Read Mundani Matìù 26 Bible Online

Matìù 26 - Mundani bible

Matìù 26

¹È li ngu àfɨꞋa Yesò nyɨ̀Ꞌte mèngà̧ maa tè mpàa la, tà shu abua bɔkatè bi nê,

²“Bɨ̀ ko nê, è tsìꞋi èlibȩ bebe, èpǎ̧ Màntsea a ègwet e kɨꞋɨ̀, è wù àlia bɔ̀ɔ baãaã Waã Wòt ezǐ a tèkitebu bòt, bɔ̀ɔ wu̧u̧te atò a mbɨ̧̀ mbasa la.”

³ÀfɨꞋa mbɔŋ bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ Bèjuê e bù̧ù̧tè a ntɔꞋɔ àtsəa bèntsìà mèpɨ̧̀ Mbɔ̧ɔ̧mà wu bɔ̀ɔ ntɔ atò ane Kefàs la,

⁴ndàŋkè ndɨ bɔ̀ɔ yɨ̧ɨ̧me ebaãaã Yesò e bùŋe atò la.

⁵Ka mbɔ̂ ngɨ̀ ale nê, bɔ ka baãaã atò àfɨꞋa èpà̧ wu, mbɨ̀Ꞌɨ̀ ka banɔ̧̀ e bùꞋ ndèm.

⁶ÀfɨꞋa Yesò wu a Betanì, a lob wòt àghɔ̧atsɔꞋɔ kǒ bɔ̀ɔ ntɔ tò ane Simùn la,

⁷àvi kǒ kɨꞋɨ nè mèwet yɔ̀Ꞌɔ kǒ è tsoo nge la, a èbem atǒꞋ kǒ bɔ ghɨ ane èti ko bɔ̀ɔ ntɔ nê àlàbastà la ntsəètè àtsəa Yesò mbɨ̀Ꞌɨ̀ tà wu a si tà tsekè me jɨ èghɨjɨ la.

⁸ÀfɨꞋa bɔkatè tò e ye la, a taꞋa saa wɔb, tè bɔ biitè nê, “Àvi waà chɨɨma ntsòkà mèwet màa ane ka ànəa à?

⁹Eyaa wu mèwet bɔ wu fɨ̧̀ɨ̧̀ne ane taꞋà èkab eŋa abua bòt mbuŋ la.”

¹⁰Bɔɔ̀ ndàꞋà ale, Yesò ko ànəa bɔ shua la, mbììte awɔb nê, “Bɨ̀ ŋa àvi wàa ngoꞋ ne ghà à? Tà ghɨ kwàꞋ ngule ànəa ntsɔ̧̀ abua am.

¹¹Bɨa me bɔ̂ bòt mbuŋ bɨ tò ba àfɨ̀Ꞌ àgème, ka è nka wu ewu ba nɨ̧̀ ba àfɨ̀Ꞌ àgème.

¹²Tà yɔꞋɔ am nè mèwet màa ale, nko nê ye taŋke am àfɨ̀Ꞌ yaa ane ndɨ bɔ̀ɔ tu am la, ka àlia mbɔŋ aa li kùꞋu.

¹³Ane nkûŋ, tsiꞋ è shua wɨ̧ nê, àdziꞋ àgème a sitsǎꞋ ŋaà bɔ̀ɔ me tsɔ̀te Ntu̧ Ntsɔ̧̀ kèfɔ̧̀ Mbɔ̧ɔ̧mà yaa la, bɔɔ me làꞋa ànəa àvi wàa ghɨ la nɨa nkù̧ù̧ta tò.”

¹⁴Wakatè Yesò ko bɔ li ngua ntɔ tò ane Judàs Iskaliòt la, gha abua bètǎt bèntsìà mèpɨ̧̀ Mbɔ̧ɔ̧mà,

¹⁵mbììte awɔb nê, “E fɨ̧̀ɨ̧̀ne a Yesò abua yɨ̧ ko bɨ̀a ŋa ghà abua am à?” Tà biite ale, bɔ ŋa tò èkwȩkab èghem yetat.

¹⁶EbuꞋu àfɨꞋa ngaa me ghà ne mbì, Judàs tsìꞋa nkɨà èlu̧ tàa zi a Yesò a tèkitebu tɔb la.

¹⁷Àlia mbì a èpǎ̧ bled wu nàa ka kɔꞋ la a li nkɨ̀Ꞌɨ̂, bɔkatè Yesò e kɨꞋɨ̀ mbììte atò nê, “Àa nkɨà nê, bà taŋke àdziꞋa àa jɨ èghɨjɨ èpǎ̧ Màntsea a ègwet la, nèŋàà?”

¹⁸Tà bɨ̀ɨ̀lè nê, “Bɨ̀ ghǎ a èbem àpfəèà nɨ̧, ko bɨa ye wòt kǒ. Bɨ̀ ye, bɨ shu abua tò nê, ‘NyɨꞋtà laꞋnê, èli bɔ̧ e tsiꞋi ètentem, maà nkɨa nê, bâ bɔkatè bɔ̧ è kɨꞋɨ njɨ̀ èghɨjɨ èpǎ̧ Màntsea a ègwet a lob yê.’ ”

¹⁹Bɔkatè tò e ghà ngɨ̀ wuê mbɨ̀Ꞌɨ̀ tà shu la, ntàŋke èghɨjɨ èpǎ̧ Màntsea a ègwet wu.

²⁰Nyèm è fen, Yesò bɔ̂ bɔkatè bi bu ntsɔ̀b babe la e tseke a si me jɨ èghɨjɨ.

²¹Mbɨ̀Ꞌɨ̀ bɔ̀ɔ njɨ̀a la, tà nê, “TsiꞋ è shua wɨ̧ ane nkûŋ nê, wòt kǒ ane yɨ̧ nàa fɨ̧̀ɨ̧̀nè am.”

²²Bɔkatè tò bu e bùꞋ me biite atò wemɔ̀Ꞌ wemɔ̀Ꞌ, “Tê, wu mmɔ̌?”

²³Yesò bɨ̀ɨ̀lè nê, “Wòt wu tà zì àbu azi a èbem apfəèꞋ ba tò la.

²⁴Waã Wòt naa pfə wuê mbɨ̀Ꞌɨ̀ bɔ shɨ a èbem àkata Mbɔ̧ɔ̧mà la, ka aa li bɨɨ àbâ wòt wu tàa fɨ̧̀ɨ̧̀ne atò la. A li mbɔ̀ŋ ko bɔ li bɔ̀ kà lem mbia ŋut.”

²⁵Judàs wu tà li fɨ̧ɨ̧ne atò la biite nê, “NyɨꞋtà, wu mmɔ̌?” Yesò bɨ̀ɨ̀lè nê, “À shu àwɔ̀ mbɔŋ.”

²⁶Mbɨ̀Ꞌɨ̀ bɔ̀ɔ njɨ̀a èghɨjɨ la, Yesò nɨ kètaã bled ŋà mènkɔ̀ŋke abua Mbɔ̧ɔ̧mà, mbɔ̂ mboꞋ ŋǎ abua bɔkatè bi nê, “Eyaa wu mbɨ̧̀ ènyit yaã, bɨ̀ nɨŋ nkwet.”

²⁷Tà mè nɨ ndɔŋ ŋà mènkɔ̀ŋke abua Mbɔ̧ɔ̧mà, mbɔ̂ ŋǎ abua yɔb shu nê “Bɨ̀agème bɨ̀ nu.

²⁸Eyaa wu àlo̧ am, Mbɔ̧ɔ̧mà wua nɨa nkùùla mènkàꞋa kèkweelè mi la. Àlo̧ am yàa a tsəète a si, mbɨ̀Ꞌɨ̀ Mbɔ̧ɔ̧mà naa waꞋa bèkàbɔ̀ŋ bòt nyaŋ.

²⁹Maa shua wɨ̧ nê, è nka li tsi nu mèlùꞋ màa bɔ ghɨ ane tètaãaãte vȩn la a, tè àli yu màa nu mèlùꞋ fi a kèfɔ̧̀ Tǎt am la a kùꞋ.”

³⁰Bɔ nkɔ̧̂ ètsəkù̧ nɨŋ ngùꞋtè a Mbɔ̧ɔ̧mà, mbɔ̂ ndzəè nkɔꞋ ngà a ègwet èbȩ Olìf.

³¹Yesò shu abua bɔkatè bi nê, “Bɨa lùùla am bàgème kwaꞋa nyèmtèsi wàa, nkàà nê Àkata Mbɔ̧ɔ̧mà a shu nê, ‘Mbɔ̧ɔ̧mà naa bùŋe a mbaabà njɨ̀, njɨ̀ tu tea taate’,

³²ka àfɨꞋa mâ yu̧u̧me la, maa ghǎ a mbì lɨ̧ a Galìlî.”

³³Pità shu abua Yesò nê, “Bɔ màà ndùùlà wê bàgème, ko e nka lùùlà a.”

³⁴Yesò shu abua tò nê, “Ane nkûŋ, tsiꞋ è shua wê nê, lu̧nkɔ̀Ꞌ naa me laꞋ nê yeà ntɔ a ètsəꞋ wàà, aa tu̧ ngò̧ tetat nê ye bakà ko am.”

³⁵Pità nê, “È màà ntsìꞋi wuê àyea màa pfə ba nè la, ko e nka tu̧ laꞋ nê e mbakà ko àwê a!” Bɔkatè ko bu e mè shu wuê a èlɨ mbɔŋ.

³⁶Yesò bɔ̂ bɔkatè bi e ghà adzìꞋ ako bɔ̀ɔ ntɔ nê Gèsemanè la, tà shu abua yɔb nê, “Bɨ̀ tseke adzìꞋ yaa, è ngà nè mbì ntsàꞋtè a Mbɔ̧ɔ̧mà.”

³⁷Tà bɔ̂ nɨa Pità nè bɔ̧ Zebèdiì bu babe la. Tà bùꞋ me ghɔ̧̀ɔ̧̀ne a èntɨ̧ɨ̧ vi, ènyit tò e me bɨɨ.

³⁸Ale, tà shu abua yɔb nê, “Èntɨ̧ɨ̧ am aà ngò̧ò̧nà kwàꞋ ànyaꞋne, tè betsiꞋa e bùŋè am. Bɨ̀ tseke adzìꞋ yaa àtatsi me tsàꞋte a Mbɔ̧ɔ̧mà nè nà̧.”

³⁹Tà mè nyaꞋa ngà nè mbì, nchùŋe àtsə azi a si, ntsàꞋtè a Mbɔ̧ɔ̧mà nê, “Tê, èlu̧ e wua à nɨ ndɔŋ ngoꞋ yàa àbu am la, ka à ka ngɨ̀ mbɨ̀Ꞌɨ̀ e nkɨa la, ghɨ̀ wuê mbɨ̀Ꞌɨ̀ àa nkɨà la.”

⁴⁰Tà ghɨ̀ ale, nkua akwèn me kɨꞋɨ bɔkatè tò bu batat la e wua ndìa, tà bììte a Pità nê, “BetsiꞋa bɨ̀ ka tsekè àtatsi nè nà̧ ka wuê ane kètem àfɨ̀Ꞌ?

⁴¹Bɨ̀ tseke àtatsi me tsàꞋte a Mbɔ̧ɔ̧mà mbɨ̀Ꞌɨ̀ bɨ kwen a èbem ètaãaãte mènəè. Èntɨ̧ɨ̧ aà ndâ nkɔ̀ŋkà e ghɨ̌ àghɨ, ka mbɨ̧̀ ènyit ka wua nkɨà.”

⁴²Tà mè nkua akwèn ngà ntsàꞋtè a Mbɔ̧ɔ̧mà nê, “Tê, à bakà wu enɨ ndɔŋ ngoꞋ yaa kà e nu yùà, a tsiꞋ a wu mbɨ̀Ꞌɨ̀ àa nkɨà la.”

⁴³Tà mè me kɨꞋɨ bɔkatè tò bu e me li, nkàà nê kèlɔ ke li mbà̧aã àwɔb bàgème.

⁴⁴Yesò mè sà wɔb ngà ane ngò̧ tetat ntsàꞋtè Mbɔ̧ɔ̧mà wu a èlɨ̀.

⁴⁵Mbɔ̂ mè nkɨ̀Ꞌɨ̂ abua bɔkatè bi bu mbììte awɔb nê “Bɨ bele a si bɨ nɔ̀ŋkè me li mè ndzètà wɨ̧ la kè naà? Bɨ̀ ye! ÀfɨꞋa bɔ̀ɔ baãaã Waã Wòt ezǐ a tèkitebu bòt kàbɔ̀ŋ la a kuêꞋ,

⁴⁶Bɨ̀ lɔ̀Ꞌte a si bàa lɔꞋɔ, bɨ̀ ye, wòt wu tà fɨ̧̀ɨ̧̀nè am la tsiꞋa nkɨ̀Ꞌa!”

⁴⁷Mbɨ̀Ꞌɨ̀ Yesò bela ndàꞋà la, Judàs wakatè kǒ ane bɔkatè tò bu ntsɔ̀b babe la kɨꞋɨ̀, nè taꞋà ènɔ̧̂ bòt bɔ bèà nyitsə nè mbuꞋtsə la. Bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ Bèjuê ka bɔ li ntsàà àwɔb la.

⁴⁸Lɨ̧̀ wu ko nê ye làŋkè bɔ̂ tò ba nê, “Wòt màa ghǎ etaꞋa atò la, bɨ ko nê wu ŋut, mbà̧aã tò.”

⁴⁹Judàs bê ngà abua Yesò nê, “NyɨꞋtà, àlàŋkè à wu ne nè!” Mbɔ̂ ntaꞋa atò.

⁵⁰Yesò shu abua tò nê, “Shu̧, ghɨ̀ àghɨa à kɨꞋa ghɨ̀ la.” Bòt bu e bê nkɨ̀Ꞌɨ̂ ndzì èbu ane Yesò, mbà̧aã tò.

⁵¹ÀfɨꞋa mbɔŋ wòt kǒ ane bòt bu bɔ̂ Yesò ba la, sɔ̀ nyi zi mii ane àbùꞋ a àtsəa bèntsìà mèpɨ̧̀ Mbɔ̧ɔ̧mà ndòo àtû̧ atò.

⁵²Yesò shu abua tò nê, “Vəè nyi yê a èbem baꞋ zi, nkàà nê, wòt tà nɨ nyi mbùŋè wòt la, wu ndɨ bɔ̀ɔ li bùŋe atò nè nyi la.

⁵³À bakà ko laꞋ nê betsiꞋa e ntɔ Tǎt am a ègwet, tà bê ntsàà èlaã bèshujà e tsè èghem ntsɔ̀b bebe, è wu bɔntu̧ tò bu a ègwet la à?

⁵⁴Ka a wu anè, ko ànəa bɔ shɨ a èbem Àkata Mbɔ̧ɔ̧mà la, àa ghɨ̀ na ka wu nkûŋ à?”

⁵⁵ÀfɨꞋa mbɔŋ Yesò bììte ènɔ̧̂ bòt bu nê, “Bɨ ghɨ̀ na me kɨꞋɨ ebaãaã am ndzəè mbɨ̀Ꞌɨ̀ bɨ kɨꞋa baãaã tsɔŋ nè nyitsə bɔ̂ mbuꞋtsə à? Maa wua nyɨ̀Ꞌta bòt a èbem lob nɨ̧ Mbɔ̧ɔ̧mà àlia àgème ka bɨ̀ ka baãaã am,

⁵⁶ka èghɨ bàagème e tsè ane mbɨ̀Ꞌɨ̀ e ghɨ̌ àghɨa bèndàꞋàtɔŋ Mbɔ̧ɔ̧mà e li shɨŋ a èbem Àkata tò la aa wu nkûŋ.” ÀfɨꞋa mbɔŋ bɔkatè tò bàgème e sa tò ndùùlà.

⁵⁷Bòt bu bɔ li mbà̧aã Yesò la, e li nɨ̀a tò ngà a lob Kefàs wu tà li ngu àtsəa bèntsìà mèpɨ̧̀ Mbɔ̧ɔ̧mà la, àdziꞋa bènyɨꞋtà mbɨ̧te Musì nè bɔɔjuŋ Bèjuê e li mbù̧ù̧tè la.

⁵⁸Pità me nyaꞋa nkùŋà wɔb akwèn tè ngà ndzə àsà̧aã àtsəa bèntsìà mèpɨ̧̀ Mbɔ̧ɔ̧mà, ntsèke a si bɔ̂ bèshujà bu mbààba àpfəa mbɔŋ la, mbɨ̀Ꞌɨ̀ eye ndɨ ànəa mbɔŋ àa lìà la.

⁵⁹ÀfɨꞋa mbɔŋ, bètǎt bèntsìà mèpɨ̧̀ Mbɔ̧ɔ̧mà nè bòt lob saꞋa yu bàgème, e me kɨ èlu̧ bɔ̀ɔ zǐ ànəê àtsəa Yesò mbɨ̀Ꞌɨ̀ ebùŋe atò la.

⁶⁰Bòt nyaŋ e li mbàtê ndɔ̀Ꞌ a si ntàꞋa fɨte mènəè ndzì àtsəa tò, ka bɔ̀ ka ye àyea bɔ̀ɔ baãaã tò adù̧ la. A ghà me lìa, bòt ko babe e kɨꞋɨ a mbì

⁶¹nê, mbalù̧ yaa li nê, ye bɔ mètàŋ ebùù lob nɨ̧ Mbɔ̧ɔ̧mà, naa me wu ane èlibȩ betat ye mèe vəèəè.

⁶²Àtsəa bèntsìà mèpɨ̧̀ Mbɔ̧ɔ̧mà yu a lɔ̀Ꞌɔ a si mbììte a Yesò nê, “À bakà bɔ ànəa àa shu ane mèngǎ̧ maà bɔ zì àtsəa yê la à?”

⁶³Ka Yesò kà lâꞋ. Àtsəa bèntsìà mèpɨ̧̀ yu a shu abua tò nê, “Zi nkà̧ ane èlen Mbɔ̧ɔ̧mà yû̧. À wu Fɔ̧̀ wu Mbɔ̧ɔ̧mà yɔꞋ ntsà, tà wù Waã Mbɔ̧ɔ̧mà la, à shu awa.”

⁶⁴Yesò bɨ̀ɨ̀lè nê, “Wuê mbɨ̀Ꞌɨ̀ à shu la, ka tsiꞋ è shua wɨ̧ bɨ̀agème nê, ebuꞋu àfɨ̀Ꞌ yaa me ghà ne mbì, bɨa ye Waã Wòt, tà tseke àbâ àbualu̧ a Mbɔ̧ɔ̧mà Àtsèàngɔ̀ŋ la, e mě ye atò nchua a ègwet a èbem mbàꞋ la!”

⁶⁵Àtsəa bèntsìà mèpɨ̧̀ Mbɔ̧ɔ̧mà yu, a zə ale, sà̧à̧te ndǐ ti nê, “Mbê waa tsiꞋa fɨ̀Ꞌnè àvi ane Mbɔ̧ɔ̧mà. Tè bà mèe nkɨ wòt kǒ tsa ka taa shua wa a kàbɔ̀ŋ tà ghɨ̀ la à? Bɨ zə bɨ̀ambɔŋ ndɨ tàa fɨ̀Ꞌnà vi ane Mbɔ̧ɔ̧mà la!

⁶⁶Bɨ kwàꞋtè na à?” Bɔ bɨ̀ɨ̀lè nê, “Ànəê yu a li àtsəa tò, bɔ̀ bùŋe atò.”

⁶⁷Ale, bɔ bùꞋ me tsəètè mattsə ane tò, ndene atò, èbeko e dèbè atò

⁶⁸nê, “Àwɔ̀ Fɔ̧̀ wu Mbɔ̧ɔ̧mà yɔꞋ ntsà la, tùꞋu wòt tà ndèbè àwê la!”

⁶⁹Pità bele àbȩ àsà̧aã tà tseke la, waàvi kǒ tà li ngu wafàꞋ abua àtsəa bèntsìà mèpɨ̧̀ Mbɔ̧ɔ̧mà la, kɨꞋɨ̀ shu abua tò nê, “À li ngu àyê bɨ Yesò wòt Galìlî.”

⁷⁰Tà bê ntu̧ a mbì lɔb bɔ̀ɔgème nê, “E mbakà ko ànəa à shua la.”

⁷¹Tà ghǎ àbȩ ntɨ̧ɨ̧ a ètsəê adzìꞋ yu bɔ̀ɔ ntsèà ka nyia a èbem àsà̧aã yu la, wekǒ nè waàvi àfàꞋ mè ndzea tò shu abua bòt bu bɔ tɨ̧ɨ̧te abot la nê, “Mbê waa li ngu bɔ̂ Yesò wòt Nazàlet.”

⁷²Pità mè ntù̧ tê ndzì nkà̧ nê, “E mbakà ko a mbê waa.”

⁷³AdzìꞋ tseke tè me wù̧ù̧ne, bòt bu bɔ tɨ̧ɨ̧te abot la, e kɨꞋɨ̀ shu abua Pità nê, “Ane nkûŋ, à wu wekǒ ayɔɔ yɔb, nkàà nê, ndɨ̧ yê nàà mbɨ̀Ꞌɨ̀ è yɔb!”

⁷⁴ÀfɨꞋa mbɔŋ Pità bùꞋ me zì tèntsɔ̧̀ɔ̧̀mètsə ane zi shua nê, “E mbakà koa mbê waa.” KwàꞋ àfɨꞋa mbɔŋ lu̧nkɔ̀Ꞌ bê ntɔ.

⁷⁵Pità kù̧ù̧te ànəa Yesò yaã shu abua zi la, nê “Lu̧nkɔ̀Ꞌ naa me laꞋ nê yea ntɔa aa tû̧ ngò̧ tetat nê ye bakà ko am.” Tà ndzəè ngà àbȩ ndɨ̀ kwàꞋ ànyaꞋne.