Read Mundani Lûm 13 Bible Online

Lûm 13 - Mundani bible

Lûm 13

¹Wòt ègème bɔ ndɨ tàa me zə bòt gɔbmèn bu bɔɔ mbà̧aã àlaꞋ la. Bòt ko bɔ̀ɔ mbà̧aã àlaꞋ kà Mbɔ̧ɔ̧mà bɨ̧̀ɨ̧̀ne la be ntsě, wu Mbɔ̧ɔ̧mà ka tà tsia bòt bu bɔ̀ɔ mbà̧aã àlaꞋ la.

²Ale, wòt tu̧a zə bòt bu bɔ̀ɔ mbà̧aã àlaꞋ la, tà ko nê ye tu̧u̧ àghɨa Mbɔ̧ɔ̧mà tsia la, mbɔ̂ bòt bɔ ghɨ̀ ale la e wua ntɔ ngoꞋ adù̧ yɔb.

³Bòt bu bɔ̀ɔ mbà̧aã èlaꞋ la e ntsě abot mbɨ̀Ꞌɨ̀ e ghɨ bòt bu bɔ̀ɔ ngɨ̀a ntsɔ̧̀ la aa me bɔa, wu bòt bu bɔ̀ɔ ngɨ̀a kàbɔ̀ŋ la ka bɔ̀ɔ me bɔa la. Àà nkɨ me tseke kâ wua mbɔ̀a wòt wu tàa mbà̧aã àlaꞋ la à? Ale, me ghɨ̀ wuê mènəè ntsɔ̧̀ mbɨ̀Ꞌɨ̀ tàa me làꞋa a ntsɔ̧̀ adù̧ ye,

⁴nkàà nê tà wu wɔ̀fàꞋ Mbɔ̧ɔ̧mà tàa faꞋa ane ntsɔ̧̀ wê la. Ka à ghɨa kàbɔ̀ŋ à me bɔa, nkàà nê, mètàŋ mu bɔ ŋa abua tò la è ntsě àku. Tà wu wɔ̀fàꞋ Mbɔ̧ɔ̧mà a mànɔŋa ntsǒ Mbɔ̧ɔ̧mà adù̧ bòt bu bɔ̀ɔ ngɨ̀a kàbɔ̀ŋ la.

⁵Ale, wòt bɔ ndɨ tàa me zə bòt bu mbà̧aã àlaꞋ la, è ka ngu nê tà bɔa wuê ntsǒ Mbɔ̧ɔ̧mà, ka tsiꞋ à wu nê a èntɨ̧ɨ̧ tò tà ko nê wu àghɨa ye bɔ ndɨ yèa ghɨ̀ la.

⁶Eyaa wu lə yu bɨ̀a ŋa èkab taksì la mɨ̧̂, nkàà nê bòt bu mbà̧aã àlaꞋ la wu bɔfàꞋ Mbɔ̧ɔ̧mà mbɨ̀Ꞌɨ̀ bɔ̀ɔ ngɨ̀à àfaꞋa mbɔŋ la.

⁷Ŋa àghɨa à bɔ ndɨ àa ŋa abua yɔb la. Ŋa èkab bètaksì tsa tsa abua bòt à bɔ ndɨ àa ŋa la, mè me kukte bòt à bɔ ndɨ àa kukte awɔb la.

⁸À ka mbèà njû wòt a èbèm lê, kà wu wuê ndɨ àa me kɔ̀ŋke waa waa la, nkàà nê wòt tàa nkɔ̀ŋkà wanyɨ vi la è ghɨ̀ àghɨa mbɨ̧ kɨà la.

⁹Mbɨ̧tsə tê shu nê, “Wòt ka me jɨ àbȩ, wòt ka mbùŋè wòt, wòt ka ntsɔŋ, wòt ka me kɨ nê àghɨa wòt tsa a wu wu azi.” Mènəè maa nè me kǒ tsa ègème wu a èbem ànəa yaa yeamɔꞋ la nê, “Me kɔ̀ŋkè wanyɨ wè mbɨ̀Ꞌɨ̀ àwɔ̀ mbɔŋ.”

¹⁰Wòt me kɔ̀ŋkè wanyɨ vi ko tà ka ghɨa kàbɔ̀ŋ ane tò a. Ale, wòt nàa me kɔ̀ŋkè wanyɨ vi tà wua ngɨ̀à àghɨ àgème mbɨ̧ kɨà la.

¹¹Bɨ̀ me ghɨ̀ àyaa nkoa mɨ̧̂ nê bɨ ko èwuu àfɨꞋa bɨ̀ wu adù̧ la. ÀfɨꞋa bɨ bɔ ndɨ bɨ̀a lɔ̀Ꞌɔ a si mbɨ̀Ꞌɨ̀ bòt bɔ ku̧u̧te awɔb la, a kuêꞋ. ÀfɨꞋa bàa bɔ mèmpème la a kɨꞋɨ tê ngu a ngèt ya àfɨ̀Ꞌ yaa tè ntsè ndɨ à le wuê àfɨ̀Ꞌ yu baa li mbùꞋ ndzì mèntɨ̧ɨ̧ ma ane Yesò la.

¹²A bê ntsìꞋi mbɨ̀Ꞌɨ̀ ètsəꞋ e tsi tè àbȩ a bùꞋ me ghaꞋte. È wu ale, bàà waꞋa èbɨꞋte èghɨ bu bàa ngɨ̀à a èbem ndzěm la, mè ngwèè àwa nè èghɨ èbet mbɨ̀Ꞌɨ̀ etaŋke a mànua a èbem èkaꞋà.

¹³Bàà me ghɨ̀ mènəè ma ane ndɨ è wu wu la, mbɨ̀Ꞌɨ̀ bòt bɔ̀ɔ ntsèka a èbem èkaꞋà la. Bàà ka me jɨ mèpǎ̧ màpaꞋta àbɨ̧, kò nùa mbea leꞋ, bàà ka me jɨ àbȩ kò ngɨ̀à èbɨꞋte mènəè leꞋ, bàà ka me nù èbet kò ngòꞋna bòt leꞋ.

¹⁴Ka bɨ̀ wèà àwɨ̧ nè mààlà Yesò Klistò Lefɨ̀Ꞌ, bɨ̀ ka me mɨ̀ɨ̀tè èghɨ mbɨ̧̀ ènyit, e me ghɨ̀ àghɨa è kɨa la.