Read Mundani Lûk 5 Bible Online

Lûk 5 - Mundani bible

Lûk 5

¹È li ngu ane àli ako Yesò tɨ̧ɨ̧ a ngèt èlemè Gènesalèt, bòt e me nùŋna nkɨ̀Ꞌa a mbì tò ezə èngǎ̧ Mbɔ̧ɔ̧mà.

²Mbɨ̀Ꞌɨ̀ bɔ̀ɔ ngɨa ale la, Yesò ye ènkànuꞋ bebe bɔ nɨŋ ndzəè aguŋ la, bèmbaãaãbasə e ko nê bɔ saame ènkànuꞋ bu nga me shùu bètasat bɔb.

³Yesò nyi a èbem ànkànuꞋ a Simùn, mbɔ̂ nê tà lɔ̀Ꞌɔ aguŋ nyaꞋa ŋwètè ngà a èbem mèleb adzìꞋ. Simùn ŋwètè ngà, Yesò tseke a èbèm, me nyɨꞋte banɔ̧̀ èngǎ̧ Mbɔ̧ɔ̧mà.

⁴AfɨꞋa Yesò paa èngǎ̧ vi la, tà shu abua Simùn nê, “Meè ŋwète ànkànuꞋ yu ngà nè èbem èdzî, mbɔ̂ bɨ bòt bè è maꞋa bètasat bɨ̧ mbà̧à̧ basə.”

⁵Simùn bɨ̀ɨ̀lè nê, “Tê, ba lia li a lè bùꞋu ka bà ka bê mbà̧aã àghɨ. Ka ndɨ̀ wu è shu àwɔ̀ la, maa màꞋa bètasat bu.”

⁶Bɔ màꞋà ale, ntaꞋa baãaã basə tè bètasat bu be tsiꞋa nkɨ ekèète.

⁷Ale, bɔ mɨ̀Ꞌ àbu ntɔ bèshu̧ bɔb a èbem ànkànuꞋ ako yu nê, bɔ̀ kɨꞋɨ ntɨ̀ŋe awɔb. Bɔ kɨꞋɨ̀, bɔ̂ tò ba e lu̧u̧ne ènkànuꞋ bu nè basə, tè ènkànuꞋ mbɔŋ e tsiꞋa nkɨ emela a èbem mèleb.

⁸Simùn wu èlen tò ko wu Pità la ye àghɨa a ghɨ̀ la, kwen a si a mbì Yesò nê, “Tê, e mbakà kùꞋu wòt màa wu ne nè la, e ngu wòt kàbɔ̀ŋ.”

⁹Tàà shua èlɨ̀ wu ale ngu ndɨ ànəa taꞋà basə bu bɔ baãaã la a taꞋa tsè àwɔb bɔ̂ bèshu̧ bi,

¹⁰Jimsì bɔ̂ Jɔ̌n bɔ̧ Zebèdiì, bɔ̂ tò ba e li ngùa fàꞋà nɔ̂ la. Yesò shu abua Simùn nê, “À ka mbɔ̀ɔ̂, e bùꞋu àfɨ̀Ꞌ yaa, à ka tsi buꞋu basə a. Aa tsiꞋi me kɨ bɔbȩ nɨa nkɨ̀Ꞌa abua am.”

¹¹Mbɨ̀Ꞌɨ̀ bɔ tsàà ènkànuꞋ bɔb aguŋ la, bɔ sà èghɨ bɔb ègème, nkùŋè a Yesò.

¹²Mbɨ̀Ꞌɨ̀ Yesò wu a èbem àpfəè ako la, wòt kǒ wu abot àghɔ̧atsɔꞋɔ a baãaã atò la. Ŋut ye a Yesò, nkɨ̀Ꞌɨ̂ ntèmè tènjûŋ ti a si a mbì tò, shù̧ù̧te atò nê, “Lefɨ̀Ꞌ, à kɔ̀ŋkà, ko betsiꞋa à ghɨ̀ e pem.”

¹³Yesò nyààbè àbu azi mbà̧à̧te atò nê, “Oo maà nkɔ̀ŋkà, pem.” KwàꞋ àfɨꞋa mbɔŋ, tà bê mpem àghɔ̧atsɔꞋɔ yu.

¹⁴Yesò səèŋkè àtû̧ atò nê tà ka shu wòt. “Ka ghǎ nyɨ̀Ꞌte awê abua ntsìà mèpɨ̧̀ Mbɔ̧ɔ̧mà, nkɔ̀ŋka Mbɔ̧ɔ̧mà nê à pem, mbɨ̀Ꞌɨ̀ Musì li shu la, enɨ ghɨ̌ waa waa naa ko nê à pem.”

¹⁵Ka mènəè Yesò mu paa mbùà ngà wu nè mbì. Bòt nyaŋ e kɨꞋɨ̀ ezə èngǎ̧ tò, tàa mě bə bòt ngò̧ò̧nà la.

¹⁶Ka ngò̧tsə nyaŋ bɔ̀ɔ nkɨ̀Ꞌa la, tà sà àwɔb nga àdzìꞋa ko zìa zìa etsàꞋte a Mbɔ̧ɔ̧mà.

¹⁷È li ngu ane àli ako Yesò me nyɨꞋte èngǎ̧ Mbɔ̧ɔ̧mà, Bèfalèsiì bɔ̂ bènyɨꞋtà mbɨ̧te Musì, bɔ dzə a tèpfəte àlaꞋ Galìlî nè Jùdià bɔ̂ Jèlusalèm la e wu abot; mètàŋ Mbɔ̧ɔ̧mà wu ane Yesò tà nɨ̀a mbəa bòt àghɔ̧.

¹⁸ÀfɨꞋa mbɔŋ, bòt ko e ŋeꞋè wòt àbâ ènyit tò a pfə la me kɨ nɨa tò enyi a lob enɔ̀ŋe atò a mbì Yesò.

¹⁹Bɔ kɨꞋɨ ale, bɔ̀ ka ye èlu̧ bɔ̀ɔ nɨa ŋut enyi a lob nkàà ènɔ̧̂ bòt bu abot la, bɔ kɔꞋ a ègwet lob, ntsɔ̀Ꞌte àti ngaꞋa èləꞋ è shuke atò a ègwet àkwàŋkè tò a kètsìà banɔ̧̀, ntsìà a mbì Yesò.

²⁰Mbɨ̀Ꞌɨ̀ tà ye ndɨ bòt ngaa e bɔ ntɨ̀ ane zi la, tà shu abua mbê ngaa nê, “Mâ waꞋa a kàbɔ̀ŋ wê.”

²¹BènyɨꞋtà mbɨ̧te Musì nè Bèfalèsiì e bùꞋ me biite nê, “Wòt waa fɨ̀Ꞌnà àvi ane Mbɔ̧ɔ̧mà la wu wàà? Wàa tsa nàa ngwàꞋa kàbɔ̀ŋ ka nè Mbɔ̧ɔ̧mà à?”

²²Mbɨ̀Ꞌɨ̀ Yesò ko àghɨa bɔ mɨ̀ɨ̀tà la, tà tsɔꞋ nê, “Bɨ ghɨ̀ na ka me kwàꞋtè èwuu maa nè mènəè a mèntɨ̧ɨ̧ mɨ̧ à?

²³Àyea ŋa àa njùa à, e shu nê ‘Mâ waꞋa kàbɔ̀ŋ wê’, kò wuê nê ‘Lɔ̀Ꞌɔ a si me ghȩ̀ȩ̀ne à?’

²⁴Maa nyɨꞋte awɨ̧ nê Waã Wòt bɔ àtɔŋ a sitsǎꞋ à màngwaꞋa kàbɔ̀ŋ.” Tà shu abua wòt wu àbâ ènyit tò a pfə la nê, “Mâ laꞋnê, lɔ̀Ꞌɔ a si ŋèꞋe àkwàŋkè àyê me gha àpfəè.”

²⁵Ŋut bê ndɔ̀Ꞌ a si a mbì lɔb ŋèꞋe àkwàŋkè àzi yu me wùꞋte a Mbɔ̧ɔ̧mà ngà àpfəè.

²⁶A tsè àwɔb bàgème, kèbɔɔ ke baãaã awɔb, bɔ tsiꞋi me wùꞋte a Mbɔ̧ɔ̧mà shua nê, “Baa ye nkɨ̀Ꞌnè ènəê laane.”

²⁷Mbɨ̀Ꞌɨ̀ Yesò paa la, tà dzəè a èbem àpfəè və ngà ndze wòt mànɨa èkab taksì kǒ èlen tò wu Levì la, tà tsekè àdzìꞋa àfàꞋ àzi la, shu abua tò nê, “KɨꞋɨ nkùŋè am.”

²⁸Levì lɔ̀Ꞌɔ a si è sà àghɨ ègème nkùŋè atò.

²⁹Levì kàꞋà taꞋa èpǎ̧ abua tò a lob zi. Bènɨa èkab taksì nyaŋ nè bòt ko tsa e li ngua njɨ̀a bɔ̂ tò ba.

³⁰Bèfalèsiì nè bènyɨꞋtà mbɨ̧te Musì bɔb e biite bɔkatè Yesò nê, “Ghǎ ghɨ̂ ka bɨ me jɨ mè nua bɨ bènɨa èkab taksì nè bòt kàbɔ̀ŋ à?”

³¹Yesò bɨ̀ɨ̀lè nê, “Bòt kekweelè aà kà kɨ ngàŋ. Bèngɔ̧̀ ka bɔ̀ɔ nkɨà ngàŋ la.

³²È nka kɨꞋa etɔ bòt bɔ mɨɨtè nê bɔ tɨ̧ɨ̧ ndɨŋndɨ̀ŋ la, e nkɨ̀Ꞌa etɔ bòt kàbɔ̀ŋ.”

³³Bòt ko e li shu abua Yesò nê, “Bɔkatè Jɔ̌n aà ndzàŋà ntsèka kà jɨ àghɨ ntsàꞋtà Mbɔ̧ɔ̧mà; èbe Bèfalèsiì e ghɨ̀ wuê a èlɨ mbɔŋ, ka èbe e me jɨa mè nua.”

³⁴Yesò shu abua yɔb nê, “Tè betsiꞋa bègɨ̧̌ ndzɔꞋɔ etɔ̧ɔ̧ èbu bɔb àfɨꞋa lu̧ ndzà bèlè bɔ̂ tò ba la à?

³⁵Àfɨ̀Ꞌ aa ghɨ̌ nkùꞋ bɔ tsì lu̧ ndzà yu ayɔɔ yɔb, e ye wu àfɨꞋa bɔ̀ɔ me tseke kà jɨ àghɨ la.”

³⁶Yesò shu awɔb èngà̧teme waa nê, “Wòt nàà kà lɔꞋ àlia sà̧ kèpȩ ane ndǐ fi nɨŋ ntèmte ndǐ èlènè la. Tà ghɨ̀ ale, ko taa tsokè ndǐ fi yu, mbɔ̂ kèpȩ ndǐ fi yu kè ka lem ngu bù̧ù̧me ane yu èlènè la.

³⁷Wòt kà meè ngua ndɔ̀Ꞌ àlia ndzìà mèlùꞋ fi a èbem ètetuꞋ gùbnyà̧ e lènè la. Tà ghɨ̀ ale, ko ètetuꞋ gùbnyà̧ bu aa gwele, mèlùꞋ mu naa tsəète, ètetuꞋ bu aa bɨɨ.

³⁸ChaꞋ bɔ̀ɔ ndzìà mèlùꞋ fi wuê a èbem ètetuꞋ gùbnyà̧ è fi.

³⁹Wòt nàà kà nu mèlùꞋ nyaꞋ ndɔ̀Ꞌ nkɨa me fi, nkàà nê tàa ngɨ̀ tà nê, ‘Me nyaꞋ è tsè me fi.’ ”