̌.

²⁰Bɨ̀ ko nê bòt babe, kò batat leꞋ e bu̧u̧te àdziꞋ ane èlen laã, ko maa wu a kètsìà wɔb.”

²¹ÀfɨꞋa mbɔŋ Pità kɨꞋɨ̀ mbììte a Yesò nê “Tê, wanɔ̧ me tseka fà̧ ànəê a mbì laã e me waꞋa a kàbɔ̀ŋ tò wuê waꞋa tè ngà ngu a ka fɨ̀Ꞌà? Tè nga ndzə ane ngò̧ tesà̧à̧mbe?”

²²Yesò bɨ̀ɨ̀lè nê “È ntsě wuê ndàꞋ ngò̧ tesà̧à̧mbe, wu ngò̧ èghem yesà̧à̧mbe èdziꞋ besà̧à̧mbe.

²³“È wu ale, betsiꞋa bɔ fɨ̀Ꞌnè a kèfɔ̧̀ Mbɔ̧ɔ̧mà ane ànəa fɔ̧̀ kǒ tà li ngua kɨ ekwàꞋtè èkatè ekabe bòt ètsə fàꞋ bi la.

²⁴ÀfɨꞋa tà buêꞋ me kwàꞋtè la, bɔ nɨ wekǒ èkab tò aa bua ŋut kwàꞋ ànyaꞋne la nɨŋ nkɨ̀Ꞌɨ̂ a mbì tò.

²⁵Mbɨ̀Ꞌɨ̀ tà kɨꞋɨ tà kà bɔ èkab wu evəâ la, fɔ̧̀ wu nê bɔ baãaã tò bɔ̂ vi tò nè bɔ̧ tò fɨ̧̀ɨ̧̀nè ane èbùꞋ, fɔ̀ɔ̀le nè èghɨ ègème tà bɔ la mbɨ̀Ꞌɨ̀ ètsə njû yu.

²⁶“Tà shu ale, wòt àtsəa fàꞋ wu teme tènjûŋ ti a si a mbì atò shù̧ù̧ta tò nê, ‘Tê, ŋa am àfɨ̀Ꞌ, maa kɨꞋɨ vəèəè èkab mbɔŋ ègème’.

²⁷Fɔ̧̀ wu zə ale, nkù tèsȩte wafàꞋ wu, sà njû yu abua tò, ngɨ̀ tà me ghǎ.

²⁸“Mbɨ̀Ꞌɨ̀ tàà ngà la, tà kwene ane wafàꞋ fɔ̧̀ ko àdziꞋ èkab tò nàa abua tò la, ndzì àbu azi a nkɨ̌ àmî tò nê ‘Bê ntsə njû yaã yu a èbem le la.’

²⁹“Shu̧ tò wafàꞋ wu teme tènjûŋ ti a si shù̧ù̧te atò nê, ‘Ŋa am àfɨ̀Ꞌ maa tsə njû yu.’

³⁰“Tà shu̧u̧te atò ale tà tu̧, nɨa tò nɨŋ nga maꞋa lob tèfȩ nê tà ghɨ̀ mbakà tsə njû yu tà kà dzəê.

³¹ÀfɨꞋa èbeko nè bɔfàꞋ fɔ̧̀ e ye àghɨa wòt àtsəa àfàꞋ wu ghɨ̀ ne wɔ̀fàꞋ ko wàa la, a taꞋa saa wɔb, bɔ ghà shua fɔ̧̀ wu ànəa a tsè la.

³²“Fɔ̧̀ wu zə ale, ntɔ atò shu abua tò nê ‘À wu kwàꞋ wɔ̀fàꞋ kàbɔ̀ŋ; mâ yaã nkù tèsȩ tê sà njû yaã yu a èbem lê la, ndɨ̀ wu à yaã shù̧ù̧te am la,

³³ale à ghɨ yu a ghɨ̀ ka à kà ku tèsȩte wanyɨ wè wafàꞋ mbɨ̀Ꞌɨ̀ mâ yaã nku tê la wu ghà à?’

³⁴Fɔ̧̀ wu ghɨ̀ ale, mbê nɨ ntsǒtsə ntsà atò nê bɔ ghǎ maꞋa tò a lob tèfȩ tè tà ghɨa tà tsə njû yu ka tà bɔ̂ ndzəè.

³⁵“Yesò ghɨ̀ ale, ndìà nê, eyaa wu èlɨ Tǎt am a ègwet nàa ghɨ̌ ane wòt ègème ane yɨ̧, na tà bakà waꞋa a kàbɔ̀ŋ wanyɨ vi nè èntɨ̧ɨ̧ vi ègème la.”