Read Mundani Lûm 10 Bible Online

Lûm 10 - Mundani bible

Lûm 10

¹Bɔnyɨ bɔ̧, àghɨa èntɨ̧ɨ̧ am àa nkɨà la, nè àtsàꞋtè am abua Mbɔ̧ɔ̧mà wu nê bòt bɔ̧ bòt Izəèlȩê e wu bɔ mèmpème.

²BetsiꞋa e ndàꞋa nkûŋ ane ànəa yɔb nê bɔ batè ndâ mbɔ̂ èntɨ̧ɨ̧ a mànkuŋa Mbɔ̧ɔ̧mà, ka bɔ̀ ka ko ntsɔ̧̀ ndɨ bɔ wu me kùŋe atò la.

³Ndɨ̀ wu bɔ li bɔ̀ ka ko ntsɔ̧̀ ndɨ Mbɔ̧ɔ̧mà nàa nɨa wòt mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, mè ntsiꞋi me kɨ wuê wɔb ne alu̧ la, a ghɨ̀ bɔ̀ ka bɨ̧ɨ̧nè ane we ne alu̧ Mbɔ̧ɔ̧mà wu tàa nɨa bòt mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li la.

⁴Yesò Klistò li nkɨ̀Ꞌɨ̂ ale, àfaꞋa mbɨ̧ à ka tsi nguê, mbɨ̀Ꞌɨ̀ naa tsiꞋi wòt ègème tà zi èntɨ̧ɨ̧ vi ane Yesò Klistò la, ka Mbɔ̧ɔ̧mà nàa nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la.

⁵Musì shɨŋ nê wòt tàa ngɨ̀à àghɨ àgème mbɨ̧ nàa shua la naa li peme nkàà yùà.

⁶Ka è wu ànəa wòt nàa zi èntɨ̧ɨ̧ vi ane Yesò ka Mbɔ̧ɔ̧mà naa nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, ko “Wòt bakà bɔ ndɨ tàa shu a èntɨ̧ɨ̧ vi nê, ‘Wàa nàa kɔꞋɔ èghǎ ègwet à?’ ” (Ngua shua nê e ghǎ nɨa Yesò Klistò e chu a si leꞋ.)

⁷“À ka mè shu nê, ‘Wàa nàa chu ghǎ a èbem si à?’ ” (Ngua shua nê eghǎ tsi a Yesò Klistò ayɔɔ bèmpfəà enɨ kɔꞋɔ leꞋ.)

⁸Ànəa e shua la wu nê, “Èngǎ̧ Mbɔ̧ɔ̧mà e wu à ngèt yè, ngu a ètsəê wê, mè ngu a èntɨ̧ɨ̧ wê.” Wu èngǎ̧ wu bàa ntsɔ̀tà nê bɨ̀ zi mèntɨ̧ɨ̧ mɨ̧ ane Yesò Klistò la.

⁹À shua ane ètsəê wê nê, “Yesò wu Lefɨ̀Ꞌ,” mè mbɨ̧̀ɨ̧̀ne a èntɨ̧ɨ̧ wê nê Mbɔ̧ɔ̧mà li njù̧ù̧me a Yesò a èbem èvə, ko aa bɔ mèmpème.

¹⁰Wòt nàa ngɨ̀ tà bɨ̧ɨ̧ne a èntɨ̧ɨ̧ vi, Mbɔ̧ɔ̧mà nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, wòt mee tà làꞋa ane ètsəê vi, tà bɔ̀ mèmpème.

¹¹Èngǎ̧ Mbɔ̧ɔ̧mà e laꞋnê, “Wòt ègème tà zi èntɨ̧ɨ̧ vi ane tò la ka li sà̧à̧tè a.”

¹²Bèjuê nè bòt kà wu Bèjuê e wu àghɨ yeamɔꞋ a mbì Mbɔ̧ɔ̧mà, ndɨ̀ wu tà wu Tǎt bòt bàgème, mè me lâ ndɔ̀ɔ̀là bòt bu bàgème bɔ̀ɔ ntɔ atò la.

¹³Àkata Mbɔ̧ɔ̧mà a laꞋnê, “Wòt ègème tà tɔ èlen Mbɔ̧ɔ̧mà la, nàa peme.”

¹⁴Bòt àa tɔ atò nǎ kà zì mèntɨ̧ɨ̧ mɔb ane tò à? Bɔ mè ngu zì mèntɨ̧ɨ̧ mɔb ane tò na kà zə ànəa tò à? Bɔ̀ɔ zə na kà ye wòt tà tsɔ̀te èngǎ̧ Mbɔ̧ɔ̧mà abua yɔb la à?

¹⁵Wòt nàa mě tsɔ̀te èngǎ̧ Mbɔ̧ɔ̧mà na kà bɔ tu̧u̧ atò à? A wu mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Wu kwàꞋ ànəa ntsɔ̧̀ e ye bòt bu bɔ̀ɔ nɨa Ntu̧ Ntsɔ̧̀ nkɨ̀Ꞌa la.”

¹⁶Ka bɔ̀ɔ àgème e bakà bɨ̧ɨ̧ne ànəa Ntu̧ Ntsɔ̧̀ Mbɔ̧ɔ̧mà e shu la, wuê mbɨ̀Ꞌɨ̀ Àsayà shu la nê, “Tê, wòt wu tà bɨ̧ɨ̧ne ànəa bàa shu la wu wàà?”

¹⁷Ale, wòt nàa ngɨ̀ tà zə èngà̧, ka tà zì èntɨ̧ɨ̧ vi ane Mbɔ̧ɔ̧mà, èngǎ̧ mbɔŋ wòt zə la, wu èngǎ̧ bɔ̀ɔ ntsɔ̀tà ane ànəa Yesò Klistò la.

¹⁸Ka tsiꞋ è mbììtè nê tè bɔ bakà zəəè? Ane nkûŋ, bɔ zə, nkàà nê Àkata Mbɔ̧ɔ̧mà a laꞋnê, “Ànəa bɔ̀ làꞋà la, a gha a èdziꞋ ègème a sitsǎꞋ, Mèngǎ̧ mɔb mè nga a bètɔ̀Ꞌa ngɔ̀ŋ bàgème.”

¹⁹TsiꞋ è mě mbììte nê: Te bòt Izəèlȩê e li bɔ̀ ka koê? Musì li mbɨ̀ mbɨ̀ɨ̀lè èngà̧ waa nê, “Maa ghɨ̌ bɨa me ghɔ̧̀ɔ̧̀ne a mèntɨ̧ɨ̧ mɨ̧ nkàà bòt kà bê nkùꞋ èbe bɔ̀ɔ wu àlaꞋ la, Mè ngu ghɨ̌ bɨa me tsoo nkàà bòt bɨa mɨ̀ɨ̀tà nê wu èkèghɨ̧̀ la.”

²⁰Àsayà li mbɔ èntɨ̧ɨ̧ kekweelè a màndaꞋa azi nê, Mbɔ̧ɔ̧mà li nê, “Bòt bɔ li bɔ̀ ka kɨ am la e li ndze am, Mâ nyɨꞋte am abua bòt bu bɔ̀ le kaꞋa biite am la.”

²¹Mbɔ̂ ngà ane ànəa bòt Izəèlȩê nê, “Maà shù̧ù̧ta bòt bɔ̧ àlia àgème nê bɔ̀ kɨꞋɨ bàà ghɨ̌ àlàŋkè, ka bɔ wu bòt àtsəa kekweelè, bɔ̀ ka wua nkɨ e zə èngǎ̧ am.”