Read Mundani ÀfaꞋa 4 Bible Online

ÀfaꞋa 4 - Mundani bible

ÀfaꞋa 4

¹Pità bɔ̂ Jɔ̌n e bela ndàꞋà abua bòt bu ale, bèntsìà mèpɨ̧̀ Mbɔ̧ɔ̧mà nè Bèsadùsiì ko, nè wòt tà wua àtsəa bèmbaabà lob nɨ̧ Mbɔ̧ɔ̧mà a Jèlusalèm la ekɨꞋɨ̀ nkwène ane yɔb.

²Bɔ kɨꞋɨ ale me tsoo ane bɔntu̧ Yesò bu babe la, nkàà nê bɔɔ ndàꞋà shu abua bòt bu nê, Yesò pfə mè njù̧ù̧mê, è wu ale bòt bàgème e wu li eyu̧u̧me mɨ̧̂.

³Ale, bɔ baãaã awɔb nɨŋ ngà nkȩ̀ tè ètsəꞋ e tsi, nkàà nê àfɨꞋa li ntàꞋa tsě.

⁴Ka bòt nyaŋ bɔ zə èngǎ̧ Pità bɔ̂ Jɔ̌n la, e zì mèntɨ̧ɨ̧ mɔb ane Yesò. Bòt bɔ zì mèntɨ̧ɨ̧ mɔb ane Yesò la e li nkwèꞋnè tè bɔ tsiꞋi mbɔ̀ŋè bètɔsì batà̧â̧.

⁵AfɨꞋa ètsəꞋ e tsi la, bɔɔjuŋ ayɔɔ bèntsìà mèpɨ̧̀ Mbɔ̧ɔ̧mà, nè bɔɔjuŋ ko, nè bènyɨꞋtà mbɨ̧te Musì, e bù̧ù̧tè a Jèlusalèm,

⁶nè Anàs wu tà wu àtsəa bèntsìà mèpɨ̧̀ Mbɔ̧ɔ̧mà la, nè Kefàs bɔ̂ Jɔ̌n, nè Àlèkzandà. Bòt ləlob àtsəa bèntsìà mèpɨ̧̀ Mbɔ̧ɔ̧mà e li ngu a si mɨ̧̂.

⁷Mbɨ̀Ꞌɨ̀ bɔ bù̧ù̧te a si la, bɔ tsia bɔntu̧ Yesò bu a mbì lɔb mbɔ̂ mbììte awɔb nê, “Bɨ ghɨ̀ na ka èka mbê wàa e lɔ̀Ꞌtè à? Bɨ bɔ kǎ mètàŋ à? Bɨ ghɨ̌ ane èlen wàà?”

⁸AfɨꞋa mbɔŋ, Fo Kèfə nyi a èntɨ̧ɨ̧ Pità, tà ŋa àbɨ̀t nê, “Bètǎt ba, nè bɔɔjuŋ ba leꞋ,

⁹Bɨ wua saꞋa awa àfɨ̀Ꞌ yaa ane ntsɔ̧̀ ba ghɨ̂ adù̧ mbê waa èka tò e li ŋɔ̀Ꞌte la, mè nè ndɨ ba bə atò la.

¹⁰Ka, bɨ bòt Izəèlȩê bàgème è ko nê, wu ane èlen Yesò Klistò wòt Nazàlet ka tà ghɨ̂ mbê waa kwèèlê ntsɔ̧̀ tè ntɨ̧ɨ̧ a mbì lɨ̧ anè la. Wu tòà wu bɨ li ngù̧ù̧te atò a mbɨ̧̀ mbasa tà pfə, ka Mbɔ̧ɔ̧mà yù̧ù̧me atò la.

¹¹Àkata Mbɔ̧ɔ̧mà a làꞋa èngǎ̧ ane Yesò nê, ‘Èti lu bɨ̀a bembɔ̧a lob è le tsi ngwàꞋ la, e tsiꞋi ngule èti tɔ̀Ꞌɔ̀ lob.’

¹²Wu ndàꞋà tòà ka tàa ŋa mèmpème kàlìà la. Mbɔ̧ɔ̧mà ŋa atò abua ya, tè èlen tsa è ka tsi nguê a èten ègwet betsiꞋa e ghɨ̀ ba bɔ mèmpème kàlìà la.”

¹³Bòt èsaꞋa bu e ye ndɨ Pità bɔ̂ Jɔ̌n e làꞋà kà bɔ̀â la, ànəa ngaa a bê ntsè àwɔb. A ghɨ̀ ale, mè ntsè àwɔb ezə nê Pità bɔ̂ Jɔ̌n wu bòt kànəè, kà lèm ndi me ghǎ àkatè. AfɨꞋa mbɔŋ bɔ ko nê Pità bɔ̂ Jɔ̌n e li ngua ngȩ̀ȩ̀nà bɔ̂ Yesò ba.

¹⁴Ka bɔ̀ ghɨ̀ ale, bɔ̀ ka tsi mbɔ ànəa bɔ̀ɔ mèe shu la, nkàà nê mbê wu bɔ bə atò la wu abot tà tɨ̧̂ bɔ̂ Pità nè Jɔ̌n la.

¹⁵Bɔ tsiꞋi shu abua yɔb nê, bɔ̀ dzəa à lob èsaꞋa yu nga àbȩ. Bɔ dzəè tê bɔ ghǎ, bòt èsaꞋa bu e bùꞋ me kwàꞋte ànəa ngaa a kètsìà wɔb.

¹⁶Waa waa tsiꞋi me biite wanyɨ vi nê, “Bàa ghɨ̀ na nè bòt baa babe la à? Wòt ègème a Jèlusalèm ŋaà è ko nê èwuu ànəê yaa kà ye fɨ̀Ꞌ la ghɨa bòt baa, tè bà ka wu tsi ko e shu ànəa tsa.

¹⁷Ka, enɨ ekele mbɨ̀Ꞌɨ̀ ànəê yaa a ghȩ̀ȩ̀ne nyaŋ, ba bɔ̂ ndɨ bàa nèète səèŋke ètû̧ bɔb mbɨ̀Ꞌɨ̀ bɔ li ane àli ako mè ndàꞋà ane èlen Yesò abua wòt la.”

¹⁸Bɔ ghɨ̀ ale, mè ntɔ awɔb a lob, shu abua yɔb nê, ko mbɨ̀Ꞌɨ̀ bɔ lɔ̀Ꞌ àlia mè ndàꞋà mènəè ane èlen Yesò abua bòt.

¹⁹Ka Pità bɔ̂ Jɔ̌n e shu abua yɔb nê, “Bɨ̀a mbɔŋ bɨ̀ kwàꞋta nê àyea ŋa àa mbɔ̀ a mbì Mbɔ̧ɔ̧mà à? Wu màndzəa abua yɨ̧, kò màndzəa abua Mbɔ̧ɔ̧mà à?

²⁰BetsiꞋa bà ka tseke kà làꞋ àghɨa bàambɔŋ e ye mè ndzə la.”

²¹Bòt èsaꞋa bu e shu awɔb nê, bɔ mè ndàꞋ ànəê ane ànəa Yesò, ko aa bɨɨ abà yɔb. Mbɨ̀Ꞌɨ̀ bɔ ŋȩte awɔb ale la, bɔ bɔ̂ sà àwɔb bɔ me ghǎ. Bɔ ghɨ̀ ale, bɔ̀ ka ye èlu̧ bɔ̀ɔ ŋa awɔb ngoꞋ la, ngu ndɨ wu waa waa nàa ngùꞋtà a Mbɔ̧ɔ̧mà ane ànəa a ghɨ̀ la.

²²Wòt wu bɔ li nɨ mètàŋ Mbɔ̧ɔ̧mà mbə atò la li ngua ntsèà èngùꞋ èghem yekwì.

²³Mbɨ̀Ꞌɨ̀ bɔ bê sà a Pità bɔ̂ Jɔ̌n la, bɔ ghà kwene ane bòt bɔb, shu awɔb ànəa bètǎt bèntsìà mèpɨ̧̀ Mbɔ̧ɔ̧mà nè bɔɔjuŋ e shu la.

²⁴AfɨꞋa bɔ zə la, bɔ̀ɔgème e fɔtè ntsàꞋtè a Mbɔ̧ɔ̧mà nê, “Mbɔ̧ɔ̧mà, wu àwɔ̀ à ghɨ̂ ègwet nè sitsǎꞋ, ngɨ̀ mèleb, nè èghɨ ègème àa tèbèm la.

²⁵À li ndzì Fo Kèfə ane tǎt nyaꞋ wa Dàbid wu tà li ngu wɔ̀fàꞋ wê la, ngɨ̀ tà nê, ‘Ghǎ li ngɨ̀ kà bòt kà wu Bèjuê e me ghèmte anè à? Ghǎ ghɨ̂ ka bòt e me kwàꞋtè mènəè àku à?

²⁶Bèfɔ̧̀ ngɔ̀ŋ ŋaa nè bòt bɔ̀ɔ mbà̧aã èlaꞋ la e li ntàŋkê mbù̧ù̧tè a si, nê bɔ kɨ tsɔꞋɔ a Tǎt wa Mbɔ̧ɔ̧mà bɔ̂ Fɔ̧̀ tò wu tà li ndzɔꞋ etsàà la.’

²⁷Ane nkûŋ, Fɔ̧̀ Elɔ̀d bɔ̂ Pontìùs Pȩlèt nè bòt kà wu Bèjuê e li ngɨ̀ tè mbù̧ù̧tè àpfəèà nɨ̧ ŋàa, bɔ̂ bòt Izəèlȩê nê, bɔ kɨ etsɔꞋɔ Ngule Waã wè wu è wu Fɔ̧̀ wu à li ndzɔꞋ ntsà la.

²⁸Bɔ li mbù̧ù̧tè eghɨ̀ àghɨa à li ndzàŋe ntàŋke nê aa li ghɨ̌ ane mètàŋ mê la. À li nkàꞋ nê aa li wu ale nkàà nê à li nkɔ̀ŋkè.

²⁹È wu ale, a Tǎt wa, ye ndɨ̀ waa bɔ kàà àwa la, è ŋa bɔfàꞋ bê mètàŋ bɔ̀ me làꞋa èngǎ̧ wè kà bɔ̀â.

³⁰Sà̧à̧mè àbu ayê mbəâ bòt, è ŋà àwa mètàŋ bà nɨ èlen Ngule Waã wè Yesò nɨŋ ngɨ̀ ngɨŋa mènəè nè tèwuute ènəê kà ye fɨ̀Ꞌ.”

³¹ÀfɨꞋa bɔ tsàꞋte a Mbɔ̧ɔ̧mà tè ndɔ̀Ꞌ la, àdziꞋa mbɔŋ a nyìꞋnè, Fo Kèfə kɨꞋɨ nyi a mèntɨ̧ɨ̧ mɔb, bɔ bùꞋ mè làꞋa èngǎ̧ Mbɔ̧ɔ̧mà kà bɔ̀â.

³²Bòt bu bɔ zì mèntɨ̧ɨ̧ mɔb ane Yesò la e li ngua fɔ̀ta ngɨ̀à àghɨ àgème nè èntɨ̧ɨ̧ wɔb wemɔꞋ. Wòt kǒ ane yɔb li tà kà shuê nê àghɨa ye bɔ la a wu abua zi zìa ndziꞋne. Waa waa li ngua ngàbtà àghɨa ye bɔ la, ŋǎ àyea wanyɨ vi.

³³Bɔntu̧ Yesò bu e li ngua ndaꞋa ane mètàŋ nê, bɔ ye mè nko nê Yesò Lefɨ̀Ꞌ è yu̧u̧mè. Mbɔ̧ɔ̧mà mè ndzì ngule èlɔ̂t vi adù̧ yɔb.

³⁴Wòt kǒ ane bòt Yesò bu li tà kà wua mbùa àghɨ. Bòt bɔ li mbɔ mbȩtsə, nè bòt bɔ li mbɔ lobtsə la, e li fɨ̧̀ɨ̧̀nè nɨ̀ èkab wu

³⁵nkɨ̀Ꞌɨ̂ nɔ̀ŋè a èten èbèm bɔntu̧ Yesò bu. Bɔntu̧ bu e ghàbtè èkab mbɔŋ abua waa waa mbɨ̀Ꞌɨ̀ tàa nkɨ̀ŋkà la.

³⁶Eyaa wu ndɨ Jòsêb wu tà li ngu wòt àndǎ̧ Levì bɔ bi atò àlaꞋ a Sȩplùs la, li ngɨ̀ la. Bɔntu̧ Yesò e li ngua ntɔ atò nê Bànabasì (ngua shua nê, “Wòt tàa ndzìà èntɨ̧ɨ̧ bɔnyɨ bi la”).

³⁷Tà li fɨ̧̀ɨ̧̀nè àdziꞋa mbȩ zi, nɨ èkab wu nkɨ̀Ꞌɨ̂ ŋǎ abua bɔntu̧ bu.