Read Mundani Jɔ̌n 14 Bible Online

Jɔ̌n 14 - Mundani bible

Jɔ̌n 14

¹Yesò mè shu abua bɔkatè bi nê, “Mbɨ̀Ꞌɨ̀ ànəa a me saa wɨ̧ a èntɨ̧ɨ̧ wɨ̧. Bɨ̀ zǐ èntɨ̧ɨ̧ wɨ̧ ane Mbɔ̧ɔ̧mà, mè ndzì èntɨ̧ɨ̧ wɨ̧ ane yaã.

²Lob Tǎt am taꞋa bɔ mèntàŋ. E tsiꞋa nga anè etaŋke àdziꞋ abua yɨ̧. A ghɨ̂ à ka wu anè ko e mbakà shu awɨ̧ ale.

³Maa me ghɨ̀ tê ngà ntàŋke àdziꞋ abua yɨ̧, mbɔ̂ nkua akwèn nkɨ̀Ꞌɨ̂ nɨa wɨ̧ ba ghà nɔ̂, mbɨ̀Ꞌɨ̀ bɨa tseke ayɨ̧ àdziꞋa e ngu la mɨ̧̂.

⁴Bɨ ko èlu̧ àdziꞋa e nga la.”

⁵Tɔmasì nê, “Tê, ba bakà ko àdziꞋa à ghà la; ale ba wu ghɨ̀ na ka ko èlu̧ à?”

⁶Yesò shu abua tò nê, “E ngu alu̧, è ngu nkûŋ, è ngu mèmpème. BetsiꞋa wòt kà gha abua Tǎt am, kà tse abua am.

⁷Bɨ me wu ale nko am, ko bɨ ko a Tǎt am mɨ̧̂. EbuꞋu àfɨ̀Ꞌ yaa me ghà ne mbì, bɨ ko atò, mè ndze atò.”

⁸Filìb shu abua tò nê, “Tè nyɨꞋte awa a tǎt wè wu ko aa kùꞋù àwa.”

⁹Yesò shu abua tò nê, “Nko nê à bele kà ziꞋ nko am ane àfɨ̀Ꞌ à seè yaa mâ tseke ba nɨ̧̀ ba la a Filìb? Wòt tà ye am la ko nê, ye ye Tǎt am. À ghɨ̀ na ka nê è nyɨꞋte awɨ̧ a Tǎt am à?

¹⁰À bakà bɨ̧ɨ̧ne laꞋnê e ngu àghɨ yeamɔꞋ nè Tǎt am, Tǎt am mè ngu àghɨ yeamɔꞋ nè nà̧? Mèngǎ̧ maa e ndàꞋà abua yɨ̧ la ka dzə àtsə am. Wu Tǎt am wu ba tò è wu àghɨ yeamɔꞋ la ka tàa ngɨ̀à e ngɨ̀à mènəè tò la.

¹¹Bɨ̀ bɨ̧ɨ̧ne nê, e ngu àghɨ yeamɔꞋ nè Tǎt am, tǎt am mè ngu àghɨ yeamɔꞋ nè nà̧. Bɨ màà mbakà wu ebɨ̧ɨ̧ne, bɨ bɨ̧ɨ̧ne nkàà mènəè maa è ngua ngɨ̀à la.

¹²Ane nkûŋ, tsiꞋ è shua wɨ̧ nê, wòt tà zǐ èntɨ̧ɨ̧ vi ane yaã la naa me ghɨ̀ mènəè maa e ngɨ̀à la mɨ̧̂, e meè ghɨ̌ fɔɔle me è tsě màa la, nkàà nê e tsiꞋa nga ekwene ane tǎt am.

¹³Ale, àghɨ àgème bɨ̀a lo̧o̧ abua Tǎt am ane èlen laã la, maa ghɨ̌, mbɨꞋɨ̀ e ghɨ̌ bòt aa wùꞋte a Tǎt am nkàà èghɨ bu mmɔ̌ Waã tò màa ngɨ̀à la.

¹⁴Bɨ màà ndò̧a wuê ghǎ ane èlen laã leꞋ, ko maa ghɨ̀ àghɨa mbɔŋ.

¹⁵“Bɨ me kɔ̀ŋkè am, ko bɨa me ghɨ̀ àghɨa mâ shu nê bɨ̀ ghɨa la,

¹⁶e mè ngu eshu̧u̧te a Tǎt am, taa ŋa wòt tsa taa me tseke bɨ tò ba ane àlia nè àlia ntɨ̀ŋa wɨ̧ la.

¹⁷Ŋut wu Fo Mbɔ̧ɔ̧mà yu nàa nyɨ̀Ꞌta mènəè nkûŋ la. BetsiꞋa bòt ngɔ̀ŋ yaa è ka bɨ̧ɨ̧nê Fo mbɔŋ kɨꞋɨ̀ ngu nè nɔb, nkàà nê bɔɔ kà ye atò bɔ̀ ka ko atò. Ka bɨ ko atò ndɨ̀ wu tàa ntsèka bɨ tò ba, mè ngua nga ewu a mèntɨ̧ɨ̧ mɨ̧ la.

¹⁸BetsiꞋa è nka sa wɨ̧ bɨ me chɨ̀ŋke, maa mèe kɨꞋɨ ekwene ane yɨ̧.

¹⁹AdzìꞋ naa me wù̧ù̧ne bòt ngɔ̀ŋ yaa è ka tsi ndze am, ka bɨ bɔ̂ ngu eye am, nkàà nê ndɨ̀ wu màa və àfɨ̀Ꞌ àgème la, bɨa wu a yɨ̧ mɨ̧̂.

²⁰Naa li ngu ane àlia mbɔŋ bɨ ko nê, e ngu àghɨ yeamɔꞋ nè Tǎt am, bɨ wu àghɨ yeamɔꞋ nè nà̧, e mè ngu àghɨ yeamɔꞋ nè nɨ̧.

²¹Wòt tà ko mbɨ̧ taã mè me ghɨ̀ mbɨꞋɨ̀ te kɨa la wu wòt tàa kɔ̀ŋkè am la. Tǎt am mè ngu me kɔ̀ŋkè wòt wu tàa nkɔ̀ŋkè am la mɨ̧̂, mmɔ̌ mbɔŋ e mè ngu me kɔ̀ŋkè atò te enyɨꞋte atò wòt è ngu wùà la.”

²²Judàs kǒ (kà wu Iskaliòt) bììte atò nê, “Tê, à ghɨ̀ na ka me kɨ enyɨꞋte awê nè abua ya ka à kà wua nkɨ enyɨꞋte awê abua bòt ngɔ̀ŋ à?”

²³Yesò bɨ̀ɨ̀lè nê, “Wòt me kɔ̀ŋkè am, ko taa me ghɨ̌ àghɨa mâ shu nê tà me ghɨ̀ la, Tǎt am mè ngu me kɔ̀ŋkè atò, ba Tǎt am e mè ngu ekɨꞋɨ tseke ba tò ba.

²⁴Wòt tàa ka kɔ̀ŋkè am la, nàà kà ghɨ àghɨa màa shua la, mbɔ̂ mèngà̧ maa bɨ zəa la ka dzə àtsə am, wu me Tǎt am wu tà tsàà am la.

²⁵“Mâ shua wɨ̧ mènəè maa àfɨ̀Ꞌ yaa è mbele ba nɨ̧̀ ba la.

²⁶Ka wòt wu tàa kɨꞋɨ me tɨŋe awɨ̧ la, Fo Kèfə yu tǎt am nàà tsàà ane èlen laã la, naa kɨꞋɨ̀ e nyɨꞋte awɨ̧ èghɨ ègème, mè ngɨ̀ bɨ ku̧u̧tè èghɨ ègème mâ shu abua yɨ̧ la.

²⁷Mâ sa àlàŋkè abua yɨ̧, mâ ŋa àlàŋkè am abua yɨ̧, ka è nka ŋa mbɨ̀Ꞌɨ̀ bòt ngɔ̀ŋ àa ŋǎ la. Mbɨ̀Ꞌɨ̀ mèntɨ̧ɨ̧ mɨ̧ me bente, bɨ̀ ka mbɔa.

²⁸“Bɨ zə ndɨ mâ laꞋnê, e tsiꞋa ngà ghǎ, mbɔ̂ ngua nga mèe ekɨꞋɨ abua yɨ̧ la. Bɨa ghɨ̀ ale ngua nkɔ̀ŋkè am, ko bɨa me wùꞋtè àwɨ̧ nê, e tsiꞋa nga abua Tǎt am, nkàà nê tà tsè am.

²⁹Mâ shu wɨ̧ mènəè maa àfɨ̀Ꞌ yaa ka naa ghɨ̌ te, mbɨ̀Ꞌɨ̀ è ghɨa è te bɨ bɨ̧ɨ̧nè nê ànəa e shua la wu nkûŋ.

³⁰È nka tsi làꞋà ba nɨ̧̀ ba ane àfɨ̀Ꞌ à seè à, nkàà nê Satàn wu, tà wu àtsəa ngɔ̀ŋ yaa la nàà nkɨ̀Ꞌa. Tà bakà bɔ mètàŋ a ègwet laã.

³¹Ka mâ ghɨ̀ wuê mbɨ̀Ꞌɨ̀ Tǎt am è shu nê, è ngɨa la, mbɨ̀Ꞌɨ̀ bòt ngɔ̀ŋ yaa aa ko nê maà nkɔ̀ŋkà atò. “Bɨ̀ lɔ̀Ꞌɔ a si bà lɔꞋɔ.”