Read Mundani Jɔ̌n 6 Bible Online

Jɔ̌n 6 - Mundani bible

Jɔ̌n 6

¹Àfɨ̀Ꞌ a tsè, Yesò tù̧u̧ èlemè Galìlî (èlemè Tìbelìàs) nga aguŋ.

²TaꞋà, ènɔ̧̂ bòt a me kùŋe atò nkàà tèwuute ènəê kà ye fɨ̀Ꞌ tu bɔ ye tà ghɨ̀ mbəâ bòt àghɔ̧ la.

³Yesò tseke tè nkɔꞋ nga a ègwet èbȩ ntsèke a si bɔ̂ bɔkatè bi.

⁴Bɔɔ ngɨa ale àfɨꞋa èpǎ̧ Màntsea a ègwet wu Bèjuê àa njɨ̀a la a tsiꞋa nkùꞋà.

⁵Mbɨ̀Ꞌɨ̀ Yesò lɔ̀kè àghɨ a zi ndzè ènɔ̧̂ bòt bu nkuŋà vi la, tà biite a Filìb nê, “Bà wu anè enɨ èghɨjɨ nè ŋà eyu̧u̧ tê ejɨɨ bòt baa?”

⁶Tàà mbììte a Filìb ale, ngua nkɨ enyɔ̀Ꞌte atò eye, nkàà nê tà li nko ndɨ yèa ghɨ̀ la.

⁷Filìb bɨ̀ɨ̀lè nê “Bɔ màà nɨ̀ wuê bèdìnalì ènkɨ̀ yebe ko betsiꞋa bɔ̀ ka yu̧u̧ èghɨjɨ tè wòt ègème jɨ badzìꞋ.”

⁸Andùlù wakatè tò kǒ è wù wanyɨ Simùn Pità la, shu abua Yesò nê,

⁹“Waã kǒ naa àdzìꞋ yaa, nè tètaãaãte bled balì [2] tetà̧â̧, nè basə babe. Ka betsiꞋa be ghɨ̀ ghǎ ane bòt baa bàgème à?”

¹⁰Yesò shu abua bɔkatè bi nê, “Bɨ̀ ghɨa bòt bu è tseke a si.” ÈfəêꞋ e li ntaꞋa wu abot, ale bòt bu e tseke a ègwet tè me ghǎ mbɔ̀ŋè mbâ̧tsə bètɔsì batà̧â̧.

¹¹Yesò nɨ̀ tètaãaãte bled tu, ŋà mènkɔ̀ke abua Mbɔ̧ɔ̧mà, mbɔ̂ ngàbtè abua bòt bu bɔ tseke a si la. Tà ghɨ̀ ale, mè nɨ basə bu ngɨ̀ wuê a èlɨ mbɔŋ, tè wòt ègème jɨ mbɨ̀Ꞌɨ̀ ye kɔ̀ŋke la.

¹²ÀfɨꞋa bɔ jɨ tê ndzet la, Yesò shu abua bɔkatè bi nê “Bɨ̀ fete tèpȩte te bəèꞋ la mbɨ̀Ꞌɨ̀ ka àghɨa ko a bi.”

¹³Ale, bɔ fete tèpȩte bled tu te bəèꞋəè ane tètaã tu tetà̧â̧ bòt bu e jɨ la, te lu̧ bankì ntsɔ̀b babe.

¹⁴ÀfɨꞋa bòt e ye ngɨŋa ànəê yaa Yesò ghɨ̀ la, bɔ nê, “Eyaa lâ ngu ndàꞋàtɔŋ Mbɔ̧ɔ̧mà wu tà li mbɔ̌ ndɨ tàa kɨꞋa sitsǎꞋ la.”

¹⁵Yesò ye nê bɔɔ̀ nkɨ ebaãaã avi ane ètɨ̧̂ è ghɨ̀ àvi ane fɔ̧̀, tà mè sa abot ngwènè a ègwet èbȩ zìa ndziꞋne.

¹⁶È tseke tè ngu a nyèmtèsi, bɔkatè Yesò e chu ngà a èbem èlemè wu,

¹⁷nyi a èbem ànkànuꞋ, me ghǎ a Kàpenàwuêm agua ko zìa. Ndzèm fen, kà Yesò zìꞋì nkɨ̀Ꞌɨ̂ te kwene ane yɔb.

¹⁸TaꞋà àfeme ako a bùꞋ me tsè tê ndɔ̀kà èfu èdzî.

¹⁹Mbɨ̀Ꞌɨ̀ bɔ gha a èbem mèleb mbɔŋe ane bèmȩl bakwì la, bɔ yea Yesò ngȩ̀ȩ̀na a ègwet *èdzî nkùŋà àwɔb nkɨ̀Ꞌa a ngèt ànkànuꞋ yu la, ale kèbɔɔ ke baãaã wɔb.

²⁰Yesò shu abua yɔb nê, “Wu mmɔ̌, bɨ̀ ka mbɔ̀a.”

²¹Bɔ ghɨ̀ ale, me kɨ enɨ atò ezǐ a èbem ànkànuꞋ yu, ka a kɨꞋɨ̀ tè ndzə aguŋ, àdziꞋa bɔ ghà la.

²²ÈtsəꞋ e tsi ènɔ̧̂ bòt bu aà teꞋa agua èlemè àko zia la, e me kɨ a Yesò. Bɔ li nko nê ànkànuꞋ a lɔ̀Ꞌ ngu abot wuê yeamɔꞋ mè nko nê Yesò nàà kàꞋà gha a èbèm bɔ̂ bɔkatè bi, nê bɔkatè tò aà ghà bɔ̀ɔ bɔ̀ɔ̀ba.

²³Bɔ bele abot, ènkànuꞋ ko e bê ndɔꞋɔ àbâ àlaꞋ a Tìbelìàs, nkɨ̀Ꞌɨ̂ a ngèt adzìꞋ yu bɔɔ̀ jɨ̀a bled wu Yesò nàà ŋà mènkɔ̀ŋke adù̧ la.

²⁴ÀfɨꞋa ènɔ̧̂ bòt bu e ye nê Yesò kò bɔkatè tò leꞋ e te ntsě abot la, bɔ nyi a èbem ènkànuꞋ mbɔŋ nga a Kàpenàwuêm e me kɨa Yesò.

²⁵Bɔ gha agua èlemè àko zia ale ndze atò, mbììte atò nê “Labȩ̀, à yaã nkɨ̀Ꞌɨ̂ àdzìꞋ yaa a ka àfɨ̀Ꞌ à?”

²⁶Yesò tsiꞋi bɨ̀ɨ̀le nê “Ane nkûŋ, tsiꞋ è shua wɨ̧ nê, bɨ̀ ka kɨ am nkàà èghɨ bu màa ngɨ̀à bɨ yea mè nkoa nê e wua nyɨ̀Ꞌta mètàŋ Mbɔ̧ɔ̧mà la. Bɨ kɨ am nkàà èghɨjɨ bɨa yaã njɨ̀ te ndzete mbɨ̀Ꞌɨ̀ bɨ kɨa la.

²⁷Bɨ̀ ka ŋà àtsəa yɨ̧ ane èghɨjɨ àa lɔ̀Ꞌɔ elìa la. Ka bɨ̀ ŋa wuê ane èghɨjɨ bu àa ŋǎ mèmpème kàlìà la. Eyaa wu èghɨjɨ bu Waã Wòt nàa ŋa abua yɨ̧ la, nkàà nê wu tòà Tǎt wa Mbɔ̧ɔ̧mà nyɨꞋtè nê tà wu wòt ye laa nê tà me ghɨ àfàꞋ yaa la.”

²⁸Ale, bɔ biite atò nê “Bàa ghɨ̀ na mbɨ̀Ꞌɨ̀ me ghɨ̀ àghɨa Mbɔ̧ɔ̧mà nàa kɨa la à?”

²⁹Yesò bɨ̀ɨ̀lè nê, “Àghɨa Mbɔ̧ɔ̧mà nàa nkɨà nê bɨ̀ me ghɨ la wu nê, bɨ̀ zì mèntɨ̧ɨ̧ mɨ̧ ane wòt wu ye tsàà la.”

³⁰Yesò làꞋ ale bɔ mè mbììte atò nê “Àa ghɨ̌ ka ànəa kà ye fɨ̀Ꞌ enɨ nyɨꞋte mètàŋ Mbɔ̧ɔ̧mà mbɨ̀Ꞌɨ̀ bɔɔ ye ebɨ̧ɨ̧ne èngǎ̧ wè à?

³¹Mè nê, tà ko na bètǎt nyaꞋ bɔb e li njɨ̀ èghɨjɨ bu bɔ̀ɔ ntɔ nê manà bɔ̂ Musì ba e li nkwene adù̧ àbâ àlaꞋ àyuube, mbɨ̀Ꞌɨ̀ bɔ shɨ a èbem àkatè a Mbɔ̧ɔ̧mà la nê, ‘Tà li ŋà wɔb èghɨjɨ e dzə a ègwet la bɔ jɨ.’ ”

³²Yesò shu abua yɔb nê “Ane nkûŋ, tsiꞋ è shua wɨ̧ nê, èghɨjɨ bu e li nchu a ègwet la e li è ka dzə abua Musì. È li ndzə abua Tǎt am Mbɔ̧ɔ̧mà wu tàa ŋǎ wɨ̧ ngule èghɨjɨ bu e dzə a ègwet la àfɨ̀Ꞌ yaa la.

³³Èghɨjɨ baa Mbɔ̧ɔ̧mà nàa ŋǎ la, wu tòà wu tà chu a ègwet me ŋa mèmpème abua bòt ngɔ̀ŋ la.”

³⁴Tà làꞋ ale bɔ shu abua tò nê “Tê, me ŋa wa èghɨjɨ bàà àfɨ̀Ꞌ àgème.”

³⁵Yesò shu abua yɔb nê, “E ngu èghɨjɨ bu àa ngɨ̀a bòt e bɔ mèmpème la. Wòt tà kɨꞋɨ̀ ndzì èntɨ̧ɨ̧ vi ane yaã la, ndzìtsə tè ka li tsi eku atò a, àtɔŋ tò à ka tsi ndɔ̀Ꞌ àlia nju̧.

³⁶Ka mbɨ̀Ꞌɨ̀ maa lɔ̀Ꞌ shua wɨ̧ la, bɨ ye am ka bɨ̀ ka wua nkɨ ezì mèntɨ̧ɨ̧ mɨ̧ ane yaã.

³⁷Waa waa Tǎt am nàa ŋǎ abua am la naa kɨꞋɨ etsiꞋi wòt am, è nka mèe ngu efəâ wòt kǒ tà kɨꞋɨ abua am la.

³⁸È nka chua a ègwet e ghɨ̀ àghɨa èntɨ̧ɨ̧ am àa nkɨà la; e nkɨ̀Ꞌa e ghɨ̀ àghɨa wòt tà tsàà am la nàa nkɨà la.

³⁹Eyaa wu àghɨa tòà wu tà tsàà am la nàa nkɨà la, nê è nka sàŋ wòt kǒ ane bòt bu yê ŋa abua am la è nyɔ̂, nê è ndi ngɨ̀ wuê ndɨ bɔ̀ɔ yu̧u̧me àlia ngɔ̀ŋ nàa lìà la.

⁴⁰Àghɨa Tǎt am nàa nkɨà la wu nê, wòt ègème tà ye Waã vi ndzì èntɨ̧ɨ̧ vi ane tò la, naa li ebɔ mèmpème kàlìà, e mè ngu e ghɨ̌ ŋut naa yu̧u̧me àlia ngɔ̀ŋ nàa lìà la.”

⁴¹Bèjuê e bùꞋ me lèmte atò nkàà nê tà li nê ye wu bled wu è chu a ègwet la.

⁴²Bɔ nê “Tè eyaa chɨɨme ntsě Yesò waã Jòsêb wu baa ko a tǎt tò bɔ̂ nyɨ̌ tò la à? Tà ghɨ̀ na ka ntsiꞋa shua nê ye chua nè ègwet à?”

⁴³Yesò bɨ̀ɨ̀lè nê “Bɨ̀ ka tsi ndèmtè a kètsìà wɨ̧.

⁴⁴BetsiꞋa wòt kà kɨꞋɨ abua am kà wu we Tǎt am wu tà tsàà am la tà ghɨ tà kɨꞋɨ la, e mbɔ̂ ngu eyu̧u̧me a ŋut àlia ngɔ̀ŋ nàa lìà la.

⁴⁵Bɔ shɨ a èbem àkata bèndàꞋàtɔŋ nê ‘Wòt tàa li me nyɨꞋte bòt la wu Mbɔ̧ɔ̧mà’. È wu ale, wòt ègème tà ŋa àtû̧ azi abua Mbɔ̧ɔ̧mà ndzə ànəa èngǎ̧ tò e shua la, naa kɨꞋɨ abua am.

⁴⁶Àyaa a ntsea shua nê, wòt kǒ nàà və tà li me ye a Mbɔ̧ɔ̧mà la. Wu ndàꞋà wòt wu tà dzə abua Mbɔ̧ɔ̧mà la ka tà li me ye atò la.

⁴⁷Ane nkûŋ, tsiꞋ è shua wɨ̧ nê wòt tà zǐ èntɨ̧ɨ̧ vi ane yaã la ebɔ mèmpème kàlìà.

⁴⁸E ngu èghɨjɨ bu àa ŋǎ mèmpème la.

⁴⁹Bètǎt nyaꞋ bɨ̧ e li mbàtê njɨ̀ èghɨjɨ bu bɔ̀ɔ ntɔ nê manà la àbâ àlaꞋ àyuube mbɔ̂ mè mpfəèꞋte wuê pfəèꞋtê,

⁵⁰ka èghɨjɨ bu e dzə a ègwet la wu è bu wòt jɨa tà kà tsi mpfə la.

⁵¹E ngu èghɨjɨ bu àa ŋǎ mèmpème e chu a ègwet la. Wòt tà jɨ èghɨjɨ baa la lia kà wu tsi epfə. Èghɨjɨ baa wu mbɨ̧̀ ènyit yaã màa ŋa mbɨ̀Ꞌɨ̀ bòt ngɔ̀ŋ àa bɔ mèmpème la.”

⁵²Tà làꞋ ale Bèjuê bu e bùꞋ me yɔ̌ a kètsìà wɔb shua nê, “Mbê waa ghɨ̀ na ka nê yea ŋa mbɨ̧̀ ènyit zi abua ya baa kwele à?”

⁵³Yesò shu abua yɔb nê, “Ane nkûŋ, tsiꞋ è shua wɨ̧ nê, bɨ bakà kwele nyà̧ ènyit Waã Wòt, e mèe nu àlo̧ atò, bɨ̀ ka bɔ mèmpème.

⁵⁴Wòt tà kwele nyà̧ ènyit yaã ndɔ̀Ꞌ nù àlo̧ am la, è bɔ mèmpème kàlìà, e mbɔ̂ ngu li eyu̧u̧me atò àlia ngɔ̀ŋ naa lìa la.

⁵⁵Aa ale nkàà nê nyà̧ ènyit yaã wu ngule èghɨjɨ, àlo̧ am mè ngu ngule àghɨa betsiꞋa wòt nu la.

⁵⁶Wòt tà kwele nyà̧ ènyit yaã ndɔ̀Ꞌ nù àlo̧ am la wua ndzìà vi ane yaã, e mè ngua ndzì am ane tò mɨ̧̂.

⁵⁷Tǎt am wu tàa ŋa mèmpème la, e tsàà am, è mè ngu tòà ka tà ghɨ̂ e mbɔ mèmpème la. Wu wuê èlɨ màa ghɨ̌ wòt tà kwele yà̧ ènyit yaã la nàa bɔ mèmpème la.

⁵⁸Eyaa wu bled wu è chu a ègwet la, è ntsě àfəa wu bètǎt nyaꞋ bɨ̧ e li nkwet ndɔ̀Ꞌ mè mpfəèꞋte la. Wòt tà kwele a bled waa la naa bɔ mèmpème e me tseke ane àlia nè àlia.”

⁵⁹Yesò nàà ndàꞋà mènəè maa ale ngu a èbem lob Mbɔ̧ɔ̧mà a Kàpenàwuêm nyɨ̀Ꞌta èngǎ̧ Mbɔ̧ɔ̧mà.

⁶⁰Tà làꞋa èngà̧ waa ale bòt nyaŋ ane bɔkatè tò e zə nê, èngǎ̧ mbɔŋ e ghe àa nkwèèla la, tè betsiꞋa waa bɨ̧ɨ̧ne wùà?

⁶¹Ka bɔɔ ngɨ̀à ale Yesò ko nê bòt bu nkùŋà vi la àa ndèmta ànəa mbɔŋ, ale tà bììte awɔb nê “Ànəê yaa a tsoke mèntɨ̧ɨ̧ mɨ̧̂?

⁶²Tè bɨ me wu ale ndzè Waã Wòt nkɔ̀Ꞌa nga a ègwet àdziꞋa tà li ngu la ko bɨa tsiꞋi ghɨ̀ naà?

⁶³Fo Mbɔ̧ɔ̧mà ka nàa ngɨ̀a bòt e bɔ mèmpème la, betsiꞋa wɔ̀bȩ̂ ka bɔ mua ane mi ne mètàŋ. Mèngǎ̧ maa e ndaꞋa abua yɨ̧ la dzə abua Fo Mbɔ̧ɔ̧mà, è mè ngu mùà ka nàa ŋǎ mèmpème kàlìà la.

⁶⁴Ka àbəèꞋ àyɨ̧ ako à ka lem mbɨ̧ɨ̧ne mèngǎ̧ mbɔŋ.” (Yesò nàà ndàꞋà ale ngu ndɨ tà yaŋe ko bòt kà wu ebɨ̧ɨ̧ne èngǎ̧ vi kwàꞋ ane àlia mbìa tà buêꞋ me laꞋa wùà la, mè nko wòt wu tàa ghɨ̌ efɨ̧̀ɨ̧̀nè àvi la.)

⁶⁵Ale, Yesò nê “Eyaa wu lə yu e ndi shu abua yɨ̧ nê betsiꞋa wòt kà kɨꞋɨ etsiꞋi wòt am kà Tǎt am ghɨ̀ ane ndɨ tàa kɨꞋɨ la.”

⁶⁶EbuꞋu àfɨꞋa mbɔŋ me ghà ne mbì bòt nyaŋ ane bɔkatè tò e kua kwèn, bɔ ka tsi ngua nkùŋà atò.

⁶⁷Yesò shu abua èbu ntsɔ̀b babe la nê, “Bɨa sa am ghà àyɨ̧ mɨ̧̂?”

⁶⁸Simùn wu èlen tò ko wu Pità la bɨ̀ɨ̀lè nê “Tê, à kɨa nê bà ghǎ abua waa tsa à? Wu ndàꞋ àwɔ̀ ka à bɔ mèngǎ̧ nàa ŋǎ mèmpème kàlìà la.

⁶⁹Ba bɨ̧ɨ̧ne mè nko nê, à wu ngule wòt wu Mbɔ̧ɔ̧mà tsàà la.”

⁷⁰Yesò bɨ̀ɨ̀lè nê “E ndɨ è nka laa wɨ̧ ntsɔ̀b babe, wòt wemɔ̀Ꞌ naa bɔ ewu wòt Satàn?”

⁷¹Tàa ndàꞋà ale ngua ŋa abua Judàs waã Simùn wu èlen tò ko wu Iskaliòt la, nkàà nê tà batè ngu wekǒ ayɔɔ bɔkatè bu ntsɔ̀b babe la ale, mbɔ̂ ngu we tàa lɔ̀Ꞌɔ efɨ̧̀ɨ̧̀ne a Yesò la.