Read Mundani Lûk 17 Bible Online

Lûk 17 - Mundani bible

Lûk 17

¹Yesò ghɨ̀ ale, è shu abua bɔkatè bi nê, “Èghɨ àa ngɨ̀à bòt e ghɨa kàbɔ̀ŋ la e bɔ ndɨ àa kɨꞋɨ la. Ka aa li bɨɨ àbâ wòt wu tà ghaꞋa èlu̧ ka e kɨꞋɨ la.

²Tà tsiꞋi te ghɨ̌ è weko ane ebe techɨɨle bàa naa ghɨa kàbɔ̀ŋ, a bɔ̂ŋ nê bɔ sèlè taꞋa èti àmî a tò, màꞋa atò a èbem *èdzî.

³Bɨ̀ me ko awɨ̧ ndɨ bɨ̀a ntsèka la. “Wanyɨ wè fà̧ ànəê abua yê, à ŋȩte atò, tà kubte mènəè kàbɔ̀ŋ mi, à waꞋa a kàbɔ̀ŋ tò.

⁴Tà màà ngɨa kàbɔ̀ŋ abua yê ane ngò̧ tesà̧à̧mbe ane àliabȩ, à waꞋa a kàbɔ̀ŋ tò àfɨ̀Ꞌ àgème tà kɨꞋɨ̀ shu abua yê nê ye fà̧ la.”

⁵Bɔntu̧ Yesò e ghɨ̀ ale, shu abua tò nê, “Ghɨa mèntɨ̧ɨ̧ ma me kweele ane yê.”

⁶Yesò bɨ̀ɨ̀lè nê, “Bɨ bɔ ntɨ̀ mbɨ̀Ꞌɨ̀ èsaãaãme maŋkaŋa kǒ e taꞋa wua nkòòta la, ko betsiꞋa bɨ shu abua àyɨt yaa nê, ‘ŊeꞋe awê nè tèghàŋ adzìꞋ yaa ngà ntsèmè a èbem *èdzî’, ko àyɨt a ngaa aa ghɨ̌ mbɨ̀Ꞌɨ̀ bɨ shu la.”

⁷Yesò mè mbììte bɔntu̧ bi nê, “Tè wòt kǒ naa ane yɨ̧ wafàꞋ tò tàa ndìꞋa àliꞋ atò, kò wòt mbààba njɨ̀te tò la, kua a mbȩ ko taa shu abua to nê, ‘KɨꞋɨ kwàla ntsèke à si njɨ̀ èghɨjɨ la à?’

⁸Àghɨa tàa ghɨ̀ la wu nê, taa shu abua wɔ̀fàꞋ vi wu nê, ‘Ghǎ ntàŋke èghɨjɨ nɨŋ nkɨ̀Ꞌɨ̂ ntsìà, è jɨ, nu, tè è mpaa, ka à jɨ̀ èbe.’

⁹Tè wafàꞋ wu ghɨ̀à àghɨa bɔ laꞋnê tà ghɨa la, bɔ mè me ŋa mènkɔ̀ŋke abua tò?

¹⁰Eyaa ndɨ àa ane yɨ̧ la mɨ̧̂. Bɨ paatè àghɨa bɔ shu nê bɨ̀ ghɨa la, bɨ bɔ̂ ndɨ bɨ̀a shu nê, ‘Ba bê ngu wuê bɔfàꞋ. Ba ghɨ wuê àghɨa ba wu ghɨ̀ la.’ ”

¹¹Yesò lɔ̀Ꞌ me ghǎ Jèlusalèm ntsèà adzìꞋa èlɨ̀ wu à kètsìà Sàmalìà bɔ̂ Galìlî la.

¹²Tà kɨꞋɨ tà me nyi àpfəè àko, bòt àghɔ̧atsɔꞋɔ ko èghem e tɨ̧ɨ̧ a endɨ̌

¹³ntsà mètsəê mɔb nê “Tê Yesò, ba shu̧u̧te awê, ku tèsȩ ta.”

¹⁴Yesò lɔ̀kè àvi ndzè àwɔb, mbɔ̂ shu abua yɔb nê, “Bɨ̀ ghǎ nyɨ̀Ꞌte awɨ̧ abua bèntsìà mèpɨ̧̀ Mbɔ̧ɔ̧mà.” Bɔ lɔ̀Ꞌ me ghǎ, mbele alu̧ me ye ènyit yɔb e yɔ̀à.

¹⁵Wòt kǒ ane yɔb ye ndɨ ye peme la, ngèble avi mbùꞋ me ŋȩa ngùꞋtè a Mbɔ̧ɔ̧mà.

¹⁶Nkɨ̀Ꞌɨ̂, ntèmè tènjûŋ ti a si a mbì Yesò, me ŋa atò mènkɔ̀ŋke. Ŋut bɔ̂ ngu wòt Sàmalìà.

¹⁷Yesò nê, “Ka bɨ wu èghem àghɔ̧ yu a dzə ane yɨ̧ la à? Bòt babəèꞋa è wu neŋàà?

¹⁸Nko nê wòt kǒ tsa ghɨ̀ tà kà wuê tàa kɨꞋɨ eŋa mènkɔ̀ŋke abua Mbɔ̧ɔ̧mà la kà wu wòt waa tà dzə àtu̧a tsa la à?”

¹⁹Yesò shu abua tò nê, “Ndɨ̀ wu à zi èntɨ̧ɨ̧ wê ane yaã la, à pem. Lɔ̀Ꞌɔ a si me ghǎ àwê.”

²⁰Bèfalèsiì ko e biite a Yesò nê, “AfɨꞋa Kèfɔ̧̀ Mbɔ̧ɔ̧mà nàa li kɨꞋɨ la wu ka àfɨ̀Ꞌ à?” Tà bɨ̀ɨ̀lè èngǎ̧ wɔb nê, “Àghɨ ako àa li nyɨ̀Ꞌte nê Kèfɔ̧̀ Mbɔ̧ɔ̧mà nàà nkɨ̀Ꞌâ la a ntsě.

²¹Wòt kà mèe ngu e shu nê, ‘Ye a kèfɔ̧̀ Mbɔ̧ɔ̧mà adzìꞋ yaa’, kò ‘Ye vìà leꞋ’, nkàà nê kèfɔ̧̀ Mbɔ̧ɔ̧mà wu a kètsìà wɨ̧.” [3]

²²Tà mè shu abua bɔkatè bi nê, “Àfɨ̀Ꞌ a bele wu, bɨa me kɨ nê bɨ wu eye Waã Wòt nkɨ̀Ꞌâ mbɨ̀Ꞌɨ̀ Fɔ̧̀, ka wù ane àli yeamɔꞋ la, ka bɨ̀ ka wu eye.

²³Bòt aa li shu awɨ̧ nê, ‘Bɨ̀ ye atò adzìꞋ yaa,’ mbə ‘Bɨ ghà ndze atò àbà nyià.’ Bɨ̀ ka nga akwene yɔb.

²⁴Waã Wòt naa li saꞋa ane èli bu tàa li kɨꞋɨ la, mbɨ̀Ꞌɨ̀ ègwelebuule àa ngɨ̀ e kaꞋa abà yaa ngà ngu a zià la.

²⁵Ka tà bɔ ndɨ tàa bɨ̌ taꞋa ye ngoꞋ, bòt laane aa mèe tu̧ nê bɔ bakà ko atò la.

²⁶“Èlɨ mènəè li ngɨ̀ àfɨꞋa Noà la, wu ndɨ nàa li ghɨ̌ àfɨꞋa Waã Wòt nàa nkɨ ekɨꞋɨ la.

²⁷È li ngu àfɨꞋa mbɔŋ bòt e me jɨa mè nua, mbâ̧tsə nè bèzi e me yɔꞋɔ awɔb tè ngà dzəè àfɨ̀Ꞌ yu Noà li nyi a èbem ànkànuꞋ yu la. Mèleb mu kɨꞋɨ ndììme awɔb bàgème.

²⁸“Aa li wu mbɨ̀Ꞌɨ̀ à le lɔ̂Ꞌ nguê àfɨꞋa Lɔ̂t la. Bòt e li ngua njɨ̀a nua, ntà tèwentsə, ndìꞋa èghɨ ndɔ̀Ꞌ mbɔ̧̀a lob tɔb.

²⁹Ka kwàꞋ ane àli yu Lɔ̂t le lɔ̂Ꞌ sà Sodòm la, èwet nè èkem nendu̧ e lɔꞋ a ègwet ndù mbɨ̀Ꞌɨ̀ mbɨ̀ŋ, ndììme bòt àpfəè və bàgème.

³⁰“Eyaa wu ndɨ àa li wu àfɨꞋa Waã Wòt nàa li pùùla ayaã la.

³¹Ane àlia mbɔŋ, wòt tà wu a ègwet lob zi la ka tsi chu eghǎ a lob enɨ èghɨ bi. È we tà wu a mbȩ la tà ka tsi nkua akwèn e kɨꞋɨ a lob zi.

³²Bɨ̀ ku̧u̧te àghɨa à le ghɨ vi Lɔ̂t la.

³³Wòt me baabe àtsəa zi, ko taa pfə wuê pfə. Mbə wòt pfə ko taa li bɔ mèmpème.

³⁴Ane nkûŋ, naa li ngu àfɨꞋa mbɔŋ bòt babe e wu a ègwet èku̧ bɔ nɨ wemɔ̀Ꞌ ntɔ̀ɔ wekǒ.

³⁵Bèzi babe e wua èti ngɔ̀Ꞌɔ̀ ntsəètsə, bɔ nɨ wemɔ̀Ꞌ ntɔ̀ɔ wekǒ. [

³⁶Mbà̧ tebe te wu ebâꞋ, bɔ nɨ yemɔ̀Ꞌ ntɔɔ yeko.]”

³⁷Bɔkatè tò e biite atò nê, “Ànəa ngaa àa li wu a ka adzìꞋa à?” Tà bɨ̀ɨ̀lè èngǎ̧ wɔb nê, “ÀpfəꞋta nyà̧ àa ngua adzìꞋ, tè tèdzǐtsə [4] te wu abot.”