Read Mundani ÀfaꞋa 25 Bible Online

ÀfaꞋa 25 - Mundani bible

ÀfaꞋa 25

¹Èli e li ntsè betat mbɨ̀Ꞌɨ̀ Festɔ̀s è nyi àbâ àlaꞋ və tè nɨ atɨ̧ vi la, tà lɔꞋ a Sìsalìà nga a Jèlusalèm.

²Bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ Bèjuê e lɔ̀ktè mènəè nàa sàa awɔb ane Pɔ̂l la, shù̧ù̧te a Festɔ̀s nê,

³tà tɨŋe awɔb ntsaa a Pɔ̂l tà kɨꞋɨ a Jèlusalèm. Bɔɔ̀ ngɨ̀à ale, mbɔ̂ ntàŋkê ndɨ bɔ̀ɔ taãaã atò alu̧ ebùŋè la.

⁴Festɔ̀s è bɨ̀ɨ̀lè nê, “Pɔ̂l wu a Sìsalìà bɔ zi atò a tèfȩ la. Mmɔ̌ mbɔŋ e mbele yàŋe eghǎ abàꞋ və.

⁵Bɔɔjuŋ bɨ̧ e koà mènəè kàbɔ̀ŋ kǒ tà ghɨ̂ bɔ me kɨ ebiite atò la, bɔ kɨꞋɨ ba tò ba è gha a Sìsalìà və.”

⁶Festɔ̀s mè ntsèke èli ko mbɔ̀ŋè befà̧aã kò wuê èghem leꞋ bɔ̂ tò ba, mbɔ̂ ngà àvi a Sìsalìà. ÈtsəꞋ e tsi, tà tseke a èbem lob èsaꞋa mbɔ̂ nê, bɔ̀ nɨ a Pɔ̂l nɨŋ nkɨ̀Ꞌɨ̂.

⁷ÀfɨꞋa tà kɨꞋɨ la, Bèjuê bu bɔ lɔ̀Ꞌɔ a Jèlusalèm la, e ghaale atò mbùꞋ me shu taꞋà mènəè kàbɔ̀ŋ tà ghɨ̀ la, kà lem ndze àlȩê bɔ ŋa ane ayea ko la.

⁸Ka Pɔ̂l è fàà àvi abua yɔb nê, “E mbakà ghɨ ànəa kàbɔ̀ŋ ako ane mbɨ̧te Bèjuê. È nka ghɨ̀ ànəa kàbɔ̀ŋ ako ane lob nɨ̧ Mbɔ̧ɔ̧mà a Jèlusalèm. È nka fà̧ ànəê abua empelɔ̀ wu a Luêm la.”

⁹Festɔ̀s me kɨ àghɨa Bèjuê àa me kɔ̀ŋkè àvi la, mbììte a Pɔ̂l nê, “BetsiꞋa à bɨ̧̀ɨ̧̀nê nkùŋè am ba gha a Jèlusalèm bɔ tsɔꞋtè ànəa ngaa a mbì laã à?”

¹⁰Pɔ̂l bɨ̀ɨ̀lè nê, “E ngu anè a mbì bòt èsaꞋa Empelɔ̀ Luêm. Eyaa wu àdziꞋa bɔ̀ɔ saꞋa am la. Mbɨ̀Ꞌɨ̀ àwɔ̀ mbɔŋ à ko la, e mbakà ghɨ̀ ànəa kàbɔ̀ŋ ako abua Bèjuê.

¹¹È wu laꞋ nê mâ pààte mbɨ̧tsə tè a nyɨꞋtè nê bɔ̀ bùŋè am, ko è nka shu nê bɔ̀ ka mbùŋè am a. Mbə è wu nê nkûŋ kǒ ndem ntsě ane mènəè maa bɔ zi àtsə am la, ko wòt kǒ ntsě tàa ŋa am abua yɔb la. Mâ shɨɨbè nê, empelɔ̀ wu ka tàa saꞋa ànəê am yàa la.”

¹²Mbɨ̀Ꞌɨ̀ Pɔ̂l è làꞋ ale la, Festɔ̀s è tɔ bòt bɔ̀ɔ nkɨ̀ɨ̀ta avi la, bɔ̂ tò ba e mù. Tà bɔ̂ nê, “Ndɨ̀ wu à shɨɨbè nê, empelɔ̀ ka tàa saꞋa ànəê ayê yaa la, maà tsàà awê abua tò.”

¹³È me wu àfɨ̀Ꞌ àko, Fɔ̧̀ Aglipà bɔ̂ Bènisì e kɨꞋɨ a Sìsalìà etsàꞋte a Festɔ̀s e mě esèe atò.

¹⁴Bɔ̀ tseke abàꞋ və ane èli ko, Festɔ̀s è tsɔ̀Ꞌte ànəa Pɔ̂l èshu abua fɔ̧̀ wu nê, “Wòt kǒ naa a si ŋàa Felìk li me dzəâ atɨ̧ ale tà wu a tèfȩ la.

¹⁵È li ngu àfɨꞋa mâ gha a Jèlusalèm la, bètǎt bèntsìà mèpɨ̧̀ Mbɔ̧ɔ̧mà bɔ̂ bɔɔjuŋ Bèjuê e lɔ̀ktè mènəè àtsə atò, nê è ngɨa àyea tò à bɨ.

¹⁶“Ka e shu abua yɔb nê, aa abua ya bàa bòt Luêm, bɔ̀ɔ ngɨ̀ bɔ̀ laꞋnê wòt è ghɨ ànəa kàbɔ̀ŋ, bà me laꞋ nê baa ngɨ̀à taa tsə àtsɔb, ba ye nê, bɔ̂ bòt bu bɔ shu ànəê yu àtsəa ŋut la e bù̧ù̧te a lob èsaꞋa, tè tà làꞋ èngà̧ enɨ fàà àtsə azi.

¹⁷È li ngu àfɨꞋa bɔ kɨꞋɨ a si ŋàa la, è nka tsokè àfɨ̀Ꞌ. ÈtsəꞋ e bê ntsi, ba nyi a lob èsaꞋa, e ntɔ̂ nê bɔ̀ nɨ atò nɨŋ nkɨ̀Ꞌɨ̂.

¹⁸Tà kɨ̀Ꞌɨ̂, bɔmbù̧ tò bu e lɔ̀Ꞌɔ a si, ka e me zə, bɔ̀ ka lem shu ànəê àko ane mènəè kàbɔ̀ŋ mu mâ ghɨ̂ ntanda nê bɔɔ shu àtsə atò la.

¹⁹Bɔ̂ tò ba e me kàànè wuê mènəè ko ndɨ bɔ̀ɔmbɔŋ àa ntsàꞋta a Mbɔ̧ɔ̧mà la, mè nkàànà ànəa èlen wòt kǒ bɔ̀ɔ ntɔ nê Yesò la, tà li mpfə, ka Pɔ̂l me shu nê tà wu yû̧ la.

²⁰Àtsə am a bɨɨ ndɨ màa chɨɨme ghɨ̌ ka ko mènəè mu bɔ shua ane Pɔ̂l la. E mbììte atò nê, taa ghǎ a Jèlusalèm bɔɔ tsɔꞋte ànəa ngaa abàꞋ və leꞋ?

²¹Ka Pɔ̂l shɨ̀ɨ̀bè wuê nê, bɔ̀ nɔ̀ŋè avi a si və tè empelɔ̀ li sàꞋa ànəê àzi, ale, e nê bɔ̀ nɔ̀ŋe atò a si ŋaa me baabe tê e ndi ntsaa atò abua tǎt wa wu.”

²²Aglipà me zə tê è shu abua Festɔ̀s nê, “Wòt ngaa me wu ale ndàꞋ abua am zìambɔŋ, ko a bɔ̌ am.” Festɔ̀s bɨ̀ɨ̀lè nê, “Maa sàꞋa atetsɔꞋ e ghɨ̌ taa làꞋa, aa zə.”

²³ÈtsəꞋ e sàꞋ ntsi, Aglipà bɔ̂ Bènisì e me kɨꞋɨ, bòt e sèè àwɔb kwàꞋ ànyaꞋne mbɨ̀Ꞌɨ̀ bɔ̀ɔ sèà wòt nɨ̧ ègème la. Bɔ nyi a èbem lob màmbu̧u̧ta bɔ̂ bòt bɔ̀ wu àtsəa banyà̧ la nè bɔɔjuŋ bu àpfəèà nɨ̧ və la. Festɔ̀s ghɨ̀ bɔ nɨ a Pɔ̂l nɨŋ nkɨ̀Ꞌɨ̂ a lob.

²⁴Festɔ̀s bɔ̂ nê, “Fɔ̧̀ Aglipà nè waa waa tàa a si ŋàa ba tò ba la, mbê waa bɨ ye atò la wu wòt Bèjuê bàgème, èbe bèa a si ŋàa la nè èbu a Jèlusalèm la e taꞋa shu am mènəè tà ghɨ̀ la. Bɔɔ̀ shua nê, à ye atò à bê mì a sitsǎꞋ ŋàa.

²⁵È wu am mmɔ̌ mbɔŋ, ko e mbakà ye nê tà ghɨ ànəa kàbɔ̀ŋ ako tè ngu àyea màa laꞋnê bɔ̀ bùŋe atò la. Ndɨ̀ wu tòà zìambɔŋ è sɨɨbè nê wu empelɔ̀ ka tàa saꞋa avi la, e ngu etsàa atò abua tǎt wa wuê mbɨ̀Ꞌɨ̀ tà shu la.

²⁶Ka e mbakà lem ndzè ngule ànəê ane tò waa màa shɨ abua empelɔ̀ wu la. È wu ale, mâ nɨ atò nɨŋ nkɨ̀Ꞌɨ̂ a si ŋàa a mbì lɨ̧ bɨ fɔ̧̀ Aglipà ba, nê tà làꞋa èngǎ̧ vi zìambɔŋ, fɔ̧̀ Aglipà zə. Ba me wu ale mbàŋè ànəa ngaa tè ndze, ko mâ ko ànəa màa shɨ abua empelɔ̀ wu la.

²⁷E nkɨà ale, nkàà nê a bakà chɨɨme nyɨ̀Ꞌte nê, è ntsàa wɔ̀tèfȩ abua empelɔ̀ wu kà neete eyààtè mènəè mu bɔ zi àtsəa ŋut la eshua atò.”