Read Mundani Lûm 4 Bible Online

Lûm 4 - Mundani bible

Lûm 4

¹Bàà wu ane laꞋ nê ghàà? Nê Abàlàghâm wu tà wû tǎt nyaꞋ bòt ba la li ndze ànəê yaa zìambɔŋ naa?

²Mbɔ̧ɔ̧mà li ngɨ̀ ale ngua nɨa Abàlàghâm mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, nkàà àfaꞋa ntsɔ̧̀ atò, ko tà li mbɔ̀ lə tàa me wu̧u̧ nkùꞋ zi la, ka tà kà wu ko ghɨ̀ ale, a mbì Mbɔ̧ɔ̧mà.

³Àkata Mbɔ̧ɔ̧mà, a laꞋnê, “Abàlàghâm li mbɨ̧̀ɨ̧̀ne ànəa Mbɔ̧ɔ̧mà shu la, Mbɔ̧ɔ̧mà nɨa atò mbɨ̀Ꞌɨ̀ wòt ta tɨ̧ɨ̧ ndɨŋndɨ̀ŋ a mbì li la.”

⁴Wòt fàꞋà àfàꞋ, bɔ ŋa èkab abua tò, è kà wu àghɨa àku bɔ ŋa abua tò la, è wu èkab àfàꞋ yu tà fàꞋà la.

⁵Ka wòt bakà wua ngɨ̀à èfàꞋ nkɨà àbȩ̀, mbɔ̂ ndzì èntɨ̧ɨ̧ vi ane Mbɔ̧ɔ̧mà wu betsiꞋa tà nɨ wòt mènəè kàbɔ̀ŋ mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, ko tàa nɨ atò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, nkàà èntɨ̧ɨ̧ wu ŋut zi ane tò la.

⁶Mbɨ̀Ꞌɨ̀ Fɔ̧̀ Dàbid li ndàꞋ azi mɨ̧̂ la nê, ntsɔ̧̀ wu wòt wu Mbɔ̧ɔ̧mà nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li, kà è wû àfaꞋa ntsɔ̧̀ ŋut ghɨ̀ la:

⁷“Ntsɔ̧̀ wu wòt wu Mbɔ̧ɔ̧mà waꞋa kàbɔ̀ŋ tò, mè nkàbte èbɨꞋte mènəè kàbɔ̀ŋ ègème tà ghɨ̀ la.

⁸Ntsɔ̧̀ mè ngu wòt wu Mbɔ̧ɔ̧mà nàa ka nɔ̀ŋa kèmpà̧ mènəè kàbɔ̀ŋ tò la.”

⁹Ntsɔ̧̀ waa nàa anè ngu wuê abua bòt bɔ naŋe awɔb la, kò abua bòt bu kà bɔ naŋe awɔb la mɨ̧̂ à? Ànəa ba shua la wu nê Mbɔ̧ɔ̧mà li nɨ Abàlàghâm mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, nkàà ndɨ̀ wu tà li ndzì èntɨ̧ɨ̧ vi ane Mbɔ̧ɔ̧mà la.

¹⁰È li ngu a ka àfɨ̀Ꞌ à? AfɨꞋa bɔ nàŋe atò mbɨ̀Ꞌɨ̀ wòt Mbɔ̧ɔ̧mà la, kò àfɨꞋa kà bɔ zìꞋì nàŋe atò à? È li ngu àfɨꞋa kà bɔ zìꞋì nàŋe atò.

¹¹Bɔ li ntsiꞋi nàŋe atò àfɨ̀Ꞌ à, mbɨ̀Ꞌɨ̀ àlȩê enɨ nyɨꞋte nê Mbɔ̧ɔ̧mà nɨ atò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la, nkàà nê tà li ndzì èntɨ̧ɨ̧ vi ane Mbɔ̧ɔ̧mà àfɨꞋa bɔ li bɔ̀ ka ziꞋì nàŋe atò la. A li ngu anè mbɨ̀Ꞌɨ̀ Abàlàghâm naa wu tǎt bòt bu bàgème bɔ zi mèntɨ̧ɨ̧ mɔb ane Mbɔ̧ɔ̧mà kà bɔ zìꞋì nàŋa awɔb, Mbɔ̧ɔ̧mà nɨ awɔb mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li la.

¹²Tà mè ngu tǎt bòt bu bɔ̀ɔ nàŋe awɔb la, kà wu bòt bu bɔ naŋe awɔb wuê a mànaŋe la. Bɔ̀ɔ̀ba wu bɔ zi mèntɨ̧ɨ̧ mɔb ane Mbɔ̧ɔ̧mà wuê mbɨ̀Ꞌɨ̀ tǎt nyaꞋ wa Abàlàghâm li ndzì vi ka bɔɔ li nàŋe atò la.

¹³Mbɔ̧ɔ̧mà li nkàꞋa Abàlàghâm nè wòt ègème bɔ̀ɔ̀ li bi atò àndǎ̧ tò la, nê ngɔ̀ŋ naa wu yɔb, mbɔ̂ ngɨ̀ mbɨ̀Ꞌɨ̀ tà shu la, ka tà kà wua ngɨ̀à nkàà nê Abàlàghâm li ngua nɔ̀ŋà mbɨ̧. Tà li ngɨ̀ ale nkàà nê Abàlàghâm li ndzì èntɨ̧ɨ̧ vi ane tò, Mbɔ̧ɔ̧mà nɨ atò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la.

¹⁴È wu bòt bu bɔ̀ɔ nɔ̀ŋà mbɨ̧ la, ka bɔ̀ɔ̀ bɔ àghɨa Mbɔ̧ɔ̧mà kàꞋ la, ko màndzia èntɨ̧ɨ̧ ane Mbɔ̧ɔ̧mà è tsìꞋi àku, àghɨa tà kàꞋà la è kà tsi ngu àghɨ.

¹⁵Wòt nàa ngɨ̀ tà ba ka ghɨ àghɨa mbɨ̧ kɨa la, ntsǒ Mbɔ̧ɔ̧mà nɔ̀ŋkè adù̧ tò, ka wòt kà wua mpààtà mbɨ̧ adzìꞋa kà mbɨ̧ wuê.

¹⁶Mbɔ̧ɔ̧mà li ngɨ̀ ale mbɨ̀Ꞌɨ̀ wòt zì èntɨ̧ɨ̧ vi ane Mbɔ̧ɔ̧mà ka tà bɔ̀ àghɨa tà li nkàꞋ la, mbɨ̀Ꞌɨ̀ mě nyɨꞋte nê tàa nɨa a ntsɔ̧̀ vi ka ŋa àghɨa tà kàꞋà la abua wòt ègème tà dzə àndǎ̧ Abàlàghâm la. Àyaa a ntsě wuê abua bòt bu bɔ̀ɔ nɔ̀ŋà mbɨ̧ la, a wu abua bòt bu bɔ zi mèntɨ̧ɨ̧ mɔb ane Mbɔ̧ɔ̧mà la mɨ̧̂, mbɨ̀Ꞌɨ̀ Abàlàghâm li ndzì è vi la. Abàlàghâm wu tǎt bòt Mbɔ̧ɔ̧mà bàgème,

¹⁷mbɨ̀Ꞌɨ̀ bɔ shɨ a èbem Àkata Mbɔ̧ɔ̧mà la nê, “Mâ ghɨ̀ awê nê àa wu tǎt èlaꞋ nyaŋ.” Ale, Abàlàghâm wu tǎt wa a mbì Mbɔ̧ɔ̧mà wu tàa njù̧ù̧me bèmpfəà mè ngɨ̀a èghɨ kà zìꞋì ngu e kɨꞋà ngua mbɨ̀Ꞌɨ̀ tà kàꞋà la.

¹⁸Abàlàghâm li ndzì èntɨ̧ɨ̧ vi ane Mbɔ̧ɔ̧mà me chɨ̀Ꞌɨ nê yea ghɨ̌ tsiꞋi tǎt èlaꞋ nyaŋ, kà ye àghɨa tà lɨ̀Ꞌɨ̀ àvi adù̧ la. Wuê mbɨ̀Ꞌɨ̀ Mbɔ̧ɔ̧mà yaŋe kàꞋa tò la nê, “Bòt àndà̧ àyê aa li taꞋa wua ndzà̧aã.”

¹⁹Tà li mbàte nko nê ye len tê ntsìꞋi mbɨ̀Ꞌɨ̀ mpfəà, nkàà ndɨ ye lu̧u̧ èngùꞋebȩ ènkɨ̀ la, mè mbàte nko nê Sàda wu yen, ka tà kà màkè àghɨa Mbɔ̧ɔ̧mà kàꞋà la.

²⁰Abàlàghâm lè kàꞋa bê màkè àghɨa Mbɔ̧ɔ̧mà kaꞋ nê yea ghɨ̀ la. Tà li ndzì èntɨ̧ɨ̧ vi ane Mbɔ̧ɔ̧mà ègème tè ŋa mènkɔ̀ŋke abua tò.

²¹Tà li mbê ndâ mbɨ̧̀ɨ̧̀ne nê, Mbɔ̧ɔ̧mà bɔ mètàŋ e ghɨ̀ àghɨa tà kàꞋa tò nê yea ghɨ̀ la.

²²Tà zi èntɨ̧ɨ̧ vi ane Mbɔ̧ɔ̧mà ale, Mbɔ̧ɔ̧mà nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la.

²³Mèngà̧ mu bɔ li shɨŋ nê, “Mbɔ̧ɔ̧mà li nɨa tò mbɨ̀Ꞌɨ̀ wòt tà tɨ̧ɨ̧ ndɨŋndɨ̀ŋ a mbì li la”, li è kà wu abua tò zìa ndziꞋne.

²⁴Bɔ li ngua shɨa abua ya mɨ̧̂, bàa wu bàa li tsiꞋi bòt bɔ̀ tɨ̧ɨ̧ ndɨŋndɨ̀ŋ e mbì Mbɔ̧ɔ̧mà ndɨ̀ wu bàa zì mèntɨ̧ɨ̧ ma ane tò wu tà yu̧u̧me a Tǎt wa Yesò wu

²⁵bɔ li ngɨ̀ tà pfə ane kàbɔ̀ŋ wa, tà mè njù̧ù̧me atò enɨ ghɨ̂ bàa tsiꞋi bòt bɔ tɨ̧ɨ̧ ndɨŋndɨ̀ŋ a mbì li la.