Read Mundani ÀfaꞋa 28 Bible Online

ÀfaꞋa 28 - Mundani bible

ÀfaꞋa 28

¹ÀfɨꞋa ba li ndzəè kà àghɨ a baãaãte wòt tè ntɨ̧ɨ̧ aguŋ la, ba zə nê èlen àlaꞋ a ngaa a kètsìà èdzî la wu Mɔɔltà.

²Bòt àlaꞋ a mbɔŋ e li ntàꞋa baãaã awa ntsɔ̧̀. Ndɨ̀ wu mbɨ̀ŋ li mbùꞋ me lu fo mè me ghɨ̀ la, bɔ tsəꞋtè èwet nɨŋ sèè àwa.

³Pɔ̂l ghɨ̀ ale, tà fete èkaꞋ èwȩ, nê ye kɨ ezǐ a èwet, me ko nyà̧kàbɔ̀ŋ dzə a èbèm, àzəꞋ a ghɨ̀ la, ndù̧ àbu atò ntsòŋa adù̧.

⁴Bòt àlaꞋ a Mɔɔltà e ye ndɨ nyà̧kàbɔ̀ŋ yu è tsoŋa ane àbu a Pɔ̂l la, me làꞋa a kètsìà wɔb shua nê, “A ghɨ̀ nà leꞋ, ko mbê waa è li te mè bùŋe wɔ̀bȩ̂. Tà mbatè mpème a *èdzî ale, ka ndɔ̀ yu bela nkuŋa tò.”

⁵Ka Pɔ̂l nyìꞋ nyà̧ yu è debe a èwet ka àghɨ à ka lem ngɨ atò.

⁶Mbɨ̀Ꞌɨ̀ tà ghɨ̀ ale la, bòt bu e me chɨ̀Ꞌɨ nê tà bele efùùla, mbə tà dèbe a si mpfə. Ka mbɨ̀Ꞌɨ̀ bɔ chɨ̀Ꞌɨ ane àfɨ̀Ꞌ à seè me ye àghɨa kàbɔ̀ŋ ko à ka ghɨ ane tò la, bɔ kubtè mèntɨ̧ɨ̧ mɔb ntsiꞋi me shu nê, “Mbê waa wu a mbɔ̧ɔ̧mà.”

⁷Wòt kǒ èlen tò li ngu Publiɔ̀s la li ngu kwàꞋ a ngèt àdziꞋa mbɔŋ, mbɔ̂ ngu fɔ̧̀ àlaꞋ a mbɔŋ. Tà li ntàꞋa sèè awa mè mbà̧à̧te awa ntsɔ̧̀, tè bà tseke mbɨ̀Ꞌɨ̀ bègɨ̧̀ tò ane èli betat.

⁸Tǎt Publiɔ̀s wu ko nê ye wu a ègwet èku̧ ngò̧ò̧nà sɔ̧̀ɔ̧̀nà nè tèlɨ̀btsə. Pɔ̂l è ghà a èbem àtsəalob tò, ntsàꞋte a Mbɔ̧ɔ̧mà, nɔ̀ŋè èbu bi adù̧ tò, mbə atò.

⁹Mbɨ̀Ꞌɨ̀ Pɔ̂l è bə wɔ̀jûŋ wu la, bòt àghɔ̧ bàgème àlaꞋ və e kɨꞋɨ̀ mɨ̧̂ tà bəè àwɔb.

¹⁰Bɔ li ntàꞋa eŋa awa èghɨ, tè è li ngu àlia baa ghà la, bɔ zì èghɨ àa tɨŋe awa a lèghȩ̀ȩ̀nè wu la a èbem ànkànuꞋ aya nê, bà nɨŋ me ghǎ.

¹¹Ba li ntsèke abàꞋ və èŋu yetat mbɔ̂ nyi a èbem taꞋà ànkànuꞋ ako a dzəa àpfəè àko è wû Àlèkzandìà la, me ghǎ. Èlen ànkànuꞋ a ngaa li ngu “Bènàmbəa bu bè wu Bɔbenyì la”, mbɔ̂ nko nê ye jɨ àbɨ̂ŋ àlaꞋ a mbɔŋ.

¹²Ba lɔ̀Ꞌɔ abàꞋ və, nyi Sìlakùs, ndì èli betat abot.

¹³Ndɔ̀Ꞌɔ abot, nga a Legiɔ̀m. ÈtsəꞋ e tsi àfeme ako a lɔ̀Ꞌ nè àtsɔꞋɔ me tsè, tê è me wu ane èli bebe ba nyi a Pùtìolì.

¹⁴Bà nyi abàꞋ və, ba ye bɔnyɨ ba ko bɔ shu abua ya nê, ba tò ba è tseke ane èli besà̧à̧mbe. Eyaa wu ndɨ ba li ngɨ̀ tè nyi a Luêm la.

¹⁵Bɔnyɨ ba a Luêm e zə, nkɨ̀Ꞌɨ̂ tè ngu a èwen Apiɔ̀s, nè adzìꞋ yu bɔ̀ɔ ntɔ nê Lobte mèlùꞋ Tetat la, nkwène ane ya. ÀfɨꞋa Pɔ̂l è ye awɔb la, tà kɔ̀ŋkè a Mbɔ̧ɔ̧mà, èntɨ̧ɨ̧ tò e mè nkwèèlê.

¹⁶Mbɨ̀Ꞌɨ̀ ba nyi a Luêm la, bɔ sa a Pɔ̂l nê, tà me tseke zìa zìa, mbɔ̂ ntsìꞋi eŋa wuê shujà wemɔ̀Ꞌ nê tà me ghȩ̀ȩ̀na mbààbe atò.

¹⁷Èli e li ntsè betat, Pɔ̂l è tɔ bɔɔjuŋ Bèjuê bu a Luêm la nê, bɔ̀ kɨꞋɨ bɔ̂ tò ba e mua. ÀfɨꞋa bɔ bù̧ù̧tè la, Pɔ̂l è shu abua yɔb nê, “Bɔnyɨ bɔ̧, e ngu wɔ̀tèfȩ bɔ li mbà̧aã am a Jèlusalèm ndzi a tèkitebu bòt Luêm la. Bɔ batè me baã am ale è nka ghɨ̀ ànəê àko ane bòt ba, è nka laꞋa kàbɔ̀ŋ ane ndɨ bɔ̀ɔ ntsèka mbɨ̀Ꞌɨ̀ bètǎt nyaꞋ ba e li sa abua ya la.

¹⁸Bòt Luêm e li mbììte am mènəè tè ntsìꞋa nkɨ esǎ am, nkàà nê bɔ li ndze nê, e mbakà ghɨ ànəa kàbɔ̀ŋ ako tè è wu àyea bɔ̀ɔ bùŋè am la.

¹⁹Ka Bèjuê e bɔ̂ me ntu̧ wuê tu̧, è shɨ̀ɨ̀bè nê, wu empelɔ̀ ka tàa saꞋa am la. Mbàtè me shɨ̀ɨ̀bè ale, è nka bɔ ànəa ko màa nɨ efɨ̧̀ɨ̧̀nè àwɔb abua empelɔ̀ la.

²⁰Eyaa wu àghɨa a ghɨ̀ ka e me kɨ eye awɨ̧ la. Bɔ me kuule am ane fȩtsə mbɨ̀Ꞌɨ̀ wɔ̀tèfȩ anè, ngua nkàà wuê ànəa wòt wu bòt Izəèlȩê e bɔ ntɨ̀ ane tò la.”

²¹Bèjuê bu e bɨ̀ɨ̀lè nê, “Ba bakà ye àkatè àko a dzə a Jùdià ane ànəê ayê la. Wanyɨ wa kǒ bakà lem ndzə abàꞋ və nè ntu̧, bà ka ye wòt kǒ tà kɨꞋɨ eshu ànəa kàbɔ̀ŋ ako àtsə ayê la.

²²Ka baa nkɨ ezə ànəa à wu a èntɨ̧ɨ̧ wê la, mbɨ̀Ꞌɨ̀ nê bòt aà ntsìà mpəəte ènɔ̧̂ bòt bu à wu bɨ tò ba la, adzìꞋ àgème.”

²³Ale, bɔ̂ Pɔ̂l ba e kàꞋà àlia, tè bòt e kɨꞋɨ kwàꞋ ànyaꞋne ane àlia mbɔŋ àdzìꞋa tàa ntsèka la. Bɔ kɨꞋɨ ale, tà bùꞋ a ntɔtetsɔ̌Ꞌ eghǎ ewu ètsəꞋ me yààte ànəa Kèfɔ̧̀ Mbɔ̧ɔ̧mà, è shua awɔb. Tà ghɨ̀ ale, tà me wȩȩte mènəè kǒ adù̧ mbɨ̧te Musì nè àkatè yu bèndàꞋàtɔŋ Mbɔ̧ɔ̧mà e li shɨŋ la shua awɔb, è nkɨ enyɔ̀Ꞌte e ghɨ̌ bòt ko ane yɔb aa zì mèntɨ̧ɨ̧ mɔb ane Yesò.

²⁴Bòt ko e zə èngǎ̧ tò wu tè mbɨ̧̀ɨ̧̀ne, ka èbeko è ka bɨ̧ɨ̧nè,

²⁵ale bɔ bùꞋ me taate, nkàànà a kètsìà wɔb. Mbɨ̀Ꞌɨ̀ bɔ̀ɔ ntààtâ la, Pɔ̂l làꞋ èngà̧ ko wemɔꞋ abua yɔb nê “Fo Kèfə li nchɨɨme ngɨ̀ Àsayà ndàꞋàtɔŋ Mbɔ̧ɔ̧mà làꞋà nkûŋ abua bètǎt nyaꞋ bɨ̧ nê:

²⁶‘Du shu abua bòt baa nê, Bɨa lâ yute, njùtê, ka bɨ̀ ka zə ànəê, Bɨa lâ ndɨ̀ŋke, ndɨ̀ŋkè, ka bɨ̀ ka ye àghɨ.

²⁷Ndɨ̀ wu bɔ̀ baka ghaꞋte mèntɨ̧ɨ̧ mɔb abua Mbɔ̧ɔ̧mà, ndììme ètû̧ bɔb, mè nkàbte àghɨ ayɔb la. A ghɨ̂ à ka wu ale, ko àghɨ ayɔb aà ndzèa èdziꞋ, ètû̧ bɔb e zəa èdziꞋ, mèntɨ̧ɨ̧ mɔb koa mènəè, bɔ kubtà, nkɨ̀Ꞌa abua am, e mbəa wɔb.’ ”

²⁸Pɔ̂l è ghɨ̀ ale, tà lìà nê, “Bɨ̀ ko nê Ntu̧ Ntsɔ̧̀ yu nàa shua ndɨ Mbɔ̧ɔ̧mà nàa tsǐ bòt a èbem kàbɔ̀ŋ wɔb la, è ghà tê ngu abua bòt kà wu Bèjuê, tè bɔ̀ɔ wu e yutè.”

²⁹[Pɔ̂l li ndàꞋ èngà̧ waa ale, Bèjuê bu e taatè me ghȩ̀ȩ̀na nkàànà ànyaꞋne a kètsìà wɔb.]

³⁰Pɔ̂l li ngɨ̀ ale me tseke wuê a èbem lob tà lè wua ntsèka ŋǎ èkab adù̧ la tè ngà ngu ane èngùꞋ yebe, sèè bòt bàgème bɔ li nkɨ̀Ꞌɨ̂ e ye atò la.

³¹Tà li ngua ndàꞋà ànəa kèfɔ̧̀ Mbɔ̧ɔ̧mà nè mènəè Yesò Klistò Lefɨ̀Ꞌ kà bɔ̀â, wòt kà mê nkèle atò.