Read Mundani Matìù 3 Bible Online

Matìù 3 - Mundani bible

Matìù 3

¹È lè wu àfɨꞋa mbɔŋ Jɔ̌n ndzìà èdzî kɨ̀Ꞌɨ̂ me làꞋa èngǎ̧ Mbɔ̧ɔ̧mà àbâ àlaꞋ àyuube a Jùdià shua nê

²“Bɨ̀ waꞋa mènəè kàbɔ̀ŋ mɨ̧ nkàà nê Kèfɔ̧̀ Mbɔ̧ɔ̧mà kɨꞋɨ̀ tê ntsìꞋi a ngèt yɨ̧.”

³Jɔ̌n waa wu wòt wu ndàꞋàtɔŋ Mbɔ̧ɔ̧mà, Àsayà li ngua shua la nê, “Wòt kǒ nàa ŋȩ̀a àbâ àlaꞋ àyuube shua nê, ‘Bɨ̀ nèètè èlu̧ abua Lefɨ̀Ꞌ, ndɔ̀ktè alu̧ tò è tɨ̧ɨ̧ ndɨŋndɨ̀ŋ.’ ”

⁴Jɔ̌n li nkwà̧aã ndìte bɔ ghɨ ane nyemte anyà̧ kǒ bɔ̀ɔ ntɔ nê kamèl la, mè nkwà̧aã nkànda a èloŋ li. Èghɨjɨ tò li ngu ngù̧ù̧metsə nè dzə.

⁵ÀfɨꞋa mbɔŋ bòt e me ghǎ abua tò bɔ dzəa Jèlusalèm la, nè Jùdià ègème, mè nè èdziꞋ bu ègème a ngèt èdzî Jodàn la.

⁶Bɔ gha ale, mbɨ̧ɨ̧nè mènəè kàbɔ̀ŋ mɔb, tà zì àwɔb a èdzî Jodàn.

⁷Ka àfɨꞋa tà ye Bèfalèsiì nyaŋ nè Bèsadùsiì nkɨ̀Ꞌa taa zǐ àwɔb a èdzî mɨ̧̂ la, tà bììte awɔb nê, “KwàꞋ bɨ̀a àndǎ̧ nyaãtekàbɔ̀ŋ, waa kɨɨte awɨ̧ nê bɨ̀ lùùla ntsǒ Mbɔ̧ɔ̧mà yu tàa ngà ètsàà la à?

⁸Bɨ̀ ghɨ̌ èghɨ bu àa nyɨ̀Ꞌta nê bɨ waꞋa mènəè kàbɔ̀ŋ mɨ̧ la.

⁹Bɨ̀ ka me ŋeꞋe awɨ̧ a ègwet è shua nê, Abàlàghâm wu tǎt nyaꞋ wɨ̧. TsiꞋ e shua wɨ̧, Mbɔ̧ɔ̧mà è bɔ ètɨ̧̂ egheble àti yaa e ghɨ̌ aa tsiꞋi bòt àndǎ̧ Abàlàghâm.

¹⁰Adzà̧ tsiꞋi a tèghàŋke àyɨt bɔ nɔ̀ŋè la. Àyɨt àgème kà wua nkɔ̀ɔ̀la tètaãaãte ntsɔ̧̀ bɔ̀ɔ ngà ekòꞋo ayùà emàꞋa a èbem èwet.

¹¹“Maà ndzìà wɨ̧ a èdzî nɨ̀a nyɨ̀Ꞌta nê bɨ waꞋa mènəè kàbɔ̀ŋ mɨ̧. Ka tòa wu nkɨ̀Ꞌa akwèn yaã la e taꞋa tsě am nyaŋ. E mbakà lem nkùꞋ èwe màa ŋeꞋe gubte tò la. Taa tsiꞋi me zǐ Fo Kèfə ane yɨ̧ nè èwet.

¹²Ankì tò wu àbu atò, tàa nɨ foa ntsəè ti la. Taa foa ntsəè tu, efete nɔ̀ŋe a ète li, ka è me wu èfaa, tà maꞋa a èbem èwet kà wu li elema.”

¹³AfɨꞋa mbɔŋ Yesò lɔꞋ a Galìlî nkɨ̀Ꞌɨ̂ a ngèt èdzî Jodàn eye a Jɔ̌n taa zi atò a èdzî.

¹⁴Tà kɨꞋɨ ale, Jɔ̌n nyɔ̀Ꞌtè me kɨ etu̧ nê yè ka zǐ atò a èdzî a. Nê Yesò ka tà wu zì àvi a èdzî la, ale ghǎ ghɨ̀ ka tà nê yè tsě zìa ndzì atò a èdzî leꞋ?

¹⁵Yesò shu abua tò nê, “TsiꞋ à wu anè àfɨ̀Ꞌ yaa, nkàà nê ba nè e bɔ ndɨ bàa ghɨ̌ èghɨ ègème Mbɔ̧ɔ̧mà nàa nkɨà la.” Ale, Jɔ̌n bɨ̧ɨ̧ne.

¹⁶Mbɨ̀Ꞌɨ̀ bɔ zìa Yesò a èdzî la, tà bê dzə a èbem èdzî. KwàꞋ àfɨꞋa mbɔŋ, ègwet e ghaꞋà tà ye Fo Mbɔ̧ɔ̧mà nchùa mbɨ̀Ꞌɨ̀ baba, nchu ngu adù̧ to.

¹⁷Bɔ̀ ghɨ̀ ale, bɔ̀ me zə, àtɔŋ a tsè a ègwet nê “Eyaa wu waã èkɔŋ am; èntɨ̧ɨ̧ am e taꞋa wua mbɔ̀ ane tò.”