Read Mundani Lûm 12 Bible Online

Lûm 12 - Mundani bible

Lûm 12

¹Ale, bɔnyɨ bɔ̧, màa shù̧ù̧ta wɨ̧ nê ndɨ̀ wu Mbɔ̧ɔ̧mà ku tèsȩ tɨ̧ la, bɨ̀ ŋa awɨ̧ abua Mbɔ̧ɔ̧mà mbɨ̀Ꞌɨ̀ nkɔ̀Ꞌ èpɨ̧̀, àghɨa èpɨ̧̀ à wu yu̧, bɔ ŋa abua Mbɔ̧ɔ̧mà nènkèm àa mbɔ̌ atò la. Eyaa lâ ngu èlɨ wòt bɔ ndɨ tàa me wùꞋte a Mbɔ̧ɔ̧mà la.

²Bɨ̀ ka me fɨŋe bòt ngɔ̀ŋ ngɨ̀à èghɨ bɔ̀ɔ ngɨ̀à la, ka tsiꞋ mèmɨ̀ɨ̀te fi mɨ̧ kubte mènəè mɨ̧. Bɨ ghɨ̀ ale, ko bɨa me ghɨ̀ àghɨa Mbɔ̧ɔ̧mà nàa nkɔ̀ŋkà la, è wù àghɨa è wu àyea ntsɔ̧̀ la, nè àyea àa mbɔ̀ atò la, mè nè àyea a lâ nkùꞋu a mbì tò la.

³E ngua ndàꞋà ane àtɔŋ yu Mbɔ̧ɔ̧mà ŋa abua am mbɨ̀Ꞌɨ̀ wantu̧ Yesò nkàà ntsɔ̧̀ vi la shua abua wòt ègème ane yɨ̧ nê, wòt ka mɨ̀ɨ̀te nê ye wu àghɨa kà wu yùà. Ka wòt ègème me nɨ avi mbɨ̀Ꞌɨ̀ tàa la, nkoa è vi ne èghab Mbɔ̧ɔ̧mà è ŋa ndɨ̀ wu tà zi èntɨ̧ɨ̧ vi ane Yesò Klistò la.

⁴Baa bɔ mbɨ̧̀ ènyit yemɔ̀Ꞌ nè èdziꞋ nyaŋ, àdziꞋ àgème a bɔ mbɔ̌ àfàꞋ àzi.

⁵Eyaa wu ndɨ bàa batè ngu nyaŋ ale, ka ngu mbɨ̧̀ ènyit yemɔ̀Ꞌ ndɨ̀ wu bàa tsiꞋi àghɨ yeamɔꞋ nè Yesò Klistò la, mè fɔte nè bɔnyɨ ba mbɨ̀Ꞌɨ̀ èdziꞋ tsa tsa ane mbɨ̧̀ ènyit yemɔ̀Ꞌ la.

⁶Ale, bàà me nɨ mèghàb mu tsa tsa Mbɔ̧ɔ̧mà nɨa ntsɔ̧̀ vi ŋa abua ya la fàꞋà. Èwe wòt nè èghàb è wu màndaꞋa àtɔŋ Mbɔ̧ɔ̧mà, tà me làꞋa ane èlɨ tà ko nê Mbɔ̧ɔ̧mà shu avi la.

⁷È wu a màfaꞋa abua bòt ko, tà fàꞋ, è wu mànyɨꞋta, tà nyɨ̀Ꞌtê.

⁸Wòt èwe tò nè èghàb wu màndzìa mèntɨ̧ɨ̧ bòt la, tà me zǐ, wòt èwe tò wu màŋa èghɨ abua bòt la, tà me ŋa ka kuule abua. Wòt tà wu àtsə bòt la, me fàꞋa ntsɔ̧̀, wòt tàa ngɨa ntsɔ̧̀ la me ghɨ nê àŋwàŋne.

⁹Bɨ̀ me kɔ̀ŋkè bòt nè nkûŋ, mpààbà àghɨa àa kàbɔ̀ŋ la, mbà̧aã àghɨa àa mbɔ̀ la ntsɔ̧̀.

¹⁰Bɨ̀ me kɔ̀ŋkè bɔnyɨ bɨ̧ nɨa ngà nè mbì nè èntɨ̧ɨ̧ wɨ̧ ègème, mè ngu bòt mbì a mànkukta bɔnyɨ bɨ̧.

¹¹Bɨ̀ ka me lȩ̀ȩ̀te ane àfàꞋ àyɨ̧ ane Mbɔ̧ɔ̧mà, bɨ̀ me fàꞋa ntsɔ̧̀ abua tò nè èntɨ̧ɨ̧ wɨ̧ ègème.

¹²Bɨ̀ me wùꞋtè àwɨ̧ mbɨ̀Ꞌɨ̀ bɨ̀a nchɨ̀Ꞌà àghɨ yu Mbɔ̧ɔ̧mà nàa ghɨ̌ ane yɨ̧ la, nkùùla mèntɨ̧ɨ̧ mɨ̧ a èbem ngoꞋ, mè ntsàꞋta Mbɔ̧ɔ̧mà kà kaã.

¹³Bɨ̀ me tɨŋe bòt Mbɔ̧ɔ̧mà bu bɔ̀ɔ nkɨ̀ŋkà la, mè me sèè bègɨ̧̀.

¹⁴Bɨ̀ me shu nê Mbɔ̧ɔ̧mà lɔ̀ɔ̀le bòt bu bɔ̀ɔ nkɨà àtsəa yɨ̧ enɨ la, bɨ̀ me shu nê tà lɔ̀ɔ̀lè àwɔb, bɨ̀ ka me zǐ ndɔ̀ àtsəa yɔb.

¹⁵Bɨ̀ me wùꞋtè àwɨ̧ nè bòt bu bɔ̀ɔ ngùꞋtà àwɔb la, mè ndɨ̀à nè bu bɔ̀ɔ ndɨ̀à la.

¹⁶Bɨ̀ me tseke ane ètsəê wemɔꞋ nè bɔnyɨ bɨ̧, bɨ̀ ka me ŋeꞋe tèkwȩ tɨ̧ a ègwet, mè me ghɨ̀ èshu̧ nè bòt bɔ̀ wu ne si la. Bɨ̀ ka me mɨ̀ɨ̀te nê bɨ bɔ èyì nyaŋ.

¹⁷Wòt ka mvəèa kàbɔ̀ŋ ane kàbɔ̀ŋ, ka me ghɨ̌ wuê àghɨa waa waa nàa ye nê aà mbɔ̀ la.

¹⁸Bɨ̀ ghɨ̌ àghɨa àgème betsiꞋa bɨ ko ngɨ̀ la ndze nê bɨa ntsèka ane àlàŋkè nè waa waa.

¹⁹Bɔnyɨ bɔ̧, wòt ghɨa kàbɔ̀ŋ ane wòt, tà ka mvəèəè, tà sàŋ Mbɔ̧ɔ̧mà nɨ ntsǒ zi ngɨ̀, wuê mbɨ̀Ꞌɨ̀ Mbɔ̧ɔ̧mà shu bɔ shɨ a èbem Àkata tò la nê, “Wòt tàa vəèəè la wu mmɔ̌. Maa ŋa àbȩ̀ yɔb. Wu Tǎt wa Mbɔ̧ɔ̧mà shua la.”

²⁰Bɨ̀ ghɨ̀ wuê mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Ndzite wɔ̀mbù̧ wê te me ku, à jɨa tò, àtɔŋ tò a yu̧a, à ŋà mèleb tà nu. À ghɨ̀ ale, ko aa wu mbɨ̀Ꞌɨ̀ tènkìtewèt tèa ngòꞋà la, à nɔ̀ŋa àtsəa tò la.”

²¹Ka mbɨ̧̀ɨ̧̀ne kàbɔ̀ŋ màꞋà awê a si, ka tsiꞋi ntsɔ̧̀ wu àa ngɨ̀à la màꞋa kàbɔ̀ŋ a si.