Read Mundani Matìù 20 Bible Online

Matìù 20 - Mundani bible

Matìù 20

¹Yesò ghɨ̀ ale, mè nê “Kèfɔ̧̀ Mbɔ̧ɔ̧mà wu mbɨ̀Ꞌɨ̀ ànəa wòt kǒ, tà li ndzəè nga àbȩ a ntɔtetsɔ̌Ꞌ ekɨ bòt bɔ̀ɔ faꞋa a mbȩ zi la.

²Tà ghǎ ale ndàŋkè bɔ̂ bɔfàꞋ bu nê yea ŋa wɔb àkwȩkab yeamɔꞋ ane àliabȩ mbɔ̂ ntsà àwɔb a mbȩ zi.

³“È lɔꞋɔ me wu ane nyèm tebəèꞋa a ntɔtetsɔ̌Ꞌ, tà mè ndzəè ngà àsà̧aã èwen ndzě bòt ko bɔ tɨ̧ɨ̧te ka wua ngɨ̀à àghɨ la,

⁴shu abua yɔb nê ‘Bɨ̀ ghǎ a mbȩ me faꞋa mɨ̧̂ ko maa ŋa wɨ̧ àghɨa a kuꞋu ane àfàꞋ àyɨ̧ la.’ Mbɨ̀Ꞌɨ̀ tà làꞋ ale la bɔ bê ndɔ̀Ꞌ me ghǎ.

⁵È tseke tè me wu ane nyèm èghem ntsɔ̀b tebe nè nyèm tetat nèngû̧, tà mè ndzəè ngà ngɨ̀ wuê a èlɨ mbɔŋ.

⁶È tseke tè mè me wu mbɔŋe ane nyèm tetà̧â̧ àfɨꞋa nyèmtèsi, tà mè ndzəè nga àsà̧aã èwen ndzě bòt ko bɔ̀ bele abot bɔ tɨ̧ɨ̧te la, mbììte awɔb nê ‘Bɨ̀ ghɨa gha àdziꞋ yaa mbɨ̀Ꞌɨ̀ ètsəꞋ e li ntsi la kà ye àghɨa bɨ wua ngɨ̀à la à?’

⁷“Bɔ bɨ̀ɨ̀lè nê, ‘Wu ndɨ wòt tà kɨa waa eŋa awa àfàꞋ la è ntsě la. Tà tsiꞋi shu abua yɔb nê: “ ‘Bɨ̀ ghà yɨ̧ a mbȩ me faꞋa mɨ̧̂.’

⁸“Nyèm tseke te fen, tǎt mbȩ yu tɔ àtsəa bɔfàꞋ yu shu abua tò nê tà tɔ bɔfàꞋ bu ŋà èkab àfàꞋ wɔb. Nê taa me ŋa, tà buꞋu ane bòt bɔ ghɨ̂ nkɨ̀Ꞌɨ̂ akwèn la ngà ndìà ane e bu be ghɨ̂ nkɨ̀Ꞌɨ̂ a mbì la.

⁹“Ale, tà ghɨ a èlɨ mbɔŋ ŋà àkwȩkab yeamɔꞋ, yeamɔꞋ abua bòt bu bɔ ghɨ̂ mbùꞋu àfàꞋ mbɔŋe ane nyèm tetà̧â̧ àfɨꞋa nyèmtèsi la.

¹⁰Bòt bu bɔ ghɨ̂ mbùꞋù àfàꞋ a mbì la e kɨꞋɨ me mɨ̀ɨ̀tè nê bɔɔ ŋa wɔb èkab nyaŋ, me ye bɔ ŋa wɔb wuê àkwȩkab yeamɔꞋ, yeamɔꞋ.

¹¹Bɔ nɨ ale, mbùꞋ me lèmte tǎt mbȩ wu

¹²shua nê ‘Bòt baa bɔ tsiꞋi nɨa wɔb akwèn la e faꞋa wuê ane kètem àfɨ̀Ꞌ. Bàa wu ba yaã ŋeꞋe àfaꞋ mbùŋè àwa a èten nyèm kèkweelè mbɨ̀Ꞌɨ̀ ètsəꞋ e li ntsi la e bɔ wuê àkwȩkab yeamɔꞋ, yeamɔꞋ mɨ̧̂.’

¹³“Tǎt mbȩ wu shu abua wòt kǒ wemɔ̀Ꞌ ane yɔb nê ‘Shu̧, ànəa kàbɔ̀ŋ ko mâ ghɨa ane yê la a tsě. Ka ba nè e yaã ndàŋkè nê maa lɔꞋɔ eŋa wê àkwȩkab ane àfaꞋ àliabȩ à?

¹⁴È wu ale, nɨ àghɨa è wuê ayê la nɨŋ me ghǎ. E ŋa wòt waa mâ tsiꞋi nɨa tò akwèn la àghɨa mâ ŋa abua yê la ane mènkɔ̀ŋke mɔ̧.

¹⁵Tè e mbakà bɔ mètàŋ e nɨ èkab am e ghɨ̀ àghɨa mâ kɔ̀ŋkè la à? Mâ ghaꞋa àbu am abua bòt baa ale, a ghɨ̀ na ka me saa àwê à?’ ”

¹⁶Yesò ghɨ̀ ale, ndìà èngà̧ waa nê “Wu wuê a èlɨ mbɔŋ bòt bɔ̀ɔ ndzea wɔb nê bɔ wu a mbì àfɨ̀Ꞌ yaa la àa li tsiꞋi akwèn, èbe bɔ̀ wu akwèn la e tsiꞋi a mbì la.”

¹⁷Mbɨ̀Ꞌɨ̀ Yesò nàa nkɔ̀Ꞌɔ ngà a Jèlusalèm la, tà tɔ bɔkatè bi bu ntsɔ̀b babe la, bɔ səèꞋtè àwɔb tà shu abua yɔb nê

¹⁸“Bɨ̀ zə, ba wua nkɔꞋɔ ngà a Jèlusalèm, àdziꞋa bɔ̀ɔ baãaã Waã Wòt, ezǐ atò a tèkitebu bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì, bɔɔ saꞋa tò e ghɨ̌ bɔɔ bùŋe atò la.

¹⁹E bɔ ghɨ̀ ale, e zǐ atò a tèkitebu bòt kà wu Bèjuê, bɔɔ wȩ̀ȩ̀te atò, eshu̧u̧ atò e lɔ̀Ꞌɔ wu̧u̧te atò a mbɨ̧̀ mbasa taa pfə, mbɔ̂ naa me wu ane èlibȩ betat taa yu̧u̧me.”

²⁰ÀfɨꞋa mbɔŋ nyɨ̌ bɔmbâ̧ Zebèdiì bu babe la kɨꞋɨ abua Yesò, ŋɔꞋne a si a mbì tò nê tà ghɨ̀ àghɨa ko abua zi.

²¹Yesò bììte nê “À kɨa nê è ngɨ̀ ghàà?” Tà bɨ̀ɨ̀lè nê “Bɨ̧ɨ̧ne nê yea ghɨ̌ bɔbɔ̧ baa babe la aa li tseke bɨ tò ba a èbem kèfɔ̧̀ wê wekǒ àbâ àbualu̧ a yê nè wekǒ àbâ àbuantoŋ ayê.”

²²Yesò bɨ̀ɨ̀lè nê “Bɔ̧ bè e bakà ko àghɨa bɔ biità la. Tè betsiꞋa bɨ nu ndɔŋ ngoꞋ yaa maà nu la à?” Bɔ nê “Baa ko nu.”

²³Yesò mè shu nê “Wu nkûŋ nê bɨa li ko enu ndɔŋ yaã, ka e tseke àbâ àbualu̧ am kò a yea ntɔŋ leꞋ è ntse mmɔ̌ màa ghɨ̀ la. ÈdziꞋ baa e wu abua bòt bu Tǎt am taŋkè nê bɔ̀ tseke abot la.”

²⁴ÀfɨꞋa bɔkatè ko bu èghem e zə ànəê yaa la, bɔ taꞋa tsoo ane bɔnyɨ bu babe la.

²⁵Ale, Yesò tɔ awɔb bàgème àdziꞋ yeamɔꞋ shu abua yɔb nê “Bɨ̀ ko nê bèfɔ̧̀ bòt kà ko a Mbɔ̧ɔ̧mà àa ngɨ̀ bɔ me ghɨɨle bòt bɔb, bèkěm bɔb, e mè me tseke àtsəa bòt bɔb.

²⁶À bakà bɔ ndɨ àa wu anè a kètsìà wɨ̧ la, ka wòt me kɨ ewu wɔ̀jûŋ ayɔɔ yɨ̧ tà bɔ ndɨ tàa wu mbɨꞋɨ̀ wafàꞋ abua ebeko la,

²⁷è we tàa nkɨ e wu a mbì ane yɨ̧ la, è bɔ ndɨ tàa wu mbɨꞋɨ̀ àbùꞋ abua ebeko la.

²⁸A bê ngu wuê mbɨ̀Ꞌɨ̀ àa ane Waã Wòt la. Tà lè kaꞋa wua nkɨ̀Ꞌa e ghɨ̌ bòt aa me fàꞋa abua tò. Tà li ngua nkɨ̀Ꞌa e me fàꞋa abua bòt, e lɔ̀Ꞌɔ e ŋà àtsə azi mbɨ̀Ꞌɨ̀ bòt nyaŋ aa peme.”

²⁹Mbɨ̀Ꞌɨ̀ bɔ dzə a Jèlikò la, taꞋà ènɔ̧̂ bòt e kùŋe a Yesò.

³⁰Bòt àghɨ àleme ko babe bɔ wu a ngèt alu̧ bɔ tseke la, e zə nê Yesò nàà ntsèà mbê mbùꞋ me ŋȩ shua nê “Waã fɔ̧̀ Dàbid, ku tèsȩ ta.”

³¹Ènɔ̧̂ bòt bu e ŋȩ awɔb nê bɔ̀ buŋ. Ka bɔ paà ŋȩ nê “Waã fɔ̧̀ Dàbid, ku tèsȩ ta.”

³²Yesò tɨ̧ ntɔ awɔb nê “Bɨ̀a nkɨa nê è ngɨ gha abua yɨ̧ à?”

³³Bɔ shu abua tò nê “Tê, ghɨa àghɨ aya à ghaꞋte.”

³⁴Yesò kù tèsȩ tɔb, mbà̧à̧te àghɨ ayɔb, àghɨ ayɔb a bê ngàꞋte bɔ kùŋe atò.