Read Mundani Mak 1 Bible Online

Mak 1 - Mundani bible

Mak 1

¹Eyaa wu Ntu̧ Ntsɔ̧̀ ane ànəa Yesò Klistò Waã Mbɔ̧ɔ̧mà.

²Mbɨ̀Ꞌɨ̀ àa a èbem àkatè ndàꞋàtɔŋ Mbɔ̧ɔ̧mà, Àsayà la, “Mbɔ̧ɔ̧mà laꞋnê, Ye wantu̧ am mâ tsǎ atò a mbì lɨ̧ taa kɨꞋɨ enèète alu̧ abua yɨ̧ la.

³Wòt kǒ nàa ŋȩ̀a àbâ àlaꞋ àyuube shua nê, Bɨ̀ nèètè èlu̧ abua Lefɨ̀Ꞌ, ndɔ̀ktè alu̧ tò è tɨ̧ɨ̧ ndɨŋndɨ̀ŋ.”

⁴Ale, Jɔ̌n ndzìà èdzî li nkɨꞋɨ àbâ àlaꞋ àyuube me tsɔ̀te nê, “Bòt è waꞋa mènəè kàbɔ̀ŋ mɔb, nkɨ̀Ꞌɨ̂ bɔ̀ zì àwɔb a èdzî mbɨ̀Ꞌɨ̀ taa waꞋa mènəè kàbɔ̀ŋ mu bɔ̀ɔ ngɨ̀à la.”

⁵ÀlaꞋ a Jùdià nè bòt Jèlusalèm bàgème e li ngà abua tò, mbɨ̧̀ɨ̧̀nè mènəè kàbɔ̀ŋ mɔb, tà zì àwɔb a èdzî Jodàn.

⁶Jɔ̌n li ngua nkwà̧aã ndìte bɔ ghɨ ane nyemte anyà̧ kǒ bɔ̀ɔ ntɔ nê kamèl la, mè nkwà̧aã nkànda a èloŋ li. Tà li ngua nkwèla ngù̧ù̧metsə mè njɨ̀a dzə.

⁷Tà li ngùa ntsɔ̀tà abua bòt nê, “Wòt kǒ nàà kɨꞋɨ akwene yaã tà taꞋa tsě am nyaŋ la. E mbakà lem nkùꞋ wòt tàa ŋɔꞋne a si eyààte mèliꞋ gubte tò la.

⁸Maà ndzìà wɨ̧ a èdzî anè, ka taa tsiꞋi me zǐ Fo Kèfə ane yɨ̧.”

⁹Àfɨ̀Ꞌ a li nyaꞋà ntsè, Yesò lɔꞋ a Nazàlet è wu àbâ àlaꞋ a Galìlî la nkɨ̀Ꞌɨ̂, Jɔ̌n zì atò a èdzî Jodàn.

¹⁰Mbɨ̀Ꞌɨ̀ Yesò è bê ndzə a èbem mèleb mu nkɔ̀Ꞌɔ aguŋ la, tà me ye ègwet e ghaꞋà, Fo Mbɔ̧ɔ̧mà chu mbɨꞋɨ̀ baba adù̧ tò.

¹¹Àtɔŋ a tsè a ègwet nê, “À wu waã èkɔŋ am; èntɨ̧ɨ̧ am e taꞋa wua mbɔ̀ ane yê.”

¹²KwàꞋ àfɨꞋa mbɔŋ, Fo Mbɔ̧ɔ̧mà ghɨ̀ Yesò ghà àbâ àlaꞋ àyuube,

¹³ntsèke abàꞋ və èli èghem yekwì, Satàn me taãaãte atò. BanyaãbàꞋ e li ngu abot, bɔntu̧ Mbɔ̧ɔ̧mà e taŋka tò.

¹⁴Àfɨ̀Ꞌ yu bɔ baãaã Jɔ̌n màꞋa a tèfȩ la, Yesò kɨ̀Ꞌɨ̂ a Galìlî me tsɔ̀te Ntu̧ Ntsɔ̧̀ Mbɔ̧ɔ̧mà,

¹⁵shua nê “Ngule àfɨ̀Ꞌ yu a kùꞋ. Kèfɔ̧̀ Mbɔ̧ɔ̧mà kɨꞋɨ tê ntsìꞋi a ngèt yɨ̧. Bɨ̀ waꞋa mènəè kàbɔ̀ŋ mɨ̧, mbɨ̧̀ɨ̧̀ne Ntu̧ Ntsɔ̧̀.”

¹⁶Mbɨ̀Ꞌɨ̀ Yesò nàa ngȩ̀ȩ̀nà a ngèt èlemè Galìlî la, tà ye bèmbaãaãbasə ko babe, Simùn bɔ̂ wanyɨ vi Andùlù, mbà̧aã basə ane tasat la.

¹⁷Yesò shu abua yɔb nê, “Bɨ̀ nkùŋè am. Maa ghɨ̌ bɨa tsiꞋi me kɨ bɔbȩ nɨa nkɨ̀Ꞌa abua am.”

¹⁸KwàꞋ àfɨꞋa mbɔŋ, bɔ sà bètasat bɔb nkùŋè atò.

¹⁹Tà nyaꞋa tà ghà nè mbì, tà ye Jimsì waã Zebèdiì bɔ̂ wanyɨ vi Jɔ̌n, a èbem ànkànuꞋ a yɔb, nèètà bètasat bɔb.

²⁰Yesò bê ntɔa wɔb, bɔ bê sà a tǎt wɔb Zebèdiì nè bɔfàꞋ bi, nkùŋè atò.

²¹Bɔ li ngà Kàpenàwuêm. Àliapfəèa Bèjuê a kɨꞋɨ̀, Yesò ghà a lob Mbɔ̧ɔ̧mà yɔb me nyɨꞋte èngǎ̧ Mbɔ̧ɔ̧mà.

²²Mèngǎ̧ tà nyɨ̀Ꞌta la li ntaꞋa tsè àwɔb nkàà nê tà li ngua nyɨ̀Ꞌta wɔb mbɨ̀Ꞌɨ̀ wòt tà bɔ àtɔŋ ane ànəa mbɔŋ la, tà kà wua nyɨ̀Ꞌta mbɨ̀Ꞌɨ̀ bènyɨꞋtà mbɨ̧te Musì.

²³KwàꞋ àfɨꞋa mbɔŋ, wòt kǒ fo kàbɔ̀ŋ nàa ane tò la, nyi a èbem lob Mbɔ̧ɔ̧mà yu, ŋȩ nê,

²⁴“Yesò wòt Nazàlet, à kɨa ghà abua ya à? À kɨ̀Ꞌa a si ŋaa eliime awa à? Mâ ko wòt à wu wùà la. À wu ngule wantu̧ Mbɔ̧ɔ̧mà.”

²⁵Yesò bê shu abua fo kàbɔ̀ŋ yu nê, “Kabte ètsəê wê! Sǎ a mbê waa!”

²⁶Fo kàbɔ̀ŋ yu nyiꞋa mbê wu ane àzəꞋ, ŋȩ̂ ane ètɨ̧̂, sa atò.

²⁷Ànəa ngaa a bê ntsè bòt bu abot la tè bɔ bùꞋ ntsiꞋa mbììta a kètsìà wɔb nê, “Eyaa wu ghà à? Wu àghɨa fi tà nyɨ̀Ꞌta la à? Mbê waa e bɔ àtɔŋ tè tàa ngɨ̀ tà shu ànəê abua fote kàbɔ̀ŋ, te bê ngɨ̀ wuê mbɨ̀Ꞌɨ̀ tà shu la!”

²⁸Ale, àndǎ tò a bê ngȩ̀ȩ̀nè kwàla àdzìꞋ àgème àbâ àlaꞋ a Galìlî.

²⁹Yesò lɔ̀Ꞌ a lob Mbɔ̧ɔ̧mà yu mbê ngà a lob Simùn bɔ̂ Andùlù. Jimsì bɔ̂ Jɔ̌n e kùŋè àwɔb.

³⁰Nyɨ̌ vi Simùn li ngu a èku̧ ngo̧o̧na sɔ̧̀ɔ̧̀nà. Mbɨ̀Ꞌɨ̀ Yesò nyi a lob la, bɔ bê shua tò ànəa mbɔŋ.

³¹Tà ghà a ngèt àvi wu mbà̧ àbu atò, ndɔ̀kè atò a si. Sɔ̧̀ɔ̧̀nà wu bê sà tò, tà lɔ̀Ꞌɔ a si mbùꞋ me taŋke awɔb.

³²ÀfɨꞋa nyèm èbàꞋà tê ndzěm bùꞋ me fene la, bòt e nɨ bòt àghɔ̧, nè bòt fote kàbɔ̀ŋ tèa ŋǎ wɔb ngoꞋ la nɨŋ nkɨ̀Ꞌɨ̂ Yesò naa bə a wɔb.

³³Bòt bàgème àpfəa nɨ̧a ngaa e bu̧u̧te a ètsələèꞋ və.

³⁴Yesò bəâ bòt tèwuute èghɔ̧ nyaŋ, mè fəè fote kàbɔ̀ŋ nyaŋ ane èbeko. Tà kà bɨ̧ɨ̧nè fote kàbɔ̀ŋ tu te làꞋ, nkàà nê te ko wòt tà wu wùà la.

³⁵ÈtsəꞋ e li ntsi, kà àbȩ a zìꞋ ngàꞋtê, Yesò lɔ̀Ꞌɔ a si ndzəè a lob. Tà lɔꞋɔ àpfəa nɨ̧ yu, ngà àdziꞋa ndziꞋne àko me tsàꞋta Mbɔ̧ɔ̧mà.

³⁶Simùn bɔ̂ bèshu̧ bi e me gheeba nkɨà tò.

³⁷ÀfɨꞋa bɔ yea tò la, bɔ shu abua tò nê, “Waa waa nàà nkɨà wê.”

³⁸Yesò nê, “Ba bɔ ndɨ bàa ghǎ etsɔ̀te Ntu̧ Ntsɔ̧̀ yaa a èdzìꞋ ko bu a ngèt adzìꞋ yaa la mɨ̧̂. Nkàà nê, eyaa wu àghɨa a li ngɨ̀ ka e nkɨ̀Ꞌɨ̂ a ngɔ̀ŋ ŋaa la.”

³⁹Tà me ghȩȩne a èdziꞋ ègème a Galìlî nyɨ̀Ꞌta èngǎ̧ Mbɔ̧ɔ̧mà a èbem lobte Mbɔ̧ɔ̧mà tɔb mè fəèà fote kàbɔ̀ŋ adù̧ bòt.

⁴⁰Wòt kǒ àghɔ̧atsɔꞋɔ a baãaã tò la li nkɨ̀Ꞌɨ̂ ntèm tènjûŋ ti a mbì Yesò ndɨ̀ nê, “À kɔ̀ŋkà, ko betsiꞋa à ghɨ̀ e pem àghɔ̧ yaa.”

⁴¹Tèsȩte ŋut te nkua Yesò. Tà nyààbè àbu azi mbà̧à̧te atò, mbɔ̂ shu abua tò nê, “Oò maà nkɔ̀ŋkà, pem!”

⁴²Mbɨ̀Ꞌɨ̀ tà làꞋ ale la, àghɔ̧atsɔꞋɔ yu a bê sà mbê wu, tà pem.

⁴³Yesò ghɨ̀ ale, mbɔ̂ səèŋkè àtû̧ atò mbê ntsàà atò tà me ghǎ.

⁴⁴Tà shu abua tò nê, “Zə, ko mbɨ̀Ꞌɨ̀ à shu wòt àghɨa a ghɨ̀ la, ka ghǎ nyɨ̀Ꞌte awê abua ntsìà mèpɨ̧̀ Mbɔ̧ɔ̧mà. À me ghǎ à nɨ èghɨ àa nɨ kɔ̀ŋke a Mbɔ̧ɔ̧mà mbɨ̀Ꞌɨ̀ Musì li shu la, enɨ ghɨ̀ waa waa naa ko nê à pem.”

⁴⁵Ka mbê wu lɔꞋ a mbì Yesò ale, mbê ngà me làꞋa àdziꞋ àgème ndɨ bɔ bəa vi la, . Tà ghà ale, mbê mbùù ànəa ngaa tè Yesò kà tsi nko ngȩ̀ȩ̀nè àpfəèà nɨ̧ yu a kètsìà bòt. Tà ntsiꞋi me tseke wuê a èdziꞋi ndziꞋne, bòt e bɔ me dzəâ a èdzìꞋ ègème nkɨ̀Ꞌa abua tò.