Read Mundani Jɔ̌n 4 Bible Online

Jɔ̌n 4 - Mundani bible

Jɔ̌n 4

¹Bèfalèsiì e zə nê Yesò tsiꞋa mbɔ̌ bòt nyaŋ, ndzìà àwɔb èdzî tè ntsea Jɔ̌n,

²mbɔ̂ me ghɨ̀ ale, è kà wu Yesò zìambɔŋ ndzìà bòt a èdzî la, è wu bɔkatè tò.

³Mbɨ̀Ꞌɨ̀ Yesò zə ànəa bɔ shua la, tà sa Jùdià mè mbà̧à̧ èlu̧ Galìlî me ghǎ.

⁴Tàà ngà ale mbɔ̌ ndɨ tàa tsě a Sàmalìà la.

⁵Tà kɨꞋɨ tê tà dzəa a èbem àpfəèà nɨ̧ a ko a Sàmalìà bɔ̀ɔ ntɔ nê Sȩkà, à wu a ngèt àdziꞋa si yu Jàkɔ̂b li ŋǎ abua waã vi Jòsêb la.

⁶Èbɨ mèleb lu Jàkɔ̂b li ntuŋ la e li ngu abot. Yesò ko nê ye ghȩ̀ȩ̀ne tê nkaã, nchu ntsèke a si a ngèt èbɨ lu. Tàà tseke ale, àfɨꞋa ngaa wu mbɔŋe a kètsìà nèngû̧.

⁷Vi Sàmalìà ko kɨꞋɨ etuꞋu mèleb, Yesò shuê abua tò nê “Ŋa mèleb è nu.”

⁸Tàà ngɨa ale bɔkatè tò e ko nê bɔ gha a èbem àpfəèa nɨ̧ yu eyu̧u̧ èghɨjɨ.

⁹Vi Sàmalìà waa, bììte atò nê “Àwɔ̀ à wu wòt Juê la, à ghɨ̀ na ka me lo̧o̧ mèleb abua am e ngu vi Sàmalìà la à?” (Tàà mbììte ale ngu ndɨ̀ wu Bèjuê bɔ̂ bòt Sàmalìà àa ka fɔte èghɨ mbà̧à̧tê la.)

¹⁰Yesò bɨ̀ɨ̀lè èngǎ̧ tò nê “À ghɨ̀ ale nko àghɨa Mbɔ̧ɔ̧mà nàa ŋǎ la, mè nko wòt wu shua nê ŋa mèleb yè nu la, ko à biite atò tà tsiꞋi ŋa awê mèleb nàa ŋǎ mèmpème la.”

¹¹Àvi wu shu abua tò nê “Tê, à bakà bɔ àghɨa àa nɨ etuꞋu mèleb la, èbɨ làa e mè me sàa, ale à wu nɨ mèleb mu nàa ŋǎ mèmpème la nèŋàà?

¹²Àa nè nko nê ye tse tǎt nyaꞋ waa Jàkɔ̂b wu tà li ŋa èbɨ mèleb la abua ya la à? Tòà zìambɔŋ li nù mèleb è dzəâ a èbem èbɨ làa la, bɔ̂ bɔ̧ bi nê banyà̧ bi.”

¹³Yesò shuê abua tò nê, “Àtɔŋ wòt ègème tà nu mèleb màa la, a bele mèe yu̧u̧,

¹⁴ka wòt ègème tà nu mèleb mu màa ŋa abua tò la, àtɔŋ tò à ka lɔꞋ àlia ntsi nju̧. Mèleb mu màa ŋa abua tò la, naa tsiꞋi ane tò mbɨ̀Ꞌɨ̀ adzì nàa nkɔꞋɔ a si àfɨ̀Ꞌ àgème ŋǎ tò mèmpème kàlìà la.”

¹⁵Àvi wu shuê abua tò nê “Tê, ŋa am mèleb màa à shua la, mbɨ̀Ꞌɨ̀ àtɔŋ am a lɔ̀Ꞌ àlia mè nju̧, mbɨ̀Ꞌɨ̀ e me tseka mè nkɨ̀Ꞌa àdziꞋ yaa etuꞋu mèleb.”

¹⁶Tà làꞋ ale Yesò shuê abua tò nê, “Ghǎ ntɔ lu̧ wê, bɨ tò è kɨꞋɨ adzìꞋ yaa.”

¹⁷Àvi wu bɨ̀ɨ̀lè nê, “E mbakà bɔ lu̧.” Yesò shuê abua tò nê “À shu nkûŋ nê ye bakà bɔ lu̧;

¹⁸nkàà nê à yɔꞋɔ bèlu̧ batà̧â̧, ka wòt à wù bɨ tò àfɨ̀Ꞌ yaa la ka lem ngu ndaŋa lu̧ wê. Ànəa à shuê la wu nkûŋ.”

¹⁹Àvi mbɔŋ shuê abua tò nê “Tê, mâ ye nê à wu ndàꞋàtɔŋ Mbɔ̧ɔ̧mà.

²⁰Bètǎt nyaꞋ baa e li ngua nguꞋta Mbɔ̧ɔ̧mà a ègwet èbȩ làa, ka bɨ me shu nê àdziꞋa bɔ wu me wùꞋte atò la a wu nè Jèlusalèm.”

²¹Yesò shuê abua tò nê “Àvi wa, bɨ̧ɨ̧ne ànəa e shua la, nkàà nê àfɨ̀Ꞌ aa nkɨ̀Ꞌa kà bòt e wu tsi me wùꞋte Mbɔ̧ɔ̧mà a ègwet èbȩ la, kò a Jèlusalèm leꞋ.

²²Bɨ̀a bòt Sàmalìà aa ngùꞋtà wòt kà ko atò, ka bàa Bèjuê e ko wòt ba wùꞋta la, nkàà nê, Mbɔ̧ɔ̧mà li ndàà Bèjuê nê bɔ̀ shu bòt ndɨ yèa ŋǎ mèmpème la.

²³Àfɨ̀Ꞌ aa nkùꞋà, a bê nkùꞋ tè ndɔ̀Ꞌ, àfɨꞋa ngule bòt bɔ̀ɔ ngùꞋtà Mbɔ̧ɔ̧mà la, àa wùꞋte atò ane èntɨ̧ɨ̧ wɔb nè nkûŋ yɔb ègème la. Eyaa wu èwuu bòt Mbɔ̧ɔ̧mà nàa nkɨà awɔb bɔɔ me wùꞋtè àvi la.

²⁴Mbɔ̧ɔ̧mà wu Fo, ale bòt bɔ̀ɔ ngùꞋta tò la e bɔ ndɨ bɔ̀ɔ me wùꞋte atò ane èntɨ̧ɨ̧ wɔb nè nkûŋ yɔb ègème la.”

²⁵Tà làꞋ ale, àvi wu shu abua tò nê, “Mâ ko nê Fɔ̧̀ wu Mbɔ̧ɔ̧mà li ndzɔꞋ etsàà la, e wu bɔ̀ɔ ntɔ atò nê Klistò la nàà nkɨ̀Ꞌa. Taa kɨꞋɨ e shua wa mènəè ègème.”

²⁶Yesò shuê abua tò nê, “Mmɔ̌ wàa ndaꞋa ba nè la, e ngu tòà.”

²⁷KwàꞋ àfɨꞋa mbɔŋ bɔkatè tò e kɨꞋɨ ndze atò ndàꞋà bɔ̂ vi Sàmalìà wu, a taꞋa tsè àwɔb, ka wòt ane yɔb ka lem mbììte atò laꞋnê, “À kɨa ghǎ abua tò à?” kò, “Ghǎ ghɨ̂ ka à me làꞋa abua tò à?”

²⁸Ale, àvi mbɔŋ sà àghɨa mèleb azi abot ngwènè àpfəèa nɨ̧ yu shu bòt nê,

²⁹“Bɨ̀ kɨꞋɨ ndzě wòt kǒ tà shua am àghɨ àgème mâ li me ghɨ̀ la. Tè eyaa ntsě Fɔ̧̀ wu Mbɔ̧ɔ̧mà li ndzɔꞋ etsàà la à?”

³⁰Ale, bɔ dzə àpfəè yu nga ekwene ane Yesò.

³¹Bɔkatè Yesò e teꞋa akwèn me shu̧u̧te atò shua nê, “Labȩ̀, lem jɨ àghɨ.”

³²Yesò bɨ̀ɨ̀lè nê “Mâ bɔ èghɨjɨ màa jɨ la ka bɨ̀ ka ko ànəa bùà.”

³³Bɔkatè tò e me màkè a kètsìà wɔb nê kò wòt kǒ enɨ èghɨjɨ nkɨ̀Ꞌɨ̂ ŋǎ abua tò leꞋ.

³⁴Yesò shu abua yɔb nê, “Èghɨjɨ bɔ̧ wu nê è ngɨ̀ àghɨa wòt wu tà tsàà am la nàa nkɨà la, mè paa àfàꞋ yu tà ŋa abua am la.

³⁵Ka bɨà shuà nê, ‘È tsiꞋi wuê èŋu yekwì, àfɨꞋa màfuꞋa a kùꞋ à’, tsiꞋ è shua wɨ̧ nê a kuêꞋ, bɨ̀ lɔ̀kè awɨ̧ ndȩ̀ mbȩtsə ndzě ndɨ èghɨjɨ e kweele tê nkùꞋ èbe màfuꞋa la.

³⁶Wòt wu tàa fùꞋà la, tàà mbɔ àbȩ̀ àfàꞋ àzi, mbɔ̂ ngua fete bòt mbɨ̀Ꞌɨ̀ bɔɔ bɔ mèmpème kàlìà. Ale, wòt màndiꞋa nè wòt màfuꞋa bɔɔ fɔte ewùꞋtè àwɔb.

³⁷Ale, wu nkûŋ mbɨ̀Ꞌɨ̀ èngà̧teme wàa e shu la nê, ‘Wòt ko nàa ngɨ̀ tà liꞋ wekǒ fùꞋ.’

³⁸Mâ tsàà àwɨ̧ nê bɨ̀ ghǎ fùꞋ èghɨ ka bɨ̀ liꞋ. Bòt tsa e ghɨ̌ afàꞋà kekweelè tè ndɔ̀Ꞌ, tè bɨ tsiꞋa njɨ̀a àbȩ̀ àfàꞋ àyɔb.”

³⁹Bòt Sàmalìà nyaŋ a èbem àpfəèà nɨ̧ a mbɔŋ e zì mèntɨ̧ɨ̧ mɔb ane Yesò ndɨ wu àvi wu shu awɔb nê, “Tà shua vi àghɨ àgème ye li mè ghɨ̀ la.”

⁴⁰Bòt Sàmalìà e kɨꞋɨ̀ nê Yesò tseke bɔ̂ tò ba. Yesò bɨ̧̀ɨ̧̀ne ntsèke abàꞋ və ane èlibȩ bebe.

⁴¹Bòt nyaŋ e mè ndzì èntɨ̧ɨ̧ wɔb ane Yesò nkàà mèngǎ̧ tà wua ndàꞋà la.

⁴²Bòt bu e shu abua àvi wu nê “Bà ka zià mèntɨ̧ɨ̧ ma ane tò àfɨ̀Ꞌ yaa nkàà ànəa à yaã shua wa la, ba tsiꞋa ndzìà nkàà nê bàambɔŋ e zə ànəa tà làꞋà la, mè nko nê tà lâ ngu Mpemnà bòt ngɔ̀ŋ yaa.”

⁴³Èlibȩ bu bebe la e li ntsè Yesò lɔꞋɔ abot ngwena àbâ àlaꞋ a Galìlî.

⁴⁴Yesò zìambɔŋ shuê nê, “Bɔɔ kà kùkte ndàꞋàtɔŋ Mbɔ̧ɔ̧mà àlaꞋ atò.”

⁴⁵Ka mbɔ̂ ngà nyi a Galìlî, bòt àlaꞋ mbɔŋ e sèe atò wuê sèe nkàà nê bɔɔ lɔ̀Ꞌ nga ejɨ èpǎ̧ wu a Jèlusalèm la, ndzě àghɨa àgème tà ghɨ̌ abàꞋ və la.

⁴⁶Yesò wène a Galìlî ale nga àpfəèà nɨ̧ a Kanà, adzìꞋ yu tà li ngèble mèleb è tsìꞋi mèlùꞋ la. Wɔ̀jûŋ kǒ li ngu a Kàpenàwuêm waã tò nàa ngò̧ò̧nà la.

⁴⁷Mbɨ̀Ꞌɨ̀ tà zə nê Yesò lɔ̀Ꞌɔ̀ a Jùdià tè nkɨ̀Ꞌɨ̂ ntsiꞋa Galìlî la, tà ghà shù̧ù̧te atò nê tà chu a Kàpenàwuêm, mbəè waã vi è ntsiꞋa mpfəà pfə la.

⁴⁸Tà làꞋ ale Yesò shuê abua tò nê “Bɨa anè ngu bòt bɔ bakà ye am ngɨ̀à èghɨ àa nyɨ̀Ꞌta mètàŋ Mbɔ̧ɔ̧mà la, nè ngɨŋa mènəè, wòt ane yɨ̧ ka zî èntɨ̧ɨ̧ vi ane yaã la.”

⁴⁹Wɔ̀jûŋ wu shuê abua Yesò nê, “TêꞋ, chu chǎb mbɨ̀Ꞌɨ̀ waã am pfə.”

⁵⁰Yesò mè shuê abua tò nê “Dù me ghǎ, waã wè naa kweele.” Wòt mbɔŋ zì èntɨ̧ɨ̧ vi ane ànəa Yesò shuê la, mbà̧à̧ èlu̧ me ghǎ.

⁵¹Mbɨ̀Ꞌɨ̀ tàa nchua ngà la, bɔfàꞋ tò e kɨꞋɨ ekwene ane tò, shuê abua tò nê waã tò wu kweelè.

⁵²Wɔ̀jûŋ wu biite awɔb àfɨꞋa waã mbɔŋ ghɨ̂ nkwèèlê la, bɔ nê “Sò̧ò̧nà wu nàà tùꞋtè tesi ane nyèm yemɔ̀Ꞌ àfɨꞋa nèngû̧.”

⁵³ÀfɨꞋa mbɔŋ tǎt waã wu ku̧u̧te nê, eyaa wu àfɨ̀Ꞌ yu Yesò nàà nê, waã vi wu naa kweele la. Ale, bɔ̂ bòt bi bàgème e bê ndzì mèntɨ̧ɨ̧ mɔb ane Yesò ntsìꞋi bòt tò.

⁵⁴Yesò ghɨ ànəê yaa ale, nko nê wu ènəê kà ye fɨ̀Ꞌ bebe, tà ghɨ̂ mbɨꞋɨ̀ tà lɔ̀Ꞌɔ a Jùdià nkɨ̀Ꞌɨ̂ a Galìlî la.