Read Mundani ÀfaꞋa 22 Bible Online

ÀfaꞋa 22 - Mundani bible

ÀfaꞋa 22

¹Pɔ̂l nê, “Bètǎt bɔ̧ nè bɔnyɨ bɔ̧, bɨ̀ yute èngǎ̧ am mbɨ̀Ꞌɨ̀ è nkɨ etsǐ ànəê àtsə am a mbì lɨ̧ anè la.”

²Bɔ me zə Pɔ̂l me làꞋa abua yɔb ane ndɨ̧ bòt Ebùlù ale, bɔ paa mbuŋ. Tà me nɨ èngǎ̧ vi ngà nè mbì.

³Nê “E ngu wòt Juê bɔ bi am Tasɔ̀s àbâ àlaꞋ a Sìlisìà la. Mbɔ̂ e ndi ntsə a Jèlusalèm ŋaa mbɨ̀Ꞌɨ̀ wakatè Gàmalìà. Bɔ li nèètè nyɨ̀Ꞌte am ndɨ màa me kùŋe mbɨ̧te bètǎt nyaꞋ ba la. E mè ŋà ènyit yaã abua Mbɔ̧ɔ̧mà wuê mbɨ̀Ꞌɨ̀ bɨ̀agème wàà bɨ tɨ̧ɨ̧ a si ŋàa laane la.

⁴E ndi ngua kɨa àtsə a bòt bɔ̀ɔ nkùŋà Alu̧ Yesò waa la tè ngɨ̀à tè mbùŋà àwɔb. E ndi ngua mbà̧aã bèzi nè mbâ̧tsə màꞋtà wɔb a tèfȩ.

⁵Bɨ biitè àtsəa bèntsìà mèpɨ̧̀ Mbɔ̧ɔ̧mà, bɔ̂ bòt lob èsaꞋa, ko bɔɔ shu awɨ̧ nê e ndàꞋà nkûŋ. Bɔ li ŋà mèkatè abua am nê, è nga ŋa abua Bèjuê bu è wu bòt Yesò a Dàmaskɔ̀s la. Ale, e nchu nga abàꞋ və ebaãaã bòt Yesò bu ekuule awɔb ane fȩtsə enɨ ewène a Jèlusalèm bɔɔ ŋa awɔb ngoꞋ.”

⁶“Mbɨ̀Ꞌɨ̀ mâ ghȩ̀ȩ̀nè te ntsìꞋa nkɨ enyi a Dàmaskɔ̀s a kètsìà nèngû̧ la, àghɨ ako mbɨ̀Ꞌɨ̀ èkaꞋà kekweelè a bê nchù ne ègwelebuule, nkaꞋa adù̧ yaã.

⁷E kwen a si, me zə, àtɔŋ ako a me làꞋa abua am, shua nê, ‘Sɔ̂l, Sɔ̂l! À ghɨ̀ na ka me kɨ àtsə am à?’

⁸“E mbiitè nê, ‘À wu wàà a Tê?’ “Àtɔŋ yu a bɨ̀ɨ̀lè nê, ‘E ngu Yesò wòt Nazàlet wu àa nkɨ̀a àtsə atò la’.

⁹Bòt bu bɔ li ngua ngȩ̀ȩ̀nà ba tò ba la e ye èkaꞋà wu, ka bɔ̀ ka zə àtɔŋ wòt wu ndaꞋa abua am la.

¹⁰“E mè mbììte nê, ‘Màa ghɨ̀ na a Tê?’ Tê Yesò mè shu abua am nê: “ ‘Lɔ̀Ꞌɔ a si nga a Dàmaskɔ̀s. À gha abàꞋ və, ko bɔɔ shu awê àghɨ àgème Mbɔ̧ɔ̧mà è taŋkè nê à ghɨa la.’

¹¹ÈkaꞋà wu e ghɨ̀ ale, mbê ndììme àghɨ am, tè bòt bu ba tò ba la e tsiꞋi e baãaã àbu am ka nɨ̀ am nga a Dàmaskɔ̀s.

¹²“Wòt kǒ li ngu abàꞋ və èlen tò wu Ànàniàs la, mbɔ̂ ngu wòt Mbɔ̧ɔ̧mà, me kùŋe mbɨ̧ ta. Bèjuê bàgème bèa ntsèka a Dàmaskɔ̀s la e mè ntàꞋa wua nguꞋta atò.

¹³Tà kɨ̀Ꞌɨ̂ ntɨ̧ɨ̧ a ngèt yaã mbɔ̂ shu abua am nê, ‘Wanyɨ am Sɔ̂l, ghaꞋa àghɨ ayê me ye èdziꞋ.’ Mbɨ̀Ꞌɨ̀ tà bê ndàꞋ ale la, àghɨ am a ghaꞋtè, tè e me ye atò.

¹⁴“Tà mè nê, ‘Mbɔ̧ɔ̧mà bètǎt nyaꞋ ba è lȩ̀ awê nê à ko àghɨa yèa nkɨà la, mè ndzè ngule Waã vi tà tɨ̧ɨ̧ ndɨŋndɨ̀ŋ a mbì li la, ndɔ̀Ꞌ ndzə atò ndaꞋa ane azi ne àtɔŋ la.

¹⁵Tà ghɨ̀ ale, mbɨ̀Ꞌɨ̀ aa li me shu a waa waa àghɨa à ye mè nko ane tò la.

¹⁶È wu ale, à ka tsi ntsòkè àfɨ̀Ꞌ. Lɔ̀Ꞌɔ a si bɔ zì àwê a èdzî, tà waꞋa a kàbɔ̀ŋ wê mbɨ̀Ꞌɨ̀ àa ntsàꞋtà atò la.’ ”

¹⁷“Mâ ghɨ̀ ale, nkua akwèn nga a Jèlusalèm me tsàꞋte a Mbɔ̧ɔ̧mà a èbem lob nɨ̧ tò, ndzè àtsə,

¹⁸ndze a Yesò, tà shua abua am nê, ‘Taŋke ndzə a Jèlusalèm ŋaa kwàla, na bòt abàꞋ ŋaa è ka bɨ̧ɨ̧ne ezə ndɨ à shua nê ye ye mè nko mènəè ane yaã la a.’

¹⁹“E bɨ̀ɨ̀lè nê, ‘Tê, bɔ ko ntsɔ̧̀ nê e ndi ngua nga a èbem lobte Mbɔ̧ɔ̧mà tɔb mbà̧aã bòt bu bɔ zì mèntɨ̧ɨ̧ mɔb ane yê la è shù̧a wɔb.

²⁰È li mè ngu àfɨꞋa bɔ bùŋà wɔ̀fàꞋ wê Stifèn la, e ngu abot è mbɨ̧̀ɨ̧̀nè nê bɔ̀ bùŋe atò, tè bòt e sɔ̀tè mèmà̧ mɔb ŋa e mbèa ka bɔ me bùŋe atò.’

²¹“Yesò shu abua am nê, ‘Dù, nkàà nê maa nga etsàà awê a endɨ̌ abua bòt kà wu Bèjuê.’ ”

²²Bòt bu e buŋ me yute tê Pɔ̂l è làꞋ ànəê yaa, bɔ bùꞋ me ŋȩ ane ètɨ̧̂ shua nê, “Bɨ̀ tsi atò a sitsǎꞋ ŋàa. Bɨ̀ bùŋe atò. Tà bakà kùꞋu wòt tàa me tseke a ngɔ̀ŋ ŋaa la.”

²³Mbɨ̀Ꞌɨ̀ bòt bu àa ŋȩ̀a, mììtà ndǐ tɔb, ntàa àbeb a ègwet la,

²⁴tǎt banyà̧ wu shu abua bòt bi nê, bɔ̀ nɨ a Pɔ̂l nga adzìꞋa banyà̧ bu àa ntsèka la, nê bɔɔ ghǎ bɔ shu̧u̧ atò, mbɔ̂ mbììte atò àghɨa a ghɨ̂ ka Bèjuê e me ŋȩ àtsə atò ale la.

²⁵Ka àfɨꞋa bɔ gha te nkùùle atò me kɨ eshu̧u̧ la, Pɔ̂l bììte wajûŋ banyà̧ bu abot la nê, “Mbɨ̧tsə te bɨ̧ɨ̧nè nê, bɨ̀ shu̧u̧ wòt Luêm kà lem saꞋa atò eye nê tà ghɨ ànəa kàbɔ̀ŋ?”

²⁶Mbɨ̀Ꞌɨ̀ wajûŋ banyà̧ wu è zə èngà̧ waa la, tà gha abua tǎt banyà̧ wu, mbììte atò nê, “Eyaa chɨɨme ngu ghà bɨ ghɨ̀à la à? Mbê waa wu wòt Luêm?”

²⁷Tǎt banyà̧ wu tsiꞋi gha abua Pɔ̂l mbììte atò nê, “Chɨɨme shu am, à wu wòt Luêm?” Tà nê, “Oò.”

²⁸Tǎt banyà̧ wu nê, “Bɔ li me laꞋ nê bɔɔ̀ nɨ am mbɨ̀Ꞌɨ̀ wòt Luêm, e ŋa aŋaã èkab.” Pɔ̂l bɨ̀ɨ̀lè nê, “È wu am, ko e ngu wòt Luêm ane membǐ.”

²⁹KwàꞋ àfɨꞋa mbɔŋ, bòt ko bɔ li ngua nga me biite a Pɔ̂l mènəè la e səèꞋtè àwɔb nkua akwèn. Mbɨ̀Ꞌɨ̀ tǎt banyà̧ wu e ye nê Pɔ̂l wu wòt Luêm bɔ̂ kuule atò la, ta tsiꞋi me bɔɔ bɔa.

³⁰Tǎt banyà̧ wu li ngua nkɨ eko àghɨ yu a chɨɨmè ngɨ̀ ka Bèjuê e me kɨ a Pɔ̂l ebùŋè la. ÈtsəꞋ e tsi, tà ghɨ̀ bɔ yaa a Pɔ̂l, mbɔ̂ ntɔ bèntsìà mèpɨ̧̀ Mbɔ̧ɔ̧mà nè bòt èsaꞋa ko bu bàgème nê bɔ bu̧u̧ta. Tà nɨ a Pɔ̂l ngà ngɨ̀ tà tɨ̧ɨ̧ a mbì lɔb.