Read Mundani Jɔ̌n 3 Bible Online

Jɔ̌n 3 - Mundani bible

Jɔ̌n 3

¹Wòt Falèsiì ko li nguê, èlen tò wu Nìkòdemòs, tà wu wajûŋ ayɔɔ Bèjuê.

²È wu ètsəꞋ ane àli ako tà gha àdziꞋa Yesò naa tsèka la shu abua atò nê, “Labȩ̀, ba ko nê à wu nyɨꞋtà Mbɔ̧ɔ̧mà tsàà la, nkàà nê Mbɔ̧ɔ̧mà bakà wu nè wòt, tà kà ko ngɨ̀ tèwuute ènəê kà ye fɨ̀Ꞌ taa àa ngɨ̀à la.”

³Yesò bɨ̀ɨ̀lè nê, “TsiꞋ è shu awê ane nkûŋ nê, bɔ bakà bi wòt a membǐ fi, tà kà nyi a kèfɔ̧̀ Mbɔ̧ɔ̧mà.”

⁴Nìkòdemòs bììte nê, “Bɔ̀ɔ mèe bi wòt tà lènè la na à? BetsiꞋa tà mè ndâ nko nyi a èbem nyɨ̌ vi, bɔ mè mbia tò a membǐ fi?”

⁵Yesò bɨ̀ɨ̀lè nê, “TsiꞋ è shu awê ane nkûŋ nê, bɔ bakà mè mbǐ wòt ane mèleb, Fo Mbɔ̧ɔ̧mà naa mě bi atò, tà kà nyi a kèfɔ̧̀ Mbɔ̧ɔ̧mà.

⁶Wɔ̀bȩ̂ nàa ngɨ̀ tà bi wekǒ, ŋut wu wuê wɔ̀bȩ̂, ka Fo Mbɔ̧ɔ̧mà bi wòt, ŋut wu tsiꞋi waã Mbɔ̧ɔ̧mà.

⁷Ko mbɨ̀Ꞌɨ̀ e nê, bɔ bɔ ndɨ bɔ̀ɔ mě bi wòt a membǐ fi la ale, ànəa mbɔŋ a me tsè àwê.

⁸Àfeme àa ngɨ̀ à me tsě, wòt me zə ndɨ a tsèà la, ka tà kà ko àdziꞋa a dzəè la, kò àyea a tsèà ngà la leꞋ, mbɔ̂ wòt kà wu ko ekele. Wu ndɨ àa la, ane wòt ègème Fo Mbɔ̧ɔ̧mà bi atò la.”

⁹Nìkòdemòs mè mbììte atò nê, “BetsiꞋa a ghɨ̀ na ka ngu ale à?”

¹⁰Yesò bììte atò nê, “Àa ngɨ̀ à wu nyɨꞋtà kèkweele ayɔɔ bòt Izəèlȩê, à kà ko ànəê ya à?

¹¹TsiꞋ è shu awê ane nkûŋ nê, ba wua ndàꞋà àghɨa ba ye la, mè ngua shua àghɨa ba ko la, ka wòt kà wu ane yɨ̧ tàa nkɨ ebɨ̧ɨ̧ne ànəa ba shua la.

¹²E shua wɨ̧ mènəè nàa ntsea a sitsǎꞋ la anè, bɨ bakà bɨ̧̀ɨ̧̀ne, bɨ ghɨ̀ na ka nko mbɨ̧̀ɨ̧̀ne wuê è me nàa ntsea a ègwet la à?

¹³Wòt kǒ tà li te mè kɔꞋ nga a ègwet mbɨ̀Ꞌɨ̀ e ko la ntsě, wu wuê ndàꞋà Waã Wòt wu tà lè chu a ègwet və la ka tà ko la.

¹⁴Mbɨ̀Ꞌɨ̀ Musì li ndɔ̀kè nyà̧kàbɔ̀ŋ yu àlaꞋ a yuube ntsòŋà a ègwet ayɨ̌t la, wu wuê ndɨ bɔ̀ɔ lɔ̀kè Waã Wòt etsoŋa la.

¹⁵Mbɨ̀Ꞌɨ̀ wòt ègème tà zi èntɨ̧ɨ̧ vi ane tò la naa bɔ mèmpème kàlìà.”

¹⁶Mbɔ̧ɔ̧mà li nkɔ̀ŋkè bòt ngɔ̀ŋ yaa kwàꞋ ànyaꞋne kwat tè ŋǎ ndàꞋà Waã vi nê waa waa tà zi èntɨ̧ɨ̧ vi ane tò la ka nyɔa, taa bɔ mèmpème kàlìà.

¹⁷Mbɔ̧ɔ̧mà li tà kà wua ntsàà Waã vi a ngɔ̀ŋ ŋaa nê tà kɨꞋɨ ndzì ndɔ̀ àtsəa bòt. Tà li ngua ntsaa atò mbɨ̀Ꞌɨ̀ taa ghɨ̌ bòt aa bɔ mèmpème.

¹⁸Wòt tà zi èntɨ̧ɨ̧ vi ane tò la àyea tò a bakà bɨ, ka èwe kà zi èntɨ̧ɨ̧ vi ane tò, àyea tò a bɨɨ tê ndɔ̀Ꞌ, nkàà nê tà bakà zi èntɨ̧ɨ̧ vi ane ndàꞋa Waã Mbɔ̧ɔ̧mà.

¹⁹Àghɨa a ghɨ̂ àyea bòt a bɨ la wu nê, èkaꞋà e kɨꞋɨ a ngɔ̀ŋ, ka bòt e bɔ̂ me kɔ̀ŋkè ndzěm ntsèa èkaꞋà wu, nkàà mènəè kàbɔ̀ŋ bɔ̀ɔ ngɨ̀à la.

²⁰Wòt ègème tàa ngɨa kàbɔ̀ŋ la nàà mpààbà èkaꞋà, tà kà wua nkɔ̀ŋkà ekɨꞋɨ a èbem èkaꞋà, mbɨ̀Ꞌɨ̀ ka bɔ gha ghɨ̌ ndzè mènəè kàbɔ̀ŋ tò.

²¹Ka wòt tàa ngɨa mènəè nkûŋ la, nàà nkɨ̀Ꞌa a èbem èkaꞋà mbɨ̀Ꞌɨ̀ bɔɔ tsène eye ntsɔ̧̀ nê tàà ngɨ̀à àghɨa Mbɔ̧ɔ̧mà nàa nkɨà la.

²²Bɔ ghɨ̀ ale, Yesò bɔ̂ bɔkatè bi e ghà àbâ àlaꞋ a Jùdià ntsèke abàꞋ və, tà me zǐ bòt a èdzî.

²³Jɔ̌n zìambɔŋ wua Enɔ̀n, a ngèt Salìm, ndzìà bòt a èdzî mɨ̧̂. Mèleb li ntaꞋa wu abot, bòt e kɨꞋɨ̀ taa zì àwɔb a èbem èdzî.

²⁴È li me wu ale bɔ̀ ka ziꞋ ndzia a Jɔ̌n a tèfȩ.

²⁵AdzìꞋ tseke tê me wù̧ù̧ne, èngà̧ ko e dzə a kètsìà bɔkatè Jɔ̌n nè wòt Juê kǒ, ane ànəa mànshua ènyit mbɨ̀Ꞌɨ̀ ekùꞋu e mbì Mbɔ̧ɔ̧mà.

²⁶Ale, bɔkatè Jɔ̌n ko e kɨꞋɨ̀ shu abua tò nê, “Labȩ̀, wòt wu bɨ tò e li ngu agua Jodàn la, ye wu à li ndàꞋà ànəa tò la, wu abà nyia. Tà wua ndzìà bòt a èdzî tè bòt nyaŋ e tsiꞋa nkuŋa tò ngà.”

²⁷Bɔ làꞋ ale, Jɔ̌n bɨ̀ɨ̀lè nê, “BetsiꞋa à ka wu ane wòt ale, kà wu Mbɔ̧ɔ̧mà tà ghɨ̀ la.

²⁸Bɨ̀a mbɔŋ bɨ ko nê e ndi nê, e ntsě Fɔ̧̀ wu Mbɔ̧ɔ̧mà li ndzɔꞋ etsàà la, ka e ngu wòt bɔ tsǎ a mbì tò la.

²⁹Wòt tà bɔ ndzà la wu lu̧ ndzà mbɔŋ. Shu̧ lu̧ ndzà nàa ntɨ̧a ndzəa àtɔŋ shu̧ zi lu̧ ndzà yu, tà taꞋa wùꞋte àvi. Eyaa wu ndɨ mèngùꞋte lu̧ a èntɨ̧ɨ̧ am la.

³⁰Ale, tà bɔ ndɨ tàa me ghǎ mbì mbì, maa me kua kwèn kwèn la.”

³¹Wòt wu tà dzəè ne ègwet la, è tsea waa waa. Èwe tà dzəa ngɔ̀ŋ ŋaa la, wu wòt ngɔ̀ŋ, mè me làꞋà wuê mènəè ngɔ̀ŋ, ka wòt tà dzə a ègwet la, lâ ngu a ègwet waa waa.

³²Tàa ngɨ̀ tà shu bòt àghɨa ye ye, mè nko la, ka wòt kà bɨ̧ɨ̧ne èngǎ̧ tò.

³³Wòt tà bɨ̧ɨ̧ne èngǎ̧ tò la, nɨ àyea mbɔŋ nɨŋ nyɨ̀Ꞌte nê ànəa Mbɔ̧ɔ̧mà shu la wu nkûŋ.

³⁴Wòt wu Mbɔ̧ɔ̧mà tsàà la, nàà ndàꞋà wuê mèngǎ̧ Mbɔ̧ɔ̧mà nkàà nê, Mbɔ̧ɔ̧mà zǐ Fo zi ane tò nènkèm.

³⁵Mbɔ̧ɔ̧mà nàà nkɔ̀ŋkà Waã vi tè ndzì èghɨ ègème a tèkitebu tò.

³⁶Wòt tà zǐ èntɨ̧ɨ̧ vi ane Waã Mbɔ̧ɔ̧mà la è bɔ mèmpème kàlìà, è we tà tu̧ ezǐ èntɨ̧ɨ̧ vi ane tò la ka wu li ebɔ mèmpème, mbɔ̂ ntsǒ Mbɔ̧ɔ̧mà kà wu li elìa, è bele àtsəa tò è nɔ̀ŋkè la.