Read Mundani Lûk 9 Bible Online

Lûk 9 - Mundani bible

Lûk 9

¹Yesò tɔ bɔkatè bi bu ntsɔ̀b babe la àdzìꞋ yeamɔꞋ, ŋà àwɔb mètàŋ nè àtɔŋ bɔɔ me nɨa fəèà fote kàbɔ̀ŋ ane bòt, mè mbəa èghɔ̧.

²Tà tsàà àwɔb nê bɔ̀ gha ntsɔ̀tè mènəè Kèfɔ̧̀ Mbɔ̧ɔ̧mà mè mbəâ bòt àghɔ̧.

³Mbɔ̂ shu abua yɔb nê, “Bɨa me ghǎ, wòt ka nɨ̀ àghɨ. Bɨ̀ ka mbea ambàŋ, bɨ̀ ka mbèa ambè, bɨ̀ ka mbèa èghɨjɨ, bɨ̀ ka mbèa èkab, bɨ̀ ka nɨ̀ ka wuê ndǐmàꞋà ko tsa.

⁴ÀdziꞋ àgème bɔ tsɔꞋɔ lob abua yɨ̧ la, bɨ tseke a lob mbɔŋ tè ndɨ bɨ̀a dzəâ àpfəè mbɔŋ la.

⁵Ka wòt bakà sèe awɨ̧ àdziꞋ, bɨ̀ me ghǎ bɨ yòò àbeb àdziꞋ mbɔŋ ane èka bɨ̧, nɨŋ nyɨ̀Ꞌte nê bɔ ghɨ ànəa kàbɔ̀ŋ ane yɨ̧.”

⁶Bɔkatè Yesò bu e zə ànəa tà shu la, ale mbà̧à̧ èlu̧ ngȩ̀ȩ̀nè bɔbɔpfəè ègème ntsɔ̀tè Ntu̧ Ntsɔ̧̀ yu, è dzə abua Mbɔ̧ɔ̧mà la, mè mbəâ bòt bɔ̀ɔ ngò̧ò̧nà la àdzìꞋ àgème.

⁷Elɔ̀d, fɔ̧̀ Galìlî li ndzəè mènəè maa è kɨꞋne atò ngu ndɨ bòt ko e li ngua shua nê, “Jɔ̌n ndzìà èdzî è yu̧u̧mè la.”

⁸ÀbəèꞋ àko a me shu nê, Èlȩjà saꞋ a kètsìà wɔb, èbeko e me shu nê, “Wu ndàꞋàtɔŋ Mbɔ̧ɔ̧mà mbɨ̀Ꞌɨ̀ èbe èlia mbì bu tà yu̧u̧me la.”

⁹Elɔ̀d nê, “E ndɨ ndò àtsəa Jɔ̌n, ale wòt waa màa ndzəèa mènəè maa tàa ngɨ̀à la wu wà à?” Mbɔ̂ shu ale, me nùa nkɨ eye a Yesò.

¹⁰Bɔntu̧ bu bè kuà, bɔ shua Yesò àghɨ àgème bɔ ghɨ̀ la. Tà nɨ̀ àwɔb bɔ̂ tò ba e səèꞋtè àwɔb ngà àpfəèà nɨ̧ ako bɔ̀ɔ ntɔ nê Bèsedà la.

¹¹Mbɨ̀Ꞌɨ̀ bòt e zə la, bɔ nkùŋè atò. Tà sèè àwɔb mè shu awɔb mènəè kèfɔ̧̀ Mbɔ̧ɔ̧mà mbəâ bòt bɔ̀ɔ ngò̧ò̧nà la.

¹²È me wu àfɨꞋa nyèm tsiꞋa mbàꞋà la, bɔkatè bu ntsɔ̀b babe la e kɨꞋɨ̀ shu abua tò nê, “Ghɨa bòt baa e taate nga a èbem èpfəè nè mbȩ tu a ngèt àdzìꞋa yaa la nkɨ èghɨjɨ nè èdziꞋa màndia, nkàà nê eyaa wu àdziꞋa kà ye bòt.”

¹³Yesò bɨ̀ɨ̀lè nê “Bɨa mbɔŋ bɨ̀ ŋa àghɨ bɔ̀ jɨ.” Bɔ nê, “Ba bɔ wuê ndàꞋ tètaãaãte bled tetà̧â̧ nè basə babe. À kɨa nê bà gha njù̧ èghɨjɨ abua ndzɔ̀ŋ bòt baa bàgème?”

¹⁴Mbâ̧tsə te li ngu mbɔ̀ŋè bètɔsì batà̧â̧. Yesò shu abua bɔkatè bi nê, “Bɨ̀ ghɨa bɔ̀ tsekte a si ane ndzɔ̀ŋtsə èghem yetà̧â̧ yetà̧â̧.”

¹⁵Bɔkatè bu e ghɨ̀ mbɨ̀Ꞌɨ̀ tà shu la, ngɨ̀ bɔ tseke a si.

¹⁶Yesò nɨ̀ tètaãaãte bled tu tetà̧â̧ la nè basə bu babe la, ndɔ̀kè àvi ndɨ̀ŋkè ègwet ŋà mènkɔ̀ŋke abua Mbɔ̧ɔ̧mà, mbɔ̂ mbòꞋte bèbled bu ŋa abua bɔkatè bi, nê bɔ ghàbte abua bòt bu.

¹⁷Bòt bàgème e jɨ ndzet, bɔkatè bu e fetè èbè e bəèꞋəè la e lu̧u̧ bankì ntsɔ̀b babe.

¹⁸Yesò li me tsàꞋte a Mbɔ̧ɔ̧mà àfɨ̀Ꞌ àko zìa ndziꞋne, bɔkatè tò e kɨꞋɨ̀ nkwène ane tò. Tà bììte awɔb nê, “Bòt àa shua nê, è ngu wàà?”

¹⁹Bɔ bɨ̀ɨ̀lè nê “Bòt ko aà shua nê à wu Jɔ̌n ndzìà èdzî, èbeko e shua nê à wu Èlȩjà, ka nè èbe bèa shua nê à wu ndàꞋàtɔŋ nyaꞋ Mbɔ̧ɔ̧mà kǒ tà yu̧u̧me la.”

²⁰Tà mè ntsìꞋi biite awɔb nê, “È me wu awɨ̧ bɨ shu nê è ngu wàà?” Pità bɨ̀ɨ̀lè nê “À wu Fɔ̧̀ wu Mbɔ̧ɔ̧mà yɔꞋ ntsà la.”

²¹Yesò ghɨ̀ ale, mbɔ̂ səèŋkè ètû̧ bɔb nê bɔ̀ ka shu wòt ànəa ngaa.

²²“Waã Wòt bɔ ndɨ tàa ye ngoꞋ nyaŋ la. Bèkěm, nè bɔɔjuŋ bèntsìà mèpɨ̧̀, nè bènyɨꞋtà mbɨ̧te Musì aa bùŋe atò, ka naa me wu ane èlibȩ betat taa yu̧u̧me.”

²³Tà shu abua yɔb bàgème nê, “Wòt me kɨ eghȩ̀ȩ̀ne ateka taã, tà sà mènəè mi ègème ŋèꞋe mbasa vi àlia àgème nkùŋè am.

²⁴Wòt me baabe àtsəa zi ko taa pfə, ka wòt tà ŋà àtsəa zi ambo yaã la, naa peme.

²⁵Wòt wua ane mbɔ̀ èghɨ sitsǎꞋ ègème, mbɔ̂ nyɔ zìambɔŋ, ko àbȩ̀ atò nàa li wu ghàà?

²⁶Ale, àtsəa wòt a me kɔꞋɔ ambo yaã nè mèngǎ̧ mɔ̧, ko àtsəa Waã Wòt aa li kɔꞋɔ ane tò mɨ̧̂ àfɨꞋa tàa li kɨꞋɨ ane ènɨ̧ vi, nè we Tǎt vi bɔ̂ bɔntu̧ bi la.

²⁷Yesò shu abua bɔkatè bi nê, ‘Ane nkûŋ, bòt aà və adzìꞋ yaa, betsiꞋa èvə è ka baãaãtè awɔb kà bɔ ye Kèfɔ̧̀ Mbɔ̧ɔ̧mà la.’ ”

²⁸È li me wu mbɔŋe ane èli befà̧aã mbɨ̀Ꞌɨ̀ tà shu mènəè maà la, Yesò nɨ a Pità bɔ̂ Jɔ̌n nè Jimsì bɔ kɔꞋ nga a ègwet èku̧u̧nè ko etsàꞋte a Mbɔ̧ɔ̧mà.

²⁹Mbɨ̀Ꞌɨ̀ Yesò bùꞋ te me tsàꞋtè la, èsi tò e kubtè, ndìte tò te tsiꞋa fəèa mbɨ̀Ꞌɨ̀ èŋu.

³⁰AfɨꞋa mbɔŋ, bòt babe e saꞋ a mbì lɔb me làꞋà bɔ̂ Yesò ba. È li ngu Musì bɔ̂ Èlȩjà,

³¹bɔ kɨꞋɨ ane ènɨ̧ Mbɔ̧ɔ̧mà me làꞋà abua Yesò ndɨ tà bele yàŋe pfə a Jèlusalèm, mbɨ̀Ꞌɨ̀ Mbɔ̧ɔ̧mà li ŋɔ̀ŋè la.

³²Kèlɔ èvə ke baãaã a Pità bɔ̂ bèshu̧ bi, ka bɔ lɔ̀Ꞌ ndzè ènɨ̧ Yesò mè ndzè bòt bu babe bɔ̂ wu bɔ̂ tò la.

³³Mbɨ̀Ꞌɨ̀ bòt bu è tsiꞋa nkɨ esǎ Yesò me ghǎ la, Pità shu abua atò nê, “Tê, a bɔ̂ŋ nê ba wu a si ŋaà. À bɨ̧̀ɨ̧̀na, ko maa vəèəè bayò batat àdzìꞋ yaa, wemɔ̀Ꞌ abua yê, wemɔ̀Ꞌ abua Musì, nè wekǒ abua Èlȩjà.” (Tàà shua ale, tà kà ko àghɨa ye shua la.)

³⁴Tà bela ndàꞋ ale, mbàꞋ kèfə kǒ kɨꞋɨ̀ nkàbte awɔb. Bɔkatè Yesò bu e bùꞋ me bɔɔ mbɨ̀Ꞌɨ̀ mbàꞋ yu è kabte awɔb la.

³⁵Bɔ me zə àtɔŋ ko a tse a èbem mbàꞋ yu nê, “Eyaa wu waã am mâ làà la, bɨ̀ yute èngǎ̧ tò.”

³⁶Àtɔŋ yu à buŋ, Yesò tsiꞋi zia ndziꞋne. Bɔkatè bu ye ale, mbuŋ ntsèke awɔb. Bɔ̀ ka shu wòt ànəa èghɨ bu bɔ ye la, àfɨꞋa mbɔŋ.

³⁷ÈtsəꞋ e tsi, Yesò bɔ̂ bɔkatè bi bu batat la e chu èku̧u̧nè lu. Mbɨ̀Ꞌɨ̀ bɔ chu la, taꞋà ènɔ̧̂ bòt e kɨꞋɨ̀ nkwene ane Yesò.

³⁸Mbâ̧ kǒ ayɔɔ bòt bu ŋȩ nê, “NyɨꞋtà, mâ shu̧u̧te awê, lɨ̀ŋkè wambâ̧ am wàà, wu ndàꞋà wambâ̧ am.

³⁹Fo kàbɔ̀ŋ kǒ nàa ngɨ̀ è bê ŋȩ mbà̧aã atò, àtsəadzə a lɔꞋɔ ane tò, àlejuu a me dzəè a ètsəê tò. Nàa ŋa atò ngoꞋ tè è kà wua mbɨ̧̀ɨ̧̀na sa atò.

⁴⁰Mâ yaãaã shù̧ù̧te bɔkatè bê nê bɔ̀ fəa yùà ka bɔ̀ fəè kekaŋ.”

⁴¹Yesò bɨ̀ɨ̀lè nê “Bɨ̀a waa bɨ wu àndǎ̧ kà koa Mbɔ̧ɔ̧mà, mè ngu bòt kàbɔ̀ŋ! Màa tseka ba nɨ̧̀ ba te e ghǎ wu a ka àfɨ̀Ꞌ à? Màa kuule èntɨ̧ɨ̧ am ane yɨ̧ te e ghǎ wu a ka àfɨ̀Ꞌ à? Ale, tà shu abua wòt wu nê, Nɨ waã wè nɨŋ nkɨ̀Ꞌɨ̂ adzìꞋ yaa!”

⁴²Mbɨ̀Ꞌɨ̀ waã wu lɔ̀Ꞌ te me kɨꞋɨ la, fo kàbɔ̀ŋ yu ŋeꞋe atò màꞋa a si ngɨ̀ àtsəadzə a lɔ̀Ꞌɔ ane tò. Yesò bê ŋȩ fo kàbɔ̀ŋ yu, mbəè waã wu, mvəèəè atò abua tǎt tò.

⁴³A taꞋa tsě bòt bu abot la bàgème eye mètàŋ kèkweelè Mbɔ̧ɔ̧mà. Mbɨ̀Ꞌɨ̀ mènəè maa Yesò nàa ngɨ̀à la, è bèla ntsèa bòt la, Yesò wu gheble avi è shu abua bɔkatè bi nê,

⁴⁴“Bɨ̀ zi ànəê yaa e nkɨ eshu awɨ̧ la a mèntɨ̧ɨ̧ mɨ̧. Bɔɔ baãaã Waã Wòt ezǐ a tèkitebu bɔbȩ.”

⁴⁵Bɔkatè tò bu è ka ko ànəa tà shua la, ngu nê Mbɔ̧ɔ̧mà lò̧ lə ànəa ngaa abua yɔb, mbɨ̀Ꞌɨ̀ bɔ ko, ka bɔ me bɔɔ ebiite atò ànəa ngaa.

⁴⁶Àyɔ̀ŋ a li ndɔ̀Ꞌ a kètsìà bɔkatè Yesò ane wòt tà tsě bòt bàgème la.

⁴⁷Yesò ko àghɨa bɔ mɨ̀ɨ̀tà la, ale tà tɔ watèchɨɨle kǒ ntsia a ngèt àka azi,

⁴⁸mbɔ̂ shu abua yɔb nê, “Wòt sèè watèchɨɨle kǒ mbɨ̀Ꞌɨ̀ waa ane èlen laã, tà ko nê ye wua sèè am. Wòt tà sèè am la, ko nê ye sèè wòt wu tà tsàà am la. Ngu nê wòt tà wu a kwèn ane yɨ̧ la è tsě bòt bàgème.”

⁴⁹Jɔ̌n bê nê, “Lefɨ̀Ꞌ, baa lɔ̀Ꞌ ndzě wòt kǒ tàa nɨa èlen lê fəèà fote kàbɔ̀ŋ la, shu abua tò nê, tà ka tsi ngɨ̀, ngu nê ba tò baa aa kà ghȩȩne ane àka yeamɔꞋ.”

⁵⁰Yesò shu abua atò nê, “Bɨ̀ ka nkèle atò, ngu nê wòt bakà wu wɔ̀mbù̧ wê, ko tà wu wòt èkɔŋ wè.”

⁵¹AfɨꞋa Yesò nàa ghǎ a ègwet la, a li mbùꞋ tè me kùꞋu. Ale, tà nɔ̀ŋè èntɨ̧ɨ̧ vi ane lèghȩ̀ȩ̀nè vi a mànga a Jèlusalèm.

⁵²Mbɨ̀Ꞌɨ̀ bɔ ghȩ̀ȩ̀ne tê ntsiꞋa nkɨ enyi àpfəèa bòt Sàmalìà ko la, tà tsàà bɔntu̧ bi a mbì nê, bɔ̀ ghǎ nèètè àdziꞋa màndia abua zi àpfəè və.

⁵³Mbɨ̀Ꞌɨ̀ bɔ nyi abot la, bòt àpfəè və e tu̧ enyɨꞋte àdziꞋa Yesò nàa kɨꞋɨ eli la, ngu nê bɔ̀ le ko nê tà tsèà tsě nga a Jèlusalèm.

⁵⁴Bɔkatè tò, Jimsì bɔ̂ Jɔ̌n e zə ànəa bòt Sàmalìà bu e shu la mbììte atò nê, “Tê, bà ghɨa èwet è chu a ègwet ntò̧ àwɔb?”

⁵⁵Yesò è ghèble avi ŋȩ̀ àwɔb nê, [“Bɨ bakà ko fo yu ane yɨ̧ ngɨ̀à bɨ làꞋà ale la. Waã Wòt li tà kà wua nkɨ̀Ꞌà eliime bɔbȩ, tà li ngua nkɨ̀Ꞌa e ghɨ̌ bɔɔ peme.”]

⁵⁶Ndɔ̀Ꞌ bɔ̂ tò ba e baãaã èlu̧ nga àpfəè ako tsa.

⁵⁷Mbɨ̀Ꞌɨ̀ bɔ̀ɔ ngà la, wòt kǒ shu abua Yesò nê, “Maa kùŋè awê àdzìꞋ àgème àa ngà la.”

⁵⁸Yesò shu abua tò nê, “Ètsɔ̀b e bɔ tègwòŋ tɔb, banɨ̧̀ bèa ndèa a ègwet la e bɔ tèjî tɔb, ka Waã Wòt kà bɔ àdziꞋa tàa nɔ̀ŋè àtsəa zi eyètè la.”

⁵⁹Tà shu abua wekǒ nè wòt nê, “Kùŋè am.” Ka ŋut shu abua tò nê, “Tê, tsiꞋ è nga ntua tǎt am yaꞋ ka nkɨ̀Ꞌɨ̂.”

⁶⁰Yesò shu abua tò nê, “TsiꞋ èpfəꞋte bòt è tu bèmpfəà bɔb. Ka è me wu awê, à ghà me tsɔ̀te ntu̧ Kèfɔ̧̀ Mbɔ̧ɔ̧mà.”

⁶¹Wòt kǒ tsa mè shu abua Yesò nê, “Tê, maa kùŋè àwê, ka tsiꞋ è nga ndàꞋnè bòt ləlob yaã yaꞋ ka nkɨ̀Ꞌɨ̂.”

⁶²Yesò shu abua tò nê, “Wòt tà baãaã nkɔ̧̀tè àshu nê ye liꞋa àliꞋ, ka mbɔ̂ me lɨ̀ŋkè kwèn la, bakà kùꞋ wòt tàa nyi a kèfɔ̧̀ Mbɔ̧ɔ̧mà mbɨ̀Ꞌɨ̀ wɔ̀fàꞋ tò la.”