Read Mundani ÀfaꞋa 26 Bible Online

ÀfaꞋa 26 - Mundani bible

ÀfaꞋa 26

¹ÀfɨꞋa mbɔŋ, fɔ̧̀ Aglipà shu abua Pɔ̂l nê, “BùꞋu èngǎ̧ wè àwɔ̌ mbɔŋ me nɨa ngà nè mbì.” Pɔ̂l è lɔ̀kè àbu azi ntsaa ègwet, ndàꞋ èngà̧ waa nɨŋ ntsì ànəê àtsə azi:

²Fɔ̧̀ Aglipà, mâ ye nê èsi am aà mbɔ̀, mbɨ̀Ꞌɨ̀ mâ tɨ̧ɨ̧ a mbì lê laane waa etsì mènəè maa ègème Bèjuê e zǐ àtsə am la.

³Àyaa wu kwàꞋ nkûŋ ndɨ̀ wu à chɨɨmè nèètè nko ndɨ Bèjuê àa ngɨ̀à mènəè mɔb la, nè mènəè bɔ̀ɔ nkaana adù̧ mbɨ̧ tɔb la. E ngu anè shù̧ù̧ta awê nê, à nyaꞋa mbuŋ njùtê èngǎ̧ am.

⁴“Bèjuê bàgème e ko ndɨ màa ngɨ̀à mènəè mɔ̧ la, e bùꞋù tê àfɨꞋa e ndi ngu watèchɨɨle la. Bɔ yàŋe ko tê a mèmbùꞋu ndɨ màa ngɨ̀à mènəè mɔ̧ ègème a èbem àlaꞋ am nè Jèlusalèm la.

⁵Bɔ ko ane àfɨ̀Ꞌ à seè, na bɔ wuê ebɨ̧ɨ̧ne e shu awê la, nê ebùꞋu tê àfɨꞋa mbì, maà ngɨ̀à mènəè mɔ̧ wuê mbɨ̀Ꞌɨ̀ ènɔ̧̂ bòt bu bɔ̀ɔ mbê ndâ ntsàꞋta a Mbɔ̧ɔ̧mà ndɨ mbɨ̧ ta tèa nkɨ̀a la. Bòt baa e shua la wu Bèfalèsiì.

⁶Ka nè àfɨ̀Ꞌ yaa, e ngu a si ŋàa mâ tɨ̧ɨ̧ bɔ me saꞋa am la, ndɨ̀ wu mâ bɔ ntɨ̀ ane mènkàꞋa mu Mbɔ̧ɔ̧mà lè kaꞋa abua bètǎt nyaꞋ ba la.

⁷Eyaa wu èghɨ mbɔŋ bu Mbɔ̧ɔ̧mà li nkàꞋ abua lətelob Izəèlȩê tu èghem ntsɔ̀b tebe nê bɔɔ li ebɔ mbɨꞋɨ̀ bɔ̀ɔ ngùꞋtà àvi a nyèmtèsi nè tètsɔꞋ la. Fɔ̧̀ Aglipà, Bèjuê e kɨ enɨ àtsə am anè ngu ànəa ntɨ̀ ngaa ba tò ba e bɔ la.

⁸Èghǎ a ghɨ̂ ka bɨ̀a Bèjuê e kwàꞋtè nê, betsiꞋa Mbɔ̧ɔ̧mà kà yu̧u̧mè bòt bɔ pfəꞋte la à?

⁹“Mmɔ̌ mbɔŋ e ndi nkwàꞋtè nê, mâ wu èghɨ ànəê àgème enɨ etsòkè èlen Yesò wòt Nazàlet.

¹⁰Eyaa wu àghɨa e ndi ngua ngɨ̀à a Jèlusalèm la. Bètǎt bèntsìà mèpɨ̧̀ Mbɔ̧ɔ̧mà e li ŋà mètàŋ abua am e me baãaã bòt Mbɔ̧ɔ̧mà nyaŋ ndzìà a tèfȩ. È ghɨ̀ è wu àfɨꞋa bɔ laꞋnê bɔ̀ bùŋè àwɔb la, mmɔ̌ mbɔŋ e mbɨ̧ɨ̧nè.

¹¹E ndi ntàꞋa wua ngɨ̀à bɔ ghɨ̧̀ɨ̧̀nà àwɔb a èbem lobte Mbɔ̧ɔ̧mà Bèjuê tègème. E ngɨ̀ è me ghɨ̀ ale, e ngua nyɔ̀Ꞌtà nkɨ e ghɨ̌ bɔɔ tu̧ a Yesò. E ndi mbê mpààbè àwɔb tè me ghǎ fɔ̀ɔ̀le a èpfəè nɨ̧ ko a èlaꞋ a tsa nkɨ̀a àtsə yɔb enɨ.

¹²“Eyaa wu lə yu e ndi me ghǎ a Dàmaskɔ̀s, bètǎt bèntsìà mèpɨ̧̀ Mbɔ̧ɔ̧mà e shɨ àkatè ŋà mètàŋ abua am nê e nga mbà̧aã bòt Yesò la.

¹³E nga alu̧ a kètsìà nèngû̧ a Mmɔ̌, è ndzě èkaꞋà ko nè ègwelebuule, e kàꞋtè tê ntsè àtaãnyèm la, e kaꞋa adù̧ yaã nè bòt bu ba tò ba e wua ngȩ̀ȩ̀nà nɔ̂ la.

¹⁴Bàa ègème e kwene a si. E me zə, àtɔŋ a laꞋa abua am ane ndɨ̧ Ebùlù nê, ‘Sɔ̂l, Sɔ̂l, à ghɨ̀ na ka me kɨ àtsə am enɨ à? À ghɨ̀à wuê awê àwɔ̌ mbɔŋ, ndɨ̀ wu àa ngù̧a awê, mbɨ̀Ꞌɨ̀ mpɔ̀ŋ tàa ŋèꞋa avi ngù̧a ane ayɨ̌t tǎt tò è tɔbtè me nɨa nchuꞋa atò ntsàà nè mbì la.’

¹⁵“Mâ ghɨ̀ ale, mbììtè nê, ‘À wu wàà a Tê?’ “Tǎt am wu nê, ‘E ngu Yesò wu àa nkɨà àtsəa tò enɨ la.

¹⁶Ka lɔ̀Ꞌɔ a si àfɨ̀Ꞌ yaa, ntɨ̧ɨ̧ ane èka bê. Mâ pùùla a mbì lê mbɨ̀Ꞌɨ̀ e lȩ̀ awê ane wɔ̀fàꞋ am. Aa shu a waa waa àghɨa à ye ane yaã laane waa la, nè èghɨ màa mě nyɨꞋte awê la.

¹⁷Maà kele mbɨ̀Ꞌɨ̀ bòt Izəèlȩê nè bòt kà wu Bèjuê bu màa tsàà àwê abua yɔb la, e zì àlɔꞋ ane yê.

¹⁸Aa ghǎ eghaꞋa àghɨ ayɔb, e mě ghɨ̌ bɔɔ dzəâ a èbem ndzěm enyi a èbem èkaꞋà. Aa ghɨ̌ bɔɔ dzəâ a tèkitebu Satàn enyi a èbem kèfɔ̧̀ Mbɔ̧ɔ̧mà, mbɨ̀Ꞌɨ̀ bɔ zì mèntɨ̧ɨ̧ mɔb ane yaã, Mbɔ̧ɔ̧mà naa waꞋa a kàbɔ̀ŋ wɔb, bɔɔ me nɨ adziꞋa yɔb ayɔɔ bòt bu Mbɔ̧ɔ̧mà làà ane bi la.’

¹⁹“È wu ale, Fɔ̧̀ Aglipà, e ndi è nka tu̧ ànəa Yesò li nchu a ègwet ndaꞋa abua am la.

²⁰E ndi mbɨ̀ ndàꞋ èngǎ̧ Yesò a Dàmaskɔ̀s, me tsɔꞋɔ ndaꞋa a Jèlusalèm, mè ndaꞋa àlaꞋ a Bèjuê àgème, ka mbɔ̂ ndaꞋa abua bòt kà wu Bèjuê. E ndi ngua ndaꞋa shua nê, bɔ̀ ghɨ̀ mènəè mu è nyɨꞋtè nê, bɔ waꞋa mènəè kàbɔ̀ŋ mɔb la, mbɨ̀Ꞌɨ̀ etsiꞋi bòt bɔ̀ɔ nkuŋa a Mbɔ̧ɔ̧mà la.

²¹Eyaa wu àghɨ yu a li ngɨ̀ ka Bèjuê e baãaã am a èbem lob nɨ̧ Mbɔ̧ɔ̧mà a Jèlusalèm me kɨ ebùŋè la.

²²Ka, ekɨꞋɨ wu laane waa, Mbɔ̧ɔ̧mà nàà ntɨ̀ŋa am. È wu ale, e ngu a si ŋàa eshu àghɨa mâ ye mè nko la abua waa waa, wɔ̀jûŋ nè watèchɨɨle. Mènəè maa e shua la, wu kwàꞋ mènəè mu bèndàꞋàtɔŋ Mbɔ̧ɔ̧mà bɔ̂ Musì ba e li nê naa li ghɨ̀ la.

²³Bɔ li nê, Fɔ̧̀ wu Mbɔ̧ɔ̧mà li ndzɔꞋ etsàà la è bɔ̂ ndɨ tàa li eye ngoꞋ te epfə, ebɔ ewu wòt mbì tàa lɔ̀Ꞌɔ eyu̧u̧me la. Nê, taa li eyu̧u̧me etsɔ̀te Ntu̧ Ntsɔ̧̀ mèmpème, è wù mbɨꞋɨ̀ èkaꞋà abua Bèjuê nè bòt kà wu Bèjuê la.”

²⁴Mbɨ̀Ꞌɨ̀ Pɔ̂l nàa ntsìà ànəê yu àtsə azi a èlɨ̀ waa la, Festɔ̀s ŋȩ̂ atò nê, “Pɔ̂l, à be. Àkatè yu a ko nyaŋ la aa ghɨ̌ aa be.”

²⁵Pɔ̂l è bɨ̀ɨ̀lè nê, “E mbakà be a ndì, e ndàꞋà èngà̧ waa ane nkûŋ mbɨ̀Ꞌɨ̀ wòt tà bela nkoa èdziꞋ la.

²⁶Fɔ̧̀ Aglipà, à ko mènəè maa ègème, è wu ale, e ngu elàꞋa abua yê kà bɔ̀â. Mâ ye nê, ànəa ko ane ngaa kà à koê a ntsě, nkàà nê mènəè ngaa li è ka wua ntsèà a ntsèm.

²⁷Fɔ̧̀ Aglipà, mâ ye nê à bɨ̧ɨ̧ne ànəa bèndàꞋàtɔŋ Mbɔ̧ɔ̧mà e li ngua shua la.”

²⁸Fɔ̧̀ Aglipà è biite a Pɔ̂l nê, “À kwaꞋtè nê, betsiꞋa à nɨ̀ kètem àfɨ̀Ꞌ ngɨ̀ e ntsiꞋi Klɨtèn?”

²⁹Pɔ̂l bɨ̀ɨ̀lè nê, “Kò àfɨꞋa ngaa aà sàà kò aà nyɨꞋa leꞋ, ko maà ntsàꞋta a Mbɔ̧ɔ̧mà nê, tà ghɨa bɨ bòt ba bàgème njùtâ èngǎ̧ am la è tsiꞋi mbɨꞋɨ̀ màa la. Wu nê, bɔ̀ ka nkùùle awɨ̧ ane fȩtsə mbɨ̀Ꞌɨ̀ bɔ kuule am anè la a.”

³⁰AfɨꞋa mbɔŋ, Fɔ̧̀ wu, bɔ̂ gɔvanɔ̀ wu, nè Bènisì, nè bòt ko bu bàgème e lɔ̀Ꞌɔ a si.

³¹Bɔ̀ dzəè a lob və, bɔ me mua a kètsìà wɔb è shua nê, “Mbê waa bakà ghɨ ànəê àko bɔ̀ɔ bùŋe atò, kò àyea bɔ̀ɔ zǐ atò ka wuê a tèfȩ la leꞋ.”

³²Fɔ̧̀ Aglipà shu abua Festɔ̀s nê, “Mbê waa è me wu ale tà kà sɨɨbè nê, empelɔ̀ ka tàa saꞋa avi la, ko à sǎ atò.”