Read Mundani Lûk 14 Bible Online

Lûk 14 - Mundani bible

Lûk 14

¹È lè lɔ̂Ꞌ ngu àliapfəèa Bèjuê àko, Yesò gha ejɨ èghɨjɨ a lob tǎt Bèfalèsiì ko. Bòt ko bɔ wu abot la, e bê ntsìte àghɨ ayɔb ane tò, bɔɔ nkɨ ye àghɨa tàa ghɨ̀ la.

²Bɔɔ ngɨa ale, wòt kǒ èka tò nè èbu tò e kɔꞋte la wu a mbì Yesò tà tɨ̧ɨ̧ la.

³Yesò lɔ̀ke àvi mbììte bènyɨꞋtà mbɨ̧te Musì nè Bèfalèsiì bu abot la nê, “Tè mbɨ̧te Musì tè bɨ̧ɨ̧nè nê bɔ̀ bə wòt àliapfəèa ya, kò te bakà bɨ̧̀ɨ̧̀ne à?”

⁴Ka wòt ane yɔb ka tsɔꞋɔ èngǎ̧ tò. Yesò nɨ wòt wu ngò̧ò̧na la mbə atò, mbɔ̂ shu abua tò nê tà me ghǎ.

⁵Tà mè mbììte awɔb nê, “Wòt wu ane yɨ̧ waã tò, kò mpɔ̀ŋ tò, kwene a èbem èbɨ mèleb ane àliapfəè, ko taa tseke ka tsì kwàꞋ àfɨꞋa mbɔŋ la wu wàà?”

⁶A tsè àwɔb ndɨ bɔ̀ɔ bɨ̀ɨ̀lè la.

⁷Àfɨ̀Ꞌ a me wu, Yesò ye ndɨ bòt ko ane bègɨ̧̀ bu aa nkɨà wu ètɨ̧ ntsɔ̧̀ ka tseke la, ale tà shu awɔb bàgème èngà̧teme waa nê,

⁸“Wòt kàꞋà àwê a èpǎ̧ ndzɔꞋɔ à ka mbɨ̀ ntsèke adù̧ atɨ̧ ntsɔ̧̀. Ngua ngɨ̀à ale mbɨ̀Ꞌɨ̀ ka wòt kǒ tà tsè àwê la lɔ̀Ꞌ nkɨ̀Ꞌɨ̂,

⁹tǎt èpà̧ wu kɨꞋɨ shu abua ye nê, lɔ̀Ꞌɔ a si ŋa atɨ̧ wu abua ŋut ngɨ̀ àfɨꞋa ngaa ale, àtsə ayê a kɔꞋ ndɨ àa ghǎ tsiꞋi nɨ atɨ̧ elìa akwèn la.

¹⁰Ka wòt kàꞋà àwê, à kɨꞋɨ, à ghà ntsèke ane atɨ̧ elìa akwèn la, mbɨ̀Ꞌɨ̀ tǎt èpà̧ ekɨꞋɨ tà shu abua ayê nê, ‘Ewuɔ, kɨꞋɨ ntsèke adzìꞋa ntsɔ̧̀’. Tà ghɨ̀ ale, ko na wu nê tà ŋa kènuke abua yê a mbì bòt bàgème abot.

¹¹Aa ale nkàà nê wòt ègème tàa ŋèꞋa tèkwȩ ti a ègwet la, Mbɔ̧ɔ̧mà naa shuke atò a si, wòt tàa nɨ̀a avi a si la, Mbɔ̧ɔ̧mà ŋèꞋe atò a ègwet.”

¹²Yesò ghɨ̀ ale, mbɔ̂ shu abua tǎt lob wu nê, “À me kàꞋa bòt nê bɔ̀ kɨꞋɨ njɨ èghɨjɨ, à ka nkàꞋà bèshu̧ bê, bɔ̂ bɔnyɨ bè, nè bòt ləlob yê, mè nè bòt èkab bɔ̀ɔ ntsèka a ngèt yê la, nkàà nê bɔ̀ kɨꞋà ko bɔ̀ɔ kàꞋa awê mɨ̧̂, nko nê bɔ̀ wua vəèà èsiꞋ lê.

¹³Ka à me ghɨ̌ èpǎ̧ wè, à kàꞋà wuê bòt ntseb, bɔ̂ bòt bɔ̀ɔ ŋɔ̧̀ɔ̧̀mà la, nè bòt èka bɔb e ŋɔꞋte la, nè bòt àghɨ ayɔb a leme la,

¹⁴ko aa bɔ èlɔ̂t ngu ndɨ bèŋût e ka li ko evəâ èsiꞋ ngaa la. Mbɔ̧ɔ̧mà naa li tsɔꞋɔ àfàꞋ àyê, ane àli yu tàa li yu̧u̧me bòt bu bɔ li ntɨ̧ɨ̧ ndɨŋndɨ̀ŋ a mbì tò ka mpfəèꞋte la.”

¹⁵Mbɨ̀Ꞌɨ̀ wòt kǒ ane bòt bu njɨ̀a èghɨjɨ bu la è zə èngà̧ waa la, tà shu abua Yesò nê, “Ntsɔ̧̀ wu bòt bu bɔ̀ɔ li tseke a mànjɨa èpà̧ wu a kèfɔ̧̀ Mbɔ̧ɔ̧mà la.”

¹⁶Yesò shu abua tò nê, “Wòt ko li ntàŋke taꞋa èpǎ̧ vi nkàꞋà bòt nyaŋ.

¹⁷ÀfɨꞋa èpà̧ wu a kùꞋ, tà tsàà wafàꞋ vi nê tà ghǎ ntɔ bòt bu ye li nkàꞋà àwɔb la nê, bɔ̀ kɨꞋɨ, nê bɔ taŋke èghɨ ègème tè ndɔ̀Ꞌ.

¹⁸“Ka bɔ̀ɔgème e bùꞋ wemɔ̀Ꞌ wemɔ̀Ꞌ me shu nê ànəê a baãaã wɔb. Wòt mbì nê, ye yu̧u̧ èbaꞋ li, ngu a si nga elɨ̀ŋke lùà, ale tà ka fèèlè am.

¹⁹“Wekǒ nè wòt nê, ye yu̧ mpɔ̀ŋke àfàꞋ ti èghem, ntsiꞋa alu̧ nga eyute, nê tà ka ntso.

²⁰“Wòt kǒ ane yɔb nê, ye shùu ndzà, ale betsiꞋa ye ka ko nkɨ̀Ꞌɨ̂.

²¹“WafàꞋ wu kua akwèn ngà è shu a tǎt vi. A saa tǎt tò wu, tà shu abua tò nê, ‘Luula ngà a balu̧ nè bɔbɔlu̧ a èbem àpfəè, ntɔ bòt ntseb, bòt bɔ̀ɔ ŋɔ̧̀ɔ̧̀mà la, bòt àghɨ àleme nè bòt èka bɔb e toŋke la nê bɔ̀ kɨꞋɨ.’

²²“WafàꞋ wu kɨ̀Ꞌɨ̂, shu abua tǎt vi nê, ‘Tê, mâ ghà tê ngɨ̀ àghɨa à shu la, ka lob ka lu̧.’

²³“Tǎt wafàꞋ wu mè shu abua tò nê, ‘Ghǎ a mèlu̧ mbȩtsə nè bɔbɔlu̧, ngɨ̀ bòt e kɨꞋɨ mbɨ̀Ꞌɨ̀ lob yaã naa lu̧.

²⁴TsiꞋ è shu awɨ̧ bɨ̀agème nê, wòt kǒ ane bòt bu maa kàꞋ la è ka yute àghɨ àdziꞋa èpà̧ am a.’ ”

²⁵Mbɨ̀Ꞌɨ̀ Yesò lɔ̀Ꞌ te me ghǎ la, taꞋa ènɔ̧̂ bòt a me ghà bɔ̂ tò ba. Tà gheble avi shu abua yɔb nê,

²⁶“Wòt kɨꞋa abua am, tè mbakà kɔ̀ŋkè am te tsě a tǎt vi nè nyɨ̌ vi, vi vi nè bɔ̧ bi, nè bɔnyɨ bi, te ghǎ dzəâ ane zi zìambɔŋ, ko betsiꞋa ŋut wu ka kuꞋù wòt tàa wu wakatè am la.

²⁷Wòt bakà bɨ̧̀ɨ̧̀ne eŋeꞋe mbasa vi ekùŋè am tà kà kuꞋ èwe tàa wu wakatè am la.

²⁸“Wàa nàa ane yɨ̧ tà me kɨ ebɔ̧ɔ̧ taꞋa lob, tà kà bɨ tseke asi ekwàꞋte ètsəkab lob ngaa eye nê ko èbu bi e kùꞋu a màmbɔ̧a lob ngaa la à?

²⁹Ŋut wu bakà kwàꞋtè te ko, mbə lob yu naa tsě atò àfɨꞋa tà bɔ̧ɔ̧ àtetsi tè ndɔ̀Ꞌ la. AfɨꞋa mbɔŋ, ko bòt ntsèà ndzèa la, aa bùꞋu me tsoꞋte atò nê,

³⁰‘Wòt waa e bùꞋu lob kà wu ko paa.’ ”

³¹Yesò ghɨ̀ ale, mè shu nê “Kò fɔ̧̀ wu tàa me ghǎ enua fɔ̧̀ kǒ tsa e bakà bɨ etseke a si kwàꞋtè la wu wàà? Ko taa kwàꞋte nê kò bɔ̂ bòt bi bètɔsì èghem aa ko nua fɔ̧̀ ko wu nè bòt bi bètɔsì èghem yebe la leꞋ?

³²Tà me ye bɔ tse atò ko taa tsàà bɔntu̧ nê, bɔ̀ gha nkwene ane fɔ̧̀ ko wu nê tà shu àghɨa yea ŋa bɔɔ ghɨ̌ àlàŋkè la.”

³³Yesò me lìa nê, “Wu wuê a èlɨ mbɔŋ betsiꞋa wòt ane yɨ̧ ka kuꞋù wòt tàa wu wakatè am la kà bɨ lèène àghɨ àgème tà bɔ la.”

³⁴“Angwaŋ nàà mbɔ̀, ka angwaŋ bakà wua ntsia ndɨ̧̀à, ko bɔ̀ɔ ghɨ̀ na tè naa mě me lɨ̧̌ à?

³⁵Angwaŋ mbɔŋ tsiꞋi àku. BetsiꞋa bɔ̀ ka zi a mbȩ, ko lem efɔte ane efəèꞋ ezǐ a mbȩ leꞋ. Ale, è tsìꞋi kùꞋù wuê ndɨ bɔ̀ɔ waꞋa la. “Wòt bɔ ètû̧, tà yute èngà̧ waa.”