Read Mundani Lûm 2 Bible Online

Lûm 2 - Mundani bible

Lûm 2

¹Àwɔ̀ wu àa ntsìà mpəèəète bòt la, à ka ghà àku a, ka à màà ngu wuê wà leꞋ. Àa ngɨ̀ a me tsì mpəèəète wòt à wua ndzìà ndɔ̀ àtsəa yê, nkàà nê àwɔ̀ wu ntsìà mpəèəète mbɔŋ la à bela ngɨ̀à wuê èghɨ mbɔŋ mɨ̧̂.

²Ba ko nê ngoꞋ Mbɔ̧ɔ̧mà naa li nɔ̀ŋke a ègwet bòt bu bɔ̀ɔ ngɨ̀à èghɨ mbɔŋ la.

³Tè à mɨɨtè nê, àwɔ̀ wu àa ntsìà mpəèəète bòt bu bɔ̀ɔ ngɨ̀à èghɨ bàà la, à me ghɨ̀ èghɨ mbɔŋ àwɔ̀ mbɔŋ, ko Mbɔ̧ɔ̧mà nàa tseke ka saꞋa awê?

⁴Kò àa mɨ̀ɨ̀tà nê ndɨ̀ wu Mbɔ̧ɔ̧mà bɔ a bɔɔla èntɨ̧ɨ̧ mè me baãaã èntɨ̧ɨ̧ vi nkua tèsȩte bòt la, tàa sà àwê aa ghà àku à? À bakà ko nê ntsɔ̧̀ waa Mbɔ̧ɔ̧mà nyɨ̀Ꞌta la, wua nkɨà mbɨ̀Ꞌɨ̀ aa kubte ane mènəè kàbɔ̀ŋ mê?

⁵Ka ndɨ̀ wu a kweele èntɨ̧ɨ̧ wê, ntu̧u̧ kubte la, à wua mpàa nkwèꞋnà ntsǒ Mbɔ̧ɔ̧mà a ègwet lè, mbɨ̀Ꞌɨ̀ è li è wu ane àli yu tàa saꞋa waa waa ndɨŋndɨ̀ŋ la, a bê mbɨ̀ àwê.

⁶Mbɔ̧ɔ̧mà naa li tsɔꞋɔ waa waa, ane àfàꞋa tò.

⁷È me wu bòt bu bɔ̀ɔ nkùùla mèntɨ̧ɨ̧ mɔb ngɨ̀à mènəè ntsɔ̧̀, nkɨà ènɨ̧, nkɨà kènùke, mè me kɨ e li tseke ane àlia nè àlia la, ko Mbɔ̧ɔ̧mà nàa ŋa awɔb mèmpème kàlìà.

⁸Ka è me wu bòt bu bɔ̀ɔ nkɨà nê àghɨ àgème a wu wu ayɔb la, mè ntu̧u̧ bɨ̧ɨ̧ne ànəa nkûŋ yu a dzə abua Mbɔ̧ɔ̧mà la, me ghɨ̀ wuê mènəè kàbɔ̀ŋ la, ko Mbɔ̧ɔ̧mà naa nyɨꞋte ntsǒ zi, enɔ̀ŋe ngoꞋ kèkweelè a ègwet lɔb.

⁹Bòt bu bɔ̀ɔ ngɨ̀a kàbɔ̀ŋ la bàgème aa li nyi a èbem ngoꞋ kèkweelè, e me ye ngɨ̧̀ɨ̧̀nè, ebùꞋu ane Bèjuê bu bɔ li mbɨ̀ ndzə èngǎ̧ Mbɔ̧ɔ̧mà la, eghǎ wu ane bòt kà wu Bèjuê.

¹⁰Ka Mbɔ̧ɔ̧mà bɔ̂ ngu wùꞋte, e kukte, e mě ŋa àlàŋkà èntɨ̧ɨ̧ abua waa waa tàa ngɨ̀a ntsɔ̧̀ la, ebùꞋu ane Bèjuê bu bɔ li mbɨ̀ ndzə èngǎ̧ Mbɔ̧ɔ̧mà la, eghǎ wu ane bòt kà wu Bèjuê.

¹¹Mbɔ̧ɔ̧mà naa ghɨ̀ anè nkàà nê tàà saꞋa bòt kà lȩ mèsi.

¹²Bòt bu bàgème bɔ li ngɨ̀a kàbɔ̀ŋ kà ko mbɨ̧ yu Mbɔ̧ɔ̧mà li ŋa abua Musì la, bɔɔ li nyɔ ka ko mbɨ̧ mbɔŋ. Bòt bu bɔ li nko mbɨ̧ mbɔŋ, ka ngɨa kàbɔ̀ŋ la, bɔɔ li nɨ mbɨ̧ mbɔŋ e saꞋa awɔb.

¹³È ntsě bòt bu bɔ̀ɔ ndzəa mènəè mu mbɨ̧ Musì nàa shua la ka bɔ̂ kùꞋu e mbì Mbɔ̧ɔ̧mà la, wu bòt bu bɔ̀ɔ ngɨ̀à àghɨa mbɨ̧ mbɔŋ shua la. Wu bɔ̀ɔ̀ba ka bɔ tɨ̧ɨ̧ ndɨŋndɨ̀ŋ a mbì tò la.

¹⁴Bòt bu kà wu Bèjuê la àa ngɨ̀ bɔ̀ ghɨ̀ àghɨa mbɨ̧ yu Mbɔ̧ɔ̧mà li ŋa abua Musì la nàa shua la, a wua nyɨ̀Ꞌta nê bɔ batè bɔ̀ ka bɔ àkata mbɨ̧ ale, mbɔ̂ nko mbɨ̧.

¹⁵Èghɨ bɔ̀ɔ ngɨ̀à la e nyɨꞋtè nê Mbɔ̧ɔ̧mà zi mbɨ̧ mbɔŋ a mèntɨ̧ɨ̧ mɔb, nkàà nê bɔ̀ɔ ngɨ̀ bɔ̀ ghɨ̀ àghɨ mbɨ̀Ꞌɨ̀ mbɨ̧ shu la, mèntɨ̧ɨ̧ mɔb ka feele àwɔb, ka bɔ̀ pààte mbɨ̧, mèntɨ̧ɨ̧ mɔb me fèèlè àwɔb.

¹⁶Ntu̧ Ntsɔ̧̀ yu màa ntsɔ̀tà la nàa shua nê, eyaa wu ndɨ bɔ̀ɔ li lo esaꞋa bòt ane àli yu Mbɔ̧ɔ̧mà nàa ghɨ̌ Yesò Klistò naa saꞋa mènəè ndò̧ mu a mèntɨ̧ɨ̧ bòt la.

¹⁷È me wu awê wu àa ntɔ awê ane Juê la, ko àyê àa li wu naa? À gha ane ndɨ̀ wu à ko mbɨ̧ Musì la me wu̧u̧ nkùꞋ ye shua nê ye ko a Mbɔ̧ɔ̧mà.

¹⁸Àà mè shua nê ye ko àghɨa Mbɔ̧ɔ̧mà nàa nkɨà nê yè ghɨa, mbɨ̧ mè nyɨ̀Ꞌte avi tè ye ko àghɨa è wuê àyea nkûŋ la.

¹⁹À lâ nko àwɔ̀ mbɔŋ nê ye wu wòt yèa mbà̧aã àbu a bòt àghɨ àleme la, mè ngu èkaꞋà abua bòt bɔ̀ wu a èbem ndzěm la,

²⁰nê ye wu nyɨꞋtà bòt bu kà ko mènəè Mbɔ̧ɔ̧mà la, mè ngu nyɨꞋtà bòt bu bɔ̀ baka zìꞋì nkwèèle ane mènəè Mbɔ̧ɔ̧mà la. Mè ndâ nko àwɔ̀ mbɔŋ nê ndɨ̀ wu à ko mbɨ̧ la, à ko àghɨ àgème, mè nko nkûŋ.

²¹Àwɔ̀ wu àa nyɨ̀Ꞌta bòt ko la, betsiꞋa à kà nyɨꞋte awê àwɔ̀ mbɔŋ? Àwɔ̀ wu àa shua nê bòt e kà me tsɔ la, àà kà tsɔŋ?

²²Àwɔ̀ wu àa shua nê wòt ka me jɨ àbȩ la, àà kà jɨ ayê àbȩ? Àwɔ̀ wu àa ka bê nkɨ zə ànəa bènàmbəa la, àà kà gha a lobte bènàmbea mbɔŋ etsɔ èghɨ? [1]

²³Àwɔ̀ wu àa ngù̧a nkùꞋ yê shua nê ye ko mbɨ̧ Mbɔ̧ɔ̧mà la, àà kà kweele àtsə abua tò e pààte mbɨ̧ mbɔŋ?

²⁴Mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Bòt kà wu Bèjuê aa ndàꞋa kàbɔ̀ŋ adù̧ èlen Mbɔ̧ɔ̧mà nkàà àghɨa bɨ̀a Bèjuê àa ngɨ̀à la.”

²⁵Bɔ naŋa wòt e nɨ nyɨꞋte nê tà wu wòt Mbɔ̧ɔ̧mà, ko wu ànəa ntsɔ̧̀, na tà me ghɨ̀ àghɨa mbɨ̧ yu Mbɔ̧ɔ̧mà li ŋa abua Musì la nàa shua la. Ka wòt bakà wua ngɨ̀à mbɨ̀Ꞌɨ̀ mbɨ̧ è shu la, ko mànaŋa ŋut bê ngu àku.

²⁶Tè bɔ bakà naŋe a wòt mbɨ̀Ꞌɨ̀ mbɨ̧ Musì kɨa la, tà bɔ me ghɨ̀ àghɨa mbɨ̧ nàa nkɨà la, ko Mbɔ̧ɔ̧mà ka nɨ atò mbɨ̀Ꞌɨ̀ wòt bɔ nàŋe atò la a?

²⁷Bòt kà wu Bèjuê bu bɔ̀ baka naŋe awɔb, bɔ bɔ̂ me nɔ̀ŋe mbɨ̧ Mbɔ̧ɔ̧mà la aa tsě awɨ̧ bɨ̀a Bèjuê bu bɔ shɨ mbɨ̧ yu a si ŋǎ abua yɨ̧, mbɔ̂ nàŋe awɨ̧ mbɨ̀Ꞌɨ̀ mbɨ̧ mbɔŋ kɨa la, ka bɨ bɔ̂ me pààte mbɨ̧ mbɔŋ la.

²⁸È ntsě èghɨ bu wòt nàa ngɨ̀à mbɨ̀Ꞌɨ̀ ndɨ̧ Bèjuê è kɨa la, ka àa ngɨ̀à wòt ane ndâ wòt Juê la. È kà meè ngu a mànaŋa wòt a mbɨ̧̀ ènyit tò ka àa ngɨ̀à Mbɔ̧ɔ̧mà bɨ̧̀ɨ̧̀nâ nê tà wu wòt vi la.

²⁹Wòt tà wu ngule wòt Juê la wu wu tàa ale ane èntɨ̧ɨ̧ vi la. E lâ naŋe wòt mbɨ̀Ꞌɨ̀ tàa tsiꞋi wòt Mbɔ̧ɔ̧mà, mě ngu ànəa èntɨ̧ɨ̧. Wu Fo Mbɔ̧ɔ̧mà ka tàa nàŋa wòt a èlɨ̀ waa la, è ntsě a màngɨa mbɨ̀Ꞌɨ̀ mbɨ̧ nàa shua la. Wɔ̀bȩ̂ màà mbakà wuꞋte èwuu wòt waa, ko Mbɔ̧ɔ̧mà naa wùꞋtè atò.