Read Mundani Mak 11 Bible Online

Mak 11 - Mundani bible

Mak 11

¹È li ngu àfɨꞋa Yesò bɔ̂ bɔkatè bi e kɨꞋɨ tê ngua a ngèt Jèlusalèm, a ngèt èpfəè Befagè bɔ̂ Betanì la, bɔ ghà a ègwet èbȩ Olìf, tà tsɔ̀Ꞌɔ bɔkatè bi ko babe

²shu abua yɔb nê “Bɨ̀ gha àpfəè zia a mbì lɨ̧ la ko bɨa bê ye a jàkâ kǒ bɔ sèlè, wòt bakà li mè kɔꞋɔ a ègwet tò la. Bɨ̀ yaa nɨŋ nkɨ̀Ꞌɨ̂ a si ŋàa.

³Wòt bììta awɨ̧ àghɨa bɨ yaa nɨ gha ghɨ̀ la, bɨ nê ‘Tǎt wu nàa nkɨà wùà’, mbɔ̂ mbê ngu paa evəâ wùà.”

⁴Ale, bɔ ghà ndzè wajàkâ àbȩ bɔ selè a ngèt ètsələèꞋ la, me yàa,

⁵bòt ko bɔ tɨ̧ɨ̧te abot la e biite a wɔb nê, “Bɨ̀ yàà wajàkâ waa e ghɨ̌ ghàà?”

⁶Bɔ bɨ̀ɨ̀lè wuê mbɨ̀Ꞌɨ̀ Yesò ghɨ̂ shu awɔb la. Bòt bu e sà wɔb bɔ nɨŋ ngà.

⁷Bɔ̀ nɨ wajàkâ wu bɔ̀ kɨꞋɨ abua Yesò, bɔ nɨ ndǐ tɔb ndzèènè kɔ̧̀ tò, Yesò kɔ̀Ꞌɔ a ègwet.

⁸Bòt nyaŋ e sàŋkè ndǐ tɔb a alu̧, èbeko e loote ètsə èyɨt nɨŋ sàŋkè alu̧.

⁹Bòt bu nga a mbì tò la nè è bu akwèn la e bùꞋ me ŋȩa shua nê, “MèngùꞋte wu abua Mbɔ̧ɔ̧mà; TsiꞋ Mbɔ̧ɔ̧mà lɔ̀ɔ̀le wòt wu nkɨ̀Ꞌa ane èlen tò la!

¹⁰Mbɔ̧ɔ̧mà lɔ̀ɔ̀le wòt wu nga me ebaãaã kèfɔ̧̀ tǎt wa Dàbid la. MèngùꞋte wu abua Mbɔ̧ɔ̧mà a ègwet.”

¹¹Yesò nyi a Jèlusalèm nga a èbem lob nɨ̧ Mbɔ̧ɔ̧mà, ngȩ̀ȩ̀nè ndɨ̀ŋkè èghɨ ègème. Ka ndɨ̀ wu nyèm tsiꞋa fèna fene la, tà ghà a Betanì bɔ̂ bɔkatè bi.

¹²ÈtsəꞋ e li ntsi, bɔ me kua a Betanì, ndzìtsə te baãaã a Yesò.

¹³Tà tɨ̧ɨ̧ a endɨ̌ ndzè àyɨt a fik nè tèfəꞋtsə a ègwet. Tà ghà abot eye nê tètaãaãtsə tea a ègwet leꞋ. Ngà ale ndze wuê tèfəꞋtsə a ègwet nkàà nê àfɨꞋa àyɨt a mbɔŋ àa nkɔ̀ɔ̀la la a li à ka kuꞋ.

¹⁴Yesò tsɔ̧̀ àyɨt yu nê, “Wòt ka lɔ̀Ꞌ àlia emě jɨ kètaã a ègwet lè a.” Bɔkatè tò e li ndzəâ ndɨ tà làꞋà la.

¹⁵Mbɨ̀Ꞌɨ̀ bɔ nyi a Jèlusalèm la, Yesò ghà a lob nɨ̧ Mbɔ̧ɔ̧mà fəè bòt bu bàgème fɨ̧̀ɨ̧̀nà mè nju̧a èghɨ a èbèm la. Mè mpààtè mèkɔꞋ bòt bu bɔ wua nkùbta mèkab nkɨà àbȩ̀ la, nè batɨ̧ bòt bu bɔ wua fɨ̧̀ɨ̧̀nà banɨ̧̌ ndɨk la.

¹⁶Tà li tà ka bê sà wòt kǒ tà nɨ̀ èghɨ èwen ntsè àsà̧aã lob nɨ̧ Mbɔ̧ɔ̧mà yu.

¹⁷Tà ghɨ̀ ale, tà bɔ me nyɨꞋte bòt shua nê, “Àkatè a Mbɔ̧ɔ̧mà a laꞋnê, ‘Lob yaã wu lob bɔ̀ɔ me tsàꞋtè am a èbèm la’, ka bɨ nɨŋ ngɨ̀ è tsìꞋi àdziꞋa bètsɔŋ aa nkɨ̀Ꞌa ndɔ̧̀ɔ̧̀tà la.”

¹⁸Bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì e zə ànəê yaa, mbùꞋ me kɨ èlu̧ bɔ̀ɔ bùŋè atò la, ka me bɔa atò nkàà nê mèngǎ̧ tò li ntàꞋa wua mbɔ̀ ènɔ̧̂ bòt bu.

¹⁹È lɔ̀Ꞌ ngu àfɨꞋa nyèmtèsi, Yesò bɔ̂ bɔkatè bi e sà àpfəa nɨ̧ yu me ghà wɔb.

²⁰Bɔ li saꞋa ntɔtetsɔ̌Ꞌ me ghȩ̀ȩ̀ne alu̧, ndzè àyɨt a fik yu a yu̧ àgème tè ngà ndzə ane tèghaŋtsə la.

²¹Pità ku̧u̧te àghɨa aà ghɨ̀ la, shu abua Yesò nê, “NyɨꞋtà, ye ndɨ àyɨt yu àà tsɔ̧̀ la a yu̧ la.”

²²Yesò bɨ̀ɨ̀lè nê, “Bɨ̀ zi èntɨ̧ɨ̧ wɨ̧ ane Mbɔ̧ɔ̧mà.

²³Ane nkûŋ, mâ shu awɨ̧ nê wòt shu abua èbȩ la nê, ‘Kȩ ngà nkwene a èbem *èdzî’, mbɔ̂ ntɨ̀ nê ànəa ye shua la aa wu ale, mbakà màkè, ko Mbɔ̧ɔ̧mà naa ghɨ̌ abua tò.

²⁴È wu ale, mâ shua wɨ̧ nê, wòt me tsàꞋte a Mbɔ̧ɔ̧mà ndò̧o̧ àghɨ, mbɔ̌ ntɨ̀ nê ye bɔ àghɨa ngaa tè ndɔ̀Ꞌ, ko taa bɔ àghɨ àgème tà lo̧o̧ la.

²⁵À tɨ̧ me tsàꞋte a Mbɔ̧ɔ̧mà, à waꞋa kàbɔ̀ŋ bòt e ghɨ ane yê la, mbɨ̀Ꞌɨ̀ Tǎt wè wu a ègwet la naa waꞋa kàbɔ̀ŋ wê mɨ̧̂. [

²⁶Ka à bakà waꞋa kàbɔ̀ŋ bòt, ko Tǎt wè wu a ègwet la ka waꞋa kàbɔ̀ŋ wê à.]”

²⁷Bɔ mè nkua nyi a Jèlusalèm. Mbɨ̀Ꞌɨ̀ Yesò nàa ngȩ̀ȩ̀na a èbem lob nɨ̧ Mbɔ̧ɔ̧mà la, bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ Bèjuê e kɨ̀Ꞌɨ̂

²⁸mbììte atò nê “Àa nɨa àtɔŋ nè ŋa ka ngɨ̀à èghɨ ba à? Waa ka tà ŋa awê àtɔŋ ngaa la à?”

²⁹Yesò tsɔꞋɔ èngǎ̧ wɔb nê, “Maa biite awɨ̧ wuê èngà̧ wemɔꞋ. Bɨ tsɔꞋɔ èwùà, ko maa shua wɨ̧ àtɔŋ yu màa nɨa ngɨ̀à èghɨ bàa la.

³⁰Bɨ̀ shu am, wàa ka tà li ntsà a Jɔ̌n nê tà me zǐ bòt a èdzî la à? È li ngu Mbɔ̧ɔ̧mà kò wuê bɔbȩ à?”

³¹Bɔ bùꞋ me kààne a kètsìà wɔb shua nê “Bàa laꞋnê ghàà? Ba wu anè nê ‘Mbɔ̧ɔ̧mà’ ko taa biite awa nê, ‘À wu ale ghǎ ghɨ̀ ka bà ka bɨ̧ɨ̧ne èngǎ̧ tò à?’

³²Ka bà nê ‘abua bɔbȩ’.” (Bɔ li ngua mbɔ̀a ènɔ̧̂ bòt bu nkàà nê bɔ li mbɨ̧̀ɨ̧̀ne bàgème nê Jɔ̌n li ngu ndàꞋàtɔŋ Mbɔ̧ɔ̧mà).

³³Ale, bɔ tsɔꞋɔ èngǎ̧ Yesò nê “Baa bakà ko.” Tà shu abua yɔb nê “Ale betsiꞋa è nka shu awɨ̧ àdziꞋa mâ nɨ àtɔŋ ka me ghɨ̌ èghɨ bàa la.”