Read Mundani Lûk 8 Bible Online

Lûk 8 - Mundani bible

Lûk 8

¹Àfɨ̀Ꞌ a li ntsèke tè me wu, Yesò me ghȩ̀ȩ̀na ntsea a èpfəè nɨ̧ nè èbe techɨɨle ntsɔ̀tà Ntu̧ Ntsɔ̧̀ Kèfɔ̧̀ Mbɔ̧ɔ̧mà. Bɔkatè tò bu ntsɔ̀b babe la e wu bɔ̂ tò ba nɔ̂,

²fɔ̀ɔ̀le nè bèzi ko Yesò lè fə fote kàbɔ̀ŋ ane yɔb, mè mbəè èghɔ̧ bɔb tsa la. Àvi kǒ ane bèzi mbɔŋ li ngu Màlià wu bɔ̀ɔ ntɔ atò nê Màdàlin la, e wu Yesò lè fə fote kàbɔ̀ŋ tesà̧à̧mbe tè le wua ŋǎ tò ngoꞋ la.

³Wekǒ nè àvi wu Jòanà wu è wuê vi Chuzà la. Chuzà waa li ngu wantu̧ kèkweelè a ntɔꞋ Fɔ̧̀ Elɔ̀d. Wekǒ wu Sùsanà bɔ̂ bèzi ko nyaŋ. Bèzi bàa e li ngua nɨ̀a èghɨ bɔ bɔ̂ la nɨa ntɨ̀ŋa Yesò bɔ̂ bɔkatè bi.

⁴Bɔbȩ e me dzəâ a èpfəè èpfəè nkɨ̀Ꞌa abua Yesò. AfɨꞋa bɔ kɨꞋɨ tê ndzaãaã la, tà shu awɔb èngà̧teme wàa nê,

⁵“Wòt kǒ li ndɔ̀Ꞌ nga esà èsaãaãme vi. Mbɨ̀Ꞌɨ̀ tàa sà la, è weko e kwentè a èbuꞋ èlu̧, bɔbȩ e tsè ntɔ̀Ꞌtè, banɨ̧̀ bu bèa ndèa a ègwet la e wȩȩtè nkwet.

⁶È weko e kwentè a ègwet èwu, ntsèke tè ntu mbê nju̧, nkàà ndɨ ètsaꞋ è le kaꞋa wua fìa la.

⁷È weko e kwente a èbem àdzɔ̧, àdzɔ̧ yu a kɔꞋ nè wùà nɨŋ.

⁸È weko nè èsaãaãme e kwente adù̧ ètsaꞋ ntsɔ̧̀, nkɔꞋ nkɔ̀ɔ̀le tètaã ènkɨ̀ ènkɨ̀.” Yesò làꞋ ale ndìà nê, “Wòt bɔ ètû̧, tà yute èngà̧ waa.”

⁹Bɔkatè Yesò e biite atò lə èngà̧teme wàa.

¹⁰Tà shu nê, “Bɔ ŋa wɨ̧ èyì a mànkoa ènəê ndò̧ Kèfɔ̧̀ Mbɔ̧ɔ̧mà, ka è me wu bòt ko, ko bɔɔ̀ ndzəèa mènəè ègème ane mèngà̧teme, ‘Mbɨ̀Ꞌɨ̀ bɔ̀ lâ bɔ̀ lɨŋka, bɔ̀ ka ye, bɔ̀ yute, bɔ̀ ka zə.’

¹¹“Eyaa wu lə èngà̧teme wàa: Èsaãaãme wu, wu èngǎ̧ Mbɔ̧ɔ̧mà.

¹²Èsaãaãme wu e kwente alu̧ la, wu mbɨ̀Ꞌɨ̀ bòt bu bɔ̀ɔ ngɨ̀ bɔ̀ zə èngǎ̧ Mbɔ̧ɔ̧mà, Satàn wòt kàbɔ̀ŋ kɨ̀Ꞌɨ̂ ntsì wùà a mèntɨ̧ɨ̧ mɔb mbɨ̀Ꞌɨ̀ bɔ bɨ̧ɨ̧nè èngǎ̧ mbɔŋ Mbɔ̧ɔ̧mà ghɨ̀ bɔ pem la.

¹³Èsaãaãme wu e kwente a ègwet èwu la e wua nyɨ̀Ꞌtà bòt bu bɔ zə èngà̧ wu, mbê mbɨ̧̀ɨ̧̀ne nè mèngùꞋte, ka bɔ kà zi èntɨ̧ɨ̧ wɔb adù̧, è ka tseke ane àfɨ̀Ꞌ à seè la. ÀfɨꞋa ngoꞋ kɨꞋɨ̀, kò bòt e me kɨ àtsəa yɔb enɨ ambo èngà̧ mbɔŋ la leꞋ, bɔ bê ntû̧ wùà.

¹⁴Èsaãaãme wu e kwente a èbèm àdzɔ̧ la, e wu mbɨ̀Ꞌɨ̀ bòt bu bɔ zə èngà̧ waa, ka ndɨ̀ wu bɔ̀ɔ ndèbà ènyit yɔb ane èghɨ sitsǎꞋ nè èkɔŋ èghɨ èkab nyaŋ la, èngà̧ wu e ka tsi nyî te e ghɨ̀ àghɨa e wu ghɨ̀ la.

¹⁵È me wu èsaãaãme wu e kwente a si ntsɔ̧̀ la, e wu mbɨ̀Ꞌɨ̀ bòt bu bɔ zə èngà̧ wu, mbɨ̧̀ɨ̧̀nê nè èntɨ̧ɨ̧ wɔb wemɔꞋ nkùùla èntɨ̧ɨ̧ wɔb me ghɨ̀ àghɨ àa shua la nɨa ngà nè mbì la.”

¹⁶“Wòt nàà kà tò̧ èkaꞋà nɨ èpfəêꞋ nkàbte, tà kà tsia a èten èku̧. Tàa ngɨ̀ tà tsia a ègwet èkɔꞋ, mbɨ̀Ꞌɨ̀ aa me bàŋe bòt bɔ̀ɔ nyìa a lob la.

¹⁷Bɨ̀ ko nê, èghɨ bɨ ghɨ a ndò̧ la aa li dzəâ àbȩ, àyea bɨ kabte la a tùꞋa mpùùla ayaã.

¹⁸È wu ale, bɨ̀ me ko awɨ̧ ndɨ bɨ̀a njùtâ èngǎ̧ Mbɔ̧ɔ̧mà la. Nkàà nê bɔɔ kwèꞋne àghɨ wòt bɔ la, ka wòt tà tanda nê ye bɔ àghɨ la bɔɔ paa ka wuê adzìꞋ wu tà bɔ la enɨ.”

¹⁹Nyɨ̌ Yesò nè bɔnyɨ tò è li nkɨ̀Ꞌɨ̂ eye atò. Nkɨ̀Ꞌɨ̂ ale, bɔ̀ ka ye èlu̧ ekɨꞋɨ a ngèt tò, nkàà ènɔ̧̂ bòt wu.

²⁰Wòt kǒ shu abua tò nê, “Nyɨ̌ wè nè bɔnyɨ bè bɔ wu àbȩ nkɨ eye awê.”

²¹Yesò shu abua banɔ̧̀ bu bàgème nê, “Nyɨ̌ am bɔ̂ bɔnyɨ bɔ̧ wu bòt bu bɔ̀ɔ ndzəèa èngǎ̧ Mbɔ̧ɔ̧mà ngɨ̀à àghɨa e shua la.”

²²È lè wu ane àli ako, Yesò nyi a èbem ànkànuꞋ bɔ̂ bɔkatè bi è shu abua yɔb nê, “Bàa ntu̧ èlemè waa ngà aguŋ zìa.” Ale, bɔ bê me ghǎ.

²³Bɔ me gha ale kèlɔ ke baãaã Yesò. Àfeme àkekweelè a chu a ègwet èlemè wu tè mèleb bùꞋ me lu̧u̧ne ànkànuꞋ yu, tè bɔ tsiꞋa nkɨ eleme.

²⁴Bɔkatè Yesò bu e ghà ndzò̧ atò shu abua tò nê, “Tê, tê, baa tsiꞋa nga epfə.” Yesò lɔ̀Ꞌɔ a si ŋȩ àfeme yu bɔ̂ mèleb mu mbèna la, è fi, èdziꞋ wu e yu bɔ̀ɔl.

²⁵Tà bììte awɔb nê, “Èghǎ ghɨ̂ ka bɨ̀ ka zi èntɨ̧ɨ̧ wɨ̧ ane yaã à?” A taꞋa tsè àwɔb, bɔ bɔ̀ɔ ànyaꞋne, mbùꞋ me làꞋte a kètsìà wɔb nê, “Eyaa chɨɨme ngu wà ka àfeme bɔ̂ mèleb a me zəèa tò à?”

²⁶Bɔ tu̧u̧ èlemè wu nkwene àlaꞋ a bòt Galasìn, è wua àbâ Galìlî àko zìa la.

²⁷Mbɨ̀Ꞌɨ̀ tà dzəè me tɨ̧ɨ̧ aguŋ la, wòt Galasìn kǒ fote kàbɔ̀ŋ tèa ane ŋut la kɨꞋɨ̀ nkwène ane tò. Tà li ntaꞋa tseke ka kwaãaã ndǐ, tà kà wua ntsèka a lob, tà me tseke wuê a ètsəsì.

²⁸Mbɨ̀Ꞌɨ̀ tà ye a Yesò la, tà ŋȩ ane àtɔŋ ànɨ̧, nkwen a si a mbì tò mbììte atò ane àtɔŋ ànɨ̧ nê, “Yesò, Waã Mbɔ̧ɔ̧mà Àtsèàngɔ̀ŋ, à kɨa ghà abua am à? Mâ shu̧u̧te awê nê à ka ngɨ̧̀ɨ̧̀nè am.”

²⁹Tà li me shu ale, ngu ndɨ Yesò li ngua shua abua fo kàbɔ̀ŋ yu nê è sǎ mbê wu la. Fo kàbɔ̀ŋ yu è li è ghɨ̀ è tseke tê è me ŋa atò ngoꞋ, bɔ baãaã atò nkùùle ane fȩtsə ndzì àkɔ̀Ꞌ a èka tò me baabe atò. Ka tà me loote fȩ tu ŋèꞋnà àkɔ̀Ꞌ yu, fote kàbɔ̀ŋ tu te foote atò ntsàà àbâ àlaꞋ àyuube.

³⁰Yesò bììte atò nê, “Èlen lê wu wà à?” Tà bɨ̀ɨ̀lè nê, “Èlen laã wu ‘Àlaã’ - nkàà nê fote kàbɔ̀ŋ te nyi ane tò nyaŋ.”

³¹Fote kàbɔ̀ŋ tu te shu̧u̧te a Yesò nê tà ka ntsàà wɔb a èbem èbɨ kà ye ndìa.

³²TaꞋà àlaã mèkunyà̧ ko a li ngua njɨ̀a a ngèt abot a mbɨ̧̀ èkù̧ù̧nè. Fote kàbɔ̀ŋ tu te shu̧u̧te a Yesò nê tà tsàà àwɔb ane mèkunyà̧ mu bɔ̀ nyi ane yɔb. Ale, Yesò bɨ̧̀ɨ̧̀ne nê tè dzəè ngà.

³³Ale, fote kàbɔ̀ŋ tu te sa tò ngà nyi ane mèkunyà̧ mu, àlaã mèkunyà̧ yu a lùùlà nchu èkù̧ù̧nè lu ndèbte a èbem èlemè wu, nu àtɨ̀ŋ mpfəèꞋtê.

³⁴ÀfɨꞋa bèmbaabà mèkunyà̧ mu e ye àghɨa a ghɨ̀ la, bɔ lùùlà ngà a èbem àpfəèà nɨ̧ yu, nè èpfəè techɨɨle a ngèt ngwȩ̀ȩ̀te ànəê àgème shuê.

³⁵Ale, bòt e dzəè ngà àbȩ eye àghɨa a ghɨ̀ la. Bɔ kɨꞋɨ nkwene ane Yesò, ndzèa mbê wu fote kàbɔ̀ŋ te dzəa ane tò la tà tseke a mbì Yesò la. Bɔ me ye tà kwaã ndǐ ti, èyì tò e kuà, kèbɔɔ ke baãaã wòt ègème.

³⁶Bòt bɔ ye la, e shu awɔb àghɨa a ghɨ̂ ka wòt wu nè fote kàbɔ̀ŋ tu pem la.

³⁷Ale, bòt tèpfəte èlaꞋ Galasìn tègème e shu abua Yesò nê, tà dzə àbâ àlaꞋ a yɔb me ghǎ, ngu ndɨ kèbɔɔ kekweelè ke baãaã awɔb la. Ale, Yesò nyi a èbem ànkànuꞋ yu me ghǎ.

³⁸Mbê wu fote kàbɔ̀ŋ te dzə ane tò la shu̧u̧te a Yesò nê tà ghɨa bɔ̂ tò è ghà nɔ̂. Ka Yesò tu̧, è shu abua tò nê,

³⁹“Wène àpfəèa yɨ̧ shu bòt àghɨa Mbɔ̧ɔ̧mà ghɨ ane yê la.” Ale, tà ghà me ghȩ̀ȩ̀nè èbem àpfəè nɨ̧ yu àgème, shua àghɨa Yesò ghɨ ane zi la.

⁴⁰AfɨꞋa Yesò wène agua èlemè ako zìà la, ènɔ̧̂ bòt a kɨꞋɨ̀ èsèè atò, ngu ndɨ bòt e wua nchɨ̀Ꞌà atò abot la.

⁴¹Wajûŋ kǒ a èbem lob Mbɔ̧ɔ̧mà èlen tò wu Jalùs la, kɨꞋɨ̀ tèmè tènjûŋ ti a si a mbì Yesò shu nê tà kɨꞋɨ a lob zi,

⁴²nkàà nê tà li mbɔ ndàꞋ waàvi vi tà wu èngùꞋ èghem ntsɔ̀b yebe ntsiꞋa mpfəèa pfə la. Mbɨ̀Ꞌɨ̀ Yesò lɔ̀Ꞌ tê me ghǎ bɔ̂ tò la, ènɔ̧̂ bòt e me ŋwèèle atò a èbâ ègème.

⁴³Àvi kǒ mbàŋ dzə ane tò ane èngùꞋ ntsɔ̀b yebe, bèngàŋ e nyɔ̀Ꞌtè kekaŋ a màmbəa tò la,

⁴⁴kɔ̀Ꞌɔ akwèn tò mbà̧à̧te àtsəa ndǐ tò. Tà bê mbà̧à̧te ale, mbàŋ yu loà.

⁴⁵Yesò bììte nê, “Wàa èbaãaãte am à?” Mbɨ̀Ꞌɨ̀ wòt ègème lèꞋtè la, Pità shu abua tò nê, “Tê, à bakà ye ndɨ bòt nyaŋ è wua nùŋnà a ngèt yè la à?”

⁴⁶Ka Yesò shu nê, “Wòt ko lâ nkɔ̀tè am, ngu nê mâ zə ndɨ mètàŋ dzə ane yaã la.”

⁴⁷Àvi wu ye ndɨ Yesò tùꞋ àvi la, nkɨ̀Ꞌɨ̂ me benta mbɔ̀ɔ nkwen a mbì tò, shu a kètsìà bòt bàgème àghɨa a ghɨ̀ ka ye baãaãte atò la.

⁴⁸Yesò shu abua tò nê, “Waã am, èntɨ̧ɨ̧ wu à zi ane yaã la, e ghɨ̂ à pem. Ghǎ ane ntsɔ̧̀.”

⁴⁹Yesò bela ndàꞋà, wantu̧ kǒ dzə àpfəa Jalùs nkɨ̀Ꞌɨ̂ shu abua tò nê, “Waã wè wu è pfə tê ndɔ̀Ꞌ, è wu ale à ka tsi ŋǎ ngoꞋ abua nyɨꞋtà wu.”

⁵⁰Yesò zə ale, shu abua Jalùs nê, “Ka mbɔ̀ɔ, zǐ èntɨ̧ɨ̧ wê wuê ane yaã, ko taa peme.”

⁵¹Mbɨ̀Ꞌɨ̀ bɔ kɨꞋɨ̀ tê ndzəè a lob la, Yesò nyî, ka tà kà bɨ̧ɨ̧nè wòt tsa ka nè Pità bɔ̂ Jɔ̌n nè Jimsì nè tǎt waã wu bɔ̂ nyɨ̌ tò e nyî a lob.

⁵²Wòt ègème li ngua sààlà ndɨ̀à ka Yesò shu abua yɔb nê, “Bɨ̀ ka tsi ndɨ̀, tà bakà pfə, tà lìa li.”

⁵³Bɔ me wȩ̀ȩ̀te atò, na bɔ li nko nê tà pfə tê fi la.

⁵⁴Ka Yesò baãaã àbu a waã wu nê, “Waã am, lɔ̀Ꞌɔ a si!”

⁵⁵Tà bê njù̧ù̧me, ndɔ̀Ꞌ a si. Yesò shu nê, bɔ̀ kɨ àghɨ ŋa tà jɨ.

⁵⁶Tǎt waã wu bɔ̂ nyɨ̌ tò e bùà. Yesò shu abua yɔb nê, bɔ̀ ka shu wòt àghɨa a ghɨ̀ la.