Read Mundani ÀfaꞋa 24 Bible Online

ÀfaꞋa 24 - Mundani bible

ÀfaꞋa 24

¹Èli e li ntsè betà̧â̧, Ànàniàs wu tà wu àtsəa bèntsìà mèpɨ̧̀ Mbɔ̧ɔ̧mà la, gha a Sìsalìà bɔ̂ bɔɔjuŋ ko, mè nè kěm èsaꞋa kǒ èlen tò wu Tètulùs la, ngwȩ̀ȩ̀te mènəè Pɔ̂l è ghɨ̀ la, è shu abua Gɔvanɔ̀ Felìk a èbem lob èsaꞋa yu.

²ÀfɨꞋa bɔ tɔ a Pɔ̂l tè tà nyi a lob la, Tètulùs bùꞋ mènəè maa me shu àtsəa Pɔ̂l wu: “Ndì! À nɨ èyǐ wè nɨŋ mbà̧à̧ àlaꞋ ntsɔ̧̀ tè ba tseke kà ngoꞋ dzə ane taꞋà àfɨ̀Ꞌ à seè. À taꞋa ghɨ̌ èghɨ nɨŋ ngàꞋa àlaꞋ aya.

³Ba taꞋa kɔ̀ŋkè àwê ane mènəè maa ane balu̧ bàgème.

⁴Maà ka kɨ etsòke àfɨ̀Ꞌ àyê nyaŋ, è wu ale, e me shu̧u̧te awê nê, à nyaꞋa mbuŋ njùte awadziꞋ ànəê yaa e nkɨ eshu ane èlen la bàgème la.

⁵“Ba ye nê mbê waa wu kwàꞋ anyà̧kàbɔ̀ŋ a kètsìà bɔbȩ. Tàa ngɨ̀ tà tsě adzìꞋ àgème a ngɔ̀ŋ ŋaa, tà lɔ̀kè ngoꞋ a kètsìà Bèjuê. Tàa anè ngu ndâ wòt tà wu àtsəa ènɔ̧̂ bòt bu bɔ̀ɔ ntɔ awɔb nê bòt Nazàlet la.

⁶Tà li ngɨ̀ tè nyɔ̀Ꞌtè nê ye kɨ etsòkè lob nɨ̧ Mbɔ̧ɔ̧mà a Jèlusalèm, ka ba baãaã atò. [Ba li ntàŋkê nê baa saꞋa atò mbɨ̀Ꞌɨ̀ mbɨ̧ ta tèa nkɨ̀a la,

⁷ka Lȩsìàs wu è wu tǎt banyà̧ la kɨꞋɨ̀ èfaa atò abua ya ane ètɨ̧̂.

⁸Ngɨ̀ ale nê, wòt bɔ ànəê tàa shu ane tò la, ŋut kɨꞋɨ a mbì lê.] À nyaꞋà mbììte atò mèngǎ̧, ko aa ye nê mènəè maa ègème ba shua la wu nkûŋ.”

⁹Tètulùs wu è làꞋ ale la, Bèjuê bu abot la, e zì ètsəê nê mènəè mu ègème wu nkûŋ.

¹⁰ÀfɨꞋa mbɔŋ, gɔvanɔ̀ wu mɨ̀Ꞌ àbu nê Pɔ̂l è laꞋa, tà bùꞋ èngà̧ waa me làꞋa nê: “Mâ ko nê à saꞋa bòt àlaꞋ ya ane mèngùꞋ nyaŋ. È wu ale, e ngu ane mèngùꞋte elàꞋa èngà̧ a mbì lê enɨ etsǐ ànəê àtsə am.

¹¹Mbɨ̀Ꞌɨ̀ àwɔ̌ mbɔŋ à ye la, èli e bakà tse èghem ntsɔ̀b bebe mbɨ̀Ꞌɨ̀ e ndi nga a Jèlusalèm nê e nga e wùꞋte a Mbɔ̧ɔ̧mà la.

¹²Bèjuê e li bɔ̀ ka ye am nkàànà ànəê ba wòt kǒ a èbem lob nɨ̧ Mbɔ̧ɔ̧mà a Jèlusalèm la. Bɔ̀ ka lem ndzè am adzìꞋ àko tsa a èbem àpfəèà nɨ̧ yu, ka wuê a èbem lobte Mbɔ̧ɔ̧mà tɔb nkɨ elɔ̀ke ngoꞋ a kètsìà bòt la.

¹³BètsiꞋa bɔ̀ ka lem nyɨꞋte àlȩê ako nê mènəè maa bɔ shua àtsə am àfɨ̀Ꞌ yaa la wu nkûŋ.

¹⁴TsiꞋ è mbɨ̧ɨ̧ne abua yê nê, maà ngùꞋtà a Mbɔ̧ɔ̧mà bètǎt nyaꞋ ba ane Alu̧ Yesò wu bɔ shua nê wu we fɨ̀te la. Mâ mê mbɨ̧ɨ̧nê mènəè ègème nàà a èbem àkata mbɨ̧te Musì, nè me nàa a èbem èkatè bèndàꞋàtɔŋ Mbɔ̧ɔ̧mà la.

¹⁵Mmɔ̌ mbɔŋ mâ bɔ ntɨ̀ mè me chɨ̀Ꞌɨ̀ wuê mbɨ̀Ꞌɨ̀ bòt baa a si ŋàa la, nê, Mbɔ̧ɔ̧mà naa li yu̧u̧me a waa waa, bòt kàbɔ̀ŋ, nè bòt ntsɔ̧̀.

¹⁶È wu ale, màa ngɨ̀ e me nyɔ̀Ꞌte àfɨ̀Ꞌ àgème ebɔ èntɨ̧ɨ̧ kà wua fèèlè am a mbì Mbɔ̧ɔ̧mà bɔ̂ wɔ̀bȩ̂.

¹⁷“E ndi ntsèke ane mèngùꞋ nyaŋ kà gha a Jèlusalèm. Ndɔ̀Ꞌ ale, ka nê e kɨ eghǎ abàꞋ və enɨ èkab ko eghǎ eŋa abua Bèjuê ba ko. E ndi ngua ngà mɨ̧̂ ekɨ̧ɨ̧me nyà̧ enɨ ŋa mènkɔ̀ŋke abua Mbɔ̧ɔ̧mà.

¹⁸È nga è me ghɨ̌ èghɨ bàa ka bɔ ye am a èbem lob nɨ̧ Mbɔ̧ɔ̧mà a Jèlusalèm. Me ye am ale, e ko nê mâ paa tê ntàŋke èpà̧ wu mâ wua ngɨ̀à enɨ nyɨꞋte nê e ntsiꞋi wòt èntɨ̧ɨ̧ kèfə e mbì Mbɔ̧ɔ̧mà la. Ènɔ̧̂ bòt e li è ka wu abot, ngoꞋ ka mê nguê. Ka Bèjuê ko bɔ dzə àbâ àlaꞋ a Esìà la e bɔ̂ ngu abot.

¹⁹Bɔ̀ɔ mbɔŋ e wu ekɨꞋɨ a si ŋàa, eshu mɔb ne mènəè, na bɔ bɔ ànəê àko betsiꞋa bɔ shu àtsə am la.

²⁰A bakà wu ale, bòt baa a si ŋàa la e shu ngule ànəê yu a li ndia àtsə am àfɨ̀Ꞌ yu e ndi ntɨ̧ɨ̧ a mbì bòt èsaꞋa la.

²¹NdàꞋ ànəê yeamɔꞋ e ndi shu la wu nê, bɔ wua ntsìà mpəè taã àfɨ̀Ꞌ yaa nkàà nê mâ bɔ ntɨ̀ nê, Mbɔ̧ɔ̧mà naa li yu̧u̧me bòt bu bɔ pfəꞋte la.”

²²Ale, ndɨ̀ wu Felìk neetè nko Alu̧ Yesò la, tà nê bɔ̀ nyaꞋa səèꞋtè èsaꞋa wu nɔ̀ŋè akwèn. Mbɔ̂ èshu abua bòt bu nê, “Maa tsiꞋi esaꞋa ànəê yaa àfɨꞋa Lȩsìàs wu tà wu tǎt banyà̧ la è kɨꞋɨ la.”

²³Tà ghɨ̀ ale, tà shu abua wajûŋ banyà̧ wu tàa mbààba a Pɔ̂l la nê, tà nɨ atò nɨŋ ngà. Mbɔ̂ mè nê, tà ka me lɨ̀ŋke atò nyaŋ, nê tà nyaꞋa ŋa atò èlu̧ ndɨ betsiꞋa bèshu̧ tò e ko ŋa atò èghɨ tàa nkɨ̀ŋkà la.

²⁴Èli ko e li ntsè, Felìk è kɨ̀Ꞌɨ̂ bɔ̂ vi vi Dùsilà tà wu waàvi Juê la. Tà kɨꞋɨ ale, tà tu̧ bɔ tɔ a Pɔ̂l, tà kɨꞋɨ ndàꞋ abua yɔb ndɨ bòt e wu zì mèntɨ̧ɨ̧ mɔb ane Yesò Klistò la.

²⁵Pɔ̂l è ghɨ̀ ale, tà mè ngà nè mbì me làꞋa ndɨ bòt e wu me ghɨ̀ mènəè Mbɔ̧ɔ̧mà nàa nkɨà la. Mè ndàꞋà ndɨ bòt e wu me baãaã mèntɨ̧ɨ̧ mɔb ka ngɨ̀à mènəè la, mè shu ndɨ Mbɔ̧ɔ̧mà nàa li esaꞋa a waa waa ane àlia ko la. Mbɨ̀Ꞌɨ̀ tàa ndàꞋà mènəè maa la, Felìk è bùꞋ me bɔa, tê ntsìꞋi shu abua tò nê, “TsiꞋ ale àfɨ̀Ꞌ yaa me ghǎ. Maa mě è mbɔ àfɨ̀Ꞌ, ka e mè ntɔ awê.”

²⁶Tàà mbɔ̂ ndaꞋa àfɨꞋa mbɔŋ ale, me kwàꞋte nê Pɔ̂l naa ŋa avi èkab àbuakwèn, ale tà me tɔ atò àfɨ̀Ꞌ àgème bɔ̂ tò e mùà.

²⁷ÈngùꞋ e tsè yebe, bɔ zi a Pɔsìòs Festɔ̀s ane gɔvanɔ̀ àdziꞋa Felìk. Felìk me laꞋ nê yea ndzəa a ègwet atɨ̧ ale nɔ̀ŋè a Pɔ̂l wuê a tèfȩ, tàa nkɨ̀a mbɨ̀Ꞌɨ̀ Bèjuê aa me kɔ̀ŋkè àvi la.