Read Mundani Lûm 3 Bible Online

Lûm 3 - Mundani bible

Lûm 3

¹Tè àghɨ ako aa və Bèjuê e nɨŋ ntsè bòt ko la à? Àbȩ̀ a mànaŋa wòt wu ghàà?

²Àbȩ̀ a taꞋa wu ane èghɨ bàa, ane abà àgème. Enɨ bùꞋu, Mbɔ̧ɔ̧mà li ndzì èngǎ̧ vi a tèkitebu Bèjuê.

³Ka àbəèꞋ àyɔb ako a li à ka ghɨ̂ mbɨ̀Ꞌɨ̀ Mbɔ̧ɔ̧mà shu la. Tè betsiꞋa Mbɔ̧ɔ̧mà gha ane èlɨ̀ ngaa, è nkùbte àghɨa tà li nkàꞋ nê ye ghɨ̌ ane yɔb la a?

⁴A ntsě ale. Bòt bàgème e màà ngu wuê bòt mèfà̧, ko Mbɔ̧ɔ̧mà naa tɨ̧ɨ̧ wuê ane èngǎ̧ vi, mbɨ̀Ꞌɨ̀ bɔ shɨ a èbem Àkata tò la nê, “Àa ngɨ̀ à laꞋa, bòt è zə bɔ nê ànəa à laꞋà la wu nkûŋ, bɔ̀ mee bɔ̀ bàŋè mènəè mê, bɔ̀ ka bê ndze àlɔꞋ adù̧.”

⁵Mbɨ̀Ꞌɨ̀ àa ale la, tè kàbɔ̀ŋ wa me ghɨ̌ bòt e me ye nê Mbɔ̧ɔ̧mà nàà ndɨŋndɨ̀ŋ, ko bàà laꞋ nê ghàà? Kò bàa laꞋnê Mbɔ̧ɔ̧mà me zi àwa a èbem ngoꞋ, ko tà wua ngɨ̀à àghɨa kà kùꞋ à? (E ndàꞋà àyaa mbɨ̀Ꞌɨ̀ wɔ̀bȩ̂.)

⁶A mbê ntsě ale. Mbɔ̧ɔ̧mà bakà wua saꞋa mènəè ndɨŋndɨ̀ŋ, ko tàa saꞋa ngɔ̀ŋ naa?

⁷Tè mènəè mèfà̧ mɔ̧ wu ghɨ̌ bòt aa yea nkûŋ Mbɔ̧ɔ̧mà, e wùꞋtè atò adù̧, è ghaa ghɨ̂ ka Mbɔ̧ɔ̧mà mè me zì am a èbem ngoꞋ nê e ngu wòt kàbɔ̀ŋ à?

⁸Tè betsiꞋa wòt me ghɨa kàbɔ̀ŋ mbɨ̀Ꞌɨ̀ me ye a ntsɔ̧̀? Eyaa wu àghɨa bòt ko àa ntsɔ̧̀ɔ̧̀tà àwa, shua nê wu àghɨa bàa ndàꞋà la. Bɔ̀ɔ ye ngoꞋ ane àghɨa bɔ̀ɔ ngɨ̀à la.

⁹Tè bàà laꞋ nê ghà àfɨ̀Ꞌ yaa? Ndɨ̀ wu Mbɔ̧ɔ̧mà nàa saꞋa bòt bàgème la bàa Bèjuê e tsě bòt koê? ChaꞋ, baa bakà tsě wòt. Mâ yaŋe shu nê kàbɔ̀ŋ kuule bòt bàgème, Bèjuê nè bòt kà wu Bèjuê.

¹⁰Eyaa wu àghɨa bɔ shɨ a èbem Àkata Mbɔ̧ɔ̧mà la nê, “Wòt kǒ tàa ngɨ̀à ntsɔ̧̀ la e ntsě, ka wuê wemɔ̀Ꞌ

¹¹Wòt kǒ tà ko ànəê yu, è wu ànəa nkûŋ la è ntsě, Wòt kà mee nguê tàa nkɨ e ko Mbɔ̧ɔ̧mà la.

¹²Bòt bàgème e tem kwèn tɔb ŋa abua Mbɔ̧ɔ̧mà, bɔ̀ɔgème e tsiꞋi bòt kàbɔ̀ŋ. Wòt kǒ tà bèla ngɨ̀à ntsɔ̧̀ ane yɔb la te ntsě, ka wuê wemɔ̀Ꞌ.”

¹³“BetsiꞋa mènəè bɔ̀ɔ ndàꞋà la bùŋè wòt, tèlɨ̧ tɔb te lu̧u̧ ne mèfà̧.” “Mèngǎ̧ nàa ndzəèà ètsəê wɔb la nàà mbɨ̀Ꞌɨ̀ àtsòŋa nyà̧kàbɔ̀ŋ.”

¹⁴“Mètsəê mɔb è lu̧u̧ ne tèntsɔ̧̀ɔ̧̀mètsə, èngǎ̧ wɔb e mè ntaꞋa wua sɔ̀ɔ̀bà mèntɨ̧ɨ̧ bòt.”

¹⁵“Bɔɔ̀ kà lȩȩta a màmbuŋa wòt,

¹⁶ntsòkà àghɨ àgème àdziꞋ àgème bɔ̀ɔ ntsèà la, ngɨ̀à bòt e yea ngoꞋ.

¹⁷Bɔ bakà ko ndɨ betsiꞋa bɔ tseke ane àlàŋkè nè bòt ko la.”

¹⁸“Kèbɔɔ Mbɔ̧ɔ̧mà ke mbê ntsě a mèntɨ̧ɨ̧ mɔb.”

¹⁹Baà ko nê àghɨ àgème bɔ shɨ a èbem mbɨ̧ Musì la a wua ndàꞋa abua bòt bu bɔ ŋa mbɨ̧ mbɔŋ abua yɔb la. Aà anè mbɨ̀Ꞌɨ̀ wòt è ka li bɔ ànəê àko tàà làꞋa ane àli yu bòt bàgème àa tɨ̧ɨ̧ e mbì Mbɔ̧ɔ̧mà tàa saꞋa awɔb la.

²⁰Wòt kǒ Mbɔ̧ɔ̧mà nàa nɨ atò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li nkàà ndɨ ŋut ghɨ̀ àghɨa mbɨ̧ nàa shua la, è ntsě, nkàà nê àghɨa mbɨ̧ nàa ngɨ̀à la wu a mànyɨꞋta wa nê baa ghɨa kàbɔ̀ŋ.

²¹Mbɔ̧ɔ̧mà lâ nyɨ̀Ꞌte àfɨ̀Ꞌ yaa ndɨ yèa ngɨ̀à ka nɨa wòt nê tà tɨ̧ɨ̧ ndɨŋndɨ̀ŋ a mbì li la. Àyaa a bakà bɔ àghɨa ko àa ghɨ̌ nê mànɔŋa mbɨ̧ la. Ka mbɨ̧ nè àghɨa bèndàꞋàtɔŋ e li shɨŋ la a li nyɨ̀Ꞌte a èlɨ ngaa mɨ̧̂.

²²Èlɨ mbɔŋ wu nê bòt àa ngɨ̀ bɔ̀ zì mèntɨ̧ɨ̧ mɔb ane Yesò Klistò, Mbɔ̧ɔ̧mà nɨ awɔb bàgème mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li la. Mbɔ̧ɔ̧mà a nɨ bòt bàgème mbɨ̀Ꞌɨ̀ àghɨ yeamɔꞋ,

²³nkàà nê waa waa è ghɨa kàbɔ̀ŋ tè tà kà tsi mbɔ̀ ènɨ̧ wu Mbɔ̧ɔ̧mà li ngɨ̀ atò nê tà bɔŋ la.

²⁴Mbɔ̧ɔ̧mà nɨa ntsɔ̧̀ vi ngɨ̀ bòt e tsiꞋi mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì tò la, àku. Tà li ngɨ̀ anè, nkàà èvə lu Yesò Klistò li mpfə nchùꞋù àtsə bòt bàgème ane kàbɔ̀ŋ wɔb la.

²⁵Mbɔ̧ɔ̧mà li ŋǎ atò tà kɨ̀Ꞌɨ̂ mpfə a mbɨ̧̀ mbasa, àlo̧ atò a tsì ndɔ̀ mènəè kàbɔ̀ŋ, mbɨ̀Ꞌɨ̀ wòt ègème tà zi èntɨ̧ɨ̧ vi ane Yesò Klistò la nàa peme yùà. Mbɔ̧ɔ̧mà li ngɨ̀ àyaa mbɨ̀Ꞌɨ̀ enɨ nyɨꞋte nê yea ngɨ̀à mènəè ndɨŋndɨ̀ŋ. È li ngu àfɨꞋa mbì tà me baãaã èntɨ̧ɨ̧ vi, tà kà wua ndzàŋà ndzìà bòt bu bɔ li ngua ngɨ̀à a kàbɔ̀ŋ la a èbem ngoꞋ.

²⁶Ka àfɨ̀Ꞌ yaa Mbɔ̧ɔ̧mà nyɨꞋte ane èvə Yesò nê yea ngɨ̀à mènəè mi àfɨ̀Ꞌ àgème ndɨŋndɨ̀ŋ, mě nyɨ̀Ꞌte nê wòt yea nɨa mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, wu wòt wu tà zi èntɨ̧ɨ̧ vi ane Yesò Klistò la.

²⁷A wu anè, ko wòt nàa mě me wu̧u̧ nkùꞋ zi shua nê ghàà? Àghɨ a te ntsě. Àghɨa àa kele wòt nê tà ka me wu̧u̧ nkùꞋ zi la wu ghàà? Wu mbɨ̧ wòt nàa me shu nê yea nɔ̀ŋà la? ÀwɔꞋ, wu màndzia èntɨ̧ɨ̧ ane Yesò Klistò, ka nàa kele wòt a màngu̧a nkùꞋ zi la.

²⁸Baa ko nê wòt nàa ngɨ̀ tà zi èntɨ̧ɨ̧ vi ane Yesò, ka Mbɔ̧ɔ̧mà nɨ atò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, è ntsě a màngɨa èghɨ bu mbɨ̧ nàa shua la.

²⁹Kò wu nê Mbɔ̧ɔ̧mà wu wuê Mbɔ̧ɔ̧mà Bèjuê le è? Tè tà ntsě Mbɔ̧ɔ̧mà bòt kà wu Bèjuê mɨ̧̂? Tà wu Mbɔ̧ɔ̧mà bòt kà wu Bèjuê mɨ̧̂,

³⁰ndɨ̀ wu Mbɔ̧ɔ̧mà nàa wemɔ̀Ꞌ la. Tàa nɨ wòt ègème tà zi èntɨ̧ɨ̧ vi ane Yesò la mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, kò ŋut wu wòt Juê, kò wòt kà wu Juê leꞋ.

³¹Tè aà anè ngua shua nê mbɨ̧ yu Mbɔ̧ɔ̧mà ŋa la tsiꞋi àku, ndɨ̀ wu è tsìꞋi àyea màndzia èntɨ̧ɨ̧ ane Yesò la à? A mbê ntsě ale! Àghɨa àa və la wu nê baa nɔ̀ŋà mbɨ̧ mbɨ̀Ꞌɨ̀ ba wu nɔ̀ŋè la.