Read Mundani Jɔ̌n 13 Bible Online

Jɔ̌n 13 - Mundani bible

Jɔ̌n 13

¹È li ntsìꞋi àli yeamɔꞋ, àlia èpǎ̧ Màntsea a ègwet a kùꞋ, Yesò ko nê, àfɨꞋa ye bɔ ndɨ yèa sǎ sitsǎꞋ yàa e ghǎ ekwene ane tǎt vi la a tsiꞋa nkùꞋà. Mbɨ̀Ꞌɨ̀ tà yaŋe wua nkɔ̀ŋkà bòt bu è wu bi a ngɔ̀ŋ ŋaa la, tà pàa nyɨ̀Ꞌte èkɔŋ vi ane yɔb tè ngà ndìà.

²È tseke tè ngu àfɨꞋa nyèmtèsi ane àlia ngaa, bɔ̂ tò ba e tseke a si me jɨ èghɨjɨ, Satàn ko nê ye ghɨ̂ Judàs wu è wu waã Simùn Iskaliòt la me mɨ̀ɨ̀te ndɨ yea fɨ̧̀ɨ̧̀ne a Yesò la.

³Yesò me wu azi ale nko nê, tǎt vi zǐ èghɨ ègème a tèkitebu ti, mè nko nê ye dzə abua Mbɔ̧ɔ̧mà, mè me wu anè ngua ntsiꞋa ngwèna abua tò.

⁴Ale, tà lɔꞋɔ àdziꞋa èghɨjɨ bu, ntsì ndǐ ègwet zi nɔŋe a si, ngwia tawèꞋ nkùùle a èloŋ li.

⁵Tà ghɨ̀ ale, mbɔ̂ ndzì mèleb a èbem èpfəèꞋ mbùꞋ me shùù èka bɔkatè bi bu, nɨa tawèꞋ wu tà kuule a èloŋ li la nɨa ndzòà.

⁶Mbɨ̀Ꞌɨ̀ tà shùù tê nkɨ̀Ꞌɨ̂ ndzə ane Simùn wu èlen tò ko wu Pità la, tà bììte a Yesò nê, “À kɨ shùù èka bɔ̧ a Tê?”

⁷Yesò bɨ̀ɨ̀lè nê, “À bakà zìꞋ nko àghɨa è ngua ngɨ̀à la àfɨ̀Ꞌ yaa, ka àfɨ̀Ꞌ àko aa me wu à koê.”

⁸Pità shu abua tò nê, “BetsiꞋa à ka lɔꞋ àlia shùù èka bɔ̧.” Yesò nê, “E mbakà shuu èka bê, à kà wu wakatè am.”

⁹Simùn Pità shu abua tò nê, “È wu ale, à ka shùù wuê ndàꞋ èka bɔ̧ a Tè, shua fɔ̀ɔ̀lè èbu bɔ̧ nè àtsə am.”

¹⁰Yesò bɨ̀ɨ̀lè nê, “Wòt tà shùù àvi la, è bɔ ndɨ tàa tsiꞋi shùù wuê ndàꞋa èka bi la, ènyit tò ègème e lɔ̂Ꞌ. Ale, ènyit yɨ̧ e lɔ̂Ꞌ, ka è kà wu wòt ègème, ènyit tò e lɔ̀Ꞌɔ̀ la.”

¹¹Yesò nàà ndàꞋ ale ngu ndɨ tà ko wòt wu nga efɨ̧̀ɨ̧̀nè àvi la. Eyaa wu àghɨa a li ngɨ̀ ka tà nê, “È ntsě wòt ègème ane yɔb ènyit tò e lɔ̀Ꞌɔ̀ la.”

¹²Mbɨ̀Ꞌɨ̀ tà shùù èka bɔb tè mpàâ, ngwi ndǐ zi nkwaã, ngà ntsèke adzìꞋ yu tà yaã ngu la, tà bììte awɔb nê, “Tè bɨ ko àghɨa mâ ghɨ̌ ane yɨ̧ la à?

¹³Bɨa ntɔ am ane nyɨꞋtà, mè ntɔ am ane tǎt wɨ̧ mbɔ̂ ngua shua nkûŋ, nkàà nê e ye wu àghɨa è ngu yùà la.

¹⁴Ndɨ̀ wu mmɔ̌ wu è ngu tǎt wɨ̧ mè ngu nyɨꞋtà wɨ̧, mâ shùù èka bɨ̧ la, bɨ bɔ ndɨ bɨ̀a me ghɨ̌ a èlɨ mbɔŋ, wòt naa me shùù èka wanyɨ vi la.

¹⁵Mâ nyɨꞋte awɨ̧ ndɨ bɨ̀a me ghɨ̀ àghɨa mâ ghɨ̀ la, nê, bɨ̀ me ghɨ̀ wuê mbɨ̀Ꞌɨ̀ mâ ghɨ̌ ane yɨ̧ la mɨ̧̂.

¹⁶KwàꞋ ane nkûŋ tsiꞋ è shua wɨ̧ nê, WafàꞋ bakà tse a tǎt àfàꞋ vi, wantu̧ ka tsè a wòt wu tà tu̧a tò la.

¹⁷Bɨ koa èghɨ bàa, mè me ghɨ̌ bùà ko ntsɔ̧̀ wu bɨ̀a.

¹⁸“È nka laꞋà ŋǎ abua yɨ̧ bɨ̀agème, mâ ko èwuu bòt bu mâ tɔ awɔb la. Ka èngǎ̧ Mbɔ̧ɔ̧mà e bɔ ndɨ àa wu nkûŋ la nê, ‘Wòt ba tò e fɔtè èghɨjɨ la, è gheble te ntsìꞋa nùa am’.

¹⁹“E ngua shua wɨ̧ àghɨa àa ghɨ̀ la, ka aa lɔ̀Ꞌɔ te, mbɨ̀Ꞌɨ̀ à ghɨa à te, bɨ ko nê e ngu wòt è ngu wùà la.

²⁰Ane nkûŋ, tsiꞋ è shua wɨ̧ nê, wòt sèe wòt mâ tsǎ atò la, tà ko nê, ye sèà am, èwe tà sèe am la ko nê, ye sèe atò wu tà tsàà am la.”

²¹Mbɨ̀Ꞌɨ̀ Yesò làꞋ ale la, a me ŋa atò ngoꞋ a èntɨ̧ɨ̧ tò tè tà ghaꞋa ètsəê vi nê, “Ane nkûŋ, tsiꞋ è shua wɨ̧ nê, wòt kǒ ane yɨ̧ nàà fɨ̧̀ɨ̧̀nè am.”

²²Waa waa ane bɔkatè tò ghèble avi ndɨ̀ŋkè wanyɨ vi, màkà wòt tà làꞋa ŋǎ abua tò la.

²³Wakatè wu Yesò taꞋa wua nkɔ̀ŋkà tò la ko nê ye wu kwàꞋ a ngèt tò tà tseke la,

²⁴ale Simùn Pità ŋùꞋù èghɨ abua tò nê, tà biite a Yesò tà shu wòt tà làꞋa èngà̧ wu ŋǎ abua tò la.

²⁵Wakatè wu bɔ̧̀ɔ̧̀nè àvi nga a ngèt àtû̧ a Yesò mbììte atò nê, “Tê, wu wàà?”

²⁶Yesò bɨ̀ɨ̀lè nê, “Wu wòt wu màa ŋa kèpȩ bled faa mâ tsèbè la abua tò la.” Tà tsèbè kèpȩ bled fu, tà ŋǎ abua Judàs, waã Simùn Iskaliòt.

²⁷Mbɨ̀Ꞌɨ̀ Judàs bê nɨa bled wu la Satàn nyi a èntɨ̧ɨ̧ tò. Ale, Yesò shu abua Judàs nê “Ghɨ̀ àghɨa à kɨ eghɨ̀ la chàba.”

²⁸Tàà ndàꞋà ale, wòt kǒ ka wuê ane yɔb wu njɨ̀a èghɨjɨ la, tà ko lə èngà̧ waa Yesò laꞋa abua tò la.

²⁹Èbeko e me mɨ̀ɨ̀te nê Yesò shu abua Judàs nê, tà gha nju̧ èghɨ bɔ̀ɔ baãaãte àdziꞋa èpà̧ wu la, mbə tà ŋà àghɨa ko abua bòt ntseb, na tà li ngu wòt tàa mpàŋa ambè èkab la.

³⁰Judàs bê nɨa bled wu ale, ndzəè ngà àbȩ, me ghǎ ndzěm kwen.

³¹ÀfɨꞋa Judàs gha àbȩ la, Yesò nê, “Bòt aa ye ènɨ̧ Waã Wòt àfɨ̀Ꞌ yaa, e mě eye ènɨ̧ Mbɔ̧ɔ̧mà ane tò.

³²Bɔ wu etsě ane tò eye ènɨ̧ Mbɔ̧ɔ̧mà, ko Mbɔ̧ɔ̧mà wu naa ghɨ̌ bɔɔ ye ènɨ̧ Waã Wòt ane zi zìambɔŋ, mbɔ̂ mbê ngu ghɨ̀ wuê kwàꞋ àfɨꞋa ngaa.

³³“Bɔ̧ bɔ̧, è nka tsi tseke ba nɨ̧̀ ba ane àfɨ̀Ꞌ à seè a. Bɨa me kɨ am, ka tsiꞋ è shua wɨ̧ àfɨ̀Ꞌ yaa àghɨa e ndi shu abua Bèjuê la nê, ‘BetsiꞋa bɨ̀ ka kɨꞋɨ àdziꞋa e ngà la’.

³⁴“Mâ ŋa awɨ̧ mbɨ̧ fi nê, bɨ̀ me kɔ̀ŋkè bɔnyɨ bɨ̧. Mbɨ̀Ꞌɨ̀ ndɨ maa wua nkɔ̀ŋkà àwɨ̧ la, bɨ̀ me kɔ̀ŋkè bɔnyɨ bɨ̧ mɨ̧̂.

³⁵Bɨ me kɔ̀ŋkè bɔnyɨ bɨ̧ anè, ko bòt bàgème aa ko nê bɨ wu bɔkatè bɔ̧.”

³⁶Simùn Pità bììte atò nê, “Tê, à ghà anè nèŋaà?” Yesò bɨ̀ɨ̀lè nê, “BetsiꞋa à kà kuŋe am àdziꞋa e ngà la àfɨ̀Ꞌ yaa la, mbɔ̂, à bele ka lɔ̀Ꞌɔ ekùŋe am.”

³⁷Pità nê, “Tê, mâ ghɨ̀ na ka è nka wu ko ekùŋè àwê àfɨ̀Ꞌ yaa? Maa ŋa àtsə am ane ànəa yê.”

³⁸Yesò bììtè atò nê, “Tè aa pfə ane ànəa am a? KwàꞋ ane nkûŋ tsiꞋ è shu awê nê, lu̧nkɔ̀Ꞌ naa me laꞋ nê yea ntɔa, à tû̧ ngò̧ tetat, nê ye bakà ko am.”