Read Mundani Lûk 2 Bible Online

Lûk 2 - Mundani bible

Lûk 2

¹È li ngu àfɨꞋa èghɨ bàa e ghɨ̀ la, Empelɔ̀ Sisà Àgɔstɔ̀s saꞋ nê, bòt bàgème bɔ̀ pà̧à̧ àwɔb a èbem èlaꞋ bu a èten li la ègème.

²ÀfɨꞋa bɔ̀ɔ ngɨ̀à kèmpà̧ mbì bɔbȩ wu la, Sisà Àgɔstɔ̀s è yɔ̀Ꞌɔ Kwìlinɔ̀ ane gɔvanɔ̀ bòt Silìà.

³Tà saꞋ ale wòt ègème gha àdzìꞋa àndǎ̧ zi a dzəè la, bɔɔ shɨ èlen tò.

⁴Jòsêb li ndzəa àpfəèa Nazàlet a èbem àlaꞋ a Galìlî nga a Betèlèghêm a èbem àlaꞋ a Jùdià, àdzìꞋa bɔ̀ le bi a fɔ̧̀ nyaꞋ Dàbid la. Tàà nga abàꞋ və ale, ngu ndɨ tà dzəè a àndǎ̧ Fɔ̧̀ Dàbid wu la.

⁵Tà li ngà ezì èlen li a si bɔ̂ Màlià, èleè vi tà lè wu nè èbèm la.

⁶Bɔ gha a Betèlèghêm ale tà me lu̧u̧te nkàà nê àfɨꞋa tà li ngu bi la a li nkùꞋ.

⁷Màlià bi waã mbi vi, wambâ̧. Bɔ lèbte atò a èbem ndǐtsə mbɔ̂ nɔ̀ŋè atò a èbem èpfəêꞋ àdziꞋa bɔ̀ɔ njɨ̀a njɨ̀tsə la, nkàà nê àdziꞋ a li à ka wuê a èbem lob bègɨ̧̀ àa nkɨ̀Ꞌa ntsèka la, bɔɔ tseke.

⁸È li ngu ane àlia ngaa bèmbaabà njɨ̀ ko e wu àbâ àlaꞋ a mbɔŋ a èghem, ètsəꞋ mbààba èlaã njɨ̀ bɔb.

⁹Wantu̧ tǎt wɔb Mbɔ̧ɔ̧mà è saꞋa a mbì lɔb. ÈkaꞋà Lefɨ̀Ꞌ e kaꞋà a ègwet lɔb, bɔ taꞋa bente.

¹⁰Wantu̧ wu shu abua yɔb nê, “Bɨ̀ ka mbɔ̀ɔ̂. Ye am àdzìꞋ yaa, mâ nɨ Ntu̧ Ntsɔ̧̀ nɨŋ nkɨ̀Ꞌɨ̂ eŋa abua yɨ̧, nàa li nɨ mèngùꞋte enɨ kɨꞋɨ ŋa abua bòt bàgème a èbem àlaꞋ a Izəèlȩê la.

¹¹Bɔ bi waã ètsəꞋ wàa a èbem àpfəèa Fɔ̧̀ Dàbid, è wu Mpemnà wɨ̧ la. Tà wu Klistò Lefɨ̀Ꞌ. [1]

¹²Eyaa wu àghɨa àa nyɨꞋte àlȩê la. Bɨa ye waã bɔ lebte atò a èbem ndǐtsə nɔ̀ŋè atò a èbem èpfəêꞋ njɨ̀tsə la.”

¹³AdzìꞋ me wù̧ù̧ne àlaã bɔntu̧ Mbɔ̧ɔ̧mà a dzə a kèfɔ̧̀ wu a ègwet la, a saꞋa a mbì lɔb, nkwene ane e we mbì wu, bɔ̂ tò ba e me kɔ̧ɔ̧ mèkù̧ nguꞋta Mbɔ̧ɔ̧mà, shua nê:

¹⁴“TsiꞋ mèngùꞋte wu abua Mbɔ̧ɔ̧mà wu a ègwet la. Tà ŋa àlàŋkè abua bòt sitsǎꞋ bàgème nkàà nê tàà nkɔ̀ŋkà àwɔb.”

¹⁵Mbɨ̀Ꞌɨ̀ bɔntu̧ Mbɔ̧ɔ̧mà bu e kua akwèn nga a ègwet la, bèmbaabà njɨ̀ bu e me làꞋa a kètsìà wɔb shua nê, “Bɨ̀ ghɨa bà gha a Betèlèghêm ndze àghɨ yaa Tǎt wa Mbɔ̧ɔ̧mà e tuꞋu abua ya la.”

¹⁶Ale, bɔ temnè ngà kwàla ndze a Màlià bɔ̂ Jòsêb mè ndze waã wu tà nɔ̀ŋkè a èbem èpfəêꞋ lu la.

¹⁷Bèmbaabà njɨ̀ bu e ye atò ale, shu awɔb àghɨ yu wantu̧ Mbɔ̧ɔ̧mà è ghɨ̀ shu adù̧ waã wu la.

¹⁸Mènəè mu bèmbaabà njɨ̀ bu e li shuê la li ntaꞋa tsě bòt bàgème.

¹⁹Màlià zìambɔŋ li ngua nkù̧ù̧ta mènəè maa ègème mbɔ̂ me mɨ̀ɨ̀tè mùà a èntɨ̧ɨ̧ vi.

²⁰Bèmbaabà njɨ̀ bu e ghɨ̀ ale, nkua akwèn me kɔ̧ɔ̧ ngùꞋtà Mbɔ̧ɔ̧mà ane mènəè bɔ zə mè ndze la. A li mbê ngu mbɨ̀Ꞌɨ̀ wantu̧ Mbɔ̧ɔ̧mà shu awɔb la.

²¹Èli befà̧aã e le tsê, àfɨꞋa bɔ̀ɔ naŋe wakèfi wu la a kuêꞋ bɔ tsì èlen tò ane Yesò, wuê mbɨ̀Ꞌɨ̀ wantu̧ Mbɔ̧ɔ̧mà lè ŋa ka bɔɔ li ekɔɔle atò la.

²²È li ngu àfɨꞋa Jòsêb bɔ̂ Màlià àa shùu a lèsɔ̀t wɔb mbɨ̀Ꞌɨ̀ mbɨ̧te Musì tèa shua la, bɔ nɨ waã wu nga a Jèlusalèm ezi atò a tèkitebu Mbɔ̧ɔ̧mà.

²³Eyaa wu ndɨ Musì le shɨ a si a èbem mbɨ̧te Mbɔ̧ɔ̧mà la nê, bɔ̀ zì waã mbì ègème è wu wambâ̧ la, abua Mbɔ̧ɔ̧mà mbɨ̀Ꞌɨ̀ tàa tsiꞋi waã tò.

²⁴Bɔ ghà ŋa bèbaba babe kò bɔ ŋa banɨ̧̀ ndɨk babe leꞋ abua tǎt wɔb Mbɔ̧ɔ̧mà mɨ̧̂ mbɨ̀Ꞌɨ̀ ndɨ mbɨ̧te tò te shu la.

²⁵È li ngu àfɨꞋa mbɔŋ wòt kǒ wu a Jèlusalèm èlen tò wu Simiòn. Tà li ngua nkùkta Mbɔ̧ɔ̧mà mè ntɨ̧ɨ̧ ndɨŋndɨ̀ŋ a mbì tò. Tà li ngua nchɨ̀Ꞌà àlia bòt Izəèlȩê bɔ̀ɔ li dzəâ a èbem ngoꞋ tɔb la, Fo Kèfə mè ngu ane tò.

²⁶Fo Kèfə li nkàꞋ atò nê, tàa li ye wòt wu Mbɔ̧ɔ̧mà li ndzɔꞋ etsàà a sitsǎꞋ la, ka pfə.

²⁷Fo Mbɔ̧ɔ̧mà ghɨ̀ ale, nɨ a Simiòn ngà a èbem lob nɨ̧ Mbɔ̧ɔ̧mà. AfɨꞋa tǎt Yesò bɔ̂ nyɨ̌ tò e nɨ atò nɨŋ nkɨ̀Ꞌɨ̂ mbɨ̀Ꞌɨ̀ mbɨ̧tsə tèa nkɨà la,

²⁸Simiòn nɨ waã wu mbèà, ngùꞋtè a Mbɔ̧ɔ̧mà nê:

²⁹“Tê, à ghɨ̀ mbɨ̀Ꞌɨ̀ à li nkàꞋ la, ghɨa wafàꞋ wê sa sitsǎꞋ àfɨ̀Ꞌ yaa bò̧ bò̧.

³⁰Mmɔ̌ mbɔŋ mâ ye waã wu à tsà nê tà kɨꞋɨ ngɨ̀ bòt è pem la.

³¹À tsà atò mbɨ̀Ꞌɨ̀ bòt bàgème a sitsǎꞋ bɔɔ ye.

³²Taa ale nguê mbɨ̀Ꞌɨ̀ èkaꞋà àa nyɨꞋte alu̧ wê abua bòt kà wu Bèjuê la. Taa li ghɨ̌ bòt aa kɨꞋɨ ekukte bòt bê bu, è wu bòt Izəèlȩê la.”

³³Simiòn è paa, a taꞋa kɨ̀Ꞌne a Tǎt Yesò bɔ̂ nyɨ̌ to ane mènəè tà shu ane tò la.

³⁴Simiòn ghɨ̀ ale, fà̧à̧te awɔb ndɔ̀Ꞌ èshu abua Màlià, nyɨ̌ waã wu nê, “Mbɔ̧ɔ̧mà làà waã waa nê tà kɨꞋɨ a èbem àlaꞋ a Izəèlȩê è shuke bòt nyaŋ a si mè ndɔ̀Ꞌ ndɔ̀kè bòt nyaŋ a ègwet. Taa li wu mbɨ̀Ꞌɨ̀ àlȩê a dzə abua Mbɔ̧ɔ̧mà la, bɔbȩ aa me làꞋa ntàꞋa èlen tò kàbɔ̀ŋ.

³⁵E bɔ ghɨ̀ ale, e tùꞋtè mènəè ndò̧ mu a èbem mèntɨ̧ɨ̧ mɔb la. E ghɨ̀ ale, tèsȩte waã wè tea sɔ̀ɔ̀be èntɨ̧ɨ̧ wê mbɨ̀Ꞌɨ̀ àlùmbà̧.”

³⁶AfɨꞋa mbɔŋ taꞋa ndèn ndàꞋàtɔŋ Mbɔ̧ɔ̧mà ko èlen tò wu Anà, tà bɔ̂ ngu nempfə àvi la wu abot. Tǎt tò li ngu Fanùl, wòt àbâ àlaꞋ a Ashà. Tà lè tsekè ane èyɔꞋɔ ane èngùꞋebȩ yesà̧à̧mbe.

³⁷Ka mbɔ̂ ngu nempfə àfɨꞋa mbɔŋ ane èngùꞋebȩ èghem yefà̧aã ntsɔ̀b yekwì. Anà mbɔŋ li ngua ntsèka a èbem lob nɨ̧ Mbɔ̧ɔ̧mà àfɨ̀Ꞌ àgème nkùkta atò ètsəꞋ bɔ̂ nèngû̧, ntsèka àfɨ̀Ꞌ àko kà jɨ èghɨjɨ mbɔ̂ me tsàꞋte wuê a Mbɔ̧ɔ̧mà.

³⁸Mbɨ̀Ꞌɨ̀ Màlià bɔ̂ Jòsêb e nɨ waã mbɔŋ nkɨ̀Ꞌɨ̂ la, tà kɨ̀Ꞌɨ̂ a ngèt tò ŋa mènkɔ̀ŋke abua Mbɔ̧ɔ̧mà, mè ndàꞋ ane èlen waã mbɔŋ abua bòt bu bàgème bɔ wua nchɨ̀Ꞌà nê, Mbɔ̧ɔ̧mà naa li etsǐ bòt Jèlusalèm a èbem ngoꞋ tɔb la.

³⁹Jòsêb bɔ̂ Màlià bɔ paa àghɨa bɔ̀ɔ ngɨ̀à mbɨ̀Ꞌɨ̀ mbɨ̧te tǎt wɔb Mbɔ̧ɔ̧mà te shu la ale, nkua akwèn ngà àpfəè yɔb a Nazàlet a èbem àlaꞋ a Galìlî.

⁴⁰Waã mbɔŋ li ntsə nkwèèlê, mbɔ̌ èyì, èlɔ̂t Mbɔ̧ɔ̧mà e mè nguê ane tò.

⁴¹Tǎt Yesò bɔ̂ nyɨ̌ tò e li ngua ngà a Jèlusalèm èngùꞋ ègème a èpǎ̧ Màntsea a ègwet.

⁴²AfɨꞋa Yesò lè wu èngùꞋ èghem ntsɔ̀b yebe la, tà kùŋe a Jòsêb bɔ̂ Màlià nga ejɨ èghɨjɨ bu, ane ndɨ bɔ̀ɔ ngɨ̀à àfɨ̀Ꞌ àgème la.

⁴³Bɔ paa èghɨjɨ bu ale, ndɔ̀Ꞌ mbùꞋ me kua akwèn nga àpfəè ayɔb, ka Yesò wu tèꞋa a Jèlusalèm. Tà tèꞋa ale, tǎt tò bɔ̂ nyɨ̌ tò è ka ko,

⁴⁴bɔ me mɨ̀ɨ̀tè nê tà wu a èbem ènɔ̧̂ wɔb. Bɔ ghȩ̀ȩ̀ne ane àliabȩ ka mbùꞋ me kɨ atò ayɔɔ bòt ləlob yɔb nè bèshu̧ bɔb.

⁴⁵Bɔ̀ kɨ atò kekaŋ, bɔ kua akwèn ngà a Jèlusalèm e me kɨ atò.

⁴⁶Èlibȩ è tsè betat, ka bɔ ye atò a èbem lob nɨ̧ Mbɔ̧ɔ̧mà, a kètsìà bènyɨꞋtà Bèjuê tà tsekè me yute a lèmù wɔb mè mbììta awɔb mèngà̧ la.

⁴⁷Èlɨ tà li ngua njùta awɔb nè mèngǎ̧ è li ngua ndzəa a ètsəê tò la e li ntsè wòt ègème.

⁴⁸ÀfɨꞋa tǎt tò bɔ̂ nyɨ̌ tò e ye atò la, mètsəê mɔb lià. Nyɨ̌ tò bììte atò nê, “Waã am, àghɨ yaa à ghɨ̀ ane ya anè la, wu ghà à? Ba tǎt wè e taꞋa bente àfɨꞋa baa wua nkɨ̀a awê la.”

⁴⁹Yesò bɨ̀ɨ̀lè nê “Ghǎ ghɨ̂ ka bɨ me kɨ am à? Bɨ bakà ko nê mâ bɔ̂ ndɨ màa wu a lob Tǎt am la.”

⁵⁰Yesò làꞋ ale bɔ̀ ka ko ànəa tà shua la.

⁵¹Ale, Yesò lɔ̀Ꞌɔ a si nkua akwèn bɔ̂ tò ba ngà a Nazàlet, mè me zə awɔb nɨ̀a ngà nè mbì. Nyɨ̌ tò li ngua nkù̧ù̧ta mènəè maa ègème mè me mɨ̀ɨ̀te mua a èntɨ̧ɨ̧ vi.

⁵²Yesò li ntsèke tè ntsə mbɔ̌ èyì, Mbɔ̧ɔ̧mà me kɔ̀ŋkè atò, bòt e mè me kɔ̀ŋkè atò mɨ̧̂.