Read Mundani Lûm 5 Bible Online

Lûm 5 - Mundani bible

Lûm 5

¹Ndɨ̀ wu Mbɔ̧ɔ̧mà nɨ awa mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li nkàà ndɨ̀ wu baa zì mèntɨ̧ɨ̧ ma ane tò la, baa bɔ àlàŋkè nè Mbɔ̧ɔ̧mà nkàà àghɨa Yesò Klistò Lefɨ̀Ꞌ wa ghɨ ane ya la.

²Ndɨ̀ wu bàa zì mèntɨ̧ɨ̧ ma ane Yesò la, tà ghɨ̂ ba ye a ntsɔ̧̀ Mbɔ̧ɔ̧mà wu bàà wu a èbèm àfɨ̀Ꞌ yaa la. Ba wu ane mèngùꞋte nkàà nê bàa ko nê baa li wu ne Mbɔ̧ɔ̧mà a èbem ènɨ̧ tò.

³Baa mè ngùꞋtà àwa a èbem ngoꞋ ta nkàà nê ngoꞋte mbɔŋ tea ngɨ̀à baa kuula mèntɨ̧ɨ̧ ma;

⁴àkuula èntɨ̧ɨ̧ yaa a ghɨ̀ baa bɔ mààlà nàa mbɔ̀ a Mbɔ̧ɔ̧mà la; mààlà waa mè ngɨ̀ baa ko nê baa li wu ne Mbɔ̧ɔ̧mà.

⁵Mbɨ̀Ꞌɨ̀ baa ko ale la, baa ntsèa nchɨ̀Ꞌà àku, nkàà nê Fo Kèfə yu tà ŋa abua ya la è ghɨ̂ èkɔŋ tò e lu̧u̧ a mèntɨ̧ɨ̧ ma.

⁶È li ngu àfɨꞋa bàà bele ka bɔ ètɨŋe la, Yesò Klistò è kɨ̀Ꞌɨ̂ kwàꞋ àfɨ̀Ꞌ yu Mbɔ̧ɔ̧mà li nɔ̀ŋè la, mpfə ambo bòt kàbɔ̀ŋ.

⁷Wu ànəa kekweelè wòt nàa pfə ambo wòt tàa ndzèa tò nê tà tɨ̧ɨ̧ ndɨŋndɨ̀ŋ la, mbɔ̂ a teko betsiꞋa wòt pfəa ambo wòt ntsɔ̧̀.

⁸Ka Mbɔ̧ɔ̧mà nyɨꞋte èkɔŋ vi abua ya ndɨ̀ wu bà le bele bòt kàbɔ̀ŋ tà ghɨ̀ Yesò Klistò è pfə ambo ya la.

⁹Ndɨ̀ wu àlo̧ a Yesò Klistò a ghɨ̂ Mbɔ̧ɔ̧mà nɨ awa mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li la, baa lâ nko nê Yesò Klistò wu naa li ghɨ̌ baa peme ane ntsǒ Mbɔ̧ɔ̧mà.

¹⁰Baa li mbèle bɔmbù̧ Mbɔ̧ɔ̧mà, tà ghɨ̀ baa tsiꞋi ane àlàŋkè nè tò, nkàà èvə waã tò. Àyaa a wua mpàa nyɨ̀Ꞌta nê ndɨ̀ waa bàà tsiꞋi ane àlàŋkè nè tò la, taa li ghɨ̌ baa peme nkàà nê waã tò wu yu̧.

¹¹E ntsě wuê ndàꞋà àyùà, baa ngùꞋtà àwa mɨ̧̂ ndɨ̀ wu bàà tsiꞋi ne Mbɔ̧ɔ̧mà la, nkàà ndɨ Yesò Klistò Lefɨ̀Ꞌ wa ghɨ baa tsiꞋi ane àlàŋkè nè Mbɔ̧ɔ̧mà la.

¹²Kàbɔ̀ŋ lè kɨꞋɨ̀ a ngɔ̀ŋ nkàà wòt wemɔ̀Ꞌ, èvə e mè nkɨ̀Ꞌɨ̀ nkàà kàbɔ̀ŋ tò. Àyea a ghɨ̀ èvə e liꞋi waa waa nkàà ndɨ bòt bàgème e ghɨa kàbɔ̀ŋ la.

¹³Mbɔ̧ɔ̧mà li me laꞋ nê yea ŋa mbɨ̧ abua Musì, kàbɔ̀ŋ bê ndzaŋe wu a sitsǎꞋ, ka betsiꞋa bɔ̀ ka baãaã wòt nê tà ghɨa kàbɔ̀ŋ àdziꞋa kà mbɨ̧ wu.

¹⁴Bòt e li ngua mpfəèꞋta ebùꞋu ane Adàm eghǎ dzə ka wuê àfɨꞋa Mbɔ̧ɔ̧mà li ŋa mbɨ̧ abua Musì la. Bɔ li mpfəèꞋte fɔɔle ne bòt bu kàbɔ̀ŋ wɔb li è kà wu mbɨ̀Ꞌɨ̀ wu Adàm li ngɨ̀ la. Adàm li ngà ane abà ako ngu mbɨ̀Ꞌɨ̀ wòt wu nga ekɨꞋɨ la.

¹⁵Ka betsiꞋa bɔ̀ ka fɨꞋnè àghɨ yu Mbɔ̧ɔ̧mà nɨa ntsɔ̧̀ vi ngɨ̀ la ane àghɨ yu Adàm li ngɨ̀ a màmpaata mbɨ̧ la. Wòt wemɔ̀Ꞌ li ngɨa kàbɔ̀ŋ nɨ̀ èvə ekɨꞋɨ adù̧ wòt ègème, ka àghɨa Mbɔ̧ɔ̧mà ghɨ̀ la a taꞋa tsè àyaa. Mbɔ̧ɔ̧mà li ntsè ane wòt wemɔ̀Ꞌ, è wu Yesò Klistò la, nyɨ̀Ꞌte a ntsɔ̧̀ vi ànyaꞋne abua bòt bàgème àku.

¹⁶Àghɨa Mbɔ̧ɔ̧mà ghɨ ane ya àku la, à ka meè ngu mbɨ̀Ꞌɨ̀ àghɨa kàbɔ̀ŋ wòt wu wemɔ̀Ꞌ li ngɨ̀ la. Wòt wemɔ̀Ꞌ li ngɨ̀ a kàbɔ̀ŋ, è ghɨ̂ Mbɔ̧ɔ̧mà me saꞋa bòt nê bɔ ghɨ̂ a kàbɔ̀ŋ. Ka bèkàbɔ̀ŋ bu nyaŋ bòt e ghɨ̀ la, bê tsiꞋi ghɨ̌ Mbɔ̧ɔ̧mà ŋà àghɨa bòt e ghɨ̂ bɔ̀ ka wu bɔ la, àku abua yɔb, nɨ̀ awɔb mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì li la.

¹⁷È wu nê kàbɔ̀ŋ wòt wemɔ̀Ꞌ li ngɨ̀ èvə e kɨꞋɨ adù̧ wòt ègème, ko àghɨ yu wekǒ nè wòt li ngɨ̀ la, a tsè àyea mbɔŋ nyaŋ. Tà li ngɨ̀ nê bòt bu bàgème tà nyɨꞋte a ntsɔ̧̀ vi ànyaꞋne abua yɔb, bɔ mè ntsìꞋi mbɨ̀Ꞌɨ̀ bòt bɔ tɨ̧ɨ̧ ndɨŋndɨ̀ŋ a mbì tò la, è bɔ mèmpème kàlìà, me ntsè àghɨ àgème, nkàà àghɨa Yesò Klistò è ghɨ̀ la.

¹⁸Mbɨ̀Ꞌɨ̀ kàbɔ̀ŋ wòt wemɔ̀Ꞌ li nɔ̀ŋè ndɔ̀ Mbɔ̧ɔ̧mà àtsəa bòt bàgème la, wu wuê èlɨ ntsɔ̧̀ wu wòt wemɔ̀Ꞌ è ghɨ̀ la, è ghɨ̂ bòt bàgème e bɔ lu̧ e ghǎ tsààbà, e mě bɔ mèmpème kàlìà la.

¹⁹Wòt wemɔ̀Ꞌ li ntu̧u̧ e ghɨ̀ àghɨa Mbɔ̧ɔ̧mà shu la, a ghɨ̀ bòt nyaŋ e tsiꞋi bòt kàbɔ̀ŋ, wu wuê ndɨ wòt wemɔ̀Ꞌ tà li ngua ndzəèa Mbɔ̧ɔ̧mà la, li ngɨ̀ Mbɔ̧ɔ̧mà nɨ bòt nyaŋ ane bòt bɔ̂ tɨ̧ɨ̧ ndɨŋndɨ̀ŋ a mbì li la.

²⁰Mbɔ̧ɔ̧mà li ntsèke tè ŋǎ mbɨ̧ mbɨ̀Ꞌɨ̀ kàbɔ̀ŋ naa kwèꞋne, ka mbɨ̀Ꞌɨ̀ kàbɔ̀ŋ è kwèꞋnè la, ntsɔ̧̀ Mbɔ̧ɔ̧mà paa nkwèꞋne.

²¹Ale, mbɨ̀Ꞌɨ̀ kàbɔ̀ŋ èbɔ mètàŋ ngɨ̀ bòt e me pfəꞋte la, wu wuê ndɨ̀ ntsɔ̧̀ Mbɔ̧ɔ̧mà wu tà nyɨꞋtè abua bòt la, èbɔ mètàŋ mè ngu ghɨ̌ bòt aa tsiꞋi bòt bɔ tɨ̧ɨ̧ ndɨŋndɨ̀ŋ a mbì tò, mè mbɔ̀ mèmpème kàlìà, nkàà àghɨa Yesò Klistò Lefɨ̀Ꞌ wa ghɨ̀ la.