Read Mundani ÀfaꞋa 11 Bible Online

ÀfaꞋa 11 - Mundani bible

ÀfaꞋa 11

¹Bɔntu̧ Yesò nè bɔnyɨ ba adzìꞋ àgème àlaꞋ a Jùdià e li ndzə nê bòt kà wu Bèjuê e zə èngǎ̧ Mbɔ̧ɔ̧mà tè mbɨ̧̀ɨ̧̀nê mɨ̧̂.

²AfɨꞋa Pità e kɔꞋ nga a Jèlusalèm la, bòt Yesò bu bɔ̀ɔ ndzìà ètsəê nê bɔ wu me naŋe bòt kà wu Bèjuê la, e fèèle atò nê,

³“À li ngà a lob wòt kà wu Juê tè ngà njɨ fɔ̀ɔ̀le èghɨjɨ bɨ tò ba.”

⁴Ale, Pità bùꞋ a lə, ngàꞋte mènəè ègème ndɨ è li ntsè la, shu awɔb:

⁵“E ndi me tsàꞋtè a Mbɔ̧ɔ̧mà àpfəèà nɨ̧ yu è wu Jopà la, ndze àtsə. Àghɨ ako mbɨ̀Ꞌɨ̀ taꞋà ndǐ a me chua a ègwet ngaa mbɨ̀Ꞌɨ̀ bòt e baãaã ane bètɔ̀Ꞌa bakwì me shuke tê a chu nɔ̀ŋkè a ngèt yaã.

⁶E nèètè ndȩ̀ me ko ndzě tèwuute banyà̧, banyaãbàꞋ, nè banyà̧ bèa ntsèka àbȩ mè ntsèka a èdzî la nè banɨ̧̀ bu bèa ndèa a ègwet la, a èbèm və.

⁷E ndzə àtɔŋ ko a shu abua am nê ‘Lɔ̀Ꞌɔ a si a Pità, mbùŋè banyà̧ baa nkwèt.’

⁸“Ka e nê, ‘Ngaŋ à Lefɨ̀Ꞌ, àghɨa mèshɨ̀kè a te bakà nyi a ètsəê am.’

⁹“Àtɔŋ yu a mè ndàꞋ a ègwet nê, ‘Ko mbɨ̀Ꞌɨ̀ à me nɨ èghɨjɨ Mbɔ̧ɔ̧mà zìambɔŋ naŋè nê bɔ̀ me jɨ la nê wu èghɨjɨ bɔ̀ɔ shɨ̀kà la.’

¹⁰A li ngɨ̀ anè ngò̧ tetat, bɔ səè àghɨa ngaa ngwènè a ègwet.

¹¹“KwàꞋ àfɨꞋa mbɔŋ, bòt ko batat bɔ tu̧u̧ awɔb a Sìsalìà nê bɔ̀ kɨꞋɨ ntɔ am la, e kɨꞋɨ̀ a lob yu màa ntsèka la.

¹²Fo Mbɔ̧ɔ̧mà è shu abua am nê è nga ba tò ba kà lȩ̀ȩ̀tè. Bɔnyɨ ba baa bantùa a Jopà la, e gha a Sìsalìà ba tò ba nyi a lob Kɔ̀nelìà.

¹³Tà shu ndɨ yèa lɔ̀Ꞌ ndze wantu̧ Mbɔ̧ɔ̧mà kǒ tà kɨꞋɨ nyi a lob zi la, shu abua zi nê, ‘Tsaa wòt ko a Jopà tà ghǎ ntɔ Simùn wu bɔ̀ɔ ntɔ atò nê Pità la.

¹⁴Taa làꞋa èngǎ̧ àa ghɨ̌ bɨ bòt bê bàgème aa peme la.’

¹⁵“AfɨꞋa mâ bùꞋ me làꞋa la, Fo Kèfə e nyi a mèntɨ̧ɨ̧ mɔb wuê mbɨ̀Ꞌɨ̀ e li mbɨ̀ nyi a mèntɨ̧ɨ̧ ma la.

¹⁶Ale, e ku̧u̧tè àghɨa Tè Yesò lè shuê la nê, ‘Jɔ̌n li ngua ndzìà bòt a èdzî, ka Mbɔ̧ɔ̧mà naa tsiꞋi ŋa awɨ̧ Fo Kèfə.’

¹⁷Ale, a nyɨꞋte nê Mbɔ̧ɔ̧mà è ŋa Fo zi yu abua bòt kà wu Bèjuê wuê mbɨ̀Ꞌɨ̀ tà li ŋa abua ya àfɨ̀Ꞌ yu ba li ndzì mèntɨ̧ɨ̧ ma ane Yesò Klistò Lefɨ̀Ꞌ la. E ndi ngu wàa e me kɨ kele Mbɔ̧ɔ̧mà à?”

¹⁸ÀfɨꞋa bɔ zə èngǎ̧ waa la, bɔ̀ ka tsi feele a Pità. Bɔ bùꞋ ntsiꞋi me wùꞋte a Mbɔ̧ɔ̧mà shua nê, “Ale Mbɔ̧ɔ̧mà ghɨ̀ ndɨ bòt kà wu Bèjuê àa waꞋa mènəè kàbɔ̀ŋ mɔb ebɔ mèmpème mɨ̧̂ la.”

¹⁹Bòt Yesò bu e li ntààte afɨꞋa bɔ li mbùŋe a Stifèn me kɨ àtsəa yɔb enɨ la. ÀbəèꞋ àko ane yɔb a li ngà tè ngu àlaꞋ a Fònisìà, nè àlaꞋ a Sȩplùs, nè Antìɔ̀k, ngȩȩna a èdzìꞋ baa ntsɔ̀tà Ntu̧ Ntsɔ̧̀ yu wuê abua Bèjuê.

²⁰Ka bòt ko, bɔ dzəa Sȩplùs nè Silenè la, e gha a Antìɔ̀k me tsɔ̀te Ntu̧ Ntsɔ̧̀ Yesò Lefɨ̀Ꞌ abua bòt kà wu Bèjuê mɨ̧̂.

²¹Mbɨ̀Ꞌɨ̀ bɔ̀ɔ ntsɔ̀tà la, mètàŋ Mbɔ̧ɔ̧mà wu ane yɔb tè bòt nyaŋ e taꞋa bɨ̧ɨ̧ne a Yesò, mè ndzì mèntɨ̧ɨ̧ mɔb ane tò.

²²AfɨꞋa chɔsì wu a Jèlusalèm la e zə ànəê yaa la, bɔ tsɔꞋɔ a Bànabasì ntu̧ a Antìɔ̀k.

²³Tà ghà abàꞋ və ndze ndɨ Mbɔ̧ɔ̧mà è nyɨꞋte a ntsɔ̧̀ vi ane bòt ngaa la, ànəa mbɔŋ a bɔ̀ atò, tà kààtè àwɔb nê bɔ̀ zì àtsə me kùŋè wuê a Yesò nkûŋ nkûŋ ngà nè mbì kà lɨŋke kwèn.

²⁴Bànabasì li ngu wòt ntsɔ̧̀ tà taꞋa zì èntɨ̧ɨ̧ vi ane Yesò la, Fo Kèfə mè ntàꞋa lu̧u̧ a èntɨ̧ɨ̧ tò tè tà ghɨ̀ bòt nyaŋ e taꞋa zi mɔb ne mèntɨ̧ɨ̧ ane Yesò mɨ̧̂.

²⁵Bànabasì li nga a Tasɔ̀s, ekɨ a Sɔ̂l.

²⁶Tà ye atò, ta nɨ atò nkɨ̀Ꞌɨ̂ a Antìɔ̀k. Ane èngùꞋebȩ ngaa ègème, bɔ̀ɔ̀ wu babe la e me fàꞋà nɔ̂ nè bòt chɔsì mè nyɨ̀Ꞌta mènəè Yesò abua ènɔ̧̂ bòt. È li ndɔ̀Ꞌ ngu a Antìɔ̀k və bɔ li mbɨ̀ ntɔ bɔkatè Yesò nê wu Bèklɨtèn la.

²⁷ÀfɨꞋa mbɔŋ wu àfɨꞋa bèndàꞋàtɔŋ Mbɔ̧ɔ̧mà ko e li ndɔ̀Ꞌ a Jèlusalèm nchu nga a Antìɔ̀k la.

²⁸Bɔ ghà ale, Fo Mbɔ̧ɔ̧mà ghɨ̀ wòt kǒ ane yɔb èlen etò wu Àgabùs la lɔ̀Ꞌɔ a si nê, èchɨɨ kekweelè aà nkɨ ekɨꞋɨ a èlaꞋ ègème. (Èchɨɨ mbɔŋ e li ngɨ̀ ale nkɨ̀Ꞌɨ̂ àfɨꞋa Klɔdìàs lè wu empelɔ̀ a Luêm la).

²⁹Bɔkatè Yesò bu e làŋkè nê waa waa ane yɔb chùbtè àghɨa ye bɔ la, bɔ tsaa nɨŋ ntɨ̀ŋe bɔnyɨ bɔb bu a Jùdià la.

³⁰Bɔ chùbtè èghɨ mbɔŋ ale, ntsaa Bànabasì bɔ̂ Sɔ̂l, nê bɔ̀ gha ŋǎ abua bɔɔjuŋ ayɔɔ bòt Yesò bu bɔ̀ ghabta.