Read Mundani Lûk 22 Bible Online

Lûk 22 - Mundani bible

Lûk 22

¹Èpǎ̧ bled kà wua nkɔ̀Ꞌɔ [6], bɔ̀ɔ ntɔ nê èpǎ̧ Màntsea a ègwet la e li me kɨꞋɨ,

²bètǎt bèntsìà mèpɨ̧̀ Mbɔ̧ɔ̧mà bɔ̂ bènyɨꞋtà mbɨ̧te Musì e me kɨ èlu̧ bɔ̀ɔ nɨ ebùŋè a Yesò a ndò̧, nkàà ndɨ bɔ̀ɔ mbɔ̀a bòt bɔb la.

³Satàn nyi a èntɨ̧ɨ̧ wakatè Yesò kǒ ane bɔkatè tò bu ntsɔ̀b babe èlen tò wu Judàs Iskaliòt la.

⁴Tà ghà nkwène ane bètǎt bèntsìà mèpɨ̧̀ Mbɔ̧ɔ̧mà bɔ̂ bètǎt bèmbaabà lob nɨ̧ Mbɔ̧ɔ̧mà, bɔ̂ tò ba e làŋkè ndɨ tàa fɨ̧̀ɨ̧̀ne a Yesò abua yɔb la.

⁵Bɔ làŋkè ale, ànəê yu a taꞋa bɔ̀ àwɔb, bɔ nê bɔɔ ŋa atò èkab.

⁶Judàs bɨ̧ɨ̧ne, mbê mbùꞋ me kɨ ndɨ yèa ghɨ̌ bɔɔ baãaã a Yesò kà bòt e ko la.

⁷Àlia èpǎ̧ bled wu nàa ka kɔꞋ la à nkɨ̀Ꞌɨ̂, è wu àli yu bɔ̀ɔ nkɨ̧̀ɨ̧̀ma bɔɔnjɨ̀ ane èghɨjɨ èpǎ̧ Màntsea a ègwet la.

⁸Yesò tu̧u̧ a Pità bɔ̂ Jɔ̌n nê, “Bɨ̀ ghǎ ntàŋke èghɨjɨ èpǎ̧ Màntsea a ègwet, bà kɨꞋɨ njɨ.”

⁹Bɔ biite atò nê, “Aà nkɨà nê bà gha ntàŋke a ka adzìꞋ à?”

¹⁰Ale, Yesò bɨ̀ɨ̀lè nê, “Bɨ̀ gha a èbem àpfəèà nɨ̧, ko wòt kǒ tà ŋeꞋe èkɨŋ mèleb la naa kwene ane yɨ̧, bɨ kuŋe atò nga a èbem lob tàa nga enyi la.

¹¹Bɨ̀ nyi, bɨ shu abua tǎt lob nê, ‘NyɨꞋtà laꞋnê ntàŋ wu bɔ̂ bɔkatè bi àa jɨ èghɨjɨ èpǎ̧ Màntsea a ègwet bɔb a èbèm la àa waa?’

¹²Ko taa nyɨꞋte awɨ̧ taꞋà àtsəa lob a ègwet bɔ naŋe la. Eyaa wu àdziꞋa bɨ̀a taŋke èghɨjɨ èpǎ̧ Màntsea a ègwet bu la.”

¹³Bɔkatè tò e gha àpfəèà nɨ̧ yu, me ye àghɨ àgème a wu mbɨ̀Ꞌɨ̀ tà ghɨ̂ shu la. Ale, bɔ taŋke èghɨjɨ èpǎ̧ Màntsea a ègwet bu.

¹⁴AfɨꞋa mànjɨa èghɨjɨ èpǎ̧ Màntsea a ègwet bu a kɨꞋɨ, Yesò tseke a si bɔ̂ bɔntu̧ bi me jɨ èghɨjɨ.

¹⁵Bɔ tseke ale, tà shu abua yɔb nê, “Maa lâ ngua nkɨ ejɨ èghɨjɨ èpǎ̧ Màntsea a ègwet bàa ba nɨ̧̀ ba, nè èntɨ̧ɨ̧ am ègème ka e bɔ eye ngoꞋ.

¹⁶TsiꞋ è shu awɨ̧ nê, è nka tsi jɨ èghɨjɨ baa, tè àli yu bòt àa ko lə èghɨjɨ mbɔŋ a kèfɔ̧̀ Mbɔ̧ɔ̧mà la a kùꞋ.”

¹⁷Ale, Yesò nɨ ndɔŋ, ŋa mènkɔ̀ŋke abua Mbɔ̧ɔ̧mà, mbɔ̂ nê, “Bɨ̀ nɨŋ nù bàgème.

¹⁸Maa shua wɨ̧ nê, è nka li tsi nu mèlùꞋ màa bɔ ghɨ ane tètaãaãte vȩn la a, tè àli yu màa nu mèlùꞋ fi a kèfɔ̧̀ Tǎt am la a kùꞋ.”

¹⁹Tà mè nɨa bled, ŋà mènkɔ̀ŋke abua Mbɔ̧ɔ̧mà, mbɔ̂ mbòꞋtê ŋa abua bɔntu̧ bi nê, “Eyaa wu mbɨ̧̀ ènyit yaã mâ ŋa abua yɨ̧ la. Bɨ̀ me ghɨa nɨa mɨ̀ɨ̀tè am.”

²⁰Tà lɔ̀Ꞌ mè ngɨ̀ wuê a èlɨ ngaa nè ndɔŋ yu è shu nê, “Ndɔŋ yaa wu mènkàꞋa fi Mbɔ̧ɔ̧mà màa nɨ àlo̧ am enɨ ghɨ̌ aa tsəète a si nkàà wɨ̧ la.

²¹Bɨ̀ zə, wòt wu tàa fɨ̧̀ɨ̧̀ne am la, wua njɨ̀a èghɨjɨ ba tò.

²²Waã Wòt naa pfə wuê mbɨ̀Ꞌɨ̀ Mbɔ̧ɔ̧mà li nɔ̀ŋè la, ka aa li bɨɨ àbâ wòt wu tàa fɨ̧̀ɨ̧̀nè atò la.”

²³Bɔ bùꞋ me biite a kètsìà wɔb wòt nga e ghɨ̀ èwuu ànəê yaa la.

²⁴Àyɔ̀ŋ a li ntsèke tè ndzə a kètsìà bɔkatè Yesò ane ànəa wòt tà wu wɔ̀jûŋ ane yɔb la.

²⁵Yesò shu abua yɔb nê, “Bɨ ko nê bèfɔ̧̀ kà ko a Mbɔ̧ɔ̧mà àa ngɨ̀ bɔ me ghɨɨle bòt bɔb, bèkěm bɔb, e mè me kɨ nê bòt è me tɔ awɔb ane bèshu̧ banɔ̧̀.

²⁶Ka a bakà bɔ ndɨ aà wu anè a kètsìà wɨ̧ la. Wɔ̀jûŋ ane yɨ̧ è bɔ̂ ndɨ tàa wu mbɨ̀Ꞌɨ̀ we kwèn la. Wòt tà tɨ̧ɨ̧ àtsə la bɔ̂ ndɨ tàa wu mbɨ̀Ꞌɨ̀ wafàꞋ la.

²⁷Wàà wu wɔ̀jûŋ à? Wu wòt wu tà tseke a si me jɨ la, kò wòt tà bɨ̧ɨ̧ne ewu wafàꞋ tò la à? Ane nkûŋ, wu wòt tà tseke a si la. Ka e ngu a kètsìà wɨ̧ mbɨ̀Ꞌɨ̀ wafàꞋ.

²⁸Ka wu ndàꞋà bɨ̀a, bɨ li ntɨ̧ɨ̧ a ngèt yaã àfɨꞋa e ndi mbùꞋ me ye ngoꞋ tê kɨꞋɨ edzəâ àfɨ̀Ꞌ yaa la.

²⁹Ale, mbɨ̀Ꞌɨ̀ Tǎt am è yɔꞋ am ane Fɔ̧̀ la, wu ndɨ màa yɔꞋɔ awɨ̧ la.

³⁰Bɨa li jɨ e mě nu ne nà̧ àfɨꞋa màa li tseke a ègwet àtɨ̧ kèfɔ̧̀ am la. ÀfɨꞋa mbɔŋ bɨa tsekte a ègwet ètɨ̧ nɨ̧, ka me saꞋa lətelob bòt Izəèlȩê tu èghem ntsɔ̀b tebe la.”

³¹Yesò ghɨ̀ ale, ntɔ Simùn wu èlen tò ko wu Pità la nê, “Simùn, zə ànəa e nkɨ eshu awê la. Mbɔ̧ɔ̧mà bɨ̧̀ɨ̧̀nè nê Satàn kɨꞋɨ nyìꞋì àwɨ̧ bàgème, mbɨ̀Ꞌɨ̀ bɔ̀ɔ nyìꞋà ntsəètsə ntsìà èfaa la.

³²Ka mâ tsàꞋte a Mbɔ̧ɔ̧mà àtsəa yê àwɔ̀ Simùn mbɨ̀Ꞌɨ̀ ka à tsì èntɨ̧ɨ̧ wê ane yaã. Ka aa me kua akwèn nkɨ̀Ꞌa abua am à zì mèntɨ̧ɨ̧ bɔnyɨ bè.”

³³Pità bɨ̀ɨ̀lè nê “Tê, è màà ngu wuê fȩ ko maa nyi yùà ba nè, nguê èvə e mpfə ba nè.”

³⁴Yesò shu abua tò nê, “Pità, kwàꞋ ane nkûŋ lu̧nkɔ̀Ꞌ naa me laꞋ nê yea ntɔ ètsəꞋ waa, à tû̧ ngò̧ tetat nê ye bakà ko am.”

³⁵Yesò ghɨ̀ ale, mbììte awɔb nê, ye li lɔ̂Ꞌ ntù̧ àwɔb kà ye ntaꞋ kò ambè nè gùbtsə ale, bɔ bu àghɨ ako leꞋ? Bɔ nê, “ÀwɔꞋ.”

³⁶Yesò mè ntsìꞋi shu abua yɔb nê, “Ka àfɨ̀Ꞌ yaa, wòt ane yɨ̧ bɔ ntaꞋ kò wuê ambè leꞋ, tà ka ntɔ. Wòt kà bɔ àlùmbà̧, tà fɨ̧̀ɨ̧̀nè ndǐmàꞋa zi nju̧.

³⁷TsiꞋ è shu awɨ̧ ane nkûŋ nê, èngǎ̧ Mbɔ̧ɔ̧mà wu e laꞋ nê, ‘Bɔɔ li nɨ atò mbɨ̀Ꞌɨ̀ wòt kàbɔ̀ŋ’ la, e bɔ ndɨ àa wu nkûŋ ane yaã la, nkàà nê àghɨa bɔ̀ le shɨ ane yaã la a bùꞋù tê me te.”

³⁸Tà làꞋ ale, bɔkatè tò e shu abua tò nê, “Tê Yesò, ba bɔ èlùmbà̧ bebe.” Yesò nê, “Bɨ̀ tsiꞋi ànəa ngaa ale.”

³⁹Yesò dzəè àpfəèà nɨ̧ yu ngà a ègwet èbȩ Olìf mbɨ̀Ꞌɨ̀ tàa ndzìà ngɨ̀à la, bɔkatè tò e kùŋe atò ngà mɨ̧̂.

⁴⁰Tà kɨꞋɨ tê tà dzə abot, tà shu abua yɔb nê, “Bɨ̀ me tsàꞋte a Mbɔ̧ɔ̧mà shù̧ù̧te atò mbɨ̀Ꞌɨ̀ bɨ kwen a èbem ètaãaãte mènəè.”

⁴¹Tà sà àwɔb nyaꞋa nga a endɨ̌, ntèmè tènjûŋ ti a si ntsàꞋtè a Mbɔ̧ɔ̧mà nê,

⁴²“Tê, nɨ ndɔŋ ngoꞋ yaa abua am la, na à kɔ̀ŋkà la. Ka à ka ngɨ̀ àghɨa e nkɨa la, ghɨ̀ wuê àyea àa nkɨà la.”

⁴³[Wantu̧ Mbɔ̧ɔ̧mà kǒ chu a ègwet ndzì èntɨ̧ɨ̧ tò.

⁴⁴Mbɨ̀Ꞌɨ̀ tà ghɔ̧ɔ̧na a èntɨ̧ɨ̧ vi nyaŋ la, tà tsènè ntsàꞋta Mbɔ̧ɔ̧mà nè èntɨ̧ɨ̧ vi ègème. Èlemne tò e me chɨ̧ɨ̧te a si mbɨ̀Ꞌɨ̀ tètabte àlo̧.]

⁴⁵Tà tsàꞋtè mpàa, ndɔ̀Ꞌ a si nga nkwene ane bɔkatè bi ndìa, bɔ kaã nyaŋ ngu ndɨ ènyit yɔb e tsa ègème ane ànəa mbɔŋ la.

⁴⁶Tà bììte awɔb nê, “Bɨ̀ lia ghà à? Bɨ̀ lɔ̀Ꞌɔ a si me tsàꞋte a Mbɔ̧ɔ̧mà, mbɨ̀Ꞌɨ̀ bɨ kwen a èbem ètaãaãte mènəè.”

⁴⁷Mbɨ̀Ꞌɨ̀ Yesò bèla ndàꞋà la, ènɔ̧̂ bòt ko e kɨꞋɨ̀ nkwène ane yɔb. Wantu̧ ko ane bɔntu̧ Yesò bu ntsɔ̀b babe bɔ̀ɔ ntɔ nê Judàs la, li ngua nɨa awɔb nkɨ̀Ꞌâ. Tà kɨꞋɨ ale ngà a ngèt Yesò, me kɨ etaꞋa atò.

⁴⁸Yesò bììte atò nê, “Judàs, nko nê à kɨ etaꞋa Waã Wòt mbɨ̀Ꞌɨ̀ efɨ̧̀ɨ̧̀ne atò?”

⁴⁹Mbɨ̀Ꞌɨ̀ bɔkatè bu bɔ wu bɔ̂ Yesò la e ye àghɨa nkɨ e ghɨ̀ la, bɔ nê, “Lefɨ̀Ꞌ, bà sɔ̀ŋke èlùmbà̧ nkòꞋte awɔb?”

⁵⁰Wakatè ko sɔ̀ àlumbà̧ mì ndo àtû̧ àbualu̧ àbùꞋ a àtsəa bèntsìà mèpɨ̧̀ Mbɔ̧ɔ̧mà.

⁵¹Yesò bê shu abua yɔb nê, “Bɨ̀ tsiꞋa yu ale.” Mbɔ̂ mbà̧à̧te àtû̧ atò ngɨ̀ tà pem.

⁵²Yesò shu abua bètǎt bèntsìà mèpɨ̧̀ Mbɔ̧ɔ̧mà nè bètǎt bèmbaabà lob nɨ̧ Mbɔ̧ɔ̧mà, nè bɔɔjuŋ bɔ kɨꞋɨ mbɨꞋɨ̀ ebaãaã atò la nê, “Bɨ ghɨ̀ na me kɨꞋɨ ebaãaã am ndzəè mbɨ̀Ꞌɨ̀ bɨ kɨꞋa baãaã tsɔŋ nè nyitsə bɔ̂ mbuꞋtsə à?

⁵³Maà wu ba nɨ̧̀ ba a èbem lob nɨ̧ Mbɔ̧ɔ̧mà àli àgème, ka bɨ̀ ka mbà̧aã am. Ka eyaa wu àfɨ̀Ꞌ àyɨ̧ nè àfɨꞋa Satàn bɔ mètàŋ mi ègème la.”

⁵⁴Bɔ baãaã a Yesò nɨ̀a tò ngà a lob Kefàs wu tà li ngu àtsəa bèntsìà mèpɨ̧̀ Mbɔ̧ɔ̧mà la. Pità me nyaꞋa nkùŋà wɔb akwèn

⁵⁵TaꞋà èwet ko e wu a kètsìà àsà̧aã bɔ tsəꞋte la, Pità ghà me yɔɔ bɔ̂ bòt bu abot la.

⁵⁶Mbɨ̀Ꞌɨ̀ Pità tseke me yɔɔ èwet wu la, waàvi àfàꞋ kǒ kɨꞋɨ me lɨ̀ŋke atò tè nê, “Mbê waa lè wu bɔ̂ Yesò nɔ̂.”

⁵⁷Tà bê ntu̧ nê, “Àvi wàà, e mbakà ko atò.”

⁵⁸Àfɨ̀Ꞌ a me wu, wòt kǒ mè ndze atò, mbê nê, “À wu wòt kǒ ane yɔb mɨ̧̂.” Pità tu̧ nê, “Mbê wa, è ntsě mmɔ̌.”

⁵⁹È mè me wu mbɔŋe ane nyèm yemɔ̀Ꞌ, wòt kǒ mè ŋwèèle kwàꞋ ane ètɨ̧̂ nê, “Ane nkûŋ, mbê waa li ngu bɔ̂ Yesò ba, nkàà nê tà wu wòt Galìlî mɨ̧̂.”

⁶⁰Pità shu nê, “Mbê waa, e mbakà ko ànəa à shua la.” Tà bela ndàꞋà, lu̧nkɔ̀Ꞌ bê ntɔ.

⁶¹Yesò Lefɨ̀Ꞌ ghèble avi ndɨ̀ŋkè a Pità àghɨ atò, Pità bê nkù̧ù̧te mèngǎ̧ Yesò è ghɨ̂ shu la nê “Lu̧nkɔ̀Ꞌ naa me laꞋ nê yea ntɔa aa tu̧ ngò̧ tetat nê ye bakà ko am.”

⁶²Pità ndzəè ngà àbȩ ndɨ̀ kwàꞋ ànyaꞋne.

⁶³ÀfɨꞋa mbɔŋ bòt bu bɔ tsia awɔb nê bɔ̀ me baabe a Yesò la, e bùꞋ me wȩ̀ȩ̀tè atò

⁶⁴nkùùle àghɨ atò, mbɔ̂ shu̧u̧ atò, mbììte atò nê, tà shu wòt tà shu̧u̧ atò la.

⁶⁵Mbɔ̂ ngɨ̀ ale mè ntaꞋa làꞋà mèngǎ̧ nyaŋ nɨŋ ngwȩ̀ȩ̀tè atò.

⁶⁶ÈtsəꞋ e me tsi, bɔɔjuŋ Bèjuê, nè bètǎt bèntsìà mèpɨ̧̀ Mbɔ̧ɔ̧mà nè bènyɨꞋtà mbɨ̧te Musì, e nyi a lob, bɔ nɨ a Yesò nkɨ̀Ꞌɨ̂ bɔɔ saꞋa atò.

⁶⁷Bɔ biite atò nê, “À wu Fɔ̧̀ wu Mbɔ̧ɔ̧mà yɔꞋ ntsà la, à shu awa?” Yesò bɨ̀ɨ̀lè nê, “E ngu anè è shu awɨ̧, ko bɨ̀ ka bɨ̧ɨ̧ne a.

⁶⁸E mbììte awɨ̧ èngà̧, ko bɨ̀ ka tsɔꞋa.

⁶⁹Ka e bùꞋu àfɨ̀Ꞌ yaa, me ghà ne mbì Waã Wòt naa tseke àbâ àbualu̧ a Mbɔ̧ɔ̧mà Àtsèàngɔ̀ŋ.”

⁷⁰Bɔ mè ntsìꞋi biite atò nê, “Nko nê à wu Waã Mbɔ̧ɔ̧mà à?” Tà shu abua yɔb nê, “Bɨ shuê nê e ngu wùà.”

⁷¹Bɔ mè nê, “Wòt ko tsa bàa mè nkɨ̀a nê tà kɨꞋɨ ndzì ànəê àtsə atò la ntsě. Bàa mbɔŋ e zə ànəa tà shu la.”