Read Mundani Lûk 6 Bible Online

Lûk 6 - Mundani bible

Lûk 6

¹È li ngu ane àliapfəèa Bèjuê ako, Yesò lɔ̀Ꞌ me tsě a èbem mbȩte bɔ liꞋi èwuu ntsəètè ko la, bɔkatè tò e bùꞋ me fààte ntsəè tu fɨ̀klâ àbu bɔb nkwèla.

²Bèfalèsiì ko e shu abua Yesò nê, “Ye àghɨa bɔkatè bê e ghɨ̀à, è wu àghɨa bɔ̀ɔ ka ghɨ àliapfəèa Bèjuê la.”

³Yesò bɨ̀ɨ̀lè nê “Bɨ te bakà etɔ zə àghɨa fɔ̧̀ Dàbid bɔ̂ bòt bi e li ngɨ̀ àfɨꞋa ndzìtsə te li ngua nkua awɔb la?

⁴Ka tà li nyi a èbem lob nɨ̧ Mbɔ̧ɔ̧mà bɔ̂ bòt bi nkwèle a bled wu bɔ tɔ èlen Mbɔ̧ɔ̧mà adù̧ la à? Bɔɔ̀ nkwèla ale è kà wu àghɨa mbɨ̧ ta te bɨ̧ɨ̧nè nê wòt tsa kà wu ntsìà mèpɨ̧̀ Mbɔ̧ɔ̧mà ghɨa la.”

⁵Yesò lìà nê “Waã Wòt wu wòt tà bɔ àtɔŋ a ègwet àliapfəèa Bèjuê la.”

⁶È li ngu ane àliapfəèa Bèjuê ako, Yesò gha a lob Mbɔ̧ɔ̧mà me nyɨꞋte èngǎ̧ Mbɔ̧ɔ̧mà. Wòt kǒ wu abot àbualu̧ atò a pfə la.

⁷BènyɨꞋtà mbɨ̧te Musì nè Bèfalèsiì e me lɨ̀ŋke atò eye nê kò taa bə wòt ane àliapfəèa Bèjuê mbɔŋ, mbɨ̀Ꞌɨ̀ bɔɔ laꞋnê tà fǎ̧ mbɨ̧ leꞋ.

⁸Ka Yesò è ko mèmɨ̀ɨ̀te mɔb shu abua wòt wu nê, “KɨꞋɨ ntɨ̧ɨ̧ àdzìꞋ yaa.” Tà lɔ̀Ꞌɔ a si ntɨ̧ɨ̧ abot.

⁹Yesò shu abua yɔb nê, “TsiꞋ è mbììte awɨ̧, mbɨ̧ ta te laꞋnê bà me ghɨ̀ na ane àliapfəè yaa? Nê bà ghɨ̀à kàbɔ̀ŋ, kò ntsɔ̧̀ à?” Nê, bà bə wòt kò ba bùŋe leè?

¹⁰Yesò me lɨ̀ŋkè àwɔb bàgème shu abua tò nê, “Nyààbè àbu ayê.” Tà nyààbè àbu azi yu, a bê nkwèèle.

¹¹Bɔ tsènè ntso, ntsìꞋi me làꞋa a kètsìà wɔb ane àghɨa bɔ̀ɔ ghɨ̌ adù̧ Yesò la.

¹²Ane èli ngaa Yesò kɔꞋ nga a ègwet èkù̧ù̧nè etsàꞋte a Mbɔ̧ɔ̧mà, ngà me tsàꞋtè tê ètsəꞋ e tsi.

¹³ÈtsəꞋ è tsi ale, tà tɔ bɔkatè bi, ndàà bòt ntsɔ̀b babe me tɔ awɔb ane bɔntu̧ bi.

¹⁴Simùn wu Yesò li ngua ntɔ nê Pità la bɔ̂ wanyɨ vi Andùlù, Jimsì bɔ̂ Jɔ̌n, Filìb bɔ̂ Bàtòlomiò,

¹⁵Màtìù bɔ̂ Tɔmasì, Jimsì waã Alfeɔ̀ nè Simùn wu tà lè taꞋa wua nùà mènəè àlaꞋ la,

¹⁶Judàs waã Jimsì, ka nè Judàs Iskaliòt wu tà li ndɔ̀Ꞌ fɨ̧̀ɨ̧̀na Yesò la.

¹⁷Yesò chu a ègwet èku̧u̧nè nè bɔntu̧ bu ntɨ̧ɨ̧ àdzìꞋa si tètoêꞋ, nè taꞋà ènɔ̧̂ bɔkatè bi nè taꞋà ènɔ̧̂ bòt bɔ dzəè a èdziꞋ ègème a Jùdià nè Jèlusalèm fɔɔle nè bòt bɔ dzəa Tȩê bɔ̂ Sidɔ̀n, è wu èpfəè nɨ̧ a ngèt *èdzî la.

¹⁸Bɔ li ngua nkɨ̀Ꞌa ezə èngǎ̧ Yesò taa mě bə èghɔ̧ bɔb. Bòt fote kàbɔ̀ŋ tèa ane yɔb la, e kɨꞋɨ̀ mɨ̧̂ tà bə awɔb bàgème.

¹⁹Bòt bàgème e li ngua nkɨ ebaãaãte atò, nkàà ndɨ mètàŋ nàa ndzəa ane tò mbə awɔb bàgème la.

²⁰Yesò lɔ̀kè àvi shu abua bɔkatè bi bu nê, “Ntsɔ̧̀ wu bɨ̀a bòt mbuŋ, kèfɔ̧̀ Mbɔ̧ɔ̧mà wu abua yɨ̧.

²¹Ntsɔ̧̀ wu bɨ̀a wu ndzìtsə tèa nkua wɨ̧ àfɨ̀Ꞌ yaa la, bɨa li jɨ te yele. Ntsɔ̧̀ wu bɨ̀a wu bɨ̀a ndɨ̀à àfɨ̀Ꞌ yaa la, bɨa li tsoꞋo.

²²Ntsɔ̧̀ wu bɨ̀a wu bòt aa mpààbà àwɨ̧, ntsìà àwɨ̧ ayɔɔ, ntsɔ̧̀ɔ̧̀tà àwɨ̧, mè shua nê bɨ wu bòt kàbɔ̀ŋ, nkàà ndɨ̀ wu bɨ̀a nkùŋà Waã Wòt la.

²³“Bɨ̀ ben ngùꞋtè àwɨ̧, nkàà nê Mbɔ̧ɔ̧mà paŋe taꞋà àbȩ̀ abua yɨ̧ a ègwet. Bɨ̀ ko nê eyaa wu ndɨ bètǎt nyaꞋ bɔb e li ngɨ ane bèndàꞋàtɔŋ nyaꞋ Mbɔ̧ɔ̧mà la.

²⁴Aa li bɨ̀a awɨ̧, bɨ̀a wu bɨ̀ wu bòt èghɨ nyaŋ àfɨ̀Ꞌ yaa la, bɨ bɔ mèntsèke lèyu mɨ̧ tè ndɔ̀Ꞌ.

²⁵Aa li bɨ̀a awɨ̧, bɨ̀a wu bɨ̀a njɨ̀a àfɨ̀Ꞌ yaa ndzèla la, bɨa li tseke ndzìtsə. Aa li bɨa awɨ̧, bɨ̀a wu bɨ̀a ntsòꞋa ngùꞋtà àwɨ̧ àfɨ̀Ꞌ yaa la, bɨa li lù èvə me dɨ̀ mèsi.

²⁶Aa li bɨa awɨ̧, àfɨꞋa bòt bàgème bɔ̀ɔ ndàꞋà ntsɔ̧̀ ane yɨ̧ la, nkàà nê, bètǎt nyaꞋ bɔb e li shu èwuu ènəê baa adù̧ bòt bu bɔ̀ le shu nê bɔ wu bèndàꞋàtɔŋ Mbɔ̧ɔ̧mà kà wu bùà la.

²⁷“Ka maà shua wɨ̧ wu bɨ̀a ndzəèa am la nê, bɨ̀ me kɔ̀ŋke bɔmbù̧ bɨ̧, ngɨa ntsɔ̧̀ abua bòt bu bɔ̀ɔ ka kɨ eye awɨ̧ la.

²⁸Bɨ̀ lɔ̀ɔ̀le bòt bu bɔ̀ɔ ndzìà ndɔ̀tsə àtsə bɨ̧ la, mè ntsàꞋtè a Mbɔ̧ɔ̧mà ane bòt bu bɔ̀ɔ ngɨ̧̀ɨ̧̀nà àwɨ̧ la.

²⁹Wòt dèbè ngòꞋ yê, à ghèble yekǒ tà dèb mɨ̧̂. Wòt nɨ ndǐmàꞋa yê, à tsiꞋ tà paa ye èten nɨŋ.

³⁰Wòt lò̧o̧ àghɨ abua yê à ŋa abua tò. Wòt nɨ àghɨa è wu àyê la, à ka tsi mbììtê.

³¹Ghɨ̌ abua bòt ko wuê ndɨ àa nkɨà nê bɔ̀ ghɨ̌ abua yê la.

³²“Bɨ me kɔ̀ŋkè wuê bòt bu bɔ̀ɔ nkɔ̀ŋkà àwɨ̧ la, ko àbȩ̀ yɨ̧ wu ghà à? Ka wuê bòt kàbɔ̀ŋ aà nkɔ̀ŋkà bòt bɔ̀ɔ nkɔ̀ŋkà àwɔb la.

³³Bɨ me ghɨa ntsɔ̧̀ wuê ane bòt bu bɔ̀ɔ ngɨ̀à a ntsɔ̧̀ abua yɨ̧ la, ko àbȩ̀ yɨ̧ wu ghà à? Ka wuê bòt kàbɔ̀ŋ aa ngɨ̀à wuê a èlɨ mbɔŋ.

³⁴À me fu àghɨ wuê abua wòt à ko nê taa li vəèəè la, à ko nê ànəa ntsɔ̧̀ yu à ghɨ̀ la wu ghà à? Ka wuê bòt bu bɔ̀ɔ ngɨ̀à kàbɔ̀ŋ la bɔɔ ngɨ̀à wuê a èlɨ mbɔŋ abua bɔnyɨ bɔb bu bɔ̀ɔ li vəèəè èkab mbɔŋ la.

³⁵Àghɨa bɨ bɔ ndɨ bɨ̀a me ghɨ̀ la wu nê, bɨ̀ me kɔ̀ŋke bɔmbù̧ bɨ̧ mè ngɨ̀a ntsɔ̧̀ abua yɔb; à fù wòt àghɨ à ka me chɨ̀Ꞌɨ̀ taa vəâ. Bɨ ghɨ̀ ale, ko bɨa li ebɔ taꞋa àbȩ̀, abua Mbɔ̧ɔ̧mà e mě wu ngule bɔ̧ Mbɔ̧ɔ̧mà Àtsèàngɔ̀ŋ. Ngu nê tàà ngɨ̀à a ntsɔ̧̀ abua bòt kàbɔ̀ŋ nè bòt bu bɔ̀ɔ ka ŋa mènkɔ̀ŋke abua tò la.

³⁶Bɨ̀ me ku tèsȩte bòt mbɨ̀Ꞌɨ̀ Tǎt wɨ̧ Mbɔ̧ɔ̧mà nàa nkùa tèsȩte bòt la.

³⁷“À ka me zəâ èfaãnəè bòt mbɨ̀Ꞌɨ̀ Mbɔ̧ɔ̧mà li ndzəèəè è bê mɨ̧̂; à ka nê à ye wòt à bɨ mbɨ̀Ꞌɨ̀ Mbɔ̧ɔ̧mà li nê àyê a bɨ mɨ̧̂; waꞋa kàbɔ̀ŋ bòt mbɨ̀Ꞌɨ̀ Mbɔ̧ɔ̧mà naa li waꞋa è bê mɨ̧̂.

³⁸Bɨ ŋa èghɨ abua bòt ko, ko Mbɔ̧ɔ̧mà naa li ŋa abua yɨ̧ mɨ̧̂. Taa kwèꞋnè àghɨa bɨ ŋa la aa taꞋa yaãaã te me bəèꞋtè awɨ̧. Àghɨa bɨa nɨa fɨ̀Ꞌà àghɨ ŋa abua bòt la, wu yùà yu tàa nɨ fɨꞋɨ eŋa abua yɨ̧ la.”

³⁹Yesò mè shu awɔb èngà̧teme nê, “BetsiꞋa wòt àghɨ àleme baãaã abua wekǒ nê ye kɨ enyɨꞋte atò èlu̧? Tà ghɨ̀ ale ko bɔ̀ɔgème è ka chɨ̧ɨ̧ a èbem èbɨ a?”

⁴⁰Wakatè bakà tsea nyɨꞋtà vi, ka àfɨꞋa tà paa àkatè azi la, tà tsìꞋi mbɨ̀Ꞌɨ̀ nyɨꞋtà vi wu mɨ̧̂.

⁴¹À ghɨ̀ na ka me ko ndzea wuê alààte kèsaabe àyɨt a èghɨ wanyɨ wè, nè ndɨ à bɔ taꞋà mpɨ̀ŋ èwȩ a lê nè èghɨ la à?

⁴²À ghɨ̀ na me shu abua wanyɨ wè nê tà tsiꞋ yè tsì kèsaabe àyɨt fu a èghɨ tò la, nè ndɨ à bɔ taꞋà mpɨ̀ŋ a lê nè èghɨ la à? Àwɔ̀ wu àa shua nê ye wu àghɨa kà wu yùà la, bɨa ntsì mpɨ̀ŋ yu a èghɨ lê la mbɨ̀Ꞌɨ̀ e ko ye èdziꞋ ntsɔ̧̀ etsì alaate àyɨt yu a èghɨ wanyɨ wè la.

⁴³“Àyɨt a ntsɔ̧̀ aà kà kɔɔle tètaãaãte kàbɔ̀ŋ, àyɨt a kàbɔ̀ŋ à ka mě ngua nkɔ̀ɔ̀la tètaãaãte ntsɔ̧̀.

⁴⁴Àà nkòa àyɨt ane tètaãaãte tàa nkɔ̀ɔ̀la la. Nkàà nê bɔɔ kà kaabe bèteshɨndɨk a èbem àdzɔ̧, bɔ̀ ka wua nkààba àgu̧u̧me a ègwet àlô̧.

⁴⁵Wòt ntsɔ̧̀ nàà nyɨ̀Ꞌta ntsɔ̧̀ vi ane èghɨ ntsɔ̧̀ bu a èntɨ̧ɨ̧ tò la, wòt kàbɔ̀ŋ me nyɨꞋta kàbɔ̀ŋ vi ane èghɨ kàbɔ̀ŋ bu a èntɨ̧ɨ̧ tò la. Ètsəê wòt aà ndàꞋà wuê àghɨa àa èbem èntɨ̧ɨ̧ tò la.

⁴⁶“Ghǎ ghɨ̂ bɨ me tɔ am nê, ‘Tê, Tê,’ ka bɨ̀ ka wua ngɨ̀à àghɨa màa shuà la à?

⁴⁷Waa waa tà kɨꞋɨ̀ ndzəè mèngǎ̧ mɔ̧ ndɔ̀Ꞌ ngɨ̀ mbɨ̀Ꞌɨ̀ nàa shua la, maa nyɨꞋte ndɨ tàa la.

⁴⁸Tà wu mbɨ̀Ꞌɨ̀ wòt tà me kuule lob zi ntu si mbɔ̧̀ àtetsi a ègwet èwu la. Èdzî e tsekè tè ndu̧ nkɔꞋ ndèbè lob yu, ka è kà bentè, nkàà ndɨ tà lè bɔ̧ɔ̧ àtetsi ntsɔ̧̀ la.

⁴⁹Ka waa waa tà zə mèngǎ̧ mɔ̧ tà kà ghɨ mbɨ̀Ꞌɨ̀ nàa shua la, wu mbɨ̀Ꞌɨ̀ wòt tà lè kuule lob zi kà bê mbɔ̧̀ àtetsi la. Èdzî e tsekè tè ndu̧ nkɔꞋ ndèbè lob mbɔŋ è bê nkwèà nchu a si kà tàktè tè ndàŋkè a si.”