Read Mundani Lûk 1 Bible Online

Lûk 1 - Mundani bible

Lûk 1

¹Wòt èkɔŋ am Tìofilɔ̀s, bòt nyaŋ e nyɔꞋtè shɨ ànəa èghɨ bu bɔ ko nê e ghɨ̌ a kètsìà wa la.

²Bɔ shɨ ènəê bu ba zə a ètsəê bòt bu bɔ li ndzè èghɨ mbɔŋ a mèmbuꞋu ndɔ̀Ꞌ ntsɔ̀tè la.

³Mbɨ̀Ꞌɨ̀ mâ kùŋe mènəè maa ègème a mèmbùꞋu la, mâ kwaꞋtè nê è shɨ mènəè mbɔŋ a si mɨ̧̂ abua yê, àwɔ̀ Tìofilɔ̀, wuê mbɨ̀Ꞌɨ̀ è li ntsè la.

⁴E ngɨ̀à anè mbɨ̀Ꞌɨ̀ aa ko nkûŋ anè ànəa èghɨ bu bɔ li nyɨ̀Ꞌte awê la.

⁵È li ngu àfɨꞋa Elɔ̀d li ngu fɔ̧̀ àlaꞋ a Jùdià la, ntsìà mèpɨ̧̀ Mbɔ̧ɔ̧mà kǒ wuê, èlen tò wu Zàkàleyà la. Tà li ndzəa ènɔ̧̂ bèntsìà mèpɨ̧̀ Mbɔ̧ɔ̧mà bu àndǎ̧ Àbijà la. Èlen vi tò li ngû Èlisabèt, tà li dzəèà àndǎ̧ Alɔ̀n è wu àndǎ̧ bèntsìà mèpɨ̧̀ Mbɔ̧ɔ̧mà la.

⁶Bòt baa babe la bɔ li ntɨ̧̀ɨ̧ ndɨŋndɨ̀ŋ a mbì Mbɔ̧ɔ̧mà mè me paŋe mbɨ̧te tò nè nkɨ̀atsə tò tègème.

⁷Bɔ li bɔ̀ ka bɔ bɔ̧ nkàà nê Èlisabèt li ngu yen, bɔ mè ntsìꞋi ndente bòt.

⁸È lè wu ane àli ako Zàkàleyà me ghɨ̌ àfàꞋ àzi mbɨ̀Ꞌɨ̀ ntsìà mèpɨ̧̀ a èbem lob nɨ̧ Mbɔ̧ɔ̧mà, àfɨꞋa a è we tò nè ènɔ̧̂ àa fàꞋa ane àlia ngaa la.

⁹Bèntsìà mèpɨ̧̀ bu bɔ li mbɔ̌ ndɨ bɔ̀ɔ màꞋa èbìt àa nyɨꞋte wòt tàa nyi a èbem lob nɨ̧ Mbɔ̧ɔ̧mà etɔ̧̀ mèwet àghaa ntsɔ̧̀ eŋa abua Mbɔ̧ɔ̧mà la. Bɔ maꞋa èbìt bu ale, e baãaã a Zàkàleyà.

¹⁰Àfɨ̀Ꞌ a tseke tê nkùꞋ bòt e bu̧u̧te a ètsəê lob nɨ̧ Mbɔ̧ɔ̧mà e me tsàꞋte atò, Zàkàleyà nyi nga etɔ̧̀ mèwet mu.

¹¹Wantu̧ Mbɔ̧ɔ̧mà è bê sàꞋa a mbì tò, ntɨ̧ɨ̧ àbâ àbualu̧ èjɨwèt mèwet àghaa ntsɔ̧̀ mu.

¹²Zàkàleyà ye atò, sàꞋà mè mbɔ̀ɔ̂.

¹³Ka wantu̧ wu shu abua tò nê, “Zàkàleyà, à ka mbɔ̀ɔ̂, Mbɔ̧ɔ̧mà zə àtsàꞋtè àyê. Vi wè Èlisabèt bèle bi wambâ̧ abua yê, aa tsì èlen tò ane Jɔ̌n.”

¹⁴Bɔɔ bi atò ale, aa me bɔ̌ àwê tè aa taꞋa wùꞋte àwê, bòt nyaŋ aa mèe taꞋa wùꞋtè àwɔb mɨ̧̂.

¹⁵Taa li wu wòt nɨ̧ a mbì Mbɔ̧ɔ̧mà. Tà ka li nu mèlùꞋ kèkweelè à, Mbɔ̧ɔ̧mà mè ngu elu̧u̧ne èntɨ̧ɨ̧ tò nè Fo Kèfə ka bɔɔ bi atò.

¹⁶Taa li ghɨ̌ bòt èpfəè àlaꞋ Izəèlȩê nyaŋ aa kua akwèn ekɨꞋɨ abua tǎt wɔb Mbɔ̧ɔ̧mà.

¹⁷Mbɔ̧ɔ̧mà naa li zǐ Fo yu tà li ndzi ane Èlȩjà la ane tò, taa bɔ mètàŋ eghǎ a mbì Mbɔ̧ɔ̧mà. Taa ghɨ̌ ale mbɨ̀Ꞌɨ̀ gheble mèntɨ̧ɨ̧ bètǎt ètsəꞋne awɔb bɔ̂ bɔ̧ bɔb. Taa li gheble bòt àtsəa kekweelè, mbɨ̀Ꞌɨ̀ bɔɔ bɔ èyì elɔ̀Ꞌɔ kua akwèn e me kwàꞋtè mènəè mbɨ̀Ꞌɨ̀ bòt bɔ ntɨ̧ɨ̧ ndɨŋndɨ̀ŋ la, e mě taŋke bòt Mbɔ̧ɔ̧mà bɔɔ me chɨ̀Ꞌɨ àfɨ̀Ꞌ yu tàa li kɨꞋɨ la.”

¹⁸Zàkàleyà bììte atò nê, “Màa ko na laꞋ nê ànəê yaa wu nkûŋ à? E ngu ndèn wòt, vi am mè ntsìꞋi ndèn àvi mɨ̧̂.”

¹⁹Wantu̧ Mbɔ̧ɔ̧mà wu nê, “E ngu Ngableyà wu tàa ntɨ̧̀ɨ̧̀ a mbì Mbɔ̧ɔ̧mà la. Wu tòà zìambɔŋ ka tà tu̧u̧ am nê è nkɨꞋɨ ndàꞋà abua yê mè shù awê Ntu̧ Ntsɔ̧̀ yaa la.

²⁰Ndɨ̀ wu à bakà bɨ̧̀ɨ̧̀nê ntu̧ yaã yu nàa li ete wu àfɨ̀Ꞌ àzi la, àa kwen mbûꞋ, à kà tsi ngua ndàꞋà te ghǎ dzəâ ane àli yu ànəa mâ shu la àa te la.”

²¹Bɔɔ̀ ndàꞋà ale, bòt bu àbȩ la bɔ chɨ̀Ꞌɨ̂ tè ntsìꞋa mbììta a kètsìà wɔb nê, èghǎ ghɨ̂ ka tà tsèkê taꞋà àfɨꞋa seè yaa a èbem lob nɨ̧ Mbɔ̧ɔ̧mà à?

²²Mbɨ̀Ꞌɨ̀ tà dzəè àbȩ la, tà kà tsi nko ndàꞋ abua yɔb, ale bɔ ko nê tà ye àtsə a èbem lob nɨ̧ Mbɔ̧ɔ̧mà. Ètsəê tò e leme ale, tà tsiꞋi me fɨ̀Ꞌtè mènəè ane èbu bi.

²³Tà tseke tê mpàâ àfàꞋ àzi a èbem lob nɨ̧ Mbɔ̧ɔ̧mà ane àfɨ̀Ꞌ yu bɔ loo la, nkua akwèn ngà àpfəè azi.

²⁴Àfɨ̀Ꞌ a tseke te me wu, vi tò, Èlisabèt kɔt ntsèke a lob ane èŋu yetà̧â̧, kà gha àbȩ.

²⁵Èlisabèt nê, “Àfɨ̀Ꞌ yaa, a me ghǎ te me lìa, Mbɔ̧ɔ̧mà tɨŋe am, ntsì ntsoꞋ yu banɔ̧̀ è le zi àtsə am la.”

²⁶AfɨꞋa Èlisabèt kɔɔle tê ngu ane èŋu yentùa la, Mbɔ̧ɔ̧mà tu̧u̧ a Ngableyà wantu̧ vi àpfəè ako bɔ̀ɔ ntɔ nê Nazàlet a èbem àlaꞋ a Galìlî la.

²⁷Tà li mbɔ̌ ntu̧ abua angɔ̧̀ kǒ èlen tò wu Màlià la. Tà li ngu èleè Jòsêb kǒ tà dzəè a àndǎ̧ Fɔ̧̀ Dàbid la.

²⁸Wantu̧ Mbɔ̧ɔ̧mà wu kɨꞋɨ̀ shu abua tò nê, “Maà ntsàꞋtà awê. Tǎt wa Mbɔ̧ɔ̧mà wu nè nè, tà taꞋa lɔ̀ɔ̀lè àwê.”

²⁹Wantu̧ wu làꞋ ale, a taꞋa tsè a Màlià. Lə mèngǎ̧ tò mu taꞋa kɨ̀Ꞌnè atò.

³⁰Wantu̧ wu shu abua tò nê, “Màlià, à ka mbɔ̀ɔ̂, à wu àvi èsi ntsɔ̧̀ e mbì Mbɔ̧ɔ̧mà.

³¹Aa kɔɔle lɔ̀Ꞌɔ bi wambâ̧ e tsì èlen tò ane Yesò.

³²Taa li wu wòt nɨ̧, bɔɔ me tɔ atò nê Waã Mbɔ̧ɔ̧mà Àtsèàngɔ̀ŋ. Mbɔ̧ɔ̧mà Lefɨ̀Ꞌ naa li ŋa atɨ̧ kèfɔ̧̀ tǎt nyaꞋ tò Dàbid abua tò.

³³Taa li wu fɔ̧̀ àtsəa àndǎ̧ Jàkɔ̂b kà ye ndìa, kèfɔ̧̀ tò kà mee ngu li elìa.”

³⁴Màlià shu abua wantu̧ Mbɔ̧ɔ̧mà wu nê, “E ngu angɔ̧̀ kà ko mbâ̧, èwuu ànəê yaa aa li wu naà?”

³⁵Wantu̧ wu bɨ̀ɨ̀lè nê, “Fo Kèfə naa wu ne nè, aa kɔɔle waã ane mètàŋ Mbɔ̧ɔ̧mà, ebi. Bɔɔ li tɔ waã wu ane waã tà dzəè abua Mbɔ̧ɔ̧mà la, e mě tɔ atò ane Waã Mbɔ̧ɔ̧mà.

³⁶Ye wòt ləlob yê Èlisabèt, bɔ laꞋnê tà wu yen la, ka àfɨ̀Ꞌ yaa tà tsiꞋi ndène àvi la, tà wu nè èbêm ane èŋu yentùa.

³⁷Ale, àghɨa ko a ntsě betsiꞋa Mbɔ̧ɔ̧mà kà ko ngɨ̀ la.”

³⁸Tà làꞋ ale Màlià bɨ̀ɨ̀lè nê, “E ngu waã a èten Tǎt wa Mbɔ̧ɔ̧mà, tsiꞋ tà ghɨ ane yaã mbɨ̀Ꞌɨ̀ à shu la.” Tà paa èngǎ̧ vi tè tà lɔꞋɔ, wantu̧ Mbɔ̧ɔ̧mà wu sà atò ngà.

³⁹AfɨꞋa mbɔŋ Màlià tàŋke ntèmnê nkɔꞋ ngà àpfəè àko àlaꞋ a Jùdià.

⁴⁰Tà ghà ale nyi a lob Zàkàleyà ntsàꞋtè a Èlisabèt.

⁴¹Èlisabèt zə ndɨ Màlià tsàꞋte àvi la ale, waã wu a èbem tò la ghȩ̀ȩ̀nè. Fo Kèfə kɨꞋɨ adù̧ tò.

⁴²Ale, tà ŋȩ shu abua Màlià nê, “Mbɔ̧ɔ̧mà lɔ̀ɔ̀lè àwê tè ntsè bèzi ko, èlɔɔle tò e mè ngu ane waã wu àa li bi la.

⁴³Ghǎ ghɨ̂ ka èwuu ànəê yaa a te ane yaã, te nyɨ̌ Lefɨ̀Ꞌ am kɨꞋɨ̀ mù am à?

⁴⁴À bê ntsàꞋtè am ale waã wu a èbem èlaã la ŋùꞋ ane mèngùꞋte.

⁴⁵Ntsɔ̧̀ wu àwɔ̀ ndɨ̀ wu à bɨ̧ɨ̧nè nê ntu̧ Tǎt wa Mbɔ̧ɔ̧mà abua yê naa li wu nkûŋ la.”

⁴⁶Màlià li nê: “Maà nkɔ̧̀ɔ̧ ngùꞋtà Tǎt wa Mbɔ̧ɔ̧mà,

⁴⁷MèngùꞋte è lu̧u̧ a èbem èntɨ̧ɨ̧ am ane Mbɔ̧ɔ̧mà wu tà wu Mpemnà am la.

⁴⁸Tà ŋa kènuke abua am, mmɔ̌ wɔ̀fàꞋ tò wu màa ka ŋèꞋe tèkwȩ taã la. E bùꞋu àfɨ̀Ꞌ yaa me ghà ne mbì, wòt ègème naa me tɔ am ane àvi èsi ntsɔ̧̀,

⁴⁹nkàà èghɨ nɨ̧ bu Mbɔ̧ɔ̧mà mètàŋ è ghɨ abua am la. Maà nkùkta èlen tò.

⁵⁰Tà nyɨꞋtè tèsȩ ti abua bòt bu bɔ̀ɔ nkùkta atò la, e bùꞋu ane bɔ̧ e ghǎ wu ane bɔ̧ bɔb.

⁵¹Tà nyààbe àbu mètàŋ àzi èsàŋè bòt bu bɔ̀ɔ ŋèꞋa tèkwȩ tɔb la, nè mènəè bɔ taŋke a mèntɨ̧ɨ̧ mɔb la.

⁵²Tà shuktè bèfɔ̧̀ kekweelè a ègwet ètɨ̧ kèfɔ̧̀ bɔb ndɔ̀ktè bòt kà wua ŋèꞋa tèkwȩ tɔb ntsà a ègwet.

⁵³Tà jɨɨ bòt ndzìtsə tèa nkua wɔb la ane èghɨ ntsɔ̧̀, èfèle bòt èkab bɔ ghà èbu fə.

⁵⁴Tà ghɨ̀ àghɨa tà lè kaꞋa abua bètǎt nyaꞋ ba la, nkɨ̀Ꞌɨ̂ etɨŋe bòt Izəèlȩê bu bɔ̀ wu bɔfàꞋ tò la.

⁵⁵Tà ku̧u̧tè enyɨꞋte tèsȩ ti ane Abàlàghâm e ghǎ dzəâ ane àndǎ̧ tò àgème kà ye ndìa.”

⁵⁶Mbɨ̀Ꞌɨ̀ Màlià è kɔ̧ɔ̧ mèkù̧ maa la, tà tsèkê bɔ̂ Èlisabèt mbɔ̀ŋè èŋu yetat ndɔ̀Ꞌ nkua akwèn ngà àpfəè azi.

⁵⁷AfɨꞋa Èlisabèt lè wu bi la a le kuêꞋ, tà bi wambâ̧.

⁵⁸Bòt àpfəè ayɔb nè bɔnyɨ tò bɔ zə ndɨ tǎt wɔb Mbɔ̧ɔ̧mà è ku tèsȩte tò la, ntàꞋa wùꞋte àwɔb nè tò.

⁵⁹Èli befà̧aã e li ntsè bɔ kɨꞋɨ naŋe waã wu, mbɔ̂ me kɨꞋɨ ale ngua nga etsì èlen tò ane Zàkàleyà, nko laꞋ nê bɔ tsì èlen tǎt tò.

⁶⁰Ka nyɨ̌ tò nê, “ÀwɔꞋ, èlen tò naa wu Jɔ̌n.”

⁶¹Tà làꞋ ale, bɔ shu abua tò nê, “Bɔnyɨ bê ko e bakà bɔ èlen mbɔŋ.”

⁶²Bɔ ghɨ̀ ale, fɨ̀Ꞌtè ane èbu bɔb mbììte a tǎt tò nê tàa nkɔ̀ŋkà nê èlen waã wu wu wàà leꞋ?

⁶³AfɨꞋa mbɔŋ Zàkàleyà lo̧o̧ a tafèn shɨŋ adù̧ nê, “Èlen tò wu Jɔ̌n.” Ànəa mbɔŋ a taꞋa kɨ̀Ꞌnè àwɔb.

⁶⁴AfɨꞋa ngaa ètsəê tò e ghaꞋà, èlɨ̧ tò e yàà, ta bùꞋ mbê me kɔ̧ɔ̧ ngùꞋtà Mbɔ̧ɔ̧mà.

⁶⁵Ale, bòt àpfəè ayɔb e bɔɔ̀, àndǎ ànəê yaa a ghɨ̀ la, a ghà èdziꞋ ègème àlaꞋ a tèbȩ ko bɔ̀ɔ ntɔ̀ nê wu Jùdià la.

⁶⁶Bòt bàgème bɔ zə mènəè maa la, bɔ nɔ̀ŋè a mèntɨ̧ɨ̧ mɔb, ndɔ̀Ꞌ mbììte nê “Waã waa naa li wu wà à?” È li ngu nkûŋ nê mètàŋ Mbɔ̧ɔ̧mà li ngu ane tò.

⁶⁷AfɨꞋa bɔ̀ le wua ntsìà èlen Jɔ̌n la, Fo Kèfə è kɨ̀Ꞌɨ̂ adù̧ Zàkàleyà, tǎt tò tà bùꞋ me làꞋa àtɔŋ Mbɔ̧ɔ̧mà nê:

⁶⁸“Bà wùꞋte èlen Lefɨ̀Ꞌ wu, tà wu Mbɔ̧ɔ̧mà bòt Izəèlȩê la. Tà kɨꞋɨ̀ ntɨ̀ŋe bòt bi ndɔ̀Ꞌ nchùꞋu ètsə bɔb, ntsì àwɔb a èbem ngoꞋ.

⁶⁹Tà tsàà àwa wòt nɨ̧ tàa ŋa awa ngule mèmpème la. Ŋut dzəè a àndǎ̧ wɔ̀fàꞋ tò Fɔ̧̀ Dàbid,

⁷⁰mbɨ̀Ꞌɨ̀ tà li ngɨ̀ bèndàꞋàtɔŋ tò e làꞋ ane mèngùꞋ nyaŋ è tsè la.

⁷¹Nê, yea li tsì àwa a tèkitebu bòt bu bɔ̀ɔ nkɨà àtsəa ya enɨ la; e mee li tsì àwa abua bòt bu bɔ̀ɔ mpààbà àwa la.

⁷²Tà lè laꞋnê, yea li ku tèsȩte bètǎt nyaꞋ ba elɔ̀Ꞌɔ ku̧u̧te mènkàꞋa kèkweelè mu zìambɔŋ ye kàꞋà la.

⁷³Tà lè zì nkà̧ a mbì tǎt nyaꞋ wa Abàlàghâm nê,

⁷⁴mbɨ̀Ꞌɨ̀ ye tsì àwa a tèkitebu bɔmbù̧ ba la, baa me fàꞋa abua zi kà bɔ̀a,

⁷⁵mbɨ̀Ꞌɨ̀ bòt bɔ li tɨ̧ɨ̧ ndɨŋndɨ̀ŋ a mbì li mè mbɔ̀ mèntɨ̧ɨ̧ kèfə ane èli ba a sitsǎꞋ ègème la.

⁷⁶È wu awê waã wàa, bɔɔ li tɔ awê nê ndàꞋàtɔŋ Mbɔ̧ɔ̧mà Àtsèàngɔ̀ŋ. Nkàà nê aa tsě a mbì Tǎt wa Mbɔ̧ɔ̧mà etaŋke alu̧ tò.

⁷⁷Aa gha shu abua bòt to nê, Mbɔ̧ɔ̧mà naa waꞋa a kàbɔ̀ŋ wɔb èghɨ bɔɔ peme,

⁷⁸ndɨ̀ wu tà wu mbɔɔlà wòt, mè ngu mànkua tèsȩ la. Taa li ghɨ̌ mèmpème mi naa saꞋa ane ya mbɨ̀Ꞌɨ̀ nyèm ntɔtetsɔ̌Ꞌ è saꞋa a ègwet la,

⁷⁹eŋa èkaꞋà ane bòt bu a èbem ndzěm yu è wuê mbɨ̀Ꞌɨ̀ mbàꞋ èvə la, e ghɨ̌ bàa ghȩ̀ȩ̀ne ane alu̧ àlàŋkà èntɨ̧ɨ̧.”

⁸⁰Waã wu li ntsə, èyì tò e mè me kwèꞋne. Tà lɔ̀Ꞌ ngà ntsèke àbâ àlaꞋ àyuube tè ngà ndzə àfɨꞋa Mbɔ̧ɔ̧mà nàa ghɨ̌ bòt Izəèlȩê aa ko atò la.