Read Mundani Lûk 7 Bible Online

Lûk 7 - Mundani bible

Lûk 7

¹Mbɨ̀Ꞌɨ̀ Yesò shu mèngà̧ maa ègème abua bòt tè mpàa la, tà ghà Kàpenàwuêm.

²Tǎt bèshujà Luêm kǒ wu a èbem àpfəè və, àbùꞋ a èkɔŋ tò a wua ngò̧ò̧nà te ntsìꞋi we pfəâ.

³AfɨꞋa tà zə mènəè Yesò è ghɨ̀ la, tà tu̧u̧ bɔɔjuŋ Bèjuê ko nê bɔ̀ gha ntɔ atò, tà kɨꞋɨ mbə àbùꞋ àzi.

⁴Bɔ ghà ndze a Yesò ntsèntè shù̧ù̧te atò nê, “Tǎt bèshujà waa wu wòt àa nyɨ̀Ꞌtâ nkûŋ nê à bɔ̂ ndɨ àa tɨŋe atò la.

⁵Tà taꞋa wua nkɔ̀ŋkà bòt ba. Tòà zìambɔŋ è kuule lob Mbɔ̧ɔ̧mà ŋa abua ya.”

⁶Ale, Yesò kùŋè àwɔb. Tà kɨꞋɨ̀ tê tà me nyi àpfəè, tǎt bèshujà wu tsàà bèshu̧ bi ko, bɔ ghà shu abua tò nê, tǎt bèshujà wu è shu nê, “Lefɨ̀Ꞌ, ko mbɨ̀Ꞌɨ̀ à ye ngoꞋ, e mbakà kuꞋu wòt àa nyi a lob yaã la.

⁷È nka mě nkùꞋ we màa kɔꞋɔ a mbì lê a nkèm yaã la. Bê ndàꞋ èngà̧, ko wafàꞋ am naa peme.

⁸Mmɔ̌ mbɔŋ e ngu a èten bètǎt bèshujà ko, mè mbɔ̀ èbeko nè bèshujà a èten laã. Màa ngɨ̀ e shu abua waa nê ‘Ghǎ’, tà ghà, shu abua via nê ‘KɨꞋɨ’, tà kɨ̀Ꞌɨ̂, shu abua àbùꞋ am nê ‘Ghɨ àghɨ yaa’, tà bê ngɨ̀.”

⁹Mbɨ̀Ꞌɨ̀ Yesò zə èngǎ̧ tò wu la, a bê ntsè atò, tà shu abua banɔ̧̀ bu nkùŋà vi la nê, “Maa shua wɨ̧ nê, e mbakà ye wòt kǒ ka wuê ayɔɔ bòt Izəèlȩê tà bɔ ngɨŋa ntɨ̀ yaa mbê waa è bɔ ane yaã la.”

¹⁰Bèshu̧ tǎt bèshujà wu e kua akwèn ngà a lob tò me kɨꞋɨ, àbùꞋ atò yu a kweelè tè ndɔ̀Ꞌ.

¹¹AdzìꞋ li me wù̧ù̧ne, Yesò bɔ̂ bɔkatè bi e me ghǎ àpfəè àko bɔ̀ɔ ntɔ nê Nên la. Bɔɔ̀ ngà ale, taꞋà ndzɔ̀ŋ bɔbȩ me kùŋè àwɔb.

¹²Bɔ kɨꞋɨ tê bɔ̀ wu àtsəkaã, bɔ bù̧ ndzɔ̀ŋ bɔbȩ è ŋeꞋe a mpfəà la. Mpfəà wu wu ndàꞋ wambâ̧ nempfə kǒ, taꞋa ndzɔ̀ŋ bɔbȩ wu alu̧ bɔ̂ tò ba bɔ dzə a èbem àpfəèà nɨ̧ yu la.

¹³Mbɨ̀Ꞌɨ̀ Yesò ye atò la, tèsȩte nempfə wu te ku atò. Tà shu abua tò nê, “Ka tsi ndɨ̀.”

¹⁴Mbɔ̂ nkɔꞋɔ a mbì, mbà̧à̧te àkwàŋkè yu bɔ nɔ̀ŋa mpfəà wu a èbèm la, bòt bu bɔ ŋeꞋe mpfəà wu la bɔ tɨ̧̂. Yesò shu nê, “Waã kèsà, mâ shu awê nê, lɔꞋɔ a si.”

¹⁵Tà shu a èlɨ ngaa ale, wòt wu tà pfə la bê ndɔ̀Ꞌ, ntsèke a si, mbùꞋ me làꞋa. Yesò bà̧à̧ àbu atò, ŋa abua nyɨ̌ tò.

¹⁶Kèbɔɔ ke baãaã awɔb bàgème, bɔ kɔ̧ ngùꞋtè a Mbɔ̧ɔ̧mà nê, “TaꞋà ndàꞋàtɔŋ Mbɔ̧ɔ̧mà è saꞋa a kètsìà wa. Mbɔ̧ɔ̧mà è kɨꞋɨ̀ etɨŋe bòt bi.”

¹⁷Yesò ghɨ̀ ale, àndǎ ànəê ya a gha àlaꞋ a Bèjuê àgème nè èlaꞋ ko bu a ngèt la.

¹⁸Bɔkatè Jɔ̌n e li shu atò mènəè maa ègème. Tà tɔ babe ane yɔb

¹⁹ntu̧ awɔb abua Yesò Lefɨ̀Ꞌ nê, “À wu wòt wu nga kɨꞋɨ la, kò bà me chɨ̀Ꞌɨ wòt kǒ tsa à?”

²⁰Mbɨ̀Ꞌɨ̀ bɔ kɨꞋɨ tê nkwene ane Yesò la, bɔ shu abua tò nê, “Jɔ̌n ndzìà èdzî tu̧u̧ awa nê bà kɨꞋɨ mbììte àwê nê, ‘À wu wòt wu nga kɨꞋɨ la, kò bà me chɨ̀Ꞌɨ wòt kǒ tsa à?’ ”

²¹ÀfɨꞋa mbɔŋ Yesò bə èwuu èghɔ̧ nyaŋ, mè fəè fote kàbɔ̀ŋ ane bòt, ngɨ̀à bòt àghɨ àleme e yea èdziꞋ.

²²Tà bɨ̀ɨ̀lè èngǎ̧ bɔkatè Jɔ̌n bu nê, “Bɨ̀ kua akwèn ngà shu a Jɔ̌n àghɨa bɨ zə la nè àyea bɨ ye la: Bòt àghɨ àleme e ye èdziꞋ, bòt èka bɔb e ŋɔꞋte la, e lɔꞋ tè ntsiꞋa ngȩ̀ȩ̀nà ndɨŋndɨ̀ŋ, bòt àghɔ̧atsɔꞋɔ e pem, mbûꞋtsə te zə èdziꞋ, bèmpfəà be yu̧u̧mè, bɔ mè tsɔ̀tè Ntu̧ Ntsɔ̧̀ Mbɔ̧ɔ̧mà abua bòt ngoꞋ.

²³Ntsɔ̧̀ wu wòt wu tàa ka màkè àghɨa è ngu yùà la.”

²⁴Mbɨ̀Ꞌɨ̀ bɔntu̧ Jɔ̌n bu e ghà la, Yesò bùꞋ me laꞋa ànəa Jɔ̌n abua ènɔ̧̂ bòt bu shua nê, “Bɨ li me nkùŋe a Jɔ̌n e gha àbâ àlaꞋ àyuube ale, mɨ̀ɨ̀tè nê bɨ gha eye ghà à? Bɨ li ngua nga eye àtsəa èfəèꞋ àfeme àa mpàà maꞋa àbâ abà la à?

²⁵Tè a bakà wu ale, ko bɨ li ngua nga àbȩ eye ghà à? Bɨ li ngua nga eye wòt bɔ wèe atò ane ndìte ntsɔ̧̀ la à? Bɨ ko nê, bòt bɔ wèè àwɔb ane ndìte ntsɔ̧̀ la bɔɔ ntsèka ne èbem ntɔꞋtsə.

²⁶Bɨ li nchɨɨmè ngua nga àbȩ abàꞋa ghà à? Eghǎ eye a ndàꞋàtɔŋ Mbɔ̧ɔ̧mà? Oò kwat! Bɨ li ndze wòt mènəè tò è tsě me ndàꞋàtɔŋ la.

²⁷Jɔ̌n waa wu wòt wu Àkata Mbɔ̧ɔ̧mà à shu nê, ‘Ye wantu̧ am mâ tsǎ atò a mbì lɨ̧ taa kɨꞋɨ enèète alu̧ abua yɨ̧ la.’

²⁸Ane nkûŋ, tsiꞋ è shu awɨ̧ nê bɔ bakà li tè me bi wòt kǒ tà tsèa Jɔ̌n la, ka wòt tà wu tandiakwèn a Kèfɔ̧̀ Mbɔ̧ɔ̧mà la, è tsě a Jɔ̌n.”

²⁹Mbɨ̀Ꞌɨ̀ bɔ zə àghɨa Yesò è shu la, bòt nyaŋ fɔ̀ɔ̀le nè bèmbaãaã taksì e bɨ̧ɨ̧ne nê alu̧ Mbɔ̧ɔ̧mà wu alu̧ nkûŋ, nkàà nê bɔ li ndzaŋe bɨ̧ɨ̧ne èngǎ̧ Jɔ̌n mɨ̧̂ tè tà zì àwɔb a èdzî.

³⁰Ka Bèfalèsiì nè bènyɨꞋtà mbɨ̧te Musì bɔ tu̧u̧ àghɨa Mbɔ̧ɔ̧mà taŋkè abua yɔb la, nkàà nê bɔ li ntû̧ ebɨ̧ɨ̧ne Jɔ̌n naa zì àwɔb a èdzî mɨ̧̂.

³¹“Tè màa chɨɨme e fɨ̀Ꞌne bòt laane wa ane ghà, bɔ wu mbɨ̀Ꞌɨ̀ ghà à?

³²Bɔɔ anè ngu mbɨ̀Ꞌɨ̀ bɔtechɨɨle bɔ tseke àdziꞋa èwen me ŋȩa ntɔ bèshu̧ bɔb shua nê, ‘Ba li ntɔ bafɨ̀, bɨ tu̧ ebene, ba kɔ̧ èvə, bɨ̀ ka dɨ̂.’

³³Jɔ̌n li nkɨ̀Ꞌɨ̂ me tseke ndzìtsə, tà kà meè ngua nua mèlùꞋ, bɔ nê, ‘Tà bɔ fo kàbɔ̀ŋ.’

³⁴Waã Wòt kɨ̀Ꞌɨ̂ me jɨ èghɨjɨ mè nua mèlùꞋ, bɔ nê, ‘Bɨ yea mbê waa! Tà wu mpfəà èghɨjɨ, mè ngu àbaala mèlùꞋ, mè ngu shu̧ bòt bɔ̀ɔ nɨa mèkab taksì la, nè bòt kàbɔ̀ŋ!’

³⁵A batè ngu ale, ka bòt bu bɔ̀ɔ mbɨ̧̀ɨ̧̀na alu̧ Mbɔ̧ɔ̧mà la, e nyɨꞋtè nê èyǐ Mbɔ̧ɔ̧mà aà və nkûŋ nkûŋ.”

³⁶Wòt Falèsiì ko lè kaꞋa Yesò nê tà kɨꞋɨ njɨ̀ èghɨjɨ a lob zi. Yesò ghà a lob tò ntsèke a si a mànjɨa èghɨjɨ bu.

³⁷Àvi kǒ tàa ntsèka a èbem àpfəa mbɔŋ ngu ghȩ̀ȩ̀nè ghȩȩne la, è zə nê Yesò wu a lob wòt Falèsiì wu njɨ̀a èghɨjɨ. Ale, tà nɨ mèwet àghaa ntsɔ̧̀ a èbem atǒꞋ nɨŋ nkɨ̀Ꞌɨ̂,

³⁸ntɨ̧ɨ̧ àdziꞋa Yesò wù la, me dɨ̌, mèsi tò me chua shùa èka tò. Tà ŋɔ̀Ꞌne a si ndzòò èka tò bu ane nyemtetsə ti, èsènè ndɔ̀Ꞌ ndzɔꞋ ane mèwet mu.

³⁹Wòt Falèsiì wu ye, ndèmtè nê, “Mbê waa ghɨ̀ ale, ngu ngule ndàꞋàtɔŋ Mbɔ̧ɔ̧mà, mbə tà ko àghɨa àvi waa mbà̧à̧ta tò la wu yùà la. Ko tà ko èwuu kàbɔ̀ŋ tàa ngɨ̀à la.”

⁴⁰Tàà ndàꞋ ale, Yesò ko ànəa tà lèmtà shua la, shu abua tò nê, “Simùn, mâ bɔ èngà̧ màa nkɨ̀a nê bà mùa la.” Simùn bɨ̀ɨ̀lè nê, “Oò, a nyɨꞋtà, shu è ndzə.”

⁴¹Yesò nê, “Bòt ko babe e li mbɔ̌ njû wòt tàa fɨ̧̀ɨ̧̀nà èkab la. Ane bòt baa babe la, wemɔ̀Ꞌ è bɔ bètɔsì ènkɨ̀ yetà̧â̧, wekǒ bɔ bètɔsì èghem yetà̧â̧.

⁴²Ka wòt kǒ ane yɔb tà bɔ èkab ètsə njû zi la ka wuê. Ale, fɨ̧̀ɨ̧̀nà èkab wu sà njû tɔb tu.” Yesò làꞋ ale mbììte a Simùn nê, “Wàà ane yɔb nàa kɔ̀ŋke fɨ̧̀ɨ̧̀nà èkab wu te tsě wekǒ à?”

⁴³Simùn bɨ̀ɨ̀lè nê, “Maà mɨ̀ɨ̀tà nê, wu wòt wu tà sà njû nyaŋ tò la.” Tà shu nê, “À bɨ̀ɨ̀le ntsɔ̧̀.”

⁴⁴Ale, Yesò ghèble avi ndɨ̀ŋkè àvi wu mbɔ̂ shu abua Simùn nê, “À ye àvi wàa? Mâ ghɨ̀ nkɨ̀Ꞌɨ̂ a lob yê, à kà shu bòt bê nê bɔ̀ ŋa mèleb è shùù èka bɔ̧. Ka àvi waa shùù èka bɔ̧ ane mèsi mi ndɔ̀Ꞌ ndzòò ane nyemtetsə ti.

⁴⁵Mâ kɨꞋɨ̀ a lob yê, à kà taꞋa am esèe am. Ka àvi waa bèle ka kaãaã a màsène èka bɔ̧ e bùꞋu àfɨꞋa mâ ghɨ̀ nkɨ̀Ꞌɨ̂ la.

⁴⁶À ghɨ̂ à kà ŋa mèwet maa nɨ yɔꞋɔ àtsə am, ka tà bɔ̀ɔ̀lè èka bɔ̧ nè mèwet àghaa ntsɔ̧̀.

⁴⁷Maa shua awê nê, ngɨŋa èkɔŋ tà nyɨꞋte la, è nyɨꞋtè nê, Mbɔ̧ɔ̧mà e waꞋa ènyaꞋne kàbɔ̀ŋ tò. Ka waa waa tà ye nê ye bakà ghɨ a kàbɔ̀ŋ ko nyaŋ Mbɔ̧ɔ̧mà nàa waꞋa la, nàà nyɨ̀Ꞌta wuê adziꞋi èkɔŋ.”

⁴⁸Yesò làꞋ ale, è shu abua àvi mbɔŋ nê, “Mâ waꞋa kàbɔ̀ŋ wê.”

⁴⁹Bòt bɔ̂ tò ba e wua njɨ̀a èghɨjɨ nɔ̂ la, bɔ̀ bùꞋ me lèmte nê, “Eyaa wu wàà, tàa ngwaꞋà kàbɔ̀ŋ anè la à?”

⁵⁰Ka Yesò, shu abua àvi wu nê, “Ghȩ̀ȩ̀ne ntsɔ̧̀, à peme ndɔ̀ kàbɔ̀ŋ wê ndɨ̀ wu à zǐ èntɨ̧ɨ̧ wê ane yaã la.”