Read Mundani Lûk 15 Bible Online

Lûk 15 - Mundani bible

Lûk 15

¹È le wu àfɨ̀Ꞌ àko bèmbaãaã taksì nè bòt bɔ tsì àwɔb ayɔɔ la, bɔ kɨꞋɨ eyute àghɨa Yesò lè wua shua la.

²Bèfalèsiì nè bènyɨꞋtà mbɨ̧te Musì e bùꞋ me lèmta shua nê, “Mbê waa nàà mbɨ̧̀ɨ̧̀nâ bòt kàbɔ̀ŋ e kɨꞋa a ngèt tò, tà mè njɨ̀a bɔ̂ tò ba.”

³Ale, Yesò shu awɔb èngà̧teme wàa, ane àbɨ̀t àlèmtè àyɔb.

⁴“Tè wòt ane yɨ̧ bɔ njɨ̀tsə ènkɨ̀, yemɔ̀Ꞌ nyɔ̂ ko tà ka saame tu èghem yebəèꞋa ntsɔ̀b tebəꞋa la a ègwet èghem e ghǎ me kɨ yu yemɔ̀Ꞌ e nyɔ la te e ghɨ̌ ye ka etseke a si à?

⁵Tà me ghɨ̌ te ndzea ko tàa taꞋa wùꞋtè àvi kwat te etsiꞋi nɔ̀ŋe atò a tèkwȩ ti

⁶enɨ gha àpfəè. Mbɔ̂ ngɨ̀ ale nkàꞋà bèshu̧ bi nè bòt bu àpfəè yeamɔꞋ nè tò la nê, ‘Bɨ̀ bù̧ù̧te enu ndɔŋ ngùꞋtè àwɨ̧ ba nɨ̧̀ ba. Njɨ̀ yaã li nyɔ̂, ka mâ ye.’

⁷Ale, kwàꞋ ane nkûŋ tsiꞋ è shu awɨ̧ nê wu wuê èlɨ mèngùꞋte nàa wu a ègwet ane wòt kàbɔ̀ŋ wemɔ̀Ꞌ tà kubte èntɨ̧ɨ̧ vi, ngwàꞋà mènəè kàbɔ̀ŋ mi la, tè ntsè me nàa ane bòt èghem yebəèꞋa ntsɔ̀b babəèꞋa bɔ̀ wu bòt ntsɔ̧̀ kà tsi mbɔ̌ ndɨ bɔ̀ɔ kubte mèntɨ̧ɨ̧ mɔb la.”

⁸Yesò mè nê, “Tè àvi ko bɔ èkwȩkab bi èghem, yeamɔꞋ a nyɔ̂, ko tàa ghɨ̌ naà? Ko taa tô̧ èkaꞋà, etuꞋu silob ègème elɨ̀ŋke èdziꞋ ègème te e ghɨ̌ eye ka tseke a si.

⁹Me ghɨ̀ ale, tè ndzea ko taa tɔ bèshu̧ bi nè bòt bu àpfəè yeamɔꞋ nè tò la, e shu abua yɔb nê, ‘Ndè ba, e ngu kwàꞋ ane mèngùꞋte ngu ndɨ mâ ye àkwȩkab am a ghɨ̂ nyɔ̂ la. Bɨ̀ kɨꞋɨ bà nɨ̧ ba ebù̧ù̧ta nu ndɔŋ ngùꞋtè àwa.’ ”

¹⁰Yesò ghɨ̀ ale, mè nê, “E ngu a si è shu awɨ̧ nê, ndɨ àvi wàa le lɔ̂Ꞌ ngùꞋtè àvi la, wu wuê èlɨ mbɔŋ bɔntu̧ Mbɔ̧ɔ̧mà àa ngùꞋtà àwɔb ane wòt kàbɔ̀ŋ wemɔ̀Ꞌ tà kubtè èntɨ̧ɨ̧ vi èsà mènəè kàbɔ̀ŋ mi la.”

¹¹Yesò mè shu awɔb nê, “Wòt ko lè lɔ̂Ꞌ mbɔ̀ bɔmbâ̧ babe.

¹²We kwèn shu abua tǎt wɔb nê, ‘Tê, ghàbtè èghɨ bê ŋà àyaã ne abà.’ Ŋut wu ghàbtè èghɨ bi ane èdzìꞋ bebe, ŋa abua bɔ̧ bi bu babe la.

¹³“Àli a me wu, we kwèn wu fɨ̧̀ɨ̧̀nè àzi ne abà, mbɔ̂ sà àpfəè, nɨ èkab nɨŋ nga àlaꞋ ako a endɨ̌. Tà ghà àlaꞋ yu ale, me tsòkè èkab wu ane ndɨ ye kɔ̀ŋkè la, kà ye àghɨa tà ghɨ̀à nè wùà la.

¹⁴Àfɨ̀Ꞌ a me wu, èkab wu ègème e mì. Èchɨɨ kekweelè e mè nyi àlaꞋ a mbɔŋ mɨ̧̂, àghɨ à ka tsi mè ngu abua tò.

¹⁵Ale, tà ghà shù̧ù̧te wòt kǒ àlaꞋ və nê tà ŋa avi àfàꞋ. Tà tsaa atò nê tà ghǎ me baabe mè njɨ̀a mèkunyà̧ mi a èbaꞋ li.

¹⁶Ale, tà ghà, wòt kà wuê tàa ŋǎ tò èghɨjɨ la. Ndzìtsə te baãaã atò tè tà tsìꞋa nkɨà èghele e ghɨ̌ èkunyà̧ ejɨ.

¹⁷“ÀfɨꞋa èyǐ tò e kua la, tà shu abua zi zìambɔŋ nê, ‘BɔfàꞋ tǎt am bàgème e bɔ èghɨjɨ tè e me tsèà wɔb a njɨ̀a, e ngu àdziꞋ yaa mpfəà ndzìtsə.

¹⁸Maa lɔ̀Ꞌɔ a si ghǎ ekwene ane tǎt am, e shu abua tò nê, Tê, mâ fâ̧ ànəê a mbì Mbɔ̧ɔ̧mà, mè fâ̧ a mbì lê.

¹⁹Àfɨ̀Ꞌ yaa, e mbakà tsi nkùꞋù we bɔ̀ɔ me tɔ am ane waã wè la, nɨ am nkwèꞋnè ane bɔfàꞋ bê.’

²⁰Tà ghɨ̀ ale, ndɔ̀Ꞌ a si mbà̧ èlu̧ me gha àpfəèa tǎt vi. “Mbɨ̀Ꞌɨ̀ tà bele alu̧ la, tǎt tò ye atò, tèsȩte waã tò wu te taꞋa kua atò. Tà lùùlà ngà màꞋà èbu bi a tèkwȩte tò ntaꞋa atò.

²¹“Waã wu lɔ̀kè àvi shu abua tǎt vi nê, ‘Tê, mâ fâ̧ ànəê a mbì Mbɔ̧ɔ̧mà, mè fâ̧ a mbì lê. E mbakà tsi nkùꞋ we bɔ̀ɔ me tɔ am ane waã wè la’.”

²²Ka tǎt tò wu tsiꞋi tɔ wuê bɔfàꞋ bi nê, “Bɨ̀ gha kwàla nɨ̀ ndaŋa ndǐ ntsɔ̧̀ nɨŋ nkɨ̀Ꞌɨ̂ ndzi a mbɨ̧̀ tò, ndzì kèmbǎꞋ àbu atò, nè gùbtsə a èka tò,

²³nɨ̀ wampɔ̀ŋ wu è lu̧u̧te la, nɨŋ nkɨ̀Ꞌɨ̂ bà waala ndaã nkwet ngùꞋtè awa adù̧ və.

²⁴Na waã am waa lè lɔ̂Ꞌ mpfə, ka nè àfɨ̀Ꞌ yaa tà yu̧u̧mè, tà lè lɔ̂Ꞌ nyɔ̂, ka nè àfɨ̀Ꞌ yaa mâ ye atò.” Tà làꞋ ale, bɔ bùꞋ me wùꞋtè àwɔb.

²⁵“Bɔɔ ngɨ̀à ale waã mbì tò wu a mbȩ. Mbɨ̀Ꞌɨ̀ tà lɔ̀Ꞌɔ a mbȩ nkua tè me wu a ngèt lob la, tà zəè ndɨ bɔ̀ kɔ̧a mbèna la.

²⁶Tà tɔ wɔ̀fàꞋ kǒ mbììte atò nê, ‘Èghǎ e ghɨ à?’

²⁷Wɔ̀fàꞋ wu shu abua tò nê, ‘Wanyɨ wè kua tǎt wè bùŋè wampɔ̀ŋ wu è lu̧u̧te la ndɨ̀ wu wanyɨ wè kua ntsɔ̧̀ kà àghɨ a ghɨa tò la’.

²⁸“Waã mbì wu bê ntso tè è ntu̧ nyi a lob. Tǎt tò dzəè àbȩ shù̧ù̧te atò nê tà nyi a lob.

²⁹Tà shu abua tǎt vi nê, ‘Ye, mâ faꞋa abua yê ane mèngùꞋ maa ègème kà tu̧ àghɨa à shu nê è ngɨ̀à la. Ka à te bakà ŋa mbɔ̀ŋè wadzə maa nɨ wùꞋte am bâ bèshu̧ bɔ̧.

³⁰Ka waã wè waa, tà nɨ èkab wê ngà ntsòkè bɔ̂ bèghȩ̀ȩ̀nè ghȩ̀ȩ̀ne la, è kɨꞋɨ̀ à bê mbùŋè wampɔ̀ŋ wu è lu̧u̧te la abua tò.’

³¹“Tǎt tò nê, ‘Waã am, à wu nè nà̧ àfɨ̀Ꞌ àgème, àghɨ àgème mâ bɔ la wu ayê.

³²Ka ba ghɨ̂ mbɔ̌ ndɨ bàa wùꞋtè àwa la. Wanyɨ wè lè lɔ̂Ꞌ mpfə, ka nè àfɨ̀Ꞌ yaa tà yu̧u̧mè, nyɔ̂ ka mâ ye atò.’ ”