Read Mundani Matìù 4 Bible Online

Matìù 4 - Mundani bible

Matìù 4

¹AfɨꞋa mbɔŋ, Fo Mbɔ̧ɔ̧mà nɨa Yesò nkɔꞋ ngà àbâ àlaꞋ àyuube, Satàn naa taãaãte atò.

²Tà tsèke èlibȩ èghem yekwì kà jɨ àghɨ, ale ndzìtsə te baãaã atò.

³Satàn kɨ̀Ꞌɨ̂ shu abua tò nê, “À wu Waã Mbɔ̧ɔ̧mà, à ghɨ̀ àti yàa a gheblè ntsìꞋi èghɨjɨ.”

⁴Yesò bɨ̀ɨ̀lè nê, “Àkata Mbɔ̧ɔ̧mà a laꞋnê, ‘Wɔ̀bȩ̂ nàà kà pem nkàà wuê èghɨjɨ bùà bùà’, ka èngà̧ ègème àa ndzəa ètsəê Mbɔ̧ɔ̧mà la aà ngɨ̀à wòt pèma.”

⁵Ndɔ̀Ꞌ abot, Satàn nɨa tò ngà a Jèlusalèm, ntsia atò a ntsɔ̀Ꞌ lob nɨ̧ Mbɔ̧ɔ̧mà. [3]

⁶Mbɔ̂ shu abua tò nê, “A wu Waã Mbɔ̧ɔ̧mà, à kȩ ntem a si. Àkata Mbɔ̧ɔ̧mà a laꞋnê, ‘Taa tsàà bɔntu̧ bi bɔɔ baabe awê, eŋeꞋe awê a èbu bɔb, mbɨ̀Ꞌɨ̀ à wù̧ àka yè ane èti’.”

⁷Yesò shu abua tò nê, “Àkata Mbɔ̧ɔ̧mà a meè shu nê, ‘Kâ ntà̧à̧te a Tǎt wè Mbɔ̧ɔ̧mà’.”

⁸Satàn mè nɨa Yesò nkɔꞋ ngà a ègwet taꞋà èbȩ ko, nyɨ̀Ꞌte atò èlaꞋ sitsǎꞋ ègème nè ènɨ̧ awɔb.

⁹Mbɔ̂ shu abua tò nê, “À ŋɔ̀Ꞌne a si a mbì laã, ngùꞋtè am, ko maa ŋa èghɨ bàagème abua yê.”

¹⁰Ale, Yesò bɨ̀ɨ̀lè nê, “Lɔ̀Ꞌɔ a ngèt yaã à Satàn! Nkàà nê, Àkata Mbɔ̧ɔ̧mà a laꞋnê, ‘À bɔ ndɨ àa me wùꞋte wua Tǎt wè Mbɔ̧ɔ̧mà, mè ndzə wuê atò la’.”

¹¹AfɨꞋa mbɔŋ, Satàn sa atò, bɔntu̧ Mbɔ̧ɔ̧mà e kɨꞋɨ̀, me taŋke atò.

¹²Àfɨ̀Ꞌ yu Yesò zə nê bɔ baãaã Jɔ̌n màꞋa a tèfȩ la, tà lɔ̀Ꞌ ngà a Galìlî.

¹³Tà sa Nazàlet, tà ghà me tseke ne Kàpenàwuêm a ngèt èlemè Galìlî, àbâ àlaꞋ a Zebulùn nè Naptalì.

¹⁴À li ngɨ̀ anè, mbɨ̀Ꞌɨ̀ àghɨa ndàꞋàtɔŋ Mbɔ̧ɔ̧mà Àsayà lè shu la aa wu nkûŋ. Tà li nê,

¹⁵“Èbâ èlaꞋ Zebulùn nè Naptalì alu̧ èlemè Galìlî, àgua èdzî Jodàn, àdziꞋa bòt kà wu Bèjuê àa ntsèka la, bɨ ye èkaꞋà.

¹⁶Bòt bu bɔ li ntsèke a èbem ndzěm la, e ye taꞋa èkaꞋà. È me wu èbu bɔ li ntsèke àlaꞋ mbɨ̀Ꞌɨ̀ bɔ wu a èbem ndzěm èvə la, ko èkaꞋà e pùùla abua yɔb.”

¹⁷E bùꞋu àfɨꞋa mbɔŋ, Yesò bùꞋ me làꞋa èngǎ̧ Mbɔ̧ɔ̧mà shua nê, “Bɨ̀ waꞋa mènəè kàbɔ̀ŋ mɨ̧, Kèfɔ̧̀ Mbɔ̧ɔ̧mà kɨꞋɨ tê ntsìꞋi a ngèt yɨ̧.”

¹⁸Mbɨ̀Ꞌɨ̀ Yesò nàa ngȩ̀ȩ̀na a ngèt èlemè Galìlî la, tà ye bèmbaãaãbasə ko babe è wu bɔnyɨ la, Simùn wu èlen tò ko li ngu Pità la, bɔ̂ wanyɨ vi Andùlù maꞋa tasat a èbem èlemè wu mbà̧aã basə.

¹⁹Tà shu abua yɔb nê, “Bɨ̀ nkùŋè am. Maa ghɨ̌ bɨ̀a tsiꞋi me kɨ bɔbȩ nɨa nkɨ̀Ꞌa abua am.”

²⁰KwàꞋ àfɨꞋa mbɔŋ, bɔ sà bètasat bɔb bu nkùŋè atò.

²¹Tà lɔꞋɔ abot me ghà ne mbì, mè ndze wòt kǒ bɔ̂ wanyɨ vi, Jimsì waã Zebèdiì bɔ̂ wanyɨ vi Jɔ̌n. Bɔ li ngu a èbem ànkànuꞋ nè tǎt wɔb Zebèdiì, nèètà bètasat bɔb. Yesò tɔ awɔb,

²²bɔ bê ntɨ̧ɨ̧ èka mbɔŋ sà ànkànuꞋ yu nè tǎt wɔb, nkùŋè atò.

²³Tà me ghȩȩne a èdziꞋ ègème a Galìlî nyɨ̀Ꞌta èngǎ̧ Mbɔ̧ɔ̧mà a èbem lobte Mbɔ̧ɔ̧mà, mè ntsɔ̀tà Ntu̧ Ntsɔ̧̀ kèfɔ̧̀ Mbɔ̧ɔ̧mà, mè mbəèa tèwuute èghɔ̧ tègème, nè èlɔꞋ ègème ane bòt.

²⁴Àndǎ tò a ghà a èdziꞋ ègème a èbem àlaꞋ və fɔ̀ɔ̀le a èbem Silìà ègème. Bòt e zə ale, nɨ bòt tèwuute èghɔ̧ tègème, nɨŋ nkɨ̀Ꞌɨ̂ abua tò tà bə awɔb. Bòt ènyit saa e li ngu ayɔɔ bòt baa, nè bòt fote kàbɔ̀ŋ, nè èbe èghɔ̧ màkwena, fɔ̀ɔ̀le ne èbe èbâ ènyit bɔb è pfəꞋte la.

²⁵TaꞋà ènɔ̧̂ bòt e dzəa Galìlî, nè Dìkapolì, nè Jèlusalèm, nè Jùdià fɔ̀ɔ̀le agua èdzî Jodàn la, e me kùŋe atò.