Read Mundani Lûk 18 Bible Online

Lûk 18 - Mundani bible

Lûk 18

¹Yesò ghɨ̀ ale, shu bɔkatè bi èngà̧teme wàa nɨŋ nyɨ̀Ꞌte awɔb nê, bɔ bɔ̂ ndɨ bɔ̀ɔ me dɨ̀a abua Mbɔ̧ɔ̧mà àfɨ̀Ꞌ àgème kà kaã la.

²Nê, “ÈtsəꞋ e li ndɔ̀Ꞌ ntsi, sàꞋàmèkěm kǒ wu àpfəè àko, tà kà wua nkùkta a Mbɔ̧ɔ̧mà bɔ̂ bɔbȩ.

³Nempfə kǒ wu àzi àpfəè və, me tseka nkɨ̀Ꞌa àli àgeme shua abua sàꞋàmèkěm wu nê, ‘Làŋke ànəê yaa a kètsìà wa baà bɔmbù̧ bɔ̧ la à tɨ̧ɨ̧ ndɨŋndɨ̀ŋ’.

⁴“Àvi wu me kɨꞋɨ ale, saꞋa mèkěm wu ka wua njùta ànəa tà shua la, ka àfɨ̀Ꞌ a tseke tè me wu tà nê, ‘Maa kà bàte mbɔ̀a a Mbɔ̧ɔ̧mà bɔ̂ bɔbȩ,

⁵ka ndɨ̀ wu nempfə wàa nàa nkɨ̀Ꞌa ŋǎ am ngoꞋ àfɨ̀Ꞌ àgème la, maa làŋke ànəa tò yaa mbɨ̀Ꞌɨ̀ tà me kɨꞋɨ wuê kɨꞋɨ tè ntsɔ̀Ꞌ am maꞋa a si.’ ”

⁶Yesò Lefɨ̀Ꞌ ghɨ̀ ale, shu awɔb nê, “Bɨ̀ zə àghɨa sàꞋàmèkěm nè ètòŋke ènəê bi shu la.

⁷Tè a wu anè ko bɨ mɨɨtè nê betsiꞋa Mbɔ̧ɔ̧mà kà laŋkè mènəè bòt bi bu tà làà wɔb bɔ̀ɔ ndɨ̀à mènəè mɔb abua tò àli àgème la à?”

⁸TsiꞋ è shu awɨ̧ nê, ko taa nàŋe mènəè mɔb naa tɨ̧ɨ̧ ndɨŋndɨ̀ŋ kwàla kwàla. Ka la, tè Waã Wòt naa li me kɨꞋɨ àfɨꞋa tà kɨꞋa la, te mèe ye bòt bɔ zi mèntɨ̧ɨ̧ mɔb ane tò a sitsǎꞋ ŋàa la à?

⁹Yesò lè lɔ̂Ꞌ shu èngà̧teme waa abua bòt bu bɔ tanda nê bɔ tɨ̧ɨ̧ ndɨŋndɨ̀ŋ e mbì Mbɔ̧ɔ̧mà tè ntsìꞋa ndzea bòt ko ntsia àghɨ ane yɔb la.

¹⁰Nê, “ÈtsəꞋ e li ndɔ̀Ꞌ ntsi, bòt ko babe e gha etsàꞋte a Mbɔ̧ɔ̧mà a èbem lob nɨ̧ Mbɔ̧ɔ̧mà. Wòt wemɔ̀Ꞌ wu Falèsiì, wekǒ wu fetà èkab taksì.

¹¹Wòt Falèsiì wu lɔ̀Ꞌɔ a si ntɨ̧ɨ̧ a mbì ntsàꞋtè a èntɨ̧ɨ̧ vi nê, ‘Tǎt wa Mbɔ̧ɔ̧mà leꞋ, mâ taꞋa kɔ̀ŋkè àwê na màa ka ghɨ èghoꞋ, mènəè mɔ̧ ka toŋke mbɨ̀Ꞌɨ̀ me bòt ko, è nka mèe ngua njɨ̀a àbȩ la. Mâ kɔ̀ŋkè àwê na à ghɨ̂ è nka wu mbɨ̀Ꞌɨ̀ fetà èkab taksì via la.

¹²Maà ntsèka kà jɨ èghɨjɨ ngò̧ tebe ane nkàb, ntsàꞋtà wê, mè ngàbtà àghɨ àgème mâ bɔ la ane èdziꞋ èghem, ŋǎ àdziꞋ yeamɔꞋ abua yê.’

¹³“È me wu a fetà èkab taksì wu, tà tɨ̧ɨ̧ a endɨ̌, tà kà lem ndɔ̀kè àtsə azi a ègwet, mbɔ̂ màꞋà èbu bi a tèkwȩ ti shuê nê, ‘Mbɔ̧ɔ̧mà, ku tèsȩ taã, e ngu wòt kàbɔ̀ŋ.’ ”

¹⁴Yesò nê, “TsiꞋ è shu awɨ̧ nê, wu ndàꞋa fetà èkab taksì waa tà li me laꞋnê yea ngà àpfəè, Mbɔ̧ɔ̧mà ghɨ̀ mènəè tò tɨ̧ɨ̧ ndɨŋndɨ̀ŋ a mbì li la. Aa ale nkàà nê wòt ègème tàa ŋèꞋe avi a ègwet la, Mbɔ̧ɔ̧mà naa shuke atò a si, è we tà nɨ avi a si la, Mbɔ̧ɔ̧mà ŋèꞋe atò a ègwet.”

¹⁵Bòt ko e li nɨ bɔ̧ bɔb nkɨ̀Ꞌɨ̂ Yesò naa nɔ̀ŋè èbu bi adù̧ yɔb, bɔkatè tò bu e ŋȩte awɔb.

¹⁶Ka Yesò tɔ bɔ̧ bu nê, “Bɨ tsiꞋ bɔ̧ bu è kɨꞋɨ abua am; bɨ̀ ka nkàlè àwɔb, nkàà nê kèfɔ̧̀ Mbɔ̧ɔ̧mà wu abua bòt mbɨꞋɨ̀ bɔ̀ɔ̀ba wàa.

¹⁷TsiꞋ è shua wɨ̧ ane nkûŋ nê, wòt bakà bɨ̧ɨ̧ne a Kèfɔ̧̀ Mbɔ̧ɔ̧mà mbɨ̀Ꞌɨ̀ watèchɨɨle, ŋut li tà kà nyi a èbèm.”

¹⁸Wajûŋ Bèjuê kǒ biite a Yesò nê, “NyɨꞋtà Ntsɔ̧̀, betsiꞋa e ngɨ̀ nǎ tè mbɔ̀ mèmpème kàlìà à?”

¹⁹Yesò mè mbììte atò nê, “À ghɨ̀ na ka ntɔ am nê wòt ntsɔ̧̀ à? NdàꞋ Mbɔ̧ɔ̧mà ka tà wu wòt ntsɔ̧̀ la.

²⁰À ko mbɨ̧te Musì: ‘À ka njɨ̀ àbȩ, à ka mbùŋè wɔ̀bȩ̂, à ka ntsɔŋ, à ka mbɨ̧̀ɨ̧̀ne ànəa àfɨte àtsəa wòt, me zəa tǎt wè bɔ̂ nyɨ̌ wè.’ ”

²¹Ŋut bɨ̀ɨ̀lè nê, “Mâ nɔ̀ŋe mbɨ̧ tàa à shua la tègème àfɨꞋa e ndi ngu wakèsà la.”

²²Yesò zə ayaa ale, shu abua tò nê, “À bela mbùa àghɨ yeamɔꞋ àa ghɨ̌ la. Ghǎ fɨ̧̀ɨ̧̀nè èghɨ bê ègème, ŋà èkab èghɨ mbɔŋ abua bòt mbuŋ, mbɔ̂ nkɨ̀Ꞌɨ̂ nkùŋè am, ko aa li jandèlè a ègwet.”

²³Ŋut wu zə ale, a taꞋa saa tò, nkàà nê tà li ntaꞋa bɔ èghɨ nyaŋ.

²⁴Yesò ye ndɨ a saa atò la nê, “Aa li taꞋa kweele abua bòt èkab a mànyia kèfɔ̧̀ Mbɔ̧ɔ̧mà.

²⁵Aà njùa anyà̧ mbɨ̀Ꞌɨ̀ loà naa tɔɔ a èbem èləꞋə sàꞋa, tè ntsè ndɨ wòt èkab nàa nyi a kèfɔ̧̀ Mbɔ̧ɔ̧mà la.”

²⁶Tà làꞋ ale bòt bɔ wu abot ndzəèa la, e biite atò nê, “Tè a wu anè, ko betsiꞋa wàà bɔ mèmpème à?”

²⁷Yesò bɨ̀ɨ̀lè èngǎ̧ wɔb nê, “Aà nkwèèla abua bɔbȩ, ka è wu ne Mbɔ̧ɔ̧mà, ko àghɨa àgème aà njùa.”

²⁸Pità bɨ̀ɨ̀le nê, “Ye ndɨ baà sa èghɨ ègème nkùŋè àwê la.”

²⁹Yesò nê, “Oò! KwàꞋ ane nkûŋ, tsiꞋ è shu awɨ̧ nê wòt tà sa àpfəè azi, nè vi vi, nè bɔnyɨ bi, nè tǎt vi bɔ̂ nyɨ̌ vi, kò bɔ̧ bi leꞋ, ambo kèfɔ̧̀ Mbɔ̧ɔ̧mà la,

³⁰naa bɔ àbȩ̀ a tsè èghɨ mbɔŋ la àfɨ̀Ꞌ yaa, e mèe li lɔ̀Ꞌɔ ebɔ mèmpème kàlìà àfɨ̀Ꞌ yu nga ekɨꞋɨ la.”

³¹Yesò nɨ bɔkatè bi bu ntsɔ̀b babe la ngà a ntsèm, è shu awɔb nê, “Bɨ̀ zə, ba wua nkɔꞋɔ ngà a Jèlusalèm, àdziꞋa àghɨ àgème bèndàꞋàtɔŋ Mbɔ̧ɔ̧mà e le shu ane Waã Wòt la àa te la.

³²Bɔɔ li e zǐ atò a tèkitebu bòt kà wu Bèjuê, bɔɔ wȩ̀ȩ̀te atò, etsɔ̧̀ɔ̧̀te atò, e mèe tsəètè mattsə ane tò.

³³Bɔɔ li shu̧u̧ atò, ebɔ bùŋe atò, ka naa me wu ane èlibȩ betat taa yu̧u̧me.”

³⁴Bɔkatè tò e zə ale, bɔ ka bê nko ànəa tà shuà la. Mbɔ̧ɔ̧mà li ndò̧ lə ànəa mbɔŋ abua yɔb tè bɔ̀ ka ko ànəa Yesò làꞋa yùà la.

³⁵Yesò lè lɔ̂Ꞌ nkɨ̀Ꞌɨ̂ tè me dzə a ngèt Jèlikò, wòt kǒ àghɨ atò a leme la, wu a si a ngèt alu̧ ndò̧a èghɨ bi.

³⁶Ŋut wu tseke me zə ènɔ̧̂ bòt e me tsě, tà bììte nê, wu ghà leꞋ?

³⁷Bɔ shu atò nê, “Wu Yesò wòt Nazàlet ntsèà.”

³⁸Tà bê ndɔ̀kè ètsəê vi ntɔ̂ nê, “Yesò, waã Dàbid, ku tèsȩ taã.”

³⁹Bòt bu bɔ wu a mbì la bɔ ŋȩ atò nê, tà kate ètsəê vi. Ka tà pàa ŋȩ nê, “Waã Dàbid, ku tèsȩ taã.”

⁴⁰Yesò tɨ̧ nê bɔ̀ nɨ wòt àghɨ àleme wu nɨŋ nkɨ̀Ꞌɨ̂. Mbɨ̀Ꞌɨ̀ ŋut wu kɨꞋɨ la, Yesò bììte atò nê,

⁴¹“Àa nkɨà nê è ngɨ gha abua ye à?” Tà nê, “Tê, maà nkɨ̀a e mě me ye èdziꞋ.”

⁴²Yesò shu abua tò nê, “Me ye èdziꞋ, èntɨ̧ɨ̧ wê wu à zi ane yaã la, e ghɨ̂ à pem.”

⁴³KwàꞋ àfɨꞋa mbɔŋ, àghɨa ŋut a ghaꞋtè tè tà bùꞋ me ye èdziꞋ, nkùŋa a Yesò, ŋa mènkɔ̀ŋke abua Mbɔ̧ɔ̧mà. Ènɔ̧̂ bòt bu e ye àghɨa a ghɨ̀ la, ŋà mènkɔ̀ŋke abua Mbɔ̧ɔ̧mà mɨ̧̂.