Read Mundani Mak 6 Bible Online

Mak 6 - Mundani bible

Mak 6

¹Yesò li ndɔ̀Ꞌ abot ngwènè àlaꞋ azi. Me ghà ale, bɔkatè tò bu e kuŋe atò.

²Tà lɔ̀Ꞌɔ àliapfəèa Bèjuê, ngà me nyɨꞋte a lob Mbɔ̧ɔ̧mà yɔb. A taꞋa tsě bòt bu njùtâ la, tè bɔ tsiꞋa mbììta nê: “Mbê waa nɨ̀ mèngà̧ maa ègème nèŋàà? Tà nchɨɨme nɨ̀ èwuu èyì waa nèŋàà? Ye èwuu mènəè kà ye fɨ̀Ꞌ kǒ tàa ngɨ̀à la!

³Tè eyaa ntsě kapentà wu tà wù waã Màlià la à? Ka Jimsì bɔ̂ Jòsêb, nè Simùn bɔ̂ Judàs wu bɔnyɨ tò à? Ka bɔnyɨ tò bɔɔ̀zi aà ntsèka ba tò ba à?” Bɔ làꞋ ale, mbɔ̂ ntû̧ èngǎ̧ tò.

⁴Yesò shu abua yɔb nê, “Bɔɔ nkùkta ndàꞋàtɔŋ adzìꞋ àgème, tè tsìꞋi wuê bòt àlaꞋ atò nè bòt àndǎ̧ tò.”

⁵Tà li tà kà ghɨ ènəê kà ye fɨ̀Ꞌ abot nyaŋ, tè è bəèa wuê ndɨ tà li nɔ̀ŋè èbu bi àtsəa bòt èghɔ̧ mbɔ̀ŋè basòꞋa leꞋ, mbəè àwɔb la.

⁶A li ntàꞋa tsě atò ndɨ̀ wu bɔ li bɔ̀ ka zi èntɨ̧ɨ̧ wɔb ane tò la. Ale, Yesò me ghȩ̀ȩ̀ne a èbem èpfəè nyɨ̀Ꞌta bòt èngǎ̧ Mbɔ̧ɔ̧mà.

⁷Tà li ntɔ bɔkatè bi bu ntsɔ̀b babe la, ntsàà àwɔb àbȩ babe babe. Me tsà àwɔb ale, ŋa wɔb àtɔŋ bɔɔ me nɨa fəèà fote kàbɔ̀ŋ ane bòt la.

⁸Mbɔ̂ shu abua yɔb nê, “Bɨa me ghǎ, wòt ka nɨ̀ àghɨa tsa kà wu ambàŋ. Wòt ka nɨ̀ ka wuê èghɨjɨ, kò wuê ambè, kò èkab a ntaꞋà zi leꞋ.

⁹Wòt kwaã gùb ti, ka tà ka nɨ̌ ndǐmàꞋa tsǎ ka nè yu tà kwaã la.”

¹⁰Tà li mè shu abua yɔb nê, “ÀdziꞋ àgème bɔ sèe àwɨ̧ la, bɨ tseke abot tè àlia bɨ̀a me ghà la a kùꞋ.”

¹¹Ka wòt bakà sèe awɨ̧ àdziꞋ, mbakà yute ànəa bɨ shua la, bɨ̀ me ghǎ bɨ yòò àbeb àdziꞋ mbɔŋ ane èka bɨ̧, nɨŋ nyɨ̀Ꞌte nê bɔ ghɨ ànəa kàbɔ̀ŋ ane yɨ̧.

¹²Bɔkatè Yesò bu e zə ànəa tà shu la, ngà me tsɔ̀te nê bòt è waꞋa mènəè kàbɔ̀ŋ mɔb.

¹³Bɔ li ntaꞋa fə fote kàbɔ̀ŋ ane bòt, mè ndzɔ̀Ꞌɔ mèwet ane èbeko ngò̧ò̧nà la mbɔ̂ mbəè àwɔb.

¹⁴È li ngu àfɨꞋa mbɔŋ fɔ̧̀ Elɔ̀d zə èghɨ è le wua ngɨ̀à la nkàà nê èlen Yesò e li ntàꞋa ghȩ̀ȩ̀ne. Bòt ko e li ntsìꞋa shua nê, “Jɔ̌n ndzìà èdzî è yu̧u̧mè! Eyaa wu àghɨa a ghɨ̀ ka tà bɔ mètàŋ me ghɨ̀ tèwuute mènəè maa la.”

¹⁵Bòt ko e me shu nê, “Wu Èlȩjà.” Èbeko e me shu ayɔb nê “Tà wu ndàꞋàtɔŋ Mbɔ̧ɔ̧mà mbɨ̀Ꞌɨ̀ èbe èlia mbì.”

¹⁶Mbɨ̀Ꞌɨ̀ Elɔ̀d è zə mènəè maa la tà nê, “Tà wu Jɔ̌n ndzìà èdzî wu e ndi ndo àtsəa tò la tà yu̧u̧me la.”

¹⁷Elɔ̀d ko nê ye li ngɨ̀ bɔ baãaã Jɔ̌n nkùùle atò maꞋa fȩ ambo Èlɔdìà, vi wanyɨ tò Filìb tà fâ nɨŋ la.

¹⁸Ngu ndɨ Jɔ̌n li shu abua tò nê mbɨ̧ tɔb te bakà bɨ̧̀ɨ̧̀ne nê tà fǎ Èlɔdìà vi wanyɨ vi la.

¹⁹Ale, Èlɔdìà baãaã Jɔ̌n a èntɨ̧ɨ̧ vi, me kɨ e ghɨ̌ bɔɔ bùŋe atò, ka tà ka ye èlu̧,

²⁰ngu nê Elɔ̀d li ngua mbɔ̀a a Jɔ̌n, ndɨ̀ wu tà lè ko nê tà wu wòt ntsɔ̧̀, mè ngu wòt Mbɔ̧ɔ̧mà la, ale, tà nɔ̀ŋè atò ntsɔ̧̀. Elɔ̀d li ngua nkɔ̀ŋkà e zə èngǎ̧ Jɔ̌n, ka tà zə a tàꞋa kɨ̀Ꞌne atò.

²¹A li ngà me lìa, èlu̧ e dzə a si abua Èlɔdìà, àfɨꞋa Elɔ̀d nàa ngùꞋtà àlia bɔ̀ le lɔꞋ mbi atò la bɔ̂ bèkěm nɨ̧ bi, nè bɔɔjuŋ ayɔɔ bèshujà, nè bòt nɨ̧ àlaꞋ a Galìlî.

²²Mbɨ̀Ꞌɨ̀ waã Èlɔdìà waàvi nyi a lob mben la, a taꞋa bɔ̌ Elɔ̀d bɔ̂ bègɨ̧̀ bi. Fɔ̧̀ Elɔ̀d shu abua waàvi wu nê, “Lo̧ àghɨa à kɔ̀ŋkè la, ko maa ŋa abua yê.”

²³Elɔ̀d zì nkà̧ abua tò nê, “À bììta wuê ghà leꞋ, ko maa ŋa, ka è màà ngu wuê àbâ àlaꞋ am.”

²⁴Waàvi wu dzəè ngà àbȩ mbììte a nyɨ̌ vi nê yè lo̧ ghà leꞋ? Nyɨ̌ tò wu nê, “Lo̧ àtsəa Jɔ̌n ndzìà èdzî.”

²⁵Waàvi wu bê ndùùlà ngwènè abua fɔ̧̀ shu abua tò nê “Ŋa àtsəa Jɔ̌n ndzìà èdzî abua am àfɨ̀Ꞌ yaa a èbem ankì.”

²⁶Fɔ̧̀ zə ale, a taꞋa saa tò, ka ndɨ̀ wu tà ghɨ̂ ngɨ̀ tè ndzì nkà̧ a mbì bègɨ̧̀ bi la, tà kà wua nkɨ e bəꞋə èngǎ̧ vi.

²⁷Ale, tà tsaa shujà kǒ ane èbu bèa mbààba atò la nê tà gha nɨ̀ àtsəa Jɔ̌n nkɨ̀Ꞌɨ̂. Shujà wu gha a lob tèfȩ yu, ndòò àtsəa Jɔ̌n,

²⁸ndzi a èbem ankì nkɨ̀Ꞌɨ̂ ŋǎ abua waàvi wu, tà ghà ŋa abua nyɨ̌ vi Èlɔdìà.

²⁹ÀfɨꞋa bɔkatè Jɔ̌n e zə ànəê yaa la, bɔ kɨꞋɨ̀ mpàa àkènkwèn yu nɨŋ ngà ntuê a èbem èsî.

³⁰Bɔntu̧ Yesò bu e li nkua a lèghȩ̀ȩ̀nè wu nkwene ane tò, shua tò àghɨ àgème bɔ ghɨ̂ mè nyɨ̀Ꞌte la.

³¹Bòt e li ntàꞋa wua nkɨ̀Ꞌa ndzèa Yesò mè ngà, tè bɔ̂ bɔntu̧ bi è ka lem ntsi mbɔ àfɨ̀Ꞌ ejɨ èghɨjɨ bɔb. Ale, tà shu abua yɔb nê, “Bɨ̀ ghɨa ba nɨ̧̀ ba è gha àdziꞋa kà ye bòt bɨ̀ nyaꞋ ndzètè.”

³²Ale, bɔ lɔꞋɔ abot nyi a èbem ànkànuꞋ, ngà àdziꞋa ko bɔ̀ɔ ndziꞋne.

³³Ka bòt nyaŋ e ye awɔb ngà la, nko awɔb, ndzəa èpfəè ègème nduula èka ngà a mbì nyi àdziꞋa ngaa ka Yesò bɔ̂ bɔkatè bi bu e kɨꞋɨ̀.

³⁴Mbɨ̀Ꞌɨ̀ Yesò dzəâ a èbem ànkànuꞋ yu la, tà ye taꞋà ènɔ̧̂ bòt, tèsȩ tɔb te kua tò, nkàà nê bɔ li ngu mbɨ̀Ꞌɨ̀ njɨ̀tsə kà yea mbaabà. Ale, tà bùꞋ me nyɨꞋte awɔb mènəè nyaŋ nyaŋ.

³⁵È tseke tè ngu àfɨꞋa nyèmtèsi, bɔkatè tò e kɨꞋɨ̀ shu abua tò nê, “Eyaa wu àdziꞋa kà ye bòt, àfɨ̀Ꞌ a mè ngà,

³⁶è wu ale à ghɨ̀ bòt baa e taate nga a èbem èpfəè njù̧ù̧te èghɨjɨ bɔb.”

³⁷Yesò bɨ̀ɨ̀lè nê “Bɨ̀a mbɔŋ bɨ̀ ŋa àghɨ bɔ̀ jɨ.” Bɔ biite atò nê, “À shua nê bà nɨ bèdìnalì [1] ènkɨ̀ yebe njù̧a bled ŋa bɔ̀ jɨ?”

³⁸Yesò mè mbììte awɔb nê, “Bɨ bɔ tètaãaãte bled tesòꞋa? Bɨ̀ lɨŋka bà ye.” Bɔ ghà ndȩ̀ nkɨ̀Ꞌɨ̂ shu abua tò nê, “Tètaãaãte bled tetà̧â̧ nè basə babe.”

³⁹Yesò shu abua bɔkatè bi nê bɔ̀ fete bòt bu ane ndzɔ̀ŋtsə ngɨ̀ bɔ̀ tseke a ègwet mèfəèꞋ.

⁴⁰Ale, bɔ tseke a si ane ènkɨ̀ ènkɨ̀ nè èghem yetà̧â̧ yetà̧â̧ ane ndzɔ̀ŋ.

⁴¹Yesò nɨ̀ tètaãaãte bled tu tetà̧â̧ la nè basə bu babe la, ndɔ̀kè a vi ndɨ̀ŋkè ègwet ŋà mènkɔ̀ŋke abua Mbɔ̧ɔ̧mà, mbɔ̂ mbòꞋte bèbled bu ŋa abua bɔkatè bi nê bɔ ghàbte abua bòt bu.

⁴²Wòt ègème jɨ ndzet.

⁴³Bɔkatè bu e fetè bèbled nè basə be bəèꞋəè la be lu̧ bankì ntsɔ̀b babe.

⁴⁴Mbâ̧tsə te li njɨ la li ngu bètɔsì batà̧â̧.

⁴⁵ÀfɨꞋa mbɔŋ Yesò ghɨ̀ bɔkatè bu e nyi a èbem ànkànuꞋ nga a mbì tò agua èlemè àko zia, a Bèsedà, tà tsìꞋi ngɨ̀ ènɔ̧̂ bòt bu e taatè.

⁴⁶ÀfɨꞋa tà làꞋnè àwɔb la, tà gha a ègwet ekù̧ù̧nè ko etsàꞋte Mbɔ̧ɔ̧mà.

⁴⁷Nyèm me fene, ànkànuꞋ yu a wu a kètsìà èlemè wu, Yesò bɔ ngu aguŋ zìa ndziꞋne.

⁴⁸Tà ye ndɨ bɔkatè tò bu e yea ngoꞋ ŋwèèlà ànkànuꞋ yu, ndɨ̀ wu àfeme aa nkɨ̀Ꞌa àbâ yu bɔ ghà la. ÈtsəꞋ e me tsi, Yesò me ghȩ̀ȩ̀ne a ègwet *èdzî nkɨ̀Ꞌa ekwene ane yɔb. Tà kɨꞋɨ tê tà tsiꞋa nkɨ epààtè wɔb,

⁴⁹bɔ ye atò mbènte ŋȩ nê “Wu mpfəà!”

⁵⁰Ngu ndɨ bɔ ye atò ale ntaꞋa bɔa la. Yesò shu abua yɔb kwàꞋ àfɨꞋa mbɔŋ nê “Bɨ̀ baãaã mèntɨ̧ɨ̧ mɨ̧! Wu mmɔ̌, bɨ̀ ka mbɔ̀a.”

⁵¹Tà nyi a èbem ànkànuꞋ yu, àfeme yu a loà,

⁵²nkàà nê èyì wɔb e li e ka ziꞋ ndzàà bɔɔ ko àghɨa Yesò li me nɨ tètaãaãte bled ejɨɨ bòt ale, ngua nɨ̀a nyɨ̀Ꞌta la. Mèntɨ̧ɨ̧ mɔb li è kà ko mbà̧aã àyea mbɔŋ.

⁵³Mbɨ̀Ꞌɨ̀ bɔ ntû̧ èlemè la, bɔ kwene a si Gènesalèt, sèlè ànkànuꞋ yu abot.

⁵⁴Mbɨ̀Ꞌɨ̀ bɔ dzə a èbem ànkànuꞋ la, bòt e bê ndȩ̀ a Yesò.

⁵⁵Ale, bɔ lùùlà ngà àdziꞋ àgème ŋèꞋte bòt àghɔ̧ a ègwet bèmatà bɔb nkùŋè atò àdziꞋ àgème bɔ zə nê tà wu abot la.

⁵⁶ÀdziꞋ àgème Yesò ghà la, a èpfəè techɨɨle nè èbe nɨ̧ kò mbȩtsə leꞋ, bòt e nɨ bòt èghɔ̧ nga èsà̧aã tèwentsə nɔ̀ŋè. Mbɔ̂ shù̧ù̧te atò nê tà tsiꞋ bèngɔ̧̀ bu è lem mbà̧à̧ta ka wuê ntseit ndǐ tò. Ngɨ̀ ale, wòt ègème tà mbà̧à̧te àtsəa ndǐ tò la, pem.