Read Mundani Lûm 1 Bible Online

Lûm 1 - Mundani bible

Lûm 1

¹Letà Pɔ̂l wɔ̀fàꞋ Yesò Klistò, Mbɔ̧ɔ̧mà lè tɔ nê tà me tsɔ̀te Ntu̧ Ntsɔ̧̀ yu è dzə abua zi la.

²Mbɔ̧ɔ̧mà li ndzaŋe kàꞋa ànəa Ntu̧ Ntsɔ̧̀ yaa, bèndàꞋàtɔŋ tò e shɨ a èbem Àkata tò.

³Ntu̧ Ntsɔ̧̀ Mbɔ̧ɔ̧mà wua ndàꞋà ànəa Waã tò wu bɔ le mbi mbɨ̀Ꞌɨ̀ wɔ̀bȩ̂ a èbem àndǎ̧ a fɔ̧̀ Dàbid la.

⁴Enɨ nyɨꞋte nê tà wu Waã Mbɔ̧ɔ̧mà, Mbɔ̧ɔ̧mà nɨ mètàŋ mi è ghe la, njù̧ù̧me atò a èbem èvə. Waã tò mbɔŋ wu Tǎt wa Yesò Klistò.

⁵Mbɔ̧ɔ̧mà li ntsè ane Yesò nɨa ntsɔ̧̀ vi ngɨ̀ am ane wantu̧ Yesò, mbɨ̀Ꞌɨ̀ maa me ghaãaã ane èlen Yesò ndàꞋà èngǎ̧ tò abua bòt èlaꞋ ègème, mbɨ̀Ꞌɨ̀ bɔɔ bɨ̧ɨ̧ne èngǎ̧ mbɔŋ, e tsiꞋi me zə wuê atò.

⁶Fɔɔle awɨ̧ wu bɨ̀ wu ayɨ̧ ayɔɔ bòt bu Mbɔ̧ɔ̧mà tɔ awɔb nê bɔ̀ wu bòt Yesò Klistò la.

⁷Tà shɨ abua bòt Mbɔ̧ɔ̧mà bu bàgème a Luêm, Mbɔ̧ɔ̧mà nàa nkɔ̀ŋkà àwɔb mè ntɔ awɔb ane bòt bi la. Maà shù̧ù̧ta Tǎt wa Mbɔ̧ɔ̧mà bɔ̂ Yesò Klistò Lefɨ̀Ꞌ nê bɔ̀ nyɨꞋte a ntsɔ̧̀ wɔb abua yɨ̧, ngɨ̀ bɨ̀ bɔ àlàŋkè a mèntɨ̧ɨ̧ mɨ̧.

⁸Maà mbɨ̌ kɔ̀ŋke a Mbɔ̧ɔ̧mà am ane èlen Yesò Klistò ane yɨ̧ bɨ̀agème, ane ndɨ bòt a èdziꞋ ègème aà ndàꞋà ndɨ bɨ zi mèntɨ̧ɨ̧ mɨ̧ ane Yesò Klistò la.

⁹Mbɔ̧ɔ̧mà wu mâ ŋa am nènkèm abua tò a mànstsɔta Ntu̧ Ntsɔ̧̀ waã tò la, è koê nê ànəa e ndàꞋà la wu nkûŋ nê, màa ngɨ̀ e me tsàꞋte atò àfɨ̀Ꞌ àgeme e me làꞋà ànəa yɨ̧ abua tò,

¹⁰è shua nê tà ghàꞋa èlu̧, ko maa yaa kɨꞋɨ àfɨ̀Ꞌ yaa e ye awɨ̧.

¹¹Maa ndâ nkɨ e kɨꞋɨ ye awɨ̧ mbɨ̀Ꞌɨ̀ nyɨꞋte awɨ̧ mènəè Mbɔ̧ɔ̧mà kǒ, bɨa me kweele ane èntɨ̧ɨ̧ wɨ̧ wu bɨ zi ane Yesò la.

¹²E nkɨ kɨꞋɨ e ye awɨ̧ mbɨ̀Ꞌɨ̀ èntɨ̧ɨ̧ wɨ̧ wu bɨ zi ane Yesò la aa zǐ èntɨ̧ɨ̧ am, è wɔ̧ wu ane tò la aa zǐ mèntɨ̧ɨ̧ mɨ̧.

¹³Bɔnyɨ bɔ̧, bɨ̀ ko nê mâ taŋke ngò̧ nyaŋ nê e nkɨ kɨꞋɨ e ye awɨ̧ (ka àghɨa ko a kele am e kɨꞋɨ e dzə àfɨ̀Ꞌ yaa). E nkɨ kɨꞋɨ mbɨ̀Ꞌɨ̀ ghɨ̌ bòt ko aa zì mèntɨ̧ɨ̧ mɔb ane Yesò, mbɨ̀Ꞌɨ̀ mâ ghɨ̌ ayɔɔ bòt kà wu Bèjuê a èdzìꞋ èko la.

¹⁴Eyaa wu àfaꞋa mâ bɔ ndɨ màa faꞋa abua bòt bàgème la. Abua bòt àghɨ ayɔb a ghaꞋa la, nè èbe kà ayɔb a ghaꞋà, nè bòt bɔ ko àkatè la, nè èbe kà koê.

¹⁵Eyaa wu lə màa ndâ nkɨ tsɔ̀te Ntu̧ Ntsɔ̧̀ yaa mɨ̧̂ abua yɨ̧ wu a Luêm la.

¹⁶Maà kà bɔ àtsəa kɔꞋɔ a ane Ntu̧ Ntsɔ̧̀ Mbɔ̧ɔ̧mà, nkàà nê, wu mètàŋ Mbɔ̧ɔ̧mà màa nɨa ntsɔ̀tà Ntu̧ Ntsɔ̧̀ yu nàa ngɨ̀à waa waa tà zi èntɨ̧ɨ̧ vi ane Yesò la peme la, ebùꞋu ane Bèjuê bu èngǎ̧ mbɔŋ e li mbɨ̀ abua yɔb la, eghǎ wu ane bòt kà wu Bèjuê.

¹⁷Ntu̧ Ntsɔ̧̀ Mbɔ̧ɔ̧mà nàà nyɨ̀Ꞌta ndɨ Mbɔ̧ɔ̧mà nàa nɨa wòt mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, è wu wòt wu tà zi èntɨ̧ɨ̧ vi ane waã tò Yesò Klistò tè èlu̧ tsa è ka tsi ngu la. Bɔ shɨ a èbem Àkata Mbɔ̧ɔ̧mà nê, “Wòt tà zi èntɨ̧ɨ̧ vi ane Mbɔ̧ɔ̧mà, tè Mbɔ̧ɔ̧mà nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, naa li wu ane àlia nè àlia.”

¹⁸Mbɔ̧ɔ̧mà è tse a ègwet me nyɨꞋte ndɨ yèa ntsòa ane bòt bàgème bɔ tu̧u̧ zə atò, me ghɨ wuê kàbɔ̀ŋ, tè kàbɔ̀ŋ mbɔŋ kele bòt, bɔ̀ ka tsi nko nkûŋ la.

¹⁹BetsiꞋa waa waa ko àghɨa Mbɔ̧ɔ̧mà wu yùà la, ndɨ̀ wu Mbɔ̧ɔ̧mà zìambɔŋ è nyɨꞋte abua yɔb la.

²⁰EbuꞋu tea àfɨꞋa Mbɔ̧ɔ̧mà li ngɨ̀ ngɔ̀ŋ la, tàa ngɨ̀à àfɨ̀Ꞌ àgème bòt e yea nê tà wu Mbɔ̧ɔ̧mà, mè ndzea nê mètàŋ tò nàa kà lìà. Bɔ li ngu ko ye nê tàa və ane èghɨ tà ghɨ̀ la. Ale, àghɨa ko bɔ̀ɔ mě nɨ ghɨ̌ te gha àku la a ntsě.

²¹Bɔ li mbàte nko nê Mbɔ̧ɔ̧mà nàà və, ka bɔ̀ ka ŋa kènuke abua tò mbɨ̀Ꞌɨ̀ Mbɔ̧ɔ̧mà, bɔ̀ ka mě nkɔ̀ŋkè atò ane àghɨa tà ghɨ̀ la. Ale, mèmɨ̀ɨ̀te mɔb è tsìꞋi àku, bɔ̀ ka meè nko àghɨa Mbɔ̧ɔ̧mà li ngua nkɨa nê bɔ̀ ko la.

²²Bɔ batè me tseka shua nê bɔ wu bòt èyì, ka mbɔ̂ ntsìꞋi èkèghɨ̧̀.

²³Bɔ sà ènɨ̧ Mbɔ̧ɔ̧mà wu tà wu ane àlia nè àlia la, ntsiꞋi me kukte wuê èghɨ bɔ̀ ghɨ̀ e efəə wɔ̀bȩ̂ nè banyaãbàꞋ, mèè nè banyà̧ bèa ntsèka e a èbem mèleb mè ntsèka aguŋ la.

²⁴Mbɔ̧ɔ̧mà ye ale, sà àwɔb nê bɔ̀ me ghɨ̌ èbɨꞋte èghɨ bu bɔ zì mèntɨ̧ɨ̧ mɔb adù̧ la, bɔ tsiꞋa ngɨ̀à mènəè àtsəa kɔꞋɔ a kètsìà wɔb bɔ̀ɔmbɔŋ.

²⁵Mbɔ̧ɔ̧mà li ngɨ̀ anè nkàà nê bɔ waꞋa nkûŋ yu ane Mbɔ̧ɔ̧mà la, ntsiꞋi me kùŋè àghɨa àfɨte. Nko nê bɔ sa a Mbɔ̧ɔ̧mà wu tà ghɨ àghɨ àgème la, ntsiꞋi me kukte èghɨ bu tà ghɨ̀ la, bɔ wu me wùꞋtè wuê a Mbɔ̧ɔ̧mà wu tà wu ane àlia nè àlia la. Àmèn.

²⁶Àyaa a ghɨ̀ Mbɔ̧ɔ̧mà sà àwɔb nè bɔ̀ me ghɨ̀ wuê èbɨꞋte èghɨ bu àa ŋa àtsəa kɔꞋɔ bɔ zì mèntɨ̧ɨ̧ mɔb adù̧ la. Bèzi bɔb e sà mbâ̧tsə ntsìꞋa nɔ̀ŋkà nè bèzi ko.

²⁷Mbâ̧tsə te me ghɨ̀ wuê a èlɨ̀ mbɔŋ mɨ̧̂, sà bèzi ntsìꞋa nkɨà wuê mbâ̧ tè ko, ngɨ̀à mènəè àtsəa kɔꞋɔ, nɔ̀ŋkà nè mbâ̧ tè ko. Mbɨ̀Ꞌɨ̀ bɔ̀ɔ ngɨ̀à ale la, Mbɔ̧ɔ̧mà me zì àwɔb a èbem ngoꞋ è wu àbȩ̀ àfaꞋa kàbɔ̀ŋ yɔb la.

²⁸Ndɨ̀ wu bòt mbɔŋ e tu̧u̧ zì mèntɨ̧ɨ̧ mɔb ane mènəè nkûŋ mu nàa nyɨ̀Ꞌta wòt Mbɔ̧ɔ̧mà wu wùà la, Mbɔ̧ɔ̧mà sà àwɔb bɔ tsiꞋi zì mèntɨ̧ɨ̧ mɔb ane èbɨꞋte èghɨ àa ŋa àtsəa kɔꞋɔ la.

²⁹Ale, mèntɨ̧ɨ̧ mɔb lu̧u̧ ne tèwuute èbɨꞋte ènəê ègème, kàbɔ̀ŋ nè mànkɨa nè èghɨ bòt tsa e wu tsiꞋi bɔb, mè nè màmɨɨta wuê a kàbɔ̀ŋ ane bòt ko. Mèntɨ̧ɨ̧ mɔb è lu̧u̧ ne ghòꞋnà, bɔ mè ngu bèlɨ̧̀, me tseka nùà bòt, fɨ̀ta bòt, mɨ̀ɨ̀tà wua kàbɔ̀ŋ ane bòt, ndàꞋa kàbɔ̀ŋ ane tèlente bòt.

³⁰Ntsòkà tèlente bòt, mpààbà a Mbɔ̧ɔ̧mà, ntsò̧ò̧tà bòt, ŋèꞋa tèkwȩ tɔb a ègwet, shua nê bɔ ghe. Bɔ mè me ntsèka mɨ̀ɨ̀tà wuê balu̧ fi a màngɨa kàbɔ̀ŋ, bɔ̀ ka wua ndzəa bètǎt bɔb bɔ̂ bènyɨ̌ bɔb.

³¹Bɔɔ ngɨ̀à mbɨ̀Ꞌɨ̀ èkèghɨ̧̀, bɔ̀ ka wua shua ànəê, ngɨ̀à a èlɨ mbɔŋ, mè me ghɨ̧̀ɨ̧̀ne bòt kà wua nkua tèsȩ.

³²Bɔ batè nko ànəa Mbɔ̧ɔ̧mà shu la nê bɔ bɔ̂ ndɨ bɔ̀ɔ bùŋe bòt bɔ̀ɔ ngɨ̀à èwuu èghɨ mbɔŋ la, ka bɔ̀ wua ngɨ̀à wuê ndàꞋà bùà, bɔ me wùꞋta fɔ̀ɔ̀la bòt bu bɔ̀ɔ ngɨ̀à èwuu èghɨ mbɔŋ la mɨ̧̂.