Read Mundani ÀfaꞋa 16 Bible Online

ÀfaꞋa 16 - Mundani bible

ÀfaꞋa 16

¹Pɔ̂l ba e li ngȩ̀ȩ̀nè ntse àpfəèà nɨ̧ a Debì, nga a Lislà. Wakatè Yesò kǒ li ngua ntsèka abot, èlen tò wu Tɔ̀màtià. Nyɨ̌ tò wu wòt Yesò mɨ̧̂, mbɔ̂ ngu wòt Juê, ka tǎt tò wu wòt Glɨ̂k.

²Bɔnyɨ ba bu a Lislà nè Èkonìòm la e li ntàꞋa wua ndàꞋà mènəè ntsɔ̧̀ ane Tɔ̀màtià mbɔŋ.

³Bɔ làꞋa ale, Pɔ̂l me kɨ enɨ atò, bɔ̂ tò ba aa ghà nɔ̂, mbɔ̂ nàŋe tò. Me naŋe Tɔ̀màtià ale ngu ndɨ̀ wu Bèjuê bàgème bɔ̀ le wua ntsèka a èdziꞋ ngaa la, e li nko nê tǎt tò li ngu wòt Glɨ̂k la.

⁴Mbɨ̀Ꞌɨ̀ bɔ̂ tò àà ntsea a èpfəè nɨ̧ ngà la, bɔ me shu bòt Yesò bu mbɨ̧ tu bɔntu̧ nè bɔɔjuŋ ayɔɔ bòt tò e li ntsìte a Jèlusalèm la, mbɔ̂ nê bɔ̀ me nɔ̀ŋe mbɨ̧te ngaa ntsɔ̧̀.

⁵A ghɨ̀ bèchɔsì bu e paa nkwèèlê ane èngǎ̧ Mbɔ̧ɔ̧mà, tè bòt nyaŋ e me zì mèntɨ̧ɨ̧ mɔb ane Yesò àli àgème.

⁶Bɔ li ngȩ̀ȩ̀nè ntse adzìꞋ yu a kètsìà èlaꞋa Fligìà bɔ̂ Gàlashìà la, nkàà nê Fo Kèfə li è kà sa awɔb nê, bɔ̀ làꞋa èngǎ̧ Yesò àlaꞋ a Esìà.

⁷ÀfɨꞋa bɔ ghà tê ngu a èlɨ àlaꞋ a Misìà la, bɔ nyɔ̀Ꞌtè nê bɔ kɨ eghǎ àbâ àlaꞋ a Bìtinìà, ka Fo Yesò kà sa awɔb.

⁸Ale, bɔ ghȩ̀ȩ̀nè tè ngà ngu a Misìà, ntsè nchu nga àpfəè yu è wu Tloas la.

⁹Pɔ̂l lɔꞋ a nyèmtèsi ndzě ndzò̧ me ko, wòt àlaꞋ a Màsèdonìà kǒ tɨ̧̂ me tɔ atò, shua nê, “Tu̧ nkɨ̀Ꞌɨ̂ a Màsèdonìà ntɨ̀ŋe awa.”

¹⁰Mbɨ̀Ꞌɨ̀ Pɔ̂l è ye ndzò̧ yu la, ba bê ntàŋkê a mànga a Màsèdonìà, ngu ndɨ̀ wu Mbɔ̧ɔ̧mà è shu awa nê bà gha ntsɔ̀tè Ntu̧ Ntsɔ̧̀ yu abua bòt bu abàꞋ və la. [5] waa bɔ̂ Pɔ̂l ba.

¹¹Ba li nyi a èbem taꞋà ànkànuꞋ ndɔ̀Ꞌ a Tloas mbê ngà ndɨŋndɨ̀ŋ nè àlaꞋ a Sàmotìlà. ÈtsəꞋ e tsi, ba gha àpfəèà nɨ̧ yu è wu Nìàpolìs la.

¹²Ndɔ̀Ꞌɔ abàꞋ və, ngȩ̀ȩ̀ne a si nga a Filìpȩ, è wu àpfəèà nɨ̧ a kekweelè àbâ àlaꞋ a Màsèdonìà, mbɔ̂ mè ngu a èten àlaꞋ a bòt Luêm la. Ba ghà ale ntsèke abàꞋ və ane èli nyaŋ.

¹³È wu àliapfəèa Bèjuê, ba dzə àpfəèà nɨ̧ yu, nga a ngèt èdzî, adzìꞋa ba kwaꞋtè nê Bèjuê aà ntsàꞋta Mbɔ̧ɔ̧mà abot la. Ngà abot ale, ntsèke a si, ndàꞋ èngǎ̧ Mbɔ̧ɔ̧mà abua bèzi ko bɔ̀ le bu̧u̧te abot la.

¹⁴Wekǒ ayɔɔ bèzi bu bɔ̀ɔ njùtâ èngǎ̧ Mbɔ̧ɔ̧mà wu la, li ngu Lidìà, tà wu wòt tàa ntâ ndìte èkab la. Tà li ndzəè àlaꞋ a Tȩ̀tilà, mbɔ̂ ngu wòt tàa ngùꞋtà Mbɔ̧ɔ̧mà la. Ale, Mbɔ̧ɔ̧mà wu ghaꞋa èntɨ̧ɨ̧ tò nê tà yute mè mbɨ̧̀ɨ̧̀nê èngà̧ wu Pɔ̂l è làꞋà la.

¹⁵Bɔ zì atò a èdzî bɔ̂ bòt lob tò, tà kàꞋ awa nê “Ndɨ̀ wu bɨ laꞋnê e ntsiꞋi ngule wòt Yesò la, bɨ̀ kɨꞋɨ me tseke a lob yaã.” Èngǎ̧ tò wu e ŋwèèlè awa ngɨ̀ ba gha a lob və.

¹⁶ÈtsəꞋ e li ntsi ane àli ako, ba me ghǎ adzìꞋa màntsaꞋta Mbɔ̧ɔ̧mà, ndzè waàvi kǒ tà wû àbùꞋ la. Fo kàbɔ̀ŋ wu ane tò, nàa ngɨ̀à tà shua mènəè nàa li lɔ̀Ꞌɔ ewu la. Tà ghɨ̀ tà shu mènəè maa, bòt e taꞋa ŋa mèkab abua tò, tà ŋa abua bòt bu bɔ bɔ atò la.

¹⁷Waàvi mbɔŋ me kùŋè àwa ba Pɔ̂l ba, ngȩ̀ȩ̀nà ŋȩ̀a shua nê, “Bòt ba wu bɔfàꞋ a Mbɔ̧ɔ̧mà Àtsèàngɔ̀ŋ. Bɔɔ̀ ngȩ̀ȩ̀nà shu awɨ̧ ndɨ bɨ̀a ghɨ̌ ka Mbɔ̧ɔ̧mà naa tsì àwɨ̧ a èbem kàbɔ̀ŋ wɨ̧ eŋa wɨ̧ mèmpème kàlìà la.”

¹⁸Tà ghɨ̀ ale, tà me zia shua wuê èngà̧ waa, tè è li ngu ane àli ako, ntɨ̧ɨ̧ Pɔ̂l e bɨ. Tà ghèble avi, shu abua fo kàbɔ̀ŋ yu nê, “Ane èlen Yesò Klistò, mâ shu awê nê, sà waàvi wàa a si, ndù.” Fo kàbɔ̀ŋ yu bê sà waàvi wu kwàꞋ àfɨꞋa mbɔŋ.

¹⁹AfɨꞋa bòt bu bɔ bɔ waàvi wu la e ye nê àyɨt a èkab ayɔb a ghà la, bɔ baãaã a Pɔ̂l bɔ̂ Sȩlàs səèŋnè nga a mbì bèkěm àsà̧aã èwen.

²⁰Bɔ səèŋnè àwɔb bɔ gha a mbì bèkěm bòt Luêm bu, bɔ nê, “Bòt baa wu Bèjuê mbɔ̂ me lɔ̀ke ngoꞋtsə àpfəèà nɨ̧ ŋàa, è wu aya la.

²¹Bɔɔ̀ nyɨ̀Ꞌta awa nê bà me ghɨ̀ mènəè kà mbɨ̧ ta te bɨ̧ɨ̧nè. Ba wu bòt Luêm, bà ka wu ko ebɨ̧ɨ̧ne me fàꞋà mbɨ̀Ꞌɨ̀ bɔ shua la.”

²²Mbɨ̀Ꞌɨ̀ bɔ làꞋ ale la, ènɔ̧̂ bòt bu e fȩ a si me kɨ elene bɔntu̧ Yesò bu. Bèkěm bu e saãaãtè ndìte Pɔ̂l bɔ̂ Sȩlàs, mbɔ̂ nê bɔ̀ shu̧u̧ awɔb.

²³Bɔ̀ tsenta bɔ̀ shu̧u̧ awɔb, bɔ màꞋà awɔb a tèfȩ, mbɔ̂ shu abua mbaabà lob tèfȩ yu nê, tà neeta nkȩ̀ ètsələèꞋ.

²⁴Mbaabà wu zə ale, màꞋà àwɔb a èbem àtsəalob yu a kètsìà lob tèfȩ yu la, mbɔ̂ fate èka bɔb ane taꞋà ètem èyɨt.

²⁵È lɔ̀Ꞌ me wu a èntɨ̧ɨ̧ ètsəꞋ Pɔ̂l bɔ̂ Sȩlàs e me tsàꞋtè a Mbɔ̧ɔ̧mà, mè nkɔ̧̀ɔ̧ mètsəkù̧ abua tò. Bɔtefȩ ko bu e me yute ndɨ bɔ kɔ̧ɔ̧ la.

²⁶AdzìꞋ bê me wù̧ù̧ne, sitsǎꞋ ben ane ètɨ̧̂ fɔ̀te lob tèfȩ yu bɔ̂ àtetsi nyìꞋ. KwàꞋ àfɨꞋa mbɔŋ, mètsələèꞋ mu tsɔꞋtè, fȩ tu bɔ nɨŋ kùùle bɔtefȩ bu bàgème la, te lootè.

²⁷Wòt wu tàa nkȩ̀ ètsəê lob tèfȩ yu la lɔ̀Ꞌɔ a si me ko ètsələèꞋ wu e wu jìa, tà tanda nê bɔtefȩ bu bàgème e luulà. Ale, tà sɔ̀ anyǐ vi nê, ye kɨ esɔ̀ɔ̀bè àvi.

²⁸Ka Pɔ̂l è ŋȩ ane ètɨ̧̂ nê, “Ka mbùŋè awê. Ba bele a si ŋàa bàagème.”

²⁹Mbê mbɔŋ lo̧o̧ èkaꞋà, nde ndèbà a èbem lob tèfȩ yu, nkwen a tèkate Pɔ̂l bɔ̂ Sȩlàs ntsìꞋa mbènta bente.

³⁰Tà ghɨ̀ ale, tà nɨ̀ àwɔb nga àbȩ mbɔ̂ mbììte nê, “Tê, màa ghɨ̀ na ka ebɔ mèmpème à?”

³¹Bɔ nê, “Bɨ̧ɨ̧ne abua Yesò Lefɨ̀Ꞌ, ko Mbɔ̧ɔ̧mà naa ghɨ̌ bɨ bòt bê bàgème aa peme.”

³²Bɔ ghɨ̀ ale, mbɔ̂ ntsɔ̀tè Ntu̧ Ntsɔ̧̀ Yesò abua tò nè waa waa a lob tò.

³³KwàꞋ àfɨꞋa mbɔŋ ètsəꞋ ngaa, mbaabà lob tèfȩ yu nɨ awɔb ngà shùù tèfɨŋ tu ane yɔb la, mbɔ̂ ndzì àwɔb bɔ̂ bòt bi bàgème a èdzî wuê àfɨꞋa mbɔŋ.

³⁴Ta nɨ a Pɔ̂l bɔ̂ Sȩlàs nga a lob zi ŋà àwɔb èghɨjɨ bɔ jɨ, bɔ̂ bòt bi e taꞋa wùꞋtè àwɔb nkàà nê bɔ̀ɔgème e zì mèntɨ̧ɨ̧ mɔb ane Mbɔ̧ɔ̧mà.

³⁵ÈtsəꞋ etsi, bèkěm Luêm bu e tsàà bɔkefen nê, bɔ̀ gha ngɨ̀ mbaabà wu yàa bòt bu sàŋ.

³⁶Tà shu abua Pɔ̂l àfɨꞋa mbɔŋ nê, “Bèkěm bu e tsɔ̀te ntu̧ nê bɔ̀ sà àwɨ̧ bɨ Sȩlàs bɨ̀ me ghǎ. È wu ale, bɨ me ghà àwɨ̧ bò̧ bò̧.”

³⁷Ka Pɔ̂l è shu abua bɔkefen bu nê, “Ba li bà ka ghɨ̂ ànəa kàbɔ̀ŋ ako, bɔ bɔ̂ shù̧ù̧ awa a kètsìà ndzɔ̀ŋ bòt, ba bɔ̂ ngu anè ntsìꞋi bòt Luêm mɨ̧̂. Bɔ li màꞋ awa a tèfȩ, ka nè àfɨ̀Ꞌ yaa bɔ wua nkɨ etsàà àwa baa me ghǎ ka bòt e koê. ChaꞋ, bà ka ghǎ àdziꞋ a. Bèkěm Luêm bu e bɔ̂ ndɨ bɔ̀ɔ kɨꞋɨ a si ŋàa bɔ̀ɔmbɔŋ ka etsàà àwa àbȩ la.”

³⁸Bɔkefen bu e ghà è shu ànəê yaa abua bèkěm bu. ÀfɨꞋa bɔ zə nê Pɔ̂l bɔ̂ Sȩlàs wu bòt Luêm mɨ̧̂ la, kèbɔa ke baãaã awɔb.

³⁹Bɔ ghà shù̧ù̧te awɔb, ntsì awɔb a lob tèfȩ yu mbɔ̂ shu awɔb nê, bɔ̀ sa àpfəèà nɨ̧ yu me ghǎ.

⁴⁰Pɔ̂l bɔ̂ Sȩlàs e dzə a lob tèfȩ yu nga a lob Lidìà, nkwene ane bɔnyɨ bɔb bu abot la ndàꞋa abua yɔb nê bɔ̀ me nɨ èngǎ̧ Mbɔ̧ɔ̧mà ngà wuê nè mbì, mbɔ̂ ndzə àpfəèà nɨ̧ yu me ghà àwɔb.