Read Mundani Mak 8 Bible Online

Mak 8 - Mundani bible

Mak 8

¹Àfɨ̀Ꞌ a me tsě, ènɔ̧̂ bòt e mè mbù̧ù̧tè. Bɔ̀ ka bɔ àghɨ ejɨ, Yesò tɔ bɔkatè bi shu abua yɔb nê,

²“Tèsȩte bòt baa teà nkua am, nkàà nê, àfɨ̀Ꞌ yaa wu èlibȩ betat, bɔ̀ wu ba tò ba la kà bɔ àghɨa bɔ̀ɔ jɨ la.

³Maà kà kɨ esà wɔb bɔɔ ghà kà jɨ àghɨ mbɨ̀Ꞌɨ̀ ka bɔ gha alu̧ ndzìtsə te nɨa wɔb.”

⁴Bɔkatè tò bu e tsɔꞋɔ èngǎ̧ tò nê, “BetsiꞋa ba chɨɨmè nɨ èghɨjɨ nèŋà àbâ àlaꞋ àyuube ŋàa tè njɨɨ taꞋà bòt baa?”

⁵Yesò mè mbììte awɔb nê, “Bɨ bɔ tètaãaãte bled tesòꞋa?” Bɔ nê, “Tètaã tesà̧à̧mbe.”

⁶Yesò ghɨ̀ bɔ tsekte a si, tà nɨ̀ tètaãaãte bled tu tesà̧à̧mbe la, ŋà mènkɔ̀ŋke abua Mbɔ̧ɔ̧mà mbɔ̂ mbòꞋte ŋǎ abua bɔkatè bi, bɔ ghàbte abua ènɔ̧̂ bòt bu.

⁷Bɔ li mbɔ̀ bɔbɔ basə ko mɨ̧̂, Yesò ŋà mènkɔ̀ŋke adù̧ və mbɔ̂ shu abua bɔkatè bi bu nê bɔ̀ ghàbte abua ènɔ̧̂ bòt bu.

⁸Wòt ègème jɨ ndzet, tè bɔkatè tò e fete èbe e bəèꞋəè la, be lu̧u̧ bankì basà̧à̧mbe.

⁹Bòt ngaa e li ngu mbɔ̀ŋè bètɔsì bakwì.

¹⁰ÀfɨꞋa mbɔŋ, Yesò ghɨ̀ bɔ me ghǎ, tà nyi a èbem ànkànuꞋ nga àbâ àlaꞋ a Dàmànutà.

¹¹Bèfalèsiì ko e li nkɨ̀Ꞌɨ̂ abua Yesò, mbùꞋ me kààne mènəè bɔ̂ tò ba. Me kɨ enyɔꞋte atò shu abua tò nê tà nyɨꞋte awɔb àlȩê nê Mbɔ̧ɔ̧mà ka tà tsàà vi la.

¹²Yesò lâ ndèmè mbɔ̂ nê, “Ghǎ ghɨ̂ ka bòt laane e me kɨ ànəa kà ye fɨ̀Ꞌ à? ChaꞋ, tsiꞋ è shu awɨ̧ ane nkûŋ nê, è nka nyɨꞋte àlȩê ko abua bòt baa.”

¹³Tà shu ale, mbɔ̂ sà wɔb, ngwènè a èbem ànkànuꞋ yu ntû̧ èlemè wu nga aguŋ zìa.

¹⁴Bɔkatè Yesò e li ndèènè enɨ a bled, tè ntsìꞋi bɔ wuê kètaã kemɔꞋ a èbem ànkànuꞋ yu.

¹⁵Yesò kɨ̀ɨ̀te awɔb nê, “Bɨ̀ me ko awɨ̧ mè mbààba awɨ̧ ane yis Bèfalèsiì nè we Elɔ̀d.”

¹⁶Bɔ bùꞋ me làꞋa a kètsìà wɔb shua nê, “Tà làꞋ ànəa yis anè ndɨ̀ wu ba bakà bɔ a bled la.”

¹⁷Yesò è ko ànəa bɔ làꞋà la, tà biite awɔb nê, “Bɨ ghɨ̀ na ka me laꞋa kètsìà wɨ̧ shua nê bɨ bakà bɔ bled à?” Ètsə bɨ̧ e bele kà zìꞋì ndzààtè? Bɨ bakà buꞋu te me ko mènəè? Mèntɨ̧ɨ̧ mɨ̧ è ghɨ̀ na ka me kweele ale à?

¹⁸Bɨ bɔ àghɨ ghǎ ghɨ̀ ka bɨ̀ ka wua ndzèa èdziꞋ à? Mbɔ̌ ètû̧ ghǎ ghɨ̀ ka bɨ̀ ka wua ndzəèa èdziꞋ à? Bɨ bakà tsi nkù̧ù̧te,

¹⁹àfɨ̀Ꞌ yu e ndi mbòꞋte tetaãaãte bled tu tetà̧â̧ ŋǎ abua bòt bètɔsì batà̧â̧ la à? Bɨ li fete bankì basòꞋa? Bɔ tsɔꞋ nê “Èghem ntsɔ̀b babe.”

²⁰Tà mè mbììte awɔb nê, “E ndi mbòꞋte tètaãaãte bled tesà̧à̧mbe ŋǎ abua bòt bètɔsì bakwì ale, bɨ fetè èboꞋte a èbem bankì basòꞋa?” Bɔ tsɔꞋ nê “Bankì basà̧à̧mbe.”

²¹Yesò mè mbììte awɔb nê, “Tè bɨ bakà zìꞋì nko àghɨa èghɨ bàa e nyɨꞋtà la à?”

²²Bɔ li nyi a Bèsedà, bòt ko e nɨ wòt kǒ àghɨ a tò a leme la, nkɨ̀Ꞌɨ̂ shù̧ù̧te nê Yesò baãaãte a ŋut, mbəèa tò.

²³Yesò baãaã wòt àghɨ àleme wu ane àbu atò nɨŋ ndzəè a èbem àpfəè və. Yesò dzəè ale, tà tsəè mat ane àghɨ a mbê wu, nɔ̀ŋè èbu bi ane tò, mbɔ̂ mbììte atò nê, “Tè à ye èdziꞋ?”

²⁴Mbê wu lɨ̀ŋkè ègwet mbɔ̂ nê, “Maà ndzea bòt, ka bɔ fəə èyɨt ngȩ̀ȩ̀nà ngèbla la.”

²⁵Yesò mè nɔ̀ŋè èbu bi ane àghɨ a tò yu. ÀfɨꞋa mbɔŋ, tà lɨ̀ŋkè èdziꞋ ane ètɨ̧̂, àghɨ a tò a ghaꞋtè tè tà me nèèta ndzèa èdziꞋ.

²⁶Yesò bɔ̂ shu abua tò nê tà wene a lob zi ka tà ka tsi nga àpfəè yu tà ghɨ̂ ndzəè la.

²⁷Yesò bɔ̂ bɔkatè bi e li ngɨ̀ ale nga àpfəè bu a ngèt Sìsalìà Filìpȩ la. Bɔ me gha alu̧ tà bììte awɔb nê, “Bòt àa shua nê e ngu wàà?”

²⁸Bɔ bɨ̀ɨ̀lè nê “Bòt ko aà shua nê à wu Jɔ̌n ndzìà èdzî, èbeko e shua nê à wu Èlȩjà, ka nè èbe bèa shua nê à wu ndàꞋàtɔŋ nyaꞋ Mbɔ̧ɔ̧mà kǒ la.”

²⁹Tà mè ntsìꞋi biite awɔb nê, “È me wu awɨ̧ bɨ shu nê è ngu wàà?” Pità bɨ̀ɨ̀lè nê “À wu Fɔ̧̀ wu Mbɔ̧ɔ̧mà yɔꞋ ntsà la.”

³⁰Yesò ghɨ̀ ale, mbɔ̂ səèŋkè ètû̧ bɔb nê wòt ka ndàꞋ ànəa zi abua wòt.

³¹Yesò li mbùꞋ me nyɨꞋte bɔkatè bi nê, “Waã Wòt bɔ ndɨ tàa ye ngoꞋ nyaŋ la. Bèkěm nè bɔɔjuŋ nè bèntsìà mèpɨ̧̀ nè bènyɨꞋtà mbɨ̧te Musì, aa tsìa tò ayɔɔ, ebùŋe atò, ka naa me wu ane èlibȩ betat taa yu̧u̧me.”

³²Tà li nèètè shu ntsɔ̧̀. Pità nɨa tò bɔ səèꞋtè àwɔb, tà bùꞋ me fèèle atò.

³³Ka Yesò ghèble avi ndɨ̀ŋkè bɔkatè bi, mbɔ̂ ŋȩte Pità nê, “LɔꞋɔ a ngèt yaã à Satàn! Àà nkèla alu̧ am. Mènəè maa à mɨ̀ɨ̀tà la ka dzəa abua Mbɔ̧ɔ̧mà, è dzəè nè abua bɔbȩ.”

³⁴Tà ghɨ̀ ale, tà tɔ ènɔ̧̂ bòt bu nè bɔkatè bi shu abua yɔb nê, “Wòt me kɨ eghȩ̀ȩ̀ne ateka taã, tà sà mènəè mi ègème ŋèꞋe mbasa vi nkùŋè am.

³⁵Wòt me baabe àtsə azi ko taa pfə, ka wòt tà ŋà àtsəa zi ambo yaã nè Ntu̧ Ntsɔ̧̀ la, naa peme.

³⁶Wòt wua ane mbɔ̀ èghɨ sitsǎꞋ ègème, mbɔ̂ nyɔ zìambɔŋ tà ko nê àbȩ̀ àzi wu ghà à?

³⁷Kò àghɨa ko aà və betsiꞋa wòt ŋa nɨŋ nchùꞋ àtsəa zi la à?

³⁸Ale, àtsəa wòt a me kɔꞋɔ ambo yaã nè mèngǎ̧ mɔ̧, a èbem ngɔ̀ŋ èbɨꞋte mènəè laane, ko àtsəa Waã Wòt aa li kɔꞋɔ ane tò mɨ̧̂ àfɨꞋa tàa li kɨꞋɨ ane ènɨ̧ Tǎt vi bɔ̂ bɔntu̧ bi la.”