Read Mundani Lûm 11 Bible Online

Lûm 11 - Mundani bible

Lûm 11

¹Ale, tsiꞋ è mbììte nê: Tè Mbɔ̧ɔ̧mà waꞋa bòt bi? ChaꞋ, ta bakà waꞋa awɔb. Mmɔ̌ mbɔŋ e ngu wòt Izəèlȩê, wòt àndǎ̧ Abàlàghâm, mâ dzəa a ləlob Benjamèn la.

²Mbɔ̧ɔ̧mà bakà waꞋa bòt bi bu tà li mbèle àfɨꞋa tsa ndà la. Bɨ bakà ko ànəa Àkata Mbɔ̧ɔ̧mà a shu ane ànəa Èlȩjà li ndàꞋ ane ànəa kàbɔ̀ŋ bòt Izəèlȩê abua Mbɔ̧ɔ̧mà la à?

³Tà li nê, “Tê, bɔ bùŋè bèndàꞋàtɔŋ bê, ntsòkè èdziꞋi bu bɔ̀ɔ ntò̧à èghɨ ŋa abua yê la, tè è tsìꞋi wuê ndàꞋà mmɔ̌, bɔ bɔ̂ me kɨa am e bùŋe.”

⁴Mbɔ̧ɔ̧mà li ŋa àbɨ̀t nê ghàà? Tà li nê, “Mâ nɔ̀ŋe bòt abua am bètɔsì basà̧à̧mbe bɔ̀ baka wùꞋte a Baàl la.” [2]

⁵Wu wuê ndɨ bòt ko àa àfɨ̀Ꞌ yaa Mbɔ̧ɔ̧mà nɨa ntsɔ̧̀ vi ndà àwɔb nɔ̀ŋè abua zi la.

⁶È wû ntsɔ̧̀ tò ka tà nɨŋ ndà àwɔb la, ko è te ntsě ànəa àfaꞋa ntsɔ̧̀. Tà li ngɨ̀ ale ngua ndàà àwɔb nkàà àfaꞋa ntsɔ̧̀ àyɔb, ko ntsɔ̧̀ tò wu te ntsě ntsɔ̧̀.

⁷Ale, bòt Izəèlȩê è le kaꞋa bɔ àghɨa bɔ li ngua nkɨà la. Wu bòt bu tà li ndà la ka bɔ li mbɔŋ la, ka èbeko nè bòt bàgème e me kweele àtsə.

⁸A li ngu mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Mbɔ̧ɔ̧mà li ngɨ̀ bɔ tsiꞋi mbɨ̀Ꞌɨ̀ bòt kà ko èdziꞋ, Mbɔ̀ àghɨ a àa ka ye èdziꞋ la, nè ètû̧ àa ka zə èdziꞋ la, e kɨꞋɨ dzəè laane.”

⁹Fɔ̧̀ Dàbid mè ndàꞋ àzi nê, “Màa ntsàꞋta Mbɔ̧ɔ̧mà nê, tà ghɨa mèpà̧ mɔb è wu mbɨ̀Ꞌɨ̀ àtaã bɔ̀ɔ kwene a èbèm la. Nê tà ghɨa bɔ̀ kwen, mè ndze ngoꞋ,

¹⁰Nê tà ghɨa àghɨ ayɔb à lem tè bɔ̀ ka te ndze èdziꞋ, mè ngɨ̀ kwèn tɔb tè ŋɔꞋte tê tè ka tsi ndi ndɔ̀Ꞌtè.”

¹¹Ale, mâ biite nê bɔ sèmnè ale mbɨ̀Ꞌɨ̀ kwene te li tseke ka tsi ndɔ̀Ꞌ? A ntsě a èlɨ mbɔŋ. Bɔ li ngɨ̀a kàbɔ̀ŋ ale, è ghaꞋa èlu̧ abua bòt kà wu Bèjuê bɔ̀ɔ bɔ mèmpème, mbɨ̀Ꞌɨ̀ e ghɨ̌ bòt Izəèlȩê aa me ghòꞋnè àwɔb.

¹²Bòt Izəèlȩê e li ngɨ̀ a kàbɔ̀ŋ è ghɨ̌ bòt ngɔ̀ŋ e bɔ èghɨ ntsɔ̧̀ nyaŋ. Ndɨ̀ wu bɔ li bɔ̀ ka ghɨ̂ mbɨ̀Ꞌɨ̀ Mbɔ̧ɔ̧mà kɨa la, a mè ngɨ̀ bòt kà wu Bèjuê e bɔ èghɨ ntsɔ̧̀ nyaŋ. A wu wu anè ko èghɨ ntsɔ̧̀ bu aa paa ghe, àfɨꞋa bòt Izəèlȩê bu bàgème àa paa me zə a Mbɔ̧ɔ̧mà la.

¹³E ntsiꞋa ndàꞋa abua yɨ̧ bɨ̀a bòt kà wu bòt Izəèlȩê àfɨ̀Ꞌ yaa. Maa me ghàꞋtè am ane àfàꞋa am mbɨ̀Ꞌɨ̀ è ngu wantu̧ Yesò abua bòt kà wu bòt Izəèlȩê la,

¹⁴mbɨ̀Ꞌɨ̀ à wu zìa ghòꞋnà a mèntɨ̧ɨ̧ Bèjuê, e ghɨ̌ àbəèꞋ àyɔb aa peme.

¹⁵Mbɔ̧ɔ̧mà wu tu̧u̧ bòt Izəèlȩê aa ghɨ̌ bòt èlaꞋ ko tsa ègème aa bɔ àlàŋkè nè tò, ko àfɨꞋa Mbɔ̧ɔ̧mà nɨ awɔb la, à ka wu mbɨꞋɨ̀ bèmpfəà be yu̧u̧me la a?

¹⁶Kèpȩ bled mbì è wu èfe Mbɔ̧ɔ̧mà, ko bled mbɔŋ nènkèm wu we tò mɨ̧̂. Bɔ mè ngu ŋa tèghaŋke àyɨt abua Mbɔ̧ɔ̧mà, ko mèntaãaã wu abua tò mɨ̧̂.

¹⁷Bɔ loote mèntaãaã kǒ ane àyɨt olìf yu bɔ liꞋi la, nɨ mèntaãaã àyɨt olìf èbemebàꞋ nkɨ̀Ꞌɨ̀ ndzì abot. Bɨ̀a bòt kà wu bòt Izəèlȩê aa mbɨ̀Ꞌɨ̀ mèntaãaã àyɨt olìf èbemebàꞋ yu, njɨ̀a àbȩ̀ èghɨ ntsɔ̧̀ bòt Izəèlȩê.

¹⁸È wu ale, bɨ̀ ka me ŋeꞋe tèkwȩ tɨ̧ a ègwet shua nê bɨ tsě bòt Izəèlȩê bu bɔ li ndòòte àwɔb mbɨ̀Ꞌɨ̀ mèntaãaã la. Bɨ me shu nê bɨ tsè àwɔb, bɨ ko nê ntsě bɨ̀a mèntaãaã ka ntɔ̀kà tèghaŋtsə la, wu tèghaŋtsə ka ntɔ̀kà àwɨ̧ la.

¹⁹Wòt kǒ nàa laꞋ nê, “Bɔ li ndòòte mèntaãaã mbɨ̀Ꞌɨ̀ nɨ am e zì abot.”

²⁰Àyea mbɔŋ wu nkûŋ. Bɔ li ndòòte àwɔb ndɨ̀ wu bɔ li bɔ̀ ka zǐ èntɨ̧ɨ̧ wɔb ane Yesò la, ka bɔ zì àwɨ̧ a mbɨ̧̀ àyɨt yu nkàà mèntɨ̧ɨ̧ mɨ̧ mu bɨ zi ane Yesò la. Ale, bɨ̀ ka me ŋeꞋe tèkwȩ tɨ̧ a ègwet, bɨ̀ me ko awɨ̧ mbɨ̀Ꞌɨ̀ bɔ tsì àwɨ̧.

²¹È wu nê Mbɔ̧ɔ̧mà lè kaꞋa sâ Bèjuê bu bɔ̀ wu mbɨ̀Ꞌɨ̀ mèntaãaã àyɨt lèkɔꞋasi la, ko tà ka bê sà àwɨ̧ a.

²²Baa ye àdziꞋ yaa ndɨ Mbɔ̧ɔ̧mà nàa ngɨ̀a ntsɔ̧̀ la, mè nè ndɨ tàa ngòꞋtà ane èsaꞋa vi la. Tàa ngòꞋtà adù̧ bòt bu bɔ ghɨa kàbɔ̀ŋ la, mbɔ̂ me ghɨa ntsɔ̧̀ abua yɨ̧ na bɨ wu mbɨ̀Ꞌɨ̀ tà kɨa la. Bɨ bakà ghɨ ale, ko taa loo awɨ̧ ewaꞋa mɨ̧̂.

²³Mbɔ̂ bòt Izəèlȩê e wu kubte e zì mèntɨ̧ɨ̧ mɔb ane Yesò, ko taa nɨ awɔb e zǐ adzìꞋa bɔ li ndzaã nguê la, nkàà nê tà bɔ mètàŋ e mě zì àwɔb abot.

²⁴Bɨ̀a bòt kà wu Bèjuê aa mbɨ̀Ꞌɨ̀ èntaãaã olìf èbemebàꞋ bɔ loo ngà ndzì adù̧ àyɨt olìf bɔ liꞋ la, è wu àghɨa a ghɨ̂ à ka wuê wu ale la. Bèjuê beà mbɨ̀Ꞌɨ̀ mèntaãaã àyɨt yaa bɔ liꞋi la, ale a wu me yu abua Mbɔ̧ɔ̧mà e nɨ mèntaãaã àyɨt a mbɔŋ bɔ yaã ndòòte la e kɨꞋɨ zǐ adzìꞋ azi.

²⁵Bɔnyɨ bɔ̧, ànəa ndò̧ àko aa və màa nkɨà bɨa ko la, mbɨ̀Ꞌɨ̀ bɨa baka wua mɨ̀ɨ̀tà nê bɨ ko nyaŋ. Ànəa mbɔŋ wu nê, àtsəa kekweelè Bèjuê à ka li wu àfɨ̀Ꞌ àgème a. Aa li lìa àfɨꞋa kèmpà̧ bòt kà wu Bèjuê bu Mbɔ̧ɔ̧mà làà àwɔb la, è kùꞋù la.

²⁶Ale, bòt Izəèlȩê bàgème aa li peme. A wu mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Wòt tàa ghɨ̌ bòt aa peme la naa dzə a Zayɔ̀n, tàa tsi èbɨꞋte èghɨ ègème àndǎ̧ Jàkɔ̂b.

²⁷Eyaa wu mènkàꞋa kèkweelè màa ghɨ̀ baà tò ba àfɨꞋa màa waꞋa bèkàbɔ̀ŋ bɔb la.”

²⁸Ndɨ̀ wu bɔ tu̧u̧ Ntu̧ Ntsɔ̧̀ Yesò Klistò la, bɔ tsiꞋi bɔmbù̧ Mbɔ̧ɔ̧mà ambo yɨ̧. Ka è me wu mbɨ̀Ꞌɨ̀ Mbɔ̧ɔ̧mà li ndàà awɔb la, ko tà bèla kɔ̀ŋkà àwɔb nkàà àghɨa tà li nkàꞋ bètǎt nyaꞋ bɔb la.

²⁹Aa ale nkàà nê Mbɔ̧ɔ̧mà nàa ngɨ̀ tà ŋa àghɨ abua wòt, kò ntɔ a ŋut leꞋ, tà ka tsi nkùbte èntɨ̧ɨ̧ vi.

³⁰Bɨ̀a bòt kà wu Bèjuê è le kaꞋa wua ndzəa Mbɔ̧ɔ̧mà, ka àfɨ̀Ꞌ yaa tà ku tèsȩ tɨ̧, ndɨ̀ wu Bèjuê àa ka zə atò la.

³¹Ale, bɔ tsiꞋa nkwèèla àtsə abua Mbɔ̧ɔ̧mà àfɨ̀Ꞌ yaa mɨ̧̂, mbɨ̀Ꞌɨ̀ taa ku tèsȩ tɔb wuê mbɨ̀Ꞌɨ̀ tà li nkù tɨ̧ la.

³²Mbɔ̧ɔ̧mà sa bòt bàgème nê bɔ̀ me kweele àtsə, mbɨ̀Ꞌɨ̀ taa ku tèsȩ tɔb.

³³Bɨ̀ ye ndɨ ènɨ̧ Mbɔ̧ɔ̧mà e ghe la! Tà taꞋa bɔ èyì, mè nko mènəè ègème! Wòt wu betsiꞋa tà ko ndɨ tàa ngɨ̀à mènəè mi la wu wàà? BetsiꞋa wàa ko balu̧ tò à?

³⁴Àyaa aa mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Wàa ko àghɨa àa èntɨ̧ɨ̧ Mbɔ̧ɔ̧mà la à? Wòt wu betsiꞋa tà kɨ̀ɨ̀te atò la wu wàà?

³⁵Wòt wu tà li mè ŋa àghɨ abua tò, mbɨꞋɨ̀ Mbɔ̧ɔ̧mà wu naa ŋa àghɨa ko abua tò la wu wàà?”

³⁶Èghɨ ègème e li ngu nkàà mètàŋ tò, èghɨ ègème e mè ngu nkàà atò, mè ngu abua tò. TsiꞋ mèngùꞋte wu abua Mbɔ̧ɔ̧mà ane àlia nè àlia. Àmèn.