Read Mundani Mak 13 Bible Online

Mak 13 - Mundani bible

Mak 13

¹Mbɨ̀Ꞌɨ̀ Yesò li ngua sà lob nɨ̧ Mbɔ̧ɔ̧mà yu la, wakatè tò kǒ shu abua tò nê, “NyɨꞋtà, chɨɨme ndzè ngule àti a ntsɔ̧̀ ko bɔ nɨŋ mvəè lob nɨ̧ Mbɔ̧ɔ̧mà la, mè ndzě ndɨ lob tàà tègème tèa mbɔ̀ la.”

²Yesò nê, “Bɨ ye ngule lob tà à? Bɔɔ li bùù lob te mbɔŋ tègème tè wòt kɨꞋɨ abot tà kà tsi ndzè ka wuê èti lemɔꞋ ane àtetsi.”

³Mbɨ̀Ꞌɨ̀ Yesò tseke a ègwet èbȩ Olìf è wu a mbì lob nɨ̧ Mbɔ̧ɔ̧mà la, Pità bɔ̂ Jimsì nè Jɔ̌n bɔ̂ Andùlù e kɨꞋɨ̀ a ntsèm mbììte atò nê,

⁴“Àfɨ̀Ꞌ yu èghɨ bàa àa li me ghɨ̌ la wu ka àfɨ̀Ꞌ à? Èghǎ aa li nyɨ̀Ꞌte nê èghɨ ngaa e tsiꞋa nkɨ me ghɨ à?”

⁵Yesò shua abua yɔb nê, “Bɨ̀ me ko awɨ̧ mbɨ̀Ꞌɨ̀ wòt fɨte awɨ̧.

⁶Bòt aa li taꞋa kɨꞋɨ ane èlen laã me shu nê, bɔ wu tòà wu nga ekɨꞋɨ la, te fɨte bòt ko nyaŋ.

⁷Naa wu àfɨꞋa bɨ zə nê mèbet dzəâ a ngèt yɨ̧, mè ndzəa èlaꞋ a ko la, mèntɨ̧ɨ̧ mɨ̧ ka mbènte. Èghɨ mbɔŋ e bɔ ndɨ àa bɨ̌ ghɨ la. Ka è ka wua nyɨ̀Ꞌta nê àfɨꞋa ngɔ̀ŋ nàa lìà la a kùꞋ.

⁸ÈlaꞋ aa li nù èbeko, bèfɔ̧̀ e nù èbeko. SitsǎꞋ naa li me nyiꞋa nkwèà a èdzìꞋ ègème, èchɨɨ e mè nge. Mènəè màà naa li wua nyɨ̀Ꞌta wu ntseit, wuê mbɨ̀Ꞌɨ̀ àvi nàa ngɨ̀ tà me kɨ ebi waã tà bùꞋ me lu̧u̧te la.

⁹“Bɨ bɔ ndɨ bɨ̀a nɨ àfɨ̀Ꞌ à yɨ̧ ntsɔ̧̀ la. Bɔɔ li baãaã awɨ̧ e ghǎ saꞋa, e lɔ̀Ꞌɔ shu̧u̧ awɨ̧ a èbem lobte Mbɔ̧ɔ̧mà. Bɨa li tɨ̧ɨ̧ a mbì bèfɔ̧̀ nè bɔɔjuŋ àlaꞋ ambo yaã, e tsɔ̀tè Ntu̧ Ntsɔ̧̀ yu abua yɔb.

¹⁰Ngɔ̀ŋ naa li me laꞋ nê yea ndìà, bɔ yaã mbɨ̀ ntsɔ̀tè Ntu̧ Ntsɔ̧̀ kèfɔ̧̀ Mbɔ̧ɔ̧mà a èlaꞋ ègème.

¹¹ÀfɨꞋa bɔ zì èbu ane yɨ̧ me nɨa nga a lob èsaꞋa la, bɨ̀ ka me kwàꞋte ànəa bɨ̀a ghǎ eshu la. Naa wu àfɨꞋa mbɔŋ bɨ làꞋà wuê àghɨa a kɔꞋ a mèntɨ̧ɨ̧ mɨ̧ la, nkàà nê èngǎ̧ mbɔŋ e ka dzə abua yɨ̧, e dzə abua Fo Kèfə.

¹²“Wòt naa li ŋa wanyɨ vi nê bɔ buŋa, tǎt mè ngu ghɨ̌ a èlɨ mbɔŋ ane waã vi, bɔ̧ e mè ngu li elɔ̀ke mbù̧tsə ane bètǎt bɔb e ghɨ̌ bɔ bùŋè àwɔb.

¹³Bòt bàgème aa li me pààbè àwɨ̧ ambo yaã, ka wòt tà baãaã èntɨ̧ɨ̧ vi tè ngà ndià la, naa li bɔ mèmpème.

¹⁴“Bɨa li ye àbɨꞋte àghɨ yu a tɨ̧ɨ̧ àdzìꞋa a ghɨ̂ à ka wu tɨ̧ɨ̧ la.” (Wòt wu ntɔ èngà̧ waa la nyɔꞋta nko ànəa èngǎ̧ mbɔŋ e shua la.) “ÀfɨꞋa mbɔŋ, bòt bu a Jùdià la è luula ngà a ègwet tèbȩtsə.

¹⁵Wòt tà wu a kɔ̧̀ lob la ka ntsòkè àfɨ̀Ꞌ nê ye gha a lob enɨ àghɨa ko.

¹⁶Wòt tà wu a mbȩ la ka nê ye gha lob enɨ èmǎ̧ vi.

¹⁷Aa li bɨɨ àbâ bèzi bu bɔ kɔte la, nè èbu bɔ̀ɔ nyɔ̀ŋa bɔ̧ la àfɨꞋa mbɔŋ.

¹⁸Bɨ̀ tsàꞋte a Mbɔ̧ɔ̧mà nê èghɨ mbɔŋ e ka ndi ngɨ̀ àfɨꞋa àbɨ̂ŋ.

¹⁹Bɨ̀ ko nê ngoꞋ tu ane èli mbɔŋ la tea li bɨɨ te tsè ète ngɔ̀ŋ yaa li me ye ebùꞋa te àfɨꞋa Mbɔ̧ɔ̧mà li ngɨ̀ yùà la, ekɨꞋɨ wu àfɨ̀Ꞌ yaa. Àghɨ ko à ka wu e li mě wu mbɨ̀Ꞌɨ̀ àyùà.

²⁰È kà chɨɨme ngu na Mbɔ̧ɔ̧mà lo̧o̧ne èli mbɔŋ tè ndɔ̀Ꞌ la, ko wòt kǒ tàa li peme la ntsě, ka tàà ghǎ ambo bòt bu tà làa ane bi la elo̧o̧ne èli mbɔŋ.

²¹Wòt lia shu abua yɨ̧ àfɨꞋa mbɔŋ nê, ‘Ye a Fɔ̧̀ wu Mbɔ̧ɔ̧mà li ndzɔꞋ etsàà la àdzìꞋ yaa’ kò ‘Ye atò a si nyìà leꞋ’, bɨ̀ ka mbɨ̧̀ɨ̧̀ne.

²²Bòt nyaŋ aa li kɨꞋɨ me fɨta shua nê bɔ wu Fɔ̧̀ mbɔŋ, èbeko aa me fɨte nê bɔ wu bèndàꞋàtɔŋ Mbɔ̧ɔ̧mà. Bɔɔ li me ghɨ̀ èghɨ àa nyɨ̀Ꞌta mètàŋ Mbɔ̧ɔ̧mà la e mě me lute tèkaŋtsə, enɨ fɨte bòt Mbɔ̧ɔ̧mà, na bɔ wu ko e ghɨ̀ la.

²³Waa waa me ko avi, na mâ shu awɨ̧ àfɨꞋa ntsɔ̧̀ tè ndɔ̀Ꞌ la.

²⁴“Naa li ngu ane èli bu ngoꞋ yu è tsè la, ‘Àtaãnyèm a fen, èŋu è ka tsi fə,

²⁵těnto̧ tu a ègwet la te kwentè a si, Mbɔ̧ɔ̧mà mè nyìꞋi èghɨ ègème àa ègwet la.’

²⁶“ÀfɨꞋa mbɔŋ, ko Waã Wòt naa dzə a èbem mbàꞋ a ègwet, nè mètàŋ bɔ̂ mèngùꞋte ènɨ̧ Mbɔ̧ɔ̧mà.

²⁷Taa li tsàà bɔntu̧ Mbɔ̧ɔ̧mà bɔɔ ghǎ fete bòt bu tà làa ane ebi la, a bètɔ̀Ꞌa ngɔ̀ŋ bàgème nè bètɔ̀Ꞌa ègwelebuule tègème.”

²⁸“Bɨ̀ nɨ nkɨ̀a ane àyɨt a fik yaa. Nàa ngɨ̀ è wu àfɨꞋa mèntaãaã tò fen, tà bùꞋ me kɔke tèfəꞋte fi la, bɨ ko nê mènkwenà nàà nkɨ̀Ꞌa.

²⁹Wu wuê èlɨ bɨ yea èghɨ bàà ègème e ghɨ̀à la, bɨ ko nê, Waã Wòt kɨꞋɨ tê ntsiꞋa ètsələèꞋ la.

³⁰Ane nkûŋ, tsiꞋ è shu awɨ̧ nê, bòt ngɔ̀ŋ àfɨ̀Ꞌ yaa aa me laꞋnê bɔɔ ndèma, èghɨ bàagème e ghɨ̀.

³¹SitsǎꞋ bɔ̂ ègwet naa li lɔ̀Ꞌɔ lìa, ka àghɨ à ka wuê li ekubte ane èngǎ̧ am.

³²“Ka wòt kǒ ntsě tà ko àlia èghɨ bàà àa ghɨ̀ la, ka wuê bɔntu̧ Mbɔ̧ɔ̧mà bu a ègwet la, kò Waã Wòt leꞋ. Wu ndàꞋ Mbɔ̧ɔ̧mà ka tà ko la.

³³Bɨ̀ me ko awɨ̧, mè me lȩ̂ ntsɔ̧̀, nkàà nê bɨ bakà ko àfɨꞋa mbɔŋ.

³⁴ÀfɨꞋa mbɔŋ aa li wu mbɨ̀Ꞌɨ̀ wòt tà me dzəè àpfəè azi ngà a lèghȩ̀ȩ̀nè, ngàbtè àfàꞋ abua bɔfàꞋ bi nê bɔ̀ tsiꞋi me ghɨ̌, mbɔ̂ shu abua wòt wu a ètsələèꞋ la nê, tà me baabe èdziꞋ la.

³⁵“È wu ale, bɨ̀ me baabe awɨ̧ nkàà nê bɨ bakà ko àfɨꞋa tǎt lob nàa kua la. Tà bakà kua a nyèmtèsi, ko ateko taa kua a èntɨ̧ɨ̧tsəꞋ, mbə tà kuà àfɨꞋa ètsəꞋ e tsiꞋa nkɨ tsi la, ko àfɨꞋa nyèm tsìꞋa nkɨ esaꞋa la leꞋ.

³⁶Tà màà nkɨ̀Ꞌa wuê àfɨꞋa ŋa leꞋ, tà ka nkwene ane yê ndìa la.

³⁷Maà shuà èngà̧ waa abua yɨ̧ ale, mè ngua shua abua waa waa nê, ‘Bɨ̀ me lȩ̂ èdziꞋ!’ ”