Read Mundani Lûk 4 Bible Online

Lûk 4 - Mundani bible

Lûk 4

¹Fo Kèfə li ndù̧u̧ ane Yesò mbɨ̀Ꞌɨ̀ tàa nkua a èdzî Jodàn la. Fo mbɔŋ nɨ atò ngà àbâ àlaꞋ àyuube

²Satàn tà̧à̧te atò ane èli èghem yekwì. Tà li tà kà jɨ àghɨ ane èli mbɔŋ, a me lìa ndzìtsə te baãaã atò.

³Satàn shu abua tò nê, “À wu Waã Mbɔ̧ɔ̧mà, à ghɨ̀ èti làa e gheblè ntsìꞋi èghɨjɨ.”

⁴Yesò tsɔꞋ nê, “Àkata Mbɔ̧ɔ̧mà a laꞋnê, ‘Wɔ̀bȩ̂ nàà kà pem nkàà wuê èghɨjɨ bùà bùà.’ ”

⁵Satàn nɨ a Yesò nkɔꞋ ngà a ègwet, tà wu me gwèlè èghɨ li, Satàn nyɨ̀Ꞌte atò èlaꞋ ègème sitsǎꞋ,

⁶mbɔ̂ shu abua tò nê, “Eyaa wu èghɨ bɔ̧ bɔ ŋa la. Mâ bɔ mètàŋ ndɨ betsiꞋa e ŋa bùà nè ènɨ̧ wɔb abua wòt màa nkɔ̀ŋkà la.

⁷À ŋɔ̀Ꞌne a si a mbì laã, ko èghɨ mbɔŋ ègème aa tsiꞋi bê.”

⁸Yesò bɨ̀ɨ̀lè nê, “Àkata Mbɔ̧ɔ̧mà a laꞋnê, ‘À bɔ ndɨ àa me wùꞋte wua Tǎt wè Mbɔ̧ɔ̧mà, mè ndzəa wuê atò la’.”

⁹Satàn nɨ atò ngà a Jèlusalèm, ntsìa atò a ègwet ntsɔ̀Ꞌ lob nɨ̧ Mbɔ̧ɔ̧mà mbɔ̂ shu abua tò nê, “À wu Waã Mbɔ̧ɔ̧mà, à lɔ̀Ꞌɔ a si ŋaà nkȩ ntem a si.”

¹⁰Mè nê, “Àkata Mbɔ̧ɔ̧mà a laꞋnê, ‘Taa tsàà bɔntu̧ bi bɔɔ baabe awê, eŋeꞋe awê.

¹¹Bɔɔ eŋeꞋe awê a èbu bɔb, mbɨ̀Ꞌɨ̀ à wù̧ àka yè ane èti.’ ”

¹²Tà làꞋ ale Yesò bɨ̀ɨ̀lè nê, “Àkata Mbɔ̧ɔ̧mà a mê shu nê, ‘Kâ ntà̧à̧te a Tǎt wè Mbɔ̧ɔ̧mà’.”

¹³Satàn kɨ̀ke a Yesò ane balu̧ bàgème tè tà paa, tà sa atò ngà me chɨ̀Ꞌɨ àfɨ̀Ꞌ àko tsa.

¹⁴Yesò wènè a Galìlî ane mètàŋ Fo Mbɔ̧ɔ̧mà. Àndǎ mènəè tò a li ngà àdzìꞋ àgème a èpfəè àlaꞋ a mbɔŋ.

¹⁵Yesò nyɨ̀Ꞌte èngǎ̧ Mbɔ̧ɔ̧mà à èbem lob Mbɔ̧ɔ̧mà yɔb. Bòt bàgème e me wùꞋte atò.

¹⁶Yesò li ngà a Nazàlet, àdzìꞋa tà li ntsə la. Àliapfəèa yɔb a kɨꞋɨ̀ tà gha a èbem lob Mbɔ̧ɔ̧mà yɔb mbɨ̀Ꞌɨ̀ tàa ndzìà ngɨ̀à la, ndɔ̀Ꞌ a si etɔ èngǎ̧ Mbɔ̧ɔ̧mà,

¹⁷bɔ ŋa atò àkata Àsayà ndàꞋàtɔŋ Mbɔ̧ɔ̧mà. Tà ghàꞋa ndze àdziꞋa bɔ shɨŋ nê,

¹⁸“Fo Tǎt wa Mbɔ̧ɔ̧mà wu ane yaã, nkàà nê tà yɔꞋɔ am nê e nga ntsɔ̀tè Ntu̧ Ntsɔ̧̀ abua bòt mbuŋ. Tà tu̧u̧ am nê, è ntsɔ̀ta nê bòt mènəè è kuule awɔb la, è dzəa, mè ngɨ̀ bòt àghɨ àleme è me ye èdziꞋ. Tà tu̧u̧ am nê, è ntsì bòt ngoꞋ a èbem ngoꞋtsə,

¹⁹mè tsɔ̀tè nê, àfɨꞋa Mbɔ̧ɔ̧mà naa ku tèsȩte bòt bi la a kuêꞋ.”

²⁰Yesò pàa, mbɔ̀te àkatè yu mvəèəè abua wɔ̀fàꞋ wu, mbɔ̂ ntsèke a si. Bòt bàgème a lob və bɔ tsitè àghɨ ayɔb ane tò.

²¹Tà bùꞋ me shu abua yɔb nê, “Èngà̧ waa àdziꞋa àkatè yaa la e te laane, mbɨ̀Ꞌɨ̀ bɨ zə la.”

²²Mèngǎ̧ Yesò è nyi awɔb. A mè ntaꞋa tsè àwɔb ane mèngǎ̧ ntsɔ̧̀ mu è dzəè a ètsəê tò la, bɔ me shu nê, “Tè eyaa ntsè waã Jòsêb?”

²³Tà shu abua yɔb nê, “Bɨ bele lâ teme èngà̧ waa abua am nê, ‘Ngàŋ, bə awê àwɔ̀ mbɔŋ; Àghɨa baa zə nê a li ngɨ̀ a Kàpenàwuêm la, ghɨa àpfəè yɨ̧ ŋaa mɨ̧̂.’ ”

²⁴Tà me shu nê, “Ane nkûŋ, tsiꞋ è shu awɨ̧ nê bɔɔ kà kùkte ndàꞋàtɔŋ Mbɔ̧ɔ̧mà àlaꞋ atò.

²⁵Bɨ̀ yute èngǎ̧ am, è li ngu àfɨꞋa Èlȩjà, ndàꞋàtɔŋ nyaꞋ Mbɔ̧ɔ̧mà, mbɨ̀ŋ tsèke kà lu àlaꞋ a Izəèlȩê ane èngùꞋebȩ yetat nè àtěm, ndaŋe èchɨɨ è nyi àlaꞋ və àgème. AfɨꞋa mbɔŋ bènempfə è taꞋa wu abàꞋ və. Ka tsiꞋ è shu awɨ̧ ane nkûŋ nê, Mbɔ̧ɔ̧mà li ntù̧u̧ Èlȩjà nê tà gha ntɨ̀ŋe wuê wòt wemɔ̀Ꞌ, kà wu wòt Izəèlȩê. Nempfə mbɔŋ li ngu wòt Zalefàt a èbem èpfəè àlaꞋ Sidɔ̀n.

²⁷È li mè ngu àfɨꞋa Èlishà ndàꞋàtɔŋ nyaꞋ Mbɔ̧ɔ̧mà, bòt àghɔ̧atsɔꞋɔ e taꞋa wu a Izəèlȩê, ka ndàꞋ wòt tà li mbə atò la li ngu Nèmàn, wòt Silìà.”

²⁸Bòt bu a lob Mbɔ̧ɔ̧mà la, e li ntaꞋa tsoo ane Yesò àfɨꞋa bɔ zə mèngà̧ mu è dzəê a ètsəê tò la.

²⁹Bɔ ghɨ̀ ale, nkȩ̀te a si èsəèŋnè atò nɨŋ ndzəè a èbem àpfəè, nkɔꞋ nga a ègwet èku̧u̧nè lu àpfəè ayɔb a wu adù̧ və la. Bɔɔ nga ale ngua nga emàꞋa atò a èten nkòòlà.

³⁰Ka Yesò bê ngèble avi, sǎ̧ a kètsìà wɔb ntsè me ghà avi.

³¹Yesò chu ngà a Kàpenàwuêm, àpfəèà nɨ̧ a Galìlî, me nyɨꞋte awɔb èngǎ̧ Mbɔ̧ɔ̧mà ane àliapfəèa Bèjuê.

³²Mèngǎ̧ tà nyɨ̀Ꞌta la li ntaꞋa tsè àwɔb nkàà nê tà li ngua nyɨ̀Ꞌta wɔb mbɨ̀Ꞌɨ̀ wòt tà bɔ àtɔŋ ane ànəa mbɔŋ la.

³³Wòt kǒ wu a lob Mbɔ̧ɔ̧mà, fo kàbɔ̀ŋ nàa ane tò la, tà ŋȩ ane àtɔŋ nɨ̧ nê,

³⁴“Eeeè! Yesò wòt Nazàlet, à kɨa ghà ane yaa? À kɨꞋɨ̀ àdzìꞋ yaa eliime awa à? Mâ ko wòt a wu wùà la. À wu ngule wantu̧ Mbɔ̧ɔ̧mà.”

³⁵Yesò shu abua fo kàbɔ̀ŋ yu nê, “Kabte ètsəê wê! Sǎ a mbê waa!” Fo kàbɔ̀ŋ yu ŋeꞋe atò ndebe a si a mbì lɔb, mbɔ̂ sa atò ka e kà zi àlɔꞋ ane tò.

³⁶Ànəê yaa à taꞋa tsè bòt bu, bɔ me làꞋa a kètsìà wɔb shua nê, “Eyaa wu kà èwuu mèngà̧ à? Mbê waà lâ mbɔ̀ àtɔŋ nè mètàŋ. Tàa ngɨ̀ tà shu ànəê abua fote kàbɔ̀ŋ, te bê sà wòt.”

³⁷Mènəè Yesò ghà a èdzìꞋ àgème àbâ àlaꞋ mbɔŋ.

³⁸Yesò sà lob Mbɔ̧ɔ̧mà yu ngà a lob Simùn. Me kɨꞋɨ nyɨ̌ vi Simùn, wua ngò̧ò̧nà sɔ̧̀ɔ̧̀nà kèkweelè. Bɔ shu ànəa àghɔ̧ ngaa abua Yesò.

³⁹Tà tɨ̧ɨ̧ a ngèt àvi wu ŋȩa sɔ̧̀ɔ̧̀nà wu, è sà atò. Tà bê nkȩ a si ndɔ̀Ꞌ me taŋke awɔb.

⁴⁰Nyèm me fene, bòt bàgème bɔ bɔ bèshu̧ bɔ̀ɔ ngò̧ò̧nà èghɔ̧ nèmbuꞋ la, bɔ nɨ awɔb nkɨ̀Ꞌɨ̂ abua Yesò. Yesò nɔ̀ŋè àbu azi àtsə wòt ègème tà pem.

⁴¹Fote kàbɔ̀ŋ te sà bòt nyaŋ mɨ̧̂, me ŋȩa shua nê, “À wu Waã Mbɔ̧ɔ̧mà.” Yesò ŋȩ àwɔb, tà kà bɨ̧ɨ̧nè nê tè laꞋa, nkàà nê te ko nê, tà wu Fɔ̧̀ wu Mbɔ̧ɔ̧mà li ndzɔꞋ etsàà a sitsǎꞋ la.

⁴²ÈtsəꞋ è tsi, Yesò dzəè a èbem àpfəè ngà adzìꞋa ndziꞋne. Bɔbȩ e me kɨ atò. AfɨꞋa bɔ ye atò la, bɔ me kɨ ekele atò nê tà ka sà àwɔb.

⁴³Tà shu abua yɔb nê, “Mâ bɔ̂ ndɨ màa tsɔ̀te Ntu̧ Ntsɔ̧̀ kèfɔ̧̀ Mbɔ̧ɔ̧mà yaa a èpfəè ko mɨ̧̂ la, nkàà nê eyaa wu àghɨa Mbɔ̧ɔ̧mà li ntsàà am nê è nkɨꞋɨ ngɨ̀ la.”

⁴⁴Ale, tà me nyɨꞋte èngǎ̧ Mbɔ̧ɔ̧mà a èbem lobte Mbɔ̧ɔ̧mà Bèjuê a Jùdià.