Read Mundani Lûm 16 Bible Online

Lûm 16 - Mundani bible

Lûm 16

¹E nkɨ shu awɨ̧ nê Fobè wanyɨ wa waàvi wu è wu dikɨ̀n a chɔsì wu a Sènkliyà la wu wòt ntsɔ̧̀. [3]

²Bɨ̀ sèe atò mbɨ̀Ꞌɨ̀ wòt Yesò, ane èlɨ bòt Mbɔ̧ɔ̧mà àa sèe bɔnyɨ bɔb la, mè ŋa tò àghɨa àgème tàa nkɨ̀ŋkà la, nkàà nê tà taꞋa tɨŋe bòt nyaŋ, è fɔ̀ɔ̀lè am.

³Bɨ̀ tsàꞋta Plìsilà bɔ̂ Àkwilà, è wu bòt baa tò ba àa fàꞋà nɔ̂ abua Yesò Klistò la.

⁴Bɔ li ntsìꞋa nkɨ epfə ambo yaã. E ntsě wuê ndàꞋà mmɔ̌ màa ŋa mènkɔ̀ŋke abua yɔb ane àghɨa bɔ li ngɨ̀ ane yaã la, bèchɔsì bòt kà wu Bèjuê bu bàgème aà ŋa mènkɔ̀ŋke abua yɔb mɨ̧̂.

⁵Bɨ̀ tsàꞋte bòt chɔsì bu bɔ̀ɔ mbù̧ù̧ta a lob yɔb la mɨ̧̂.Bɨ̀ tsàꞋtè ngule shu̧ yaã Èpanetùs.Wu wòt mbì tà li ndzì èntɨ̧ɨ̧ vi ane Yesò Klistò àlaꞋ a Esìà la.

⁶Bɨ̀ tsàꞋte Màlià wu tà taꞋa fàꞋa abua yɨ̧ la.

⁷Bɨ̀ tsàꞋte Àndòlonikùs bɔ̂ Junìàs, è wu bòt àlaꞋ bɔ̧, bàà tò ba e li ngua tèfȩ nɔ̂ la. Bòt e ko awɔb ntsɔ̧̀ ayɔɔ bɔntu̧ Yesò Klistò, bɔ mè ngu bòt bɔ li mbɨ̀ ndzì mèntɨ̧ɨ̧ mɔb ane Yesò ka maa zì èwɔ̧ la.

⁸Bɨ̀ tsàꞋtè Ampliyatùs, ngule shu̧ yaã ane Yesò.

⁹Bɨ̀ tsàꞋtè Yubanùs, è wu wòt bàa tò ba àa fàꞋà abua Yesò Klistò nɔ̂ la, mè ntsàꞋtè ngule shu̧ yaã Stachis.

¹⁰Bɨ̀ tsàꞋte Apelès wu tà lâ nyɨ̀Ꞌte nê yeà ndzəèa Yesò Klistò la. Bɨ̀ tsàꞋte bòt lob Alistobulùs.

¹¹Bɨ̀ tsàꞋte Èlodìon wòt àlaꞋ am. Bɨ̀ tsàꞋte bɔnyɨ ba bòt Yesò Klistò bu, è wu bòt lob Nàsisùs la.

¹²Bɨ̀ tsàꞋte Tȩ̀fenà bɔ̂ Tȩ̀fosà, è wu bòt bɔ̀ɔ fàꞋà abua Yesò Klistò la. Bɨ̀ tsàꞋtè ngule shu̧ yaã Pesìs wu tàa ndâ fàꞋa abua Yesò Klistò la.

¹³Bɨ̀ tsàꞋte Lufùs wu Mbɔ̧ɔ̧mà tɔ atò a màfaꞋa abua Tè Yesò, bɔ̂ nyɨ̌ vi wu, tà wu nyɨ̌ am mɨ̧̂ la.

¹⁴Bɨ̀ tsàꞋte Àsinklitùs bɔ̂ Flegòn nè Emès nè Pàtèlobàs, nè Emàs mè nè bɔnyɨ ba bu bɔ̀ wu bɔ̂ tò ba nɔ̂ la.

¹⁵Bɨ̀ tsàꞋte Fìlologùs nè Julià nè Nelùs bɔ̂ wanyɨ vi waàvi, nè Olimpàs mè nè bòt Mbɔ̧ɔ̧mà bu bàgème bɔ̀ wu bɔ̂ tò ba la.

¹⁶Bɨ̀ taꞋa bɔnyɨ bɨ̧ ntsàꞋte àwɔb mbɨ̀Ꞌɨ̀ bòt Mbɔ̧ɔ̧mà. Bèchɔsì Yesò Klistò bàgème beà ntsàꞋtà àwɨ̧.

¹⁷Bɔnyɨ bɔ̧, e ngua shù̧ù̧ta wɨ̧ nê bɨ̀ me ko awɨ̧ ane bòt bu bɔ̀ɔ ndzìà àghàbtè a kètsìà wɨ̧, ntàa bòt, mè nyɨ̀Ꞌta èghɨ ko tsa kà wu èghɨ bu bɔ li nyɨ̀Ꞌte awɨ̧ la. Bɨ̀ ka mbɔ̀ àghɨa ko a màngɨa nê èwuu bòt mbɔŋ.

¹⁸Èwuu bòt mbɔŋ è ka faꞋa abua Yesò Klistò Lefɨ̀Ꞌ wa, bɔ fàꞋà wuê abua tèbêm tɔb. Bɔɔ nɨa mèngǎ̧ ntsɔ̧̀ nè àvəèəèlè fɨ̀ta bòt bu bɔ̀ɔ ka kwaꞋte mènəè ntsɔ̧̀ la.

¹⁹Wòt ègème è zə ndɨ bɨ̀a ngɨ̀à àghɨa Ntu̧ Ntsɔ̧̀ Mbɔ̧ɔ̧mà shu la, tè a taꞋa bɔ̀ am mɨ̧̂. Maà nkɨà nê bɨ̀ bɔ èyì a mànkoa àghɨa àa mbɔ̀ la, mè ngu mbɨ̀Ꞌɨ̀ bòt kà ko àghɨ a màngɨa kàbɔ̀ŋ.

²⁰Mbɔ̧ɔ̧mà wu tàa ngɨ̀à baa bɔ àlàŋkè la, bele yàŋe tsòkè mètàŋ Satàn, e ghɨ̌ tàa tsiꞋi a èten lɨ̧̂. Maà ntsàꞋtà nê Yesò Klistò Lefɨ̀Ꞌ wa nyɨꞋte a ntsɔ̧̀ vi abua yɨ̧.

²¹Tɔ̀màtià wu baa tò àa fàꞋà nɔ̂ la nàà ntsàꞋtà awɨ̧, bɔ̂ Lusiɔ̀s nè Jasɔ̀n mè nè Sòsipatà, è wu bòt àlaꞋ bɔ̧ la.

²²Mmɔ̌ Tetiùs wu mâ shɨ letà waa abua Pɔ̂l la, maà ntsàꞋtà àwɨ̧ mbɨ̀Ꞌɨ̀ wanyɨ wɨ̧ ane Mbɔ̧ɔ̧mà.

²³Gayɔ̀s wu màa ntsèka a lob tò la nè bòt chɔsì bàgème bɔ̀ɔ mbù̧ù̧tà a lob tò la aà ntsàꞋtà àwɨ̧. Èlastùs wu tà wu wòt tàa mpàŋa èkab àpfəèà nɨ̧ yaa la bɔ̂ wanyɨ wa Kwatùs aà ntsàꞋtà àwɨ̧. [

²⁴Maà ntsàꞋtà nê Yesò Klistò Lefɨ̀Ꞌ wa nyɨꞋte a ntsɔ̧̀ vi abua yɨ̧ bɨ̀agème. Àmèn.]

²⁵Bàa ŋa mèngùꞋte abua Mbɔ̧ɔ̧mà! Tà bɔ mètàŋ e ghɨ̌ bɨa me kweele mbɨ̀Ꞌɨ̀ Ntu̧ Ntsɔ̧̀ nàa shua la. Ntu̧ Ntsɔ̧̀ mbɔŋ wu ntu̧ yu màa ndàꞋà ane ànəa Yesò Klistò la, è wu nkûŋ yu bɔ li bɔ̀ ka ko ànəa yùà ane mèngùꞋ nyaŋ è tsè la.

²⁶Nkûŋ mbɔŋ è pùùla ayaã àfɨ̀Ꞌ yaa ane àghɨ a bèndàꞋàtɔŋ Mbɔ̧ɔ̧mà e li shɨŋ la. Mbɔ̧ɔ̧mà wu tà wu ane àlia nè àlia la è shu nê èlaꞋ ègème e ko, mbɨ̀Ꞌɨ̀ bòt bàgème aa bɨ̧ɨ̧ne ànəa tà shu la, e me zə atò.

²⁷Wu ndàꞋà Mbɔ̧ɔ̧mà tà bɔ èyì la. MèngùꞋte wu abua tò ane àlia nè àlia, nkàà àghɨa Yesò Klistò li ngɨ̀ la! Àmèn.